A bunu da u fuu ko zuntu ku u na u!

1-2. Andi da wan soni di dë fanöudu da Jehovah, nöö andi a kë fuu du?

SONI an hia di dë sö fanöudu da Jehovah kuma di fasi fa u ta libi ku wotowan. Jesosi bi taki taa u musu lobi di wotowan fuu kumafa u lobi useei (Mat. 22:37-39). Hën da u musu ta libi bunu tu ku dee sëmbë dee an ta biibi dee soni dee u ta biibi. Te u ta libi bunu ku de, nöö u ta djeesi Jehovah Gadu, u di „a ta mbei di sonu fëën ta jabi da dee bunu sëmbë ku dee hogiwan tuu. A ta mbei di tjuba fëën ta kai da dee sëmbë dee ta libi bunu nëën wojo ku dee an ta libi bunu nëën wojo tuu”.​—Mat. 5:45.

² Hii fa Jehovah lobi hii sëmbë, tökuseei a abi wan apaiti lobi da dee sëmbë dee ta libi bunu nëën wojo (Joh. 14:21). A kë fuu ta djeesi ën. A ta piki u fuu ta ’lobi’ dee baaa ku dee sisa fuu ’ku hii u hati’, söseei fuu ’ta fii’ da de (1 Pet. 4:8; Lom. 12:10). Di lö lobi ku di lö fii aki dë kuma di u ta abi da wan famii fuu di u lobi, nasö wan gaan mati fuu.

3. Andi u lobi u musu hoi a pakisei?

³ Lobi dë kuma wan folo. Ee u kë faa göö, nöö a dë fanöudu fuu ta luku ën, ta buta mëni nëën. Apösutu Paulosu bi piki dee Keesitu sëmbë taa: „Un musu ta lobi unuseei go dou kuma baaa ku baaa e” (Heb. 13:1). Jehovah kë fuu ta buta mëni go dou a di lobi di u abi da wotowan. Di woto aki o taki faandi mbei u musu ko möön zuntu ku dee baaa ku dee sisa fuu, söseei unfa u sa ta du di soni dë nango nöömö.

FAANDI MBEI U MUSU KO MÖÖN ZUNTU KU U NA U?

4. Unfa u sa ta kai di libi di u ta libi fiifii makandi u gaan soni go dou, te u luku Psalöm 133:1? (Luku dee peentje tu.)

⁴ Lesi Psalöm 133:1. U piki ku di soni di di psalöm sikifima bi taki, di a bi taa a „bunu”, söseei a „suti” te u dë mati ku dee sëmbë dee lobi Jehovah. Ma leti kumafa a sa pasa taa wan sëmbë an buta mëni a wan gaan pau di a ta si hii daka, sö nöö a sa pasa taa useei an buta mëni a di fa a waiti tjika taa u ta libi fiifii makandi ku dee baaa ku dee sisa fuu. U lo’ u si dee baaa ku dee sisa fuu. Kandë u ta si de sömëni pasi a di wiki dendu seei. Wë nöö unfa u sa ta kai de gaan soni go dou? Di lobi di u lobi dee baaa ku dee sisa fuu o ko möön taanga ee u ta tei ten pakisei fa de dë fanöudu da di kemeente tjika, söseei fa de dë fanöudu da u tjika.

5. Andi sa pasa te sëmbë si fa u ta lobi u na u?

⁵ A bi bigi seei da so sëmbë di bi ko a komakandi u di fosu pasi, di de bi si fa u ta lobi useei tjika. Di soni dë wanwan sa mbei taa de ko si taa de feni di tuutuu lei. Jesosi bi taki taa: „Biga te un ta lobi sö kaa, nöö hii sëmbë o si taa bakama u mi gbelin un dë e” (Joh. 13:35). Luku unfa soni bi dë da Chaithra, wan mujëë mii di bi nango a universiteit, di bi ta lei soni u Bëibel ku dee Jehovah Kotoigi. De bi kai ën faa go a wan könklësi, hën a go. Baka di a bi go a di fosu daka u di könklësi, hën a piki di sisa di bi ta lei ën soni u Bëibel taa: „Mi mama ku mi tata an baasa mi wan daka. Ma di mi go a di könklësi fuunu, hën hii 52 sëmbë baasa mi a wan kodo daka dendu! Mi bi fii taa Jehovah bi ta wooko ku dee sëmbë fëën, u mbei mi fii taa a lobi mi. Mi seei kë dë wan sëmbë fëën tu.” Chaithra bi go a fesi go dou, hën a dopu a di jaa 2024. Awa, te sëmbë si dee bunu wooko dee u ta du, te kisi di lobi di u ta lobi useei, nöö a lo’ u pasa taa de ta kë ko dini Jehovah tu.​—Mat. 5:16.

6. Unfa u ta feni tjubi, te u ta ko zuntu ku dee baaa ku dee sisa fuu?

⁶ U ta feni tjubi te u ta ko zuntu ku dee baaa ku dee sisa fuu. Paulosu bi piki dee woto Keesitu sëmbë taa: „Un musu ta da unuseei taanga go dou hibiwan daka, . . . be soni an ganjan unu tja go a hogi së te nöö wan ko a’ bisi ku Masa Gadu möön seei” (Heb. 3:13). Ee u ko ta fii bookosaka sö tee taa futu fuu bigi ta kumutu a di pasi u Jehovah, nöö Jehovah sa mbei wan woto dinima fëën di si andi ta pasa, ko heepi u (Ps. 73:2, 17, 23). Awa, di lö heepi dë bunu da u tuutuu.

7. Unfa lobi ku fiifii libi nama ku deseei? (Kolosën 3:13, 14)

⁷ U ta feni sömëni gaan bunu, u di u dë a wan famii di ta mbei hii möiti u ta lei de na de taa de lobi de na de (1 Joh. 4:11). Lobi ta mbei taa u ta „hoi pasensi da [useei]”, nöö di soni dë ta mbei taa u sa ta libi fiifii makandi ku useei. (Lesi Kolosën 3:13, 14; Ef. 4:2-6) Fëën mbei a ta dë wan gaan suti soni seei u dë a dee komakandi fuu, möön fa a ta dë a dee komakandi dee woto sëmbë ta hoi.

UN MUSU TA LESIPEKI UNU NA UNU

8. Unfa Jehovah ta heepi u fuu sa ta libi fiifii makandi ku useei?

⁸ Di libi di u ta libi fiifii makandi ku useei a hii së u goonliba da wan foombo soni. Jehovah hën ta mbei soni waka sö, hii fa u dë zöndu libisëmbë (1 Kol. 12:25). Di Bëibel ta taki taa ’Gadu seei lei u fa fu lobi useei makandi kuma baaa ku baaa’ (1 Tes. 4:9). Hën da Jehovah ta piki u finifini a di Wöutu fëën andi u musu du, fuu sa ta ko möön zuntu ku u na u. Gadu sa „lei u soni”, te u ta tei ten ta öndösuku dee soni dee a ta lei sëmbë, nöö u ta libi ku de (Heb. 4:12; Jak. 1:25). Nöö di soni dë dee Jehovah Kotoigi ta mbei möiti u ta du.

9. Andi u ta lei a Loomë 12:9-13 te a nama ku di lesipeki di u musu ta lesipeki u na u?

⁹ Unfa di Wöutu u Gadu ta heepi u fuu ta ko möön zuntu ku useei? Luku andi Paulosu bi taki u di soni dë, a Loomë 12:9-13. (Lesi ën.) Hoi a pakisei taa a bi taki taa „i fosu musu ta lei wotowan taa i ta lesipeki de”. Andi di soni dë kë taki? Wë a kë taki taa u musu ta suku okasi u lei wotowan taa u „ta fii” da de. Wantu fasi fa u sa du di soni dë, hën da te u ta da wotowan paadon, te u ta tei de ku wai a u wosu, söseei te u ta da de soni (Ef. 4:32). An dë fii ta wakiti u dee baaa ku dee sisa fii ko möön zuntu ku i. „I fosu” sa mbei di möiti dë. Nöö joo si andi Jesosi bi ta taki, di a bi taki taa: „Dee sëmbë dee ta da sëmbë soni, ta dë waiwai möön leki dee sëmbë dee ta feni.”​—Tjab. 20:35.

10. Unfa u sa dë wan sëmbë di ta wooko taanga, te u ’musu lei wotowan taa u ta lesipeki de’? (Luku di peentje tu.)

¹⁰ Di Paulosu da u taanga fuu fosu ta lei wotowan taa u ta lesipeki de, hën a toona taki wante taa ’wa musu malëngë, ma u musu ta wooko taanga’. Te de da wan sëmbë di ta wooko taanga wan wooko faa du, nöö a ta du ën bumbuu. Nöngö 3:27, 28 ta piki u taa: „I musu ta du bunu da dee sëmbë dee dë a fuka te i sa du ën.” Fëën mbei te u si taa wan sëmbë abi heepi fanöudu, nöö u ta du andi u sa du u heepi ën. Wa ta dë ta naanaa, söseei wa ta hoi taa wan woto sëmbë o du ën.​—1 Joh. 3:17, 18.

11. Andi sa heepi u fuu sa ko möön zuntu ku useei?

¹¹ Wan woto fasi fa u sa lei wotowan taa u ta lesipeki de, da te u ta dë kabakaba u da de paadon te de du wan soni ku u di hati u. Efeise 4:26 ta taki taa: „Sonu an musu go bifö hati fii kötö.” Faandi mbei a taki sö? Vers 27 ta taki taa ee soni waka sö, nöö woo ’da Didibi pasi faa buta u fuu du hogi’. Jehovah ta piki u sömëni pasi a di Wöutu fëën taa u musu ta da u na u paadon. Kolosën 3:13 ta piki u taa u musu ’ta da useei paadon ku hii u hati’. Wan u dee möön bunu fasi fa u sa ta ko zuntu ku wotowan, hën da te u ta da dee paadon te de mbei föutu. Te u ta du sö, nöö u ta heepi fuu sa ta ’dë ku wan hati kumafa di santa jeje u Masa Gadu buta u’ (Ef. 4:3). Hën da te u ta da wotowan paadon, nöö u sa ta libi fiifii makandi ku useei go dou.

12. Unfa Jehovah ta heepi u fuu sa ta da wotowan paadon?

¹² A dë sö tuu taa a sa taanga da u fuu da dee sëmbë dee du wan hati soni ku u paadon. Ma di santa jeje u Gadu sa heepi u fuu du ën. Di di Bëibel taki taa ’u musu ta lobi useei, ta fii da useei’, söseei taa ’u musu ta wooko taanga’, hën a taki go dou taa: „Be di santa jeje heepi unu fuun ta dë gaagaa.” Awa, hën da di santa jeje u Gadu sa heepi u fuu ta lobi useei, ta fii da useei, söseei fuu ta dë kabakaba u da useei paadon. Fëën mbei u ta begi Jehovah ku hii u hati faa heepi u.​—Luk. 11:13.

’BE WAN TA PAATI KU UNU NA UNU E’

13. Andi sa paati u?

¹³ Hii pei sëmbë dë a di kemeente (1 Tim. 2:3, 4). Fëën mbei u sa du soni a tookatooka fasi te a nama ku dee soni dee u ta bisi, di fasi fa u ta seeka useei, dee fasi u kula dee u lobi, ku dee soni dee u ta du u mbei piizii. Nöö ee wa köni, nöö u sa mbei dee soni aki paati u (Lom. 14:4; 1 Kol. 1:10). Ma u di ’Gadu seei lei u fa fuu ta lobi useei’, mbei u musu ta köni fu wa ta du kuma di fasi fa u ta du soni, bunu möön di u dee wotowan.​—Fil. 2:3.

14. Andi u musu ta mbei möiti fuu ta du hii juu, nöö faandi mbei u musu ta mbei di möiti dë?

¹⁴ U sa köni tu u soni an paati u a di kemeente, te u ta mbei möiti hii juu fuu ta du soni a wan fasi di ta da wotowan taanga (1 Tes. 5:11). Dee ten dee pasa aki, sömëni sëmbë di an bi ta ko a komakandi möön, söseei di de bi puu a di kemeente bi toona ko baka. U ta wai ku de seei! (2 Kol. 2:8) Luku fa soni bi waka da wan sisa di an bi ta ko a komakandi möön, baka di a bi toona ko a di Könuköndë zali. Teni jaa longi di sisa aki an bi ko a komakandi. A bi taki taa: „Hii sëmbë bi ta wai ku mi, ta da mi maun” (Tjab. 3:19). Unfa dee pikipiki soni dë bi mbei a fii? A bi taki taa: „Dee soni dë bi mbei mi fii taa Jehovah bi ta heepi mi u mi ko ta dë waiwai baka.” Te u ta du soni u ta da wotowan taanga, nöö Keesitu sa tei u fuu heepi dee sëmbë dee „dë fukafuka”, söseei dee ’ko wei u dee lai de ta tja’.​—Mat. 11:28, 29.

15. Andi da wan woto fasi fa u sa mbei taa fiifii libi dë a di kemeente? (Luku di peentje tu.)

¹⁵ Wan woto fasi fa u sa mbei taa fiifii libi dë a di kemeente, da ku dee soni dee u ta taki. Jöpu 12:11 ta taki taa: „Jesi ta jei soni nöö töngö ta tesi soni, na sö nö?” Leti kumafa wan sëmbë di ta boi soni ta tesi di soni fëën luku ee a suti ufö a da sëmbë ën u de njan, sö nöö a bunu fuu seei ta pakisei luku andi woo taki, ufö u taki wan soni (Ps. 141:3). U kë ta dë seiki hii juu taa dee soni dee woo taki o da wotowan taanga, taa de o mbei de fii bunu, söseei taa de o „sa heepi sëmbë tja de ko a fesi”.​—Ef. 4:29.

16. Ambë musu ta mbei möiti seei u ta taki soni di ta da wotowan taanga?

¹⁶ A dë fanöudu seei u dee womi dee tööu, ku dee sëmbë dee abi miii, ta mbei möiti u ta taki soni di ta da wotowan taanga (Kol. 3:19, 21; Tit. 2:4). Dee gaanwomi seei musu dë sëmbë di ta da wotowan taanga ku kötöhati, u di de ta luku dee sëmbë u Jehovah (Jes. 32:1, 2; Gal. 6:1). Wan nöngö di dë a Bëibel ta taki taa: „Wan soni di de taki a wan soifi ten, bunu seei!”​—Nöng. 15:23.

’A MUSU DË U SI A U LIBI TUUTUU TAA U LO’ SËMBË’

17. Andi u sa du u di lobi di u abi da dee baaa ku dee sisa fuu sa dë tuutuu lobi?

¹⁷ Apösutu Johanisi ta da u taanga fu ’wa musu ta lobi sëmbë ku buka wanwan, ma a musu dë u si a u libi tuutuu’ (1 Joh. 3:18). U kë u di lobi di u abi da dee baaa ku dee sisa fuu musu dë tuutuu lobi. Unfa u sa du di soni dë? Möön u ta dë makandi ku dee baaa ku dee sisa fuu, möön woo ta ko zuntu ku useei, nöö möön di lobi di u abi da useei o ta ko möön taanga. Fëën mbei a bunu fii ta suku fasi fii sa ta dë makandi ku wotowan. A sa dë a dee komakandi nasö a di peleikiwooko. Mbei möiti fii nango ta luku wotowan. Te u ta du dee soni aki, nöö u ta lei taa ’Gadu seei lei u fa fuu ta lobi useei’ (1 Tes. 4:9). A sö wan fasi, möönmöön woo ta si „fa a bunu, söseei fa a suti te baaa ku baaa ta libi makandi!”​—Ps. 133:1.