Soni di dee lesima hakisi
Naasë dee 70 bakama u Jesosi dee a bi manda go peleiki bi dë, di a seti di Ndeti Njanjan u Masa? De bi go disëën u?
An bi o bunu fuu ta pakisei taa dee 70 bakama u Jesosi bi go disëën, nasö taa Gadu an feni de u bunu, u di de an bi dë ku Jesosi di daka di a seti di Ndeti Njanjan u Masa. Di daka dë, Jesosi bi kë dë ku dee apösutu fëën.
Jesosi bi feni dee 12 apösutu fëën ku dee 70 bakama fëën tuu u bunu. A bi tei dee 12 womi aki a dee gaan hia bakama fëën dendu, hën a kai de apösutu (Luk. 6:12-16). A bi dë a Galilea di a bi „kai dee tuwalufu bakama fëën ko nëën”, hën „a manda de u de go ta lontu a dee peipei köndë ta konda da sëmbë taa Masa Gadu ta hopo di Njunjun Tii fëën. Nöö söseei tu de musu kula dee sikima ko bunu” (Luk. 9:1-6). Wan woto daka möön, di de bi dë a Judea, „hën Masa Jesosi kai sëbënteni u dee bakama fëën ko nëën. Nöö hën a manda de tu ku tu u de musu go a dee pikipiki köndë ku dee gaangaan köndë ka hënseei bi pakisei faa musu go” (Luk. 9:51; 10:1). Fuu taki ën, nöö Jesosi bi abi bakama a tookatooka pisiwata di bi ta lei woto sëmbë soni fëën.
A kan taa dee Dju dee bi ko toon bakama u Jesosi bi ta hoi di Pasika piizii hiniwan jaa ku dee sëmbë u de (Ëki. 12:6-11, 17-20). Di di daka di de bi o kii ën bi ta zuntu, hën Jesosi ku dee apösutu fëën go a Jelusalen. Ma an bi kai hii dee bakama fëën u Judea, Galilea, ku Pelea u de ko hoi di Pasika piizii makandi ku ën. A dë gbelingbelin u si taa Jesosi bi kë dë ku dee apösutu fëën wanwan a di pisiten dë. A bi piki de taa: „Wë mi bi hangi seei fu mi njan di daka aki ku unu e baa, ufö di juu dou fu mi tja di sitaafu di mi musu tjai.”—Luk. 22:15.
Na u sösö Jesosi bi du di soni dë. An bi o tei longi möön faa dëdë kuma „di Sikapu Mii u Gadu”, u di „hën wë Gadu manda faa ko paka fu dee hogi du fu hii libisëmbë” (Joh. 1:29). A bi o dëdë a Jelusalen, ka sëmbë bi guwenti u tja soni go tjuma da Gadu. Di dëdë u Jesosi bi o tja möön gaan bunu ko, möön di u di sikapu mii di dee Isaëli sëmbë bi ta njan u mëni di daka di Gadu bi puu de a katibo a Egepiti. Biga di dëdë u Jesosi bi o mbei hii libi sëmbë ko fii u zöndu ku dëdë (1 Kol. 5:7, 8.). Di dëdë u Jesosi bi o mbei dee tuwalufu apösutu fëën ko toon di goonsei u di Keesitu kemeente (Ef. 2:20-22). A bunu fuu sabi taa de mbei di peni u di njunjun Jelusalen „a tuwalufu gaan sitonu liba”. Nöö ’hiniwan u dee sitonu abi di në u wan u de tuwalufu apösutu u di Sikapu Mii sikifisikifi’ (Ako. 21:10-14). Awa, dee apösutu abi wan gaan wooko u du, u mbei dee soni dee Gadu abi a pakisei u du pasa tuutuu. U ta fusutan faandi mbei Jesosi bi kë u de dë makandi ku ën a di lasiti Pasika piizii dë, söseei a di njunjun soni di a bi o seti baka di dë: di Ndeti Njanjan u Masa.
Dee 70 bakama u Jesosi ku dee woto bakama fëën an bi dë makandi ku ën di ndeti dë. Ma tökuseei hii dee bakama u Jesosi dee ta hoi deseei nëën tuu bi o feni wini u di Ndeti Njanjan u Masa. Hii dee bakama u Jesosi dee bi o ko dë salufuwan tuu, bi o dë a di buka di Jesosi bi mbei ku dee apösutu fëën a di ndeti di a seti di Ndeti Njanjan u Masa. A bi piki de taa de o dë ku ën a di Könuköndë fëën.—Luk. 22:29, 30.