Biibi taa Jehovah da i paadon

1-2. Unfa wan sëmbë di du wan zöndu sa fii bunu tjika, te a lei taa a ta tjali u di zöndu di a du? (Luku di peentje u di tu.)

KÖNU Dafiti bi sabi unfa a dë te háti ta fon wan sëmbë u di a bi du zöndu a di ten di pasa (Ps. 40:12; 51:3; di pisi di dë a bigi fëën). A mbei wantu gaangaan föutu nëën libi. Ma a bi lei taa a bi ta tjali u dee föutu fëën, nöö Jehovah bi dëën paadon (2 Sam. 12:13). Di soni dë bi mbei taa Dafiti bi ko fusutan unfa wan sëmbë ta fii bunu tjika, te Jehovah dëën paadon.​—Ps. 32:1.

² Useei sa ko fusutan unfa wan sëmbë ta fii bunu tjika, te Jehovah lei ën taa a abi tjalihati fëën, leti kuma Dafiti. Aluwasi ee u du wan gaan zöndu, tökuseei u sa feni kötöhati, u di u sabi taa Jehovah o da u paadon ee u ta tjali tuutuu u di zöndu fuu, ee u begi hakisi ën faa da u paadon, ee u fan ku dee gaanwomi, söseei ee u mbei hii möiti fu wa du di soni dë möön! (Nöng. 28:13; Tjab. 26:20; 1 Joh. 1:9) Boiti di dë, a ta da u kötöhati seei u di u sabi taa Jehovah ta da u paadon te dou, nöö a ta dë kuma nöiti seei u bi du di zöndu dë wan daka!​—Eze. 33:16.

3-4. Unfa wan sisa bi ta fii baka di a dopu, nöö andi woo luku a di woto aki?

³ So juu a sa taanga da so sëmbë u de biibi taa Jehovah da de paadon. Luku di woto u wan sisa de kai Jennifer, di de bi kiija a di tuutuu lei. Di a bi möön njönku, nöö a bi ta du soni di an bunu tjubitjubi. Sömëni jaa baka di dë, hën a bi tooka soni nëën libi. A bi buta hën libi a Jehovah maun, hën a dopu. A bi taki taa: „A di ten di pasa, mi bi ta si möni kuma di möön fanöudu soni, mi bi ta libi fanafiti a di së u manu ku mujëë soni, mi bi ta bebe ta dööngö, söseei mi bi abi taanga hatiboonu. Mi bi sabi taa di lusupaima u Jesosi bi mbei mi ko limbo, u di mi bi begi hakisi Jehovah faa da mi paadon, söseei u di mi bi lei taa mi ta tjali u dee zöndu dee mi bi du. Ma hati u mi bi ta mbei mi bi ta fii kuma Jehovah an da mi paadon.”

⁴ A ta taanga da i so juu fii biibi taa Jehovah da i paadon u dee föutu dee i bi mbei a di ten di pasa u? Jehovah kë fuu dë seiki taa a abi tjalihati fuu, leti kumafa Dafiti bi dë seiki fëën. A di woto aki, woo luku faandi mbei a dë fanöudu fuu biibi taa Jehovah da u paadon, söseei woo luku andi sa heepi u fuu biibi di soni dë.

FAANDI MBEI A DË FANÖUDU FUU BIIBI TAA JEHOVAH DA U PAADON?

5. Andi Saatan kë fuu biibi? Konda wan woto.

⁵ Te u biibi taa Jehovah da u paadon, nöö Saatan an o feni u kisi ku wan u dee taapu fëën. Hoi a pakisei taa Saatan o du hii soni di sa du, u tapa u fu wa dini Jehovah möön. Faa sa du di soni aki, nöö a sa suku u mbei u ko ta biibi taa wa sa feni paadon u dee zöndu fuu. Luku di woto u di womi u di foto Kolenti, di de bi puu a di kemeente, u di a bi libi fanafiti libi a di së u manu ku mujëë soni (1 Kol. 5:1, 5, 13). Di a bi ko tjali bakaten u di soni di a bi du, nöö Saatan an bi kë u dee sëmbë u di kemeente dëën paadon, söseei an bi kë u de toona tei ën a di kemeente baka. Hii fa di womi aki bi ta tjali u di soni di a bi du, tökuseei Saatan bi kë faa fii kuma an bi o sa feni paadon nöiti. A bi kë faa ’dë ku tjali sö tee taa a lasi hati’, nöö a disa u dini Jehovah. Saatan an tooka di soni di a kë, söseei an tooka di fasi fa a ta du soni. Ma „u sabi andi dë nëën hati, taa a sai dë ta boi köni faa kisi u”.​—2 Kol. 2:5-11.

6. Andi sa heepi u u háti fuu an ta fon u möön?

⁶ Te u biibi taa Jehovah da u paadon, nöö háti fuu an o ta fon u möön. Te u du wan zöndu, nöö háti fuu lo’ u fon u (Ps. 51:17). Di soni dë da wan bunu soni. Te háti fuu ta fon u, nöö di soni dë sa heepi u fuu bia du soni woto fasi (2 Kol. 7:10, 11). Ma ee u ta mbei háti fuu ta fon u nango nöömö, hii fa u bi lei taa u ta tjali u di zöndu di u du, nöö a sa pasa taa u disa u dini Jehovah. Te u biibi taa Jehovah da u paadon, nöö wa o da háti fuu pasi faa fon u möön. Di soni dë o mbei taa woo sa dini ën ku piizii, söseei ku wan limbo háti, kumafa a kë fuu dini ën (Kol. 1:10, 11; 2 Tim. 1:3). Ma nöö unfa u sa ko ta biibi taa Jehovah da u paadon?

ANDI SA HEEPI U FUU BIIBI TAA JEHOVAH DA U PAADON?

7-8. Unfa Jehovah bi piki Mosesi taa a dë, nöö fuun soni u sa dë seiki? (Ëkisodesi 34:6, 7)

⁷ Buta pakisei a di fasi fa Jehovah seei piki u taa a dë. Luku andi Jehovah bi piki Mosesi a di kuun de kai Sinai.a (Lesi Ëkisodesi 34:6, 7.) Jehovah bi sa taki sömëni soni u dee fasi dee a abi, söseei u di fasi fa a ta du soni. Ma a bi kë fuu ko sabi taa a dë „wan Gadu di abi tjalihati u sëmbë, söseei di ta fii da sëmbë”. A sa dë taa sö wan Gadu an o kë da wan dinima fëën paadon, hii fa a bi lei taa a ta tjali u di zöndu di a du ö? Na seei! Di soni dë bi o mbei a dë kuma Jehovah an abi tjalihati u sëmbë, söseei taa an ta fii da sëmbë. Ma nöiti Jehovah o dë sö.

⁸ U sa dë seiki taa nöiti Jehovah o ganjan u taa a dë wan sëmbë di an dë, u di a dë wan Gadu di ta taki soni kumafa a dë (Ps. 31:5). Fëën mbei u sa biibi dee soni dee a ta taki. Ee háti fii ta fon i jeti u soni di i bi du a di ten di pasa, nöö i sa hakisi iseei dee soni aki: ’Mi ta biibi tuutuu taa Jehovah abi tjalihati u sëmbë, taa a ta fii da sëmbë, söseei taa nöiti a o sa dë nöö an da wan sëmbë paadon ee di sëmbë lei taa a ta tjali u di zöndu fëën u? Wë nöö ee a dë sö, nöö ma musu biibi taa a da mi paadon tuutuu nö?’

9. Andi a kë taki taa Gadu da u paadon u dee zöndu fuu? (Psalöm 32:5)

⁹ Kai pakisei a di soni di Jehovah bi mbei dee womi dee sikifi di Bëibel taki, u di da di a ta da sëmbë paadon. Luku andi Dafiti bi taki u di da di Jehovah ta da sëmbë paadon. (Lesi Psalöm 32:5.) Dafiti bi taki taa: „I da mi paadon u dee föutu ku dee zöndu u mi.” Di Hebelejën wöutu di de puu ko „da paadon” sa kë taki „hopo tei”, „tei tja go”, nasö „tja”. Di Jehovah bi da Dafiti paadon, nöö a bi dë kuma a bi hopo dee zöndu fëën tei, hën a tja de go. Baka di dë, Dafiti bi böö seei fëëë sö, u di Jehovah bi tei di hebi soni di a bi ta tja puu nëën (Ps. 32:2-4). Sö nöö useei sa feni böö tu. Te u lei taa u ta tjali tuutuu u dee föutu dee u bi mbei, nöö wa musu da háti fuu pasi faa fon u u dee zöndu dë hedi möön, u di Jehovah hopo di hebi soni di u bi ta tja dë puu a u kaa, hën a tjëën go.

10-11. Andi dee wöutu „dë kabakaba u da sëmbë paadon” ta lei u u Jehovah? (Psalöm 86:5)

¹⁰ Lesi Psalöm 86:5. Dafiti ta taki a di tëkisi aki taa Jehovah ta „dë kabakaba u da sëmbë paadon”. Wan buku di ta taki soni u Bëibel, bi taki u Jehovah taa: „[A] dë ’wan sëmbë di ta da sëmbë paadon’. Sö seei ’a dë kaa’.” Faandi mbei Jehovah dë sö? Di woto pisi u di tëkisi ta taki taa: „Hii sëmbë di ta bai kai i, i ta lei taa i abi bunuhati u de pasa maaka.” Kumafa u bi si a di woto di pasa, nöö di bunuhati u Jehovah ta mbei taa a ta abi wan taanga lobi di an ta kaba möönsö, da dee dinima fëën dee ta hoi deseei nëën. Fëën mbei ee de du wan zöndu, hën de lei taa de ta tjali u di zöndu di de du, nöö a o dë kabakaba u da de paadon (Jes. 55:7). Ee a ta taanga da i fii biibi taa Gadu da i paadon, nöö i sa hakisi iseei dee soni aki: ’Mi ta biibi taa Jehovah da wan sëmbë di ta da sëmbë paadon u? Mi ta biibi taa a ta dë kabakaba u da hii dee sëmbë dee ta bai ta hakisi ën faa abi tjalihati u de paadon u? Wë nöö ee sö a dë, nöö ma musu biibi taa a da mi paadon u di mi bi bai suku heepi nëën nö?’

¹¹ U sa feni kötöhati, u di u sabi taa Jehovah ta fusutan tuutuu unfa u dë zöndu libisëmbë tjika (Ps. 139:1, 2). Boo luku wan woto soni di Dafiti bi taki a di buku Psalöm, söseei boo luku unfa di soni dë sa heepi u fuu biibi taa Jehovah da u paadon.

NA FËËKËTË TAA WAN SONI DË DI JEHOVAH TA HOI A PAKISEI

12-13. Andi fuu Jehovah ta hoi a pakisei, nöö andi di soni aki ta mbei a du, te u luku Psalöm 103:14?

¹² Lesi Psalöm 103:14. Dafiti bi taki taa Jehovah „ta hoi a pakisei taa ku doti u mbei”. Di soni di Dafiti bi taki aki, da wan u dee soni di ta lei faandi mbei Jehovah ta dë kabakaba u da dee dinima fëën paadon, te de lei taa de ta tjali u dee zöndu u de: A ta fusutan taa u da zöndu libisëmbë. Fuu sa fusutan di soni aki, nöö boo buta pakisei möön bunu a di soni di Dafiti bi taki.

¹³ Dafiti bi taki taa Jehovah „sabi bumbuu ku andi u mbei”. A bi „tei di goondoti”, hën a mbei Adam. Nöö a sabi taa libisëmbë di na abi zöndu seei, abi soni di de an sa du. De an sa libi söndö njan, söndö duumi, söseei söndö hai böö (Ken. 2:7). Ma di Adam ku Eva du zöndu, nöö wa bi dë doti möön nöö a kaba, ma soni bi ko dë wan hii woto fasi da u. U di u dë bakamii u de, mbei useei ko abi zöndu, nöö di soni dë ta mbei taa u ta kë ta du soni di an bunu. Na sabi nöö Jehovah sabi taa u da zöndu libisëmbë, ma a ’ta hoi ën a pakisei’ tu, leti kumafa Dafiti bi taki. Di Hebelejën wöutu di de wooko ku ën aki, sa kë taki „hopo du wan bunu soni”. A dë kuma Dafiti bi ta taki taa: Jehovah ta fusutan taa woo ta mbei föutu so juu, nöö te a si taa u ta tjali tuutuu u di föutu di u mbei, nöö a ta lei taa a abi tjalihati fuu, nöö a ta da u paadon.​—Ps. 78:38, 39.

14. (a) Un woto soni Dafiti bi taki u di fasi fa Jehovah ta da u paadon? (Psalöm 103:12) (b) Unfa di woto u Dafiti ta lei taa Jehovah ta da sëmbë paadon te dou? (Luku di pisi „Jehovah ta da u paadon, nöö an ta toona mëni dee zöndu fuu möön”.)

¹⁴ Un woto soni sa heepi u fuu dë seiki taa Jehovah da u paadon? (Lesi Psalöm 103:12.) Dafiti bi taki taa te Jehovah da u paadon, nöö a ta buta dee zöndu fuu go longi ku u, „leti kumafa sonu kumutu longi ku sonu go”. Fuu taki ën, nöö sonu kumutu longi seei ku sonu go. Andi di soni aki ta lei u u di da di Jehovah ta da sëmbë paadon? Wan buku di ta taki soni u Bëibel, bi taki taa Gadu ta buta di zöndu fuu go sö longi ku u, taa a ta ko dë kuma te de puu wan soni a wan kamian, sö taa di sumëë fëën an sai dë möön seei. So juu di sumëë u wan soni, sa mbei i toona mëni wan soni. Ma te Jehovah da u paadon, nöö a ta dë kuma na wan soni u di soni di u du ta fika a baka dë, u mbei a toona mëni di zöndu fuu, sö taa a sa kë sitaafu u fëën hedi.​—Eze. 18:21, 22; Tjab. 3:19.

15. Andi u sa du ee háti fuu ta fon u nango nöömö, u dee zöndu dee u bi du a di ten di pasa?

¹⁵ Unfa di soni di Dafiti bi taki a Psalöm 103 ta heepi u fuu biibi taa Jehovah da u paadon? Ee háti fuu ta fon u nango nöömö u dee zöndu dee u bi du a di ten di pasa, nöö u sa hakisi useei dee soni aki: ’Mi ta fëëkëtë taa Jehovah ta hoi a pakisei taa mi da wan zöndu libisëmbë, söseei taa a o da wan zöndu libisëmbë kuma mi paadon u? Mi ta buta pakisei jeti a dee zöndu dee a da mi paadon u de kaa, söseei dee an o toona mëni soni u de nöiti möön u?’ Jehovah an ta buta pakisei a dee zöndu dee u bi du a di ten di pasa, nöö useei an musu buta pakisei a de tu (Ps. 130:3). Te u biibi taa Jehovah da u paadon, nöö woo sa da useei paadon u dee föutu dee u bi mbei, nöö u dini ën go dou ku piizii.

16. Konda wan woto di ta lei andi sa pasa ee u ta buta pakisei nöömö a dee zöndu dee u bi du a di ten di pasa. (Luku di peentje tu.)

¹⁶ Buta pakisei a di woto aki: Te u ta buta pakisei nöömö a dee zöndu dee u bi du a di ten di pasa, nöö a dë kuma u ta pooba u lëi wan wagi, hii fa wa ta puu wojo a di sipei di ta heepi u fuu si go a baka. A ta bunu fuu ta tuwë wojo a di sipei dë wanwan pasi, u di a ta heepi u fuu si ee hogi o miti u. Ma ee u kë lëi go a fesi söndö u hogi miti u, nöö u musu ta buta pakisei ka u nango. Wë sö nöö a sa bunu ee wanwan pasi u ta toona buta pakisei a dee föutu dee u bi mbei a di ten di pasa. U sa lei wan soni a de, nöö di soni dë sa heepi u fu wa toona mbei dee föutu dë möön. Ma ee wa ta puu pakisei möönsö a dee föutu dee u bi mbei, nöö u sa lasi hati, nöö di soni dë sa tapa u fu wa dini Jehovah möön kumafa u bi o kë. A bi o möön bunu fuu ta buta pakisei ka u nango. U dë a di pasi di ta tja sëmbë go a di njunjun goonliba di Gadu paamusi u, ka ’sëmbë an o ta mëni dee hogi soni u fesiten möön’.​—Jes. 65:17; Nöng. 4:25.

MBEI MÖITI GO DOU FII KO TA BIIBI TAA JEHOVAH DA I PAADON

17. Faandi mbei a dë fanöudu fuu ta mbei möiti go dou fuu sa biibi taa Jehovah lobi u, söseei taa a da u paadon?

¹⁷ A dë fanöudu fuu ta mbei möiti fuu sa biibi taa Jehovah lobi u, söseei taa a da u paadon (1 Joh. 3:19). Faandi mbei? Wë u di Saatan o ta mbei möiti nöömö u mbei u ko ta si kuma wa fiti u Jehovah lobi u, söseei faa da u paadon. Aluwasi andi a ta du, di soni di a kë an ta tooka: A kë tapa u fu wa dini Jehovah möön. U sa dë ku di mëni taa Saatan o mbei möön taanga möiti u tapa u, u di a sabi taa an abi hia ten möön (Ako. 12:12). Wa musu mbei a wini u!

18. Andi i sa du fii ko ta möön biibi taa Jehovah lobi i, söseei taa a da i paadon?

¹⁸ Fii sa ko dë seiki taa Jehovah lobi i, nöö a bunu fii du dee soni dee u bi taki a di woto di pasa. Fii sa ko ta möön biibi taa Jehovah da i paadon, nöö a bunu fii buta pakisei a di fasi fa Jehovah konda da u taa a dë. Kai pakisei a dee soni dee a mbei sëmbë sikifi buta a Bëibel, u lei u unfa a ta da sëmbë paadon tjika. Na fëëkëtë taa a sabi taa i da zöndu libisëmbë, nöö a o lei i taa a abi tjalihati fii. Boiti di dë, hoi a pakisei taa te a da wan sëmbë paadon, nöö a ta du ën ku hii hën hati. Te i du sö kaa, nöö iseei o sa taki di soni Dafiti bi taki, u di a bi dë seiki taa Jehovah abi tjalihati u sëmbë. Joo sa taki taa: „Gaantangi fii Jehovah, u di i da mi paadon ’u dee föutu ku dee zöndu u mi’!”​—Ps. 32:5.