WOTO 7
KANDA 15 Gafa di Womi Mii u Gadu!
Un wini i ta feni u di Jehovah ta da i paadon?
„Ju ta da sëmbë paadon tuutuu.”—PS. 130:4.
SONI DI WOO LUKU
Woo buta pakisei a wantu apaiti soni di Jehovah bi taki, di o heepi u fuu ko ta möön tei ën u bigi taa a ta da hiniwan fuu paadon.
1. Faandi mbei a ta taanga fii sabi andi libisëmbë kë taki te de piki i taa de da i paadon?
„MI DA I PAADON.” I ta böö seei fëëë sö te wan sëmbë piki i di soni dë, möönmöön te i sabi taa i taki wan soni, nasö i du wan soni di hati di sëmbë. Ma andi dee wöutu „Mi da i paadon” kë taki seei? A sa dë sö taa di sëmbë di i du soni ku ën kë fii fusutan taa ju ku ën dë mati jeti ö? Naa kandë a ta taki sö u lei taa an kë taki soni u di soni di pasa möön? A sa taanga fii sabi andi libisëmbë kë taki te de piki i taa de da i paadon.
2. Andi di Bëibel ta taki u di fasi fa Jehovah ta da sëmbë paadon? (Luku di pisi di ta taki u woto fanöudu soni tu.)
2 Di fasi fa Jehovah ta da sëmbë paadon, tooka ku di fasi fa u ta da u na u paadon. Jehovah ta da sëmbë paadon a wan apaiti fasi. Di psalöm sikifima bi taki taa: „Ju ta da sëmbë paadon tuutuu, sö taa sëmbë sa lesipeki i”a (Ps. 130:4). Awa, Jehovah hën a ta da sëmbë „paadon tuutuu”. Hën da di Sëmbë di ta heepi u fuu fusutan gbelingbelin andi a kë taki u da sëmbë paadon. So juu dee womi dee bi ta sikifi di Bëibel bi ta wooko ku wan Hebelejën wöutu di kë taki paadon, u lei unfa Jehovah ta da sëmbë paadon tjika. Ma nöiti sëmbë bi ta wooko ku di wöutu dë u lei fa libisëmbë ta da wotowan paadon.
3. Unfa di fasi fa Jehovah ta da sëmbë paadon tooka ku di fasi fa uu ta du ën? (Jesaaja 55:6, 7)
3 Te Jehovah da wan sëmbë paadon, nöö a ta feki di zöndu u di sëmbë puu fiaa, nöö hën ku ën ta ko dë bunu baka. Jehovah ta da sëmbë paadon ku hii hën hati, söseei a ta dë kabakaba u du ën.—Lesi Jesaaja 55:6, 7.
4. Unfa Jehovah ta heepi u fuu ko sabi andi dee wöutu ’da paadon’ kë taki tuutuu?
4 Ee Jehovah an ta da sëmbë paadon kumafa u zöndu libisëmbë ta du ën, nöö unfa seei u sa ko fusutan andi dee wöutu ’da paadon’ kë taki tuutuu? Jehovah ta konda wantu soni da u a di Wöutu fëën, u heepi u fuu ko fusutan di soni dë bumbuu. A di woto aki, woo taki u so u dee soni dë. De o heepi u fuu si unfa Jehovah ta puu dee zöndu fuu, nöö a toona da u pasi fuu ku ën ko dë mati baka. Di taki di woo taki u dee soni aki o heepi u fuu ko möön lobi di Tata fuu di lo’ sëmbë, söseei di lo’ u da sëmbë paadon.
JEHOVAH TA PUU DEE ZÖNDU FUU
5. Andi ta pasa te Jehovah da u paadon u dee zöndu fuu?
5 Di Bëibel lo’ u tei dee zöndu fuu maaka ku wanlö hebi lai di u ta tja. Könu Dafiti bi taki unfa dee zöndu fëën bi dë dëën. A bi taki taa: „Dee zöndu u mi dë seei gedjegedje te de ta pasa mi hedi. De dë kuma wan hebi lai da mi, di hebi da mi poi u mi tja” (Ps. 38:4). Ma Jehovah ta da sëmbë paadon te de tjali u dee zöndu di de du (Ps. 25:18; 32:5). Di Hebelejën wöutu di de puu ko „da paadon” kë taki „hopo tei” nasö „tja”. U sa si Jehovah kuma wan taanga womi, di ta hopo dee zöndu fuu puu a u ahömaun, nöö a tei de tja go.
„I da mi paadon” (Ps. 32:5)
6. Unfa Jehovah ta buta dee zöndu fuu go longi ku u tjika?
6 Di Bëibel ta taki wan woto soni u lei u unfa Jehovah ta buta dee zöndu fuu go longi ku u tjika. Psalöm 103:12 ta piki u taa: „Leti kumafa sonu kumutu longi ku sonu go, sö nöö a buta dee zöndu fuu longi ku u.” Te i kumutu a di së u sonu kumutu nango, nöö di möön longi kamian di i sa kisi da sonu go. Dee tu kamian aki an ta miti nöiti. Hën da ee fuu taki ën, nöö Jehovah ta buta de zöndu fuu go sö longi ku u möön fa u sa mëni seei. Di soni aki ta da u kötöhati seei, u di a ta heepi u fuu si taa Jehovah ta da u paadon tuutuu!
„Leti kumafa sonu kumutu longi ku sonu go” (Ps. 103:12)
7. Andi di Bëibel ta lei u taa Jehovah ta du ku dee zöndu fuu? (Mika 7:18, 19)
7 A dë sö taa Jehovah ta buta mëni a dee zöndu fuu jeti, hii fa a ta buta de go longi ku u ö? Wë nönö. Könu Esikia bi taki wan soni u Jehovah. A bi taki taa: „I vinde hii dee zöndu u mi tuwë go a i baka” (Jes. 38:9, 17). Di soni aki ta lei u taa te wan sëmbë ta tjali u dee zöndu dee a du, nöö Jehovah ta tei dee zöndu fëën vinde puu nëën fesi, nöö an ta luku de möön. U sa taki di soni di sikifi a di tëkisi aki a sö wan fasi tu: „I mbei [dee zöndu u mi] ko dë kuma ma bi du de seei.” Di Bëibel ta taki wan woto soni a Mika 7:18, 19 u heepi u fuu ko fusutan di soni aki möön bunu. (Lesi ën.) Di tëkisi aki ta piki u taa a dë kuma Jehovah ta tuwë dee zöndu fuu go a ze mindi dubuu piii. Na awooten, a bi o taanga da wan sëmbë faa toona feni wan soni di de tuwë go a ze mindi.
„I vinde hii dee zöndu u mi tuwë go a i baka” (Jes. 38:17)
„I tuwë dee zöndu fuu go a ze mindi dubuu piii” (Mik. 7:19)
8. Andi u lei a dee pisi dee u luku aki?
8 Di Bëibel ta lei u gbelingbelin taa te Jehovah da u paadon, nöö a ta hopo dee zöndu fuu puu a u liba, fu wa abi de u ta tja möön. Leti kuma Dafiti, useei sa taki taa „kölöku u dee sëmbë dee Gadu puu a bëë u di fa de bi poi ën wëti. Kölöku u de di Gadu an ta si dee hogi de bi du möön e. Kölöku u di sëmbë di Gadu an o mbei a paka u dee hogi dee a du möön” (Lom. 4:7, 8). Awa, di paadon dë da tuutuu paadon!
JEHOVAH TA FEKI DEE ZÖNDU FUU PUU
9. Andi Jehovah konda da u u heepi u fuu fusutan unfa a ta da sëmbë paadon tjika?
9 U di Jesosi paka di lusupaima da u, mbei Jehovah ta feki dee zöndu fuu puu te u ta tjali. Jehovah ta konda da u taa a ta wasi dee zöndu fuu, nöö a sawa de puu. Di soni dë ta mbei di sëmbë di du di zöndu ko limbo baka (Ps. 51:7; Jes. 4:4; Jel. 33:8). Jehovah seei ta taki taa: „Aluwasi dee zöndu fuunu bë kuma buuu, tökuseei de o ko weti faaan kuma ëisi. Aluwasi de bë kuma wan bë koosu, tökuseei de o ko dë kuma weti sikapu puuma” (Jes. 1:18). Te wan koosu mandja ku wan bë soni kuma buuu, nöö a ta taanga seei fii wasi ën ko limbo. Ma Jehovah ta lei u ku di soni di a taki dë, taa a sa wasi dee zöndu fuu puu sö tee taa de an o pena dë u si möön.
„Aluwasi dee zöndu fuunu bë kuma buuu, tökuseei de o ko weti faaan kuma ëisi” (Jes. 1:18)
10. Un woto soni Jehovah konda da u, u lei u unfa di paadon di a ta da sëmbë bigi tjika?
10 A di woto di pasa, u bi taki taa zöndu dë kuma paima (Mat. 6:12; Luk. 11:4). Hën da hiniwan pasi te u du wan zöndu, nöö a ta ko dë kuma u ko abi wan möön gaan paima u paka Jehovah. Na piki paima u abi nëën! Ma te Jehovah da u paadon, nöö a ta dë kuma a ta puu di paima di u abi nëën. Te a da u paadon u wan zöndu kaa, nöö an ta hakisi u fuu toona pakëën möön. Di soni di Jehovah konda da u aki ta da u taanga tuutuu. U sa taki taa u ta böö seei fëëë sö te Jehovah da u paadon!
„Da u paadon u dee zöndu fuu” (Mat. 6:12)
11. Andi di Bëibel kë taki te a ta taki ta Jehovah ta „feki dee zöndu fuu puu”? (Tjabukama 3:19)
11 Na puu nöö Jehovah ta puu dee paima fuu, nasö dee zöndu fuu, ma a ta feki de puu. (Lesi Tjabukama 3:19.) Boo taa i bi abi wan möni u paka wan sëmbë, hën di sëmbë kaabu ën sëkësëkë. Hii fa a dë sö, tökuseei a kan taa sëmbë o sa si di mëni di i bi musu paka jeti. Ma soni ta dë woto fasi te i feki wan soni puu. Fuu sa fusutan di soni aki, nöö a bunu fuu hoi a pakisei taa di pëni wata di sëmbë bi ta sikifi ku ën na awooten, bi sa feki hesihesi puu ku wata. Wan sëmbë bi sa tei wan munjanmunjan sipönsu, nöö a feki di sikifi puu. Hën da te de bi „feki” wan paima puu, nöö an bi ta dë u si na wan pikisö möön seei. Sëmbë an bi sa si andi bi sikifi dë möön. A ta ko dë kuma ja bi abi paima u paka wan daka. Wë u ta tei ën u bigi seei, u di u sabi taa na puu nöö Jehovah ta puu dee zöndu fuu, ma a ta feki de puu seei kaba këëë!—Ps. 51:9.
„Nöö a o feki dee zöndu fuunu puu” (Tjab. 3:19)
12. Andi u ta lei a di woto u di bundji di Jehovah taki aki?
12 Jehovah ta konda wan woto soni da u, u lei u unfa a ta feki dee zöndu fuu puu. A ta taki taa: „Mi o feki dee hogi dee i du puu, nöö mi o tapa dee zöndu fii ku wan bundji” (Jes 44:22). Te Jehovah da u paadon, nöö a ta dë kuma a ta tapa dee zöndu fuu ku wan bundji, sö taa u ku ën tuu an sa si de möön.
„Mi o tapa dee zöndu fii ku wan bundji” (Jes. 44:22)
13. Unfa u ta fii te Jehovah da u paadon u dee zöndu fuu?
13 Unfa u musu fusutan di soni di Jehovah taki u di bundji? Te Jehovah da u paadon u dee zöndu dee u du, nöö háti fuu an musu ta fon u u dee soni dë hedi möön. Jesosi dëdë paka u dee zöndu fuu kaa. Te Jehovah da u paadon u wan zöndu di u du, nöö a ta dë seei kuma nöiti u bi du sö wan zöndu. Sö Jehovah ta da u paadon te u ta tjali u dee zöndu fuu.
JEHOVAH TA HEEPI U FUU KU ËN SA DË MATI BAKA
Di da di Jehovah ta da sëmbë paadon ta mbei taa u ku ën sa dë mati (Luku palaklafu 14)
14. Faandi mbei u sa dë seiki taa Jehovah o da u paadon tuutuu? (Luku di tu.)
14 U di Jehovah ta da sëmbë paadon tuutuu, mbei u ku ën sa dë mati go dou. Di soni dë ta heepi u u háti fuu an ta fon u möön u wan soni di u bi du. An dë fuu ta fëëë taa Jehovah ta hoi u a bëë söndö fuu sabi, söseei taa a ta suku wan fasi faa sitaafu u. An o du di soni dë nöiti. Faandi mbei u sa futoou Jehovah te a ta taki taa a ta da u paadon? Jehovah bi piki di tjabukama de kai Jelemia taa: „Mi o da de paadon u dee hogi di de du, nöö ma o mëni dee zöndu u de möön” (Jel. 31:34). Di pisi u Gadu Wöutu dë Paulosu bi ta taki, di a bi taki taa: „Ma o mëni dee zöndu u de möön seei” (Heb. 8:12). Ma andi di soni dë kë taki seei?
„Ma o mëni dee zöndu u de möön” (Jel. 31:34)
15. Andi Jehovah kë taki, te a ta taki taa an ta mëni dee zöndu fuu möön?
15 Te di Bëibel ta taki u di wöutu „mëni”, nöö na hii juu a ta nama ku di pakisei di wan sëmbë ta pakisei wan soni. Ma a sa nama ku di hopo di wan sëmbë ta hopo du wan soni. Di hogiduma di de bi peka a wan posu a Jesosi bandja, bi hakisi Jesosi taa: „Jesosi o, mëni mi te i dë a di könuköndë fii e” (Luk. 23:42, 43). Wë a dë u si taa na hakisi nöö a bi ta hakisi Jesosi faa pakisei ën a di pisiten dë. Jesosi bi piki ën taa a bi o weki ën ko a libi baka. Hën da te Jehovah ta piki u taa an o mëni dee zöndu fuu möön, nöö a kë taki taa a da u paadon, söseei taa an o hopo du soni bakaten u sitaafu u u dee zöndu dë hedi.
16. Ku andi di Bëibel ta tei u maaka?
16 Di Bëibel ta taki wan woto soni tu u heepi u fuu ko fusutan unfa u ta ko dë bööböö tjika te Jehovah da u paadon. U di u dë zöndu libisëmbë di ta kë ta du soni di an bunu, mbei di Bëibel ta taki taa u dë „saafuma a hogidu basu”. Ma u di Jehovah ta da u paadon, mbei u ko dë kuma saafuma di „ko fii kumutu a hogilibi basu” (Lom. 6:17, 18; Ako. 1:5) Awa, di da di Jehovah ta da u paadon ta mbei u ta wai gaanfa seei, u di a ta mbei u fii taa u ko fii.
„Un ko fii kumutu a hogilibi basu” (Lom. 6:18)
17. Na un futu u ta ko bëtë te Jehovah da u paadon? (Jesaaja 53:5)
17 Lesi Jesaaja 53:5. U di u dë zöndu libisëmbë, mbei di Bëibel ta taki taa u dë kuma sëmbë di abi wan taku siki. Ma u di Jehovah mbei Jesosi ko paka di lusupaima da u, mbei a ko dë kuma u ko bëtë (1 Pet. 2:24). Te u du wan zöndu, nöö di lusupaima ta mbei taa u ku Jehovah sa ko dë gaan mati baka. Leti kumafa wan sëmbë di abi wan taku siki ta wai gaanfa seei te a ko bëtë, sö nöö useei ta wai te u ku Jehovah ko dë bunu baka, u di a da u paadon.
„Dee koti buka fëën mbei taa u ko bëtë” (Jes. 53:5)
UN WINI U TA FENI U DI JEHOVAH TA DA U PAADON?
18. Andi u lei a dee soni dee di Bëibel ta taki, u lei u unfa Jehovah ta da u paadon tjika? (Luku di pisi „Unfa Jehovah ta da u paadon?”)
18 Andi u lei a dee soni dee di Bëibel ta taki, u lei u unfa Jehovah ta da u paadon tjika? Wë u si taa te a da u paadon u wan soni, nöö an ta du ën hafuhafu, söseei an ta bia ko a di soni dë möön. Di soni aki ta mbei taa u ku di Tata fuu di dë a liba ala sa dë mati. U ta hoi a pakisei tu taa di paadon di Jehovah ta da u, da wan kado. A ta da u ën u di a lobi u, söseei u di a lo’ u da sëmbë soni, ma na bunu u bunu sö mbei a ta da u ën.—Lom. 3:24.
19. (a) Un soni u musu ta tei u bigi? (Loomë 4:8) (b) Andi woo luku a di woto di ta ko?
19 Lesi Loomë 4:8. U ta tei ën u bigi seei taa Jehovah ta da u paadon! (Ps. 130:4) Ma u musu du wan fanöudu soni ee u kë u Jehovah da u paadon. Jesosi bi taki taa: „Ee un ta hoi sëmbë a bëë u dee hogi de ta du unu, nöö unu Tata a liba ala o hoi unu a bëë tu e, u dee hogi dee un ta du” (Mat. 6:14, 15). Fëën mbei useei musu ta da sëmbë paadon kumafa Jehovah ta da sëmbë paadon. Ma unfa u sa du di soni dë? Wë woo si unfa u sa du ën a di woto di ta ko.
KANDA 46 Jehovah, u ta da i tangi
a Di pampia lolu di Gadu bi mbei sëmbë sikifi bigibigi a Hebelejëntöngö ta taki soni u di „da di Gadu ta da sëmbë paadon”. Di soni aki ta lei taa di fasi dë, da di wan kodo fasi fa wan sëmbë ta feni paadon tuutuu. Sömëni u dee Bëibel an ta tja di pisi dë ko a fesi, ma di Bijbel—Nyun-Grontapuvertaling hën a ta du ën. Nöö fëën mbei u sa taki taa a ta tja Psalöm 130:4 ko a fesi a wan soifi fasi.