Djeesi Jehovah ku Jesosi a di fasi fa de ta si soni

1-2. Andi di lobi di u lobi Jehovah kë taki, nöö unfa Jesosi bi lei taa a lobi Jehovah ku hii hën pakisei?

„I MUSU lobi Masa Gadu ku hii i hati, ku hii i libi, ku hii i taanga, ku hii pakisei fii” (Luk. 10:27). Jesosi bi taki limbolimbo taa di soni dë da di möön fanöudu soni a di Wëti u Mosesi. Hoi a pakisei taa di lobi di u lobi Jehovah ta kumutu a u hati. Di soni dë kë taki taa u ta lei taa u lobi Jehovah ku dee soni dee u ta kë, ku di fasi fa u ta fii, söseei ku hii u libi, ku hii u kaakiti. Boiti di dë, u ta lei taa u lobi ën ku di fasi fa u ta pakisei, nasö ku di fasi fa u ta si soni. Tuu taa wa sa kaba fusutan limbolimbo unfa Jehovah ta pakisei. Ma u sa ko fusutëën möön bunu te u ta mbei möiti u ko sabi di fasi fa Jesosi bi ta si soni, u di Jesosi ta si soni kumafa hën Tata ta si soni.​—1 Kol. 2:16.

² Jesosi bi lobi Jehovah ku hii hën pakisei. A bi sabi andi Gadu bi kë faa du, nöö a bi dë kabakaba u du andi Jehovah bi kë, hii fa a bi sabi taa a bi o tja sitaafu u di a bi o ta du soni a wan leti fasi. A bi ta buta hii hën pakisei a di soni di Jehovah bi kë faa du, nöö an bi ta mbei na wan soni puu hën pakisei a di soni dë.

3. Andi apösutu Petuisi bi lei a Jesosi, nöö andi a da dee Keesitu sëmbë taanga u de du? (1 Petuisi 4:1)

³ Petuisi ku dee woto apösutu bi abi di gaandi u dë makandi ku Jesosi, söseei u ko sabi unfa a bi ta pakisei. Di Petuisi bi sikifi di fosu biifi fëën, hën a bi da dee Keesitu sëmbë taanga u de mbei möiti u de ta si soni kumafa Keesitu bi ta si soni. (Lesi 1 Petuisi 4:1.) Di Petuisi bi sikifi dee wöutu „unuseei musu dë kabakaba”, nöö a bi wooko ku wöutu di de bi lo’ u taki te wan sodati bi ta seeka dee fetilai fëën, faa bi sa dë kabakaba u go a feti. Awa, ee dee Keesitu sëmbë djeesi Jesosi a di fasi fa a bi ta pakisei, nöö de o dë seekaseeka u de sa finga futu da dee zöndu fii u de, ku di goonliba u Saatan aki.​—2 Kol. 10:3-5; Ef. 6:12.

4. Unfa di woto aki o heepi u fuu du soni kumafa Petuisi bi taki?

⁴ Woo luku fa Jesosi bi ta si soni sö taa u sa djeesi ën. Woo si unfa u sa djeesi Jehovah a di fasi fa a ta si soni, sö taa hii u tuu sa ko ta si soni a di seei fasi. Woo si tu unfa u sa ko abi sakafasi. Söseei woo si unfa di begi di woo ta begi suku heepi a Jehovah sa heepi u fuu sa du soni ku köni.

DJEESI JEHOVAH A DI FASI FA A TA SI SONI

5. Unfa Petuisi bi lei wan pasi taa an bi ta si soni kumafa Jehovah ta si soni?

⁵ Boo taki soni u wan dee pasi ka Petuisi an bi si soni kumafa Jehovah ta si soni. Jesosi bi piki dee apösutu fëën taa a bi o dë faa go a Jelusalen ka dee keiki fesima bi o kisi ën tja go da sitaafu, nöö te u kaba fëën de bi o kii ën (Mat. 16:21). Petuisi bi sabi taa Jesosi da di Mësiasi di bi o ko puu dee Isaëli sëmbë a fuka. Fëën mbei a bi taanga dëën u biibi taa Jehovah bi o disa di Womi Mii fëën u de kii ën (Mat. 16:16). Petuisi bi kai Jesosi tja go a wan së, hën a piki ën taa: „Masa, na taki dee lö soni dë e. Biga de an o sa pasa ku i seei, kwetikweti” (Mat. 16:22). Petuisi an bi ta si soni kumafa Jehovah ta si soni. Fëën mbei hën ku Jesosi an bi kai a wan a di soni dë.

6. Na un fasi Jesosi bi lei taa a bi ta si soni kumafa Jehovah ta si soni?

⁶ Di fasi fa Jesosi bi ta si soni bi ta kai ku di fasi fa di Tata fëën di dë a liba ala ta si soni. Jesosi bi piki Petuisi taa: „Waka pasa kumutu a mi fesi dë e, ju didibi Saatan. I dë kuma wan sitonu a pasi da mi u mi naki futu kai kumutu a di pasi Gadu buta da mi u mi waka. Biga fa i fan dë, nöö na Gadu da i di pakisei dë e. Libisëmbë pakisei nöö di dë” (Mat. 16:23). Jesosi bi sabi taa ee a bi kë du soni kumafa Jehovah kë, nöö a bi o dë faa tja sitaafu u te a dëdë. Fëën mbei an bi tei di soni di Petuisi bi piki ën, hii fa a bi djei kuma Petuisi bi kë heepi ën. Petuisi bi lei a di soni dë taa a bi musu mbei möiti u ta si soni kumafa Jehovah ta si soni. Di soni dë da wan gaan fanöudu soni di useei musu du tu.

7. Unfa Petuisi bi lei bakaten taa a bi kë ko ta si soni kumafa Jehovah ta si soni?

⁷ Bakaten, Petuisi bi lei taa a bi kë ko ta si soni kumafa Jehovah ta si soni. Di di ten bi dou u dee sëmbë dee an bi dë Dju ko dë sëmbë u Gadu, hën Petuisi bi abi di gaandi u peleiki da Konelisi. Di womi aki an bi dë wan Dju, nöö a bi o ko dë di fosu woto köndë sëmbë di ko dë Keesitu sëmbë. Dee Dju an bi ta kë hulu ku dee woto köndë sëmbë. Fëën mbei Petuisi bi musu tooka di fasi fa a ta si soni faa a bi sa peleiki da dee woto köndë sëmbë. Di Petuisi bi ko fusutan unfa Jehovah ta si dee woto köndë sëmbë, hën a bi tooka di fasi fa a bi ta pakisei. Fëën mbei di Konelisi manda kai ën faa ko nëën, hën Petuisi an bi „niinga” (Tjab. 10:28, 29). A bi peleiki da Konelisi ku hii dee sëmbë fëën wosudendu, hën de dopu.​—Tjab. 10:21-23, 34, 35, 44-48.

8. Unfa u sa lei taa u ta si soni kumafa Jehovah ta si soni? (1 Petuisi 3:8)

⁸ Sömëni jaa baka di dë, hën Petuisi bi da dee Keesitu sëmbë taanga u de „ta libi makandi ku wan hati”. (Lesi 1 Petuisi 3:8.) U dee sëmbë u Jehovah sa ta libi makandi ku wan hati te u ta djeesi Jehovah a di fasi fa a ta pakisei. Di fasi fa a ta pakisei dë u feni a di Wöutu fëën. Jesosi bi piki dee bakama fëën taa de musu mbei möiti u ta buta dee soni u di Könuköndë u Gadu a di fosu kamian a de libi (Mat. 6:33). Fëën mbei ee wan sëmbë u di kemeente ka u dë buta taa a o du di hii-ten diniwooko, nöö ka fuu piki ën faa du soni di an bi o mbei di libi taanga dëën sö, nöö u sa taki bumbuu soni u di soni di a kë du, söseei u sa buta taa woo heepi ën.

KO ABI SAKAFASI

9-10. Unfa Jesosi bi lei taa a bi abi sakafasi gaanfa seei?

⁹ A di ndeti ufö Jesosi dëdë, a bi lei Petuisi ku dee woto apösutu fëën u abi sakafasi. Jesosi bi manda Petuisi ku Johanisi u go seeka soni sö taa a bi sa njan di lasiti Ndeti Njanjan makandi ku de, ufö a dëdë. Wan u dee soni di de bi musu du, hën da de bi musu seeka wan bëki, ku wantu koosu, sö taa wan sëmbë bi sa wasi dee futu u dee sëmbë dee bi o ko, ufö de njan. Ma ambë bi o saka hënseei u wasi dee wotowan futu?

¹⁰ Jesosi an bi niinga u du di soni dë. A bi lei taa a abi sakafasi tuutuu. A bi bigi da dee apösutu u Jesosi seei, di de bi si fa a bi ta du wan soni di wan saafu bi guwenti u du. Jesosi bi puu dee liba koosu fëën, hën a tai wan koosu nëën mindi. Hën a buta wata a wan bëki, hën a bigi wasi de futu (Joh. 13:4, 5). A kan taa a bi tei pikisö ten u wasi hii dee 12 apösutu fëën futu, ma tökuseei a bi du ën. A bi wasi di futu u Judasi seei tu, di sëmbë di bi o sei ën bakaten. Baka di dë, hën a bi konda di soni aki da de ku pasensi. A bi taki taa: „Wë dee sëmbë o, di soni mi du aki, un saandi nö? Wë un haika e. Fa un dë aki, un ta kai mi ’Mësitë’ ku ’Masa’, nöö un a’ leti biga sö mi dë tuu. Wë nöö ee mi dë di Masa ku di Mësitë fuunu, nöö hën mi saka miseei sö te mi wasi futu fuunu, wë nöö unu wë? Na sö fuun du tu nö?”​—Joh. 13:12-14.

11. Unfa Petuisi bi lei taa a bi abi sakafasi? (1 Petuisi 5:5) (Luku di peentje tu.)

¹¹ Petuisi bi lei u ko abi sakafasi kuma Jesosi. Baka di Jesosi bi toona go a liba ala, hën Petuisi bi du wan foombo wooko, u di a bi kula wan womi di bi lan sensi di de pai ën (Tjab. 1:8, 9; 3:2, 6-8). Wanlö gaan hia sëmbë bi si di foombo soni di Petuisi bi du aki, hën de go nëën (Tjab. 3:11). Ma a bi dë sö taa di soni dë bi mbei a fii hënseei ö, möönmöön faa a bi dë taa a kiija a wan wosudendu ka sëmbë lobi nëbai ö? Wë nönö, Petuisi bi lei taa a bi abi sakafasi. A bi lei de taa Jehovah ku Jesosi de bi musu gafa. Fëën mbei a bi taki taa: ’Di kaakiti u [Jesosi] wë i si kula di sëmbë di bi lan aki’ (Tjab. 3:12-16). Dee wöutu dee Petuisi bi wooko ku de di a sikifi wan biifi manda da dee Keesitu sëmbë, u di fasi fa a dë fanöudu tjika u abi sakafasi, sa mbei u mëni di fasi fa Jesosi bi lolu di koosu nëën mindi di a bi ta wasi dee futu u dee Apösutu fëën.​—Lesi 1 Petuisi 5:5.

12. Unfa u sa djeesi Petuisi go dou a di fasi fa a bi ta lei taa a abi sakafasi?

¹² U sa djeesi Petuisi a di fasi fa a bi lei taa a ko abi sakafasi. Hoi a pakisei taa te u abi sakafasi tuutuu, nöö an o dë u si a dee soni dee u ta taki wanwan nöö. Di wöutu di Petuisi bi wooko ku ën di a bi ta taki u „sakafasi” bi nama ku di fasi fa u ta si useei ku wotowan. U ta heepi wotowan a soni u di u lobi Jehovah ku libisëmbë, na u di u kë sëmbë gafa u. U ta lei taa u abi sakafasi, te u ta mbei möiti ta dini Jehovah ta heepi wotowan go dou, aluwasi ee sëmbë an ta buta pakisei a di möiti di u ta mbei.​—Mat. 6:1-4.

„DU SONI KU KÖNI”

13. Konda andi a kë taki u ta „du soni ku köni”.

¹³ Andi a kë taki te wan sëmbë ta „du soni ku köni”? (1 Pet. 4:7) Wan Keesitu sëmbë di ta du soni ku köni ta luku unfa Jehovah ta pakisei, ufö a buta taa a o du wan soni. U ta hoi a pakisei taa na wan soni dë a di libi aki di dë fanöudu möön di dë di u ku Jehovah dë mati. Wa ta si kuma u sa’ hii soni. Ma u ta lei taa u ta futoou Jehovah te u ta begi suku heepi nëën.a

14. Unfa Petuisi bi lei wan pasi taa an bi futoou Jehovah?

¹⁴ A di lasiti ndeti ufö Jesosi dëdë, nöö a bi piki dee bakama fëën taa: ’Dee sëmbë o, a di ndeti i si aki seei nöö na wan fuunu o lei taa un abi biibi a mi möön e. Un tuu o go disa mi.’ Ma Petuisi bi mëni taa a bi taanga tjika, hën a piki taa: „Ambë, Masa! Aluwasi hii dee otowan aki tuu go disa i ma mi, aan juu seei di mi o disa i möönsö.” A di ndeti dë seei Jesosi bi fan ku wantu u dee bakama fëën taa: „Un dë ku wojo e, nöö un begi taanga” (Mat. 26:31, 33, 41). Ee Petuisi bi wooko ku di soni di Jesosi bi taki dë, nöö kandë a bi o abi degihati u piki taa hën da wan bakama u Jesosi. Ma a bi taki taa an sabi Jesosi, nöö bakaten di soni dë bi hati ën gaanfa seei.​—Mat. 26:69-75.

15. Unfa Jesosi bi du soni ku köni a di lasiti ndeti ufö a dëdë?

¹⁵ Jesosi bi ta futoou Jehovah te dou. Hii fa Jesosi bi dë söndö föutu, tökuseei a bi ta begi Jehovah hii juu. Di soni dë bi ta heepi ën faa bi ta du soni kumafa Jehovah kë (Mat. 26:39, 42, 44; Joh. 18:4, 5). Fuu taki ën, nöö Petuisi an bi fëëkëtë nöiti taa Jesosi bi begi sömëni pasi a di lasiti ndeti ufö a dëdë.

16. Unfa Petuisi bi lei taa a ko ta du soni ku köni? (1 Petuisi 4:7)

¹⁶ Bakaten Petuisi bi ko ta begi Jehovah möön gaanfa. Di Jesosi bi weki ko a libi baka, hën a bi piki Petuisi ku dee woto apösutu taa Gadu bi o da de di santa jeje fëën, sö taa de bi sa peleiki di bunu buka go dou. Ma Jesosi bi piki de u de wakiti a Jelusalen u te di soni dë pasa (Luk. 24:49; Tjab. 1:4, 5). Andi Petuisi bi du a di pisiten di a bi ta wakiti? Wë, hën ku dee woto Keesitu sëmbë bi dë „ta begi Gadu nöömö” (Tjab. 1:13, 14). A di fosu biifi u Petuisi, a bi da dee woto Keesitu sëmbë taanga u de ta du soni ku köni, söseei u de ta begi Jehovah nöömö. (Lesi 1 Petuisi 4:7.) Petuisi bi ko lei u futoou Jehovah, söseei a bi ta da dee baaa ku dee sisa fëën a di kemeente taanga.​—Gal. 2:9.

17. Andi u musu ta du hiniwan juu, aluwasi ee u sa’ u du so soni kaa? (Luku di peentje tu.)

¹⁷ Fuu sa ta du soni ku köni, nöö u musu ta begi Jehovah hii juu. U musu ta begi Jehovah faa heepi u, aluwasi ee u sabi taa u sa’ u du so soni kaa. U musu ta suku heepi a Jehovah, söseei u musu ta biibi taa a sabi andi möön bunu da u, möönmöön te u kë du wan fanöudu soni.

18. Unfa u sa mbei möiti fuu ko ta möön si soni kumafa Jehovah ta si soni?

¹⁸ U ta tei ën u bigi taa Jehovah mbei u a sö wan fasi taa u sa djeesi ën a dee fasi dee a abi (Ken. 1:26). Tuu taa wa sa djeesi Jehovah a dee fasi fëën te dou (Jes. 55:9). Ma u sa ta mbei möiti go dou, leti kuma Petuisi fuu sa ta möön si soni kumafa Jehovah ta si soni. Woo sa du di soni dë te u ta djeesi Jehovah go dou a di fasi fa a ta si soni, te u abi sakafasi, söseei te u ta du soni ku köni.