Faandi mbei feti an ta kaba möönsö?

ZÖNDU

Gadu bi mbei dee fosu gaansëmbë fuu, Adam ku Eva, kumafa hënseei dë (Kenesesi 1:27). Di soni aki kë taki taa de bi sa ta djeesi Gadu a dee fasi dee a abi. De bi sa ta libi fiifii ku wotowan, söseei de bi sa ta lobi wotowan (1 Kolenti 14:33; 1 Johanisi 4:8). Ma Adam ku Eva pasa Gadu buka hën de du zöndu. Fëën mbei hii u tuu ko abi zöndu, nöö u ta dëdë (Loomë 5:12). U di u abi zöndu mbei gaansë u dee soni dee u ta pakisei sa dë soni di an bunu. Di soni aki ta mbei sömëni sëmbë ta kë du hogi.​—Kenesesi 6:5; Maikusi 7:21, 22.

DEE TII U LIBISËMBË

Gadu an bi mbei u fuu ta tii useei. Di Bëibel ta taki taa: „Na wan libisëmbë seei di ta waka sa taki naasë a musu tuwë futu” (Jelemia 10:23). Di soni dë mbei dee tii u libisëmbë an sa puu feti ku hogidu a goonliba.

SAATAN KU DEE TAKU JEJE FËËN

Di Bëibel ta taki taa „hii dee oto sëmbë u di goonliba aki tuu dë a didibi basu” (1 Johanisi 5:19). Saatan Didibi da wan hogihati kiima (Johanisi 8:44). Hën ku dee woto taku jeje ta mbei dee köndë ta feti ku deseei, söseei de ta mbei sëmbë ta du hogi.​—Akoalimbo 12:9, 12.