„I lobi mi möön dee disi ö?”

1, 2. Andi Petuisi bi lei, baka di ndeti di a bi dë ta kisi fisi?

WAN hii ndeti longi seibi u dee bakama u Jesosi bi go kisi fisi a di ze u Galilea. Ma de an bi kisi na wan fisi. Di didia jabi, hën Jesosi di bi weki kumutu a dëdë ko a libi baka, bi taanpu a di ze bandja ta luku de. ’Nöö hën a taki da de taa: Wë un sabi nö? Un hiti di nëti fuunu go a di letimaun së u di boto, nöö woon kisi. Nöö di de jei sö, nöö hën de puu di nëti a di së dë hiti go a di oto së. Nöö wantewante naandë hën de kisi fisi te a hila seei, tee de an sa hai di nëti ko a di boto dendu.’—Johanisi 21:1-6.

² Jesosi bi da dee bakama fëën bëëë ku fisi u de njan a di mamate dë. Hën a bia luku Simon Petuisi, hën hakisi ën taa: „Ju di mii u Jonasi aki, i lobi mi möön dee disi ö?” Jesosi bi sabi taa Petuisi bi lo’ u kisi fisi. Kandë Jesosi bi ta hakisi Petuisi ee a bi lobi ën, söseei ee a bi lobi dee soni dee a bi ta lei de, möön leki fa a bi lobi di fisi wooko fëën. Petuisi piki Jesosi taa: „Wë aai Masa, i seei sabi taa mi lobi i e” (Johanisi 21:15). Sensi di daka dë, hën Petuisi lei taa di soni di a bi taki bi dë sö tuu. A bi lei taa a lobi Keesitu, u di a bi ta du di peleikiwooko fajafaja, söseei a bi ko dë wan sëmbë di bi abi wan gaan faantiwöutu a di kemeente u Keesitu sëmbë.

3. Ku un soni Keesitu sëmbë musu ta köni?

³ Andi u sa lei a dee soni di Jesosi bi piki Petuisi? U musu ta köni be an ko pasa taa wa lobi Keesitu sö möön. Jesosi bi sabi taa di libi bi o ta taanga da u a di ten aki, söseei taa u bi o abi sömëni bookohedi, nöö sëmbë bi o ta du ku u tu. A di woto di Jesosi bi konda u di womi di bi ta paandi soni, a bi taki taa so sëmbë bi o haika „di buka u di Njunjun Tii u Gadu”, nöö bigibigi de bi o ko dë fajafaja a di dini u Gadu. Ma bakaten dee ’bookohedi a soni u di goonliba aki ku dee gudu u di goonliba aki bi o ganjan de’ u ’hai de a baka’, nöö dee sëmbë aki an bi o dë fajafaja möön (Mateosi 13:19-22; Maikusi 4:19). Ee wa ta köni ku di soni aki, nöö dee bookohedi dee u ta abi hiniwan daka sa mbei wa dë fajafaja a di dini u Jehovah möön. Fëën mbei Jesosi bi bai dee bakama fëën taa: „Dee sëmbë o, un mëni unu seei e, fu wan booko unu hedi ku dee sölugu u di goonliba aki ku dee jajo libi fëën, te nöö un fëëkëtë di Daka dë e. Wan musu ta sai dë ta dööngö ta poi ten te nöö di daka kisi unu söndö un mëni.”—Lukasi 21:34.

4. Andi o heepi u fuu sabi ee u lobi Keesitu gaanfa? (Luku di peentje a bigi u di woto.)

⁴ Leti kumafa Petuisi bi lei taa a lobi Keesitu, u di a bi ta buta di peleikiwooko a di fosu kamian nëën libi, sö nöö useei musu ta du ën tu. Andi u sa du fuu sa ta du di soni aki nöömö? U sa hakisi useei dee soni aki: ’Andi mi möön lobi u du? Di dini u Jehovah hën ta möön da mi piizii ö, naa woto soni?’ Fuu sa piki dee hakisi aki, nöö boo luku dii soni di sa mbei wa ko ta lobi Keesitu sö möön. Dee soni aki da wooko, piizii, ku gudu.

NA MBEI DI WOOKO FII DË DI MÖÖN FANÖUDU SONI A I LIBI

5. Un faantiwöutu dee hedima u dee wosudendu abi?

⁵ Na lobi nöö Petuisi bi lobi di fisi wooko di a bi ta du, ma a bi dë di wooko di a bi ta du faa sölugu dee sëmbë fëën. A di ten aki Jehovah da dee hedima u dee wosudendu di faantiwöutu u sölugu dee sëmbë u de wosudendu (1 Timoteo 5:8). De musu ta wooko taanga u du di soni aki. Ma a dee lasiti daka u di goonliba aki, di wooko di u ta du sa tja sömëni bookohedi ko da u.

6. Faandi mbei di wooko fuu sa ta da u bookohedi?

⁶ Sömëni sëmbë ta suku wooko, ma wooko an ta dë u feni. Fëën mbei sëmbë lo’ u fia ku deseei u feni wan wooko. Sömëni sëmbë ta si taa de musu wooko pasa juu, hii fa de an ta paka de hia möni. A di ten aki dee masikapei ta mbei möiti u du möön hia soni ku wantu wookoma nöö. Fëën mbei dee wookoma ta ko wei, nöö te u kaba fëën so u de ta siki. Sömëni u de ta fëëë taa de o puu de a wooko ee de an du andi di basi u de ta piki de.

7, 8. (a) Na ambë u ta möön hoi useei? (b) Un soni wan baaa u Tailand bi ko fusutan di nama ku di wooko di a bi ta du?

⁷ U kuma Keesitu sëmbë ta hoi useei a Jehovah möön leki hiniwan woto sëmbë, te kisi di basi fuu seei (Lukasi 10:27). U ta wooko fuu sa bai dee soni dee u abi fanöudu, söseei fuu sa ta du di diniwooko fuu. Ma ee wa luku bunu, nöö dee faantiwöutu dee u abi a di wooko fuu sa tapa u fu wa dini Jehovah kumafa u musu dini ën. U sa lei wan soni a di woto u wan baaa di ta libi a Tailand. A bi taki taa: „Di mbei di mi bi ta mbei computer bi dë wan wooko di mi bi lobi seei, ma mi bi musu ta wooko pasa juu. Te u kaba fëën ma bi ta abi ten u du soni di nama ku di biibi u mi. Mi bi ko si taa ee mi bi kë buta di Könuköndë a di fosu kamian a mi libi, nöö mi bi musu suku wan woto wooko.” Andi di baaa aki bi du?

⁸ A bi taki taa: „Baka di mi seeka soni wan jaa longi, hën mi bigi ta sei ice cream a sitaati. Bigibigi di wooko an bi nango sö, nöö mi bi ko lasi hati. Te mi bi miti dee sëmbë dee mi ku de bi ta wooko makandi, nöö de bi ta mbei mi fa ta hakisi mi faandi mbei mi si kuma di sei di mi ta sei ice cream a sitaati bunu möön di computer wooko di mi bi ta du a di kötö kantoo. Mi bi begi Jehovah, hën mi hakisi ën faa heepi mi u mi hoi dou, söseei u mi dou di maaka di mi bi kë dou u mi abi möön ten da soni di nama ku di biibi u mi. An bi tei longi möön, hën soni bi bigi nango möön bunu. Mi bi ko sa’ u mbei di ice cream a sö wan fasi taa sëmbë bi ko lobi ën. Te u kaba fëën, mi bi ta sei hii dee ice cream di mi bi mbei a wan daka dendu. Mi bi ko abi möön möni möön di mi bi ta mbei computer. Mi bi ta möön dë waiwai, u di ma bi abi dee bookohedi di mi bi abi a di wooko di mi bi ta du fosu. Nöö di möön fanöudu soni, hën da nöunöu mi ku Jehovah ko dë möön gaan mati.”—Lesi Mateosi 5:3, 6.

9. Andi u musu du fuu sa ta si di wooko di u ta du a wan soifi fasi hii juu?

⁹ Jehovah lobi te u ta wooko taanga. U ta feni wini te u ta wooko taanga tu (Nöngö 12:14). Ma u musu sölugu taa di wooko di u ta du an ko dë di möön fanöudu soni da u möön di dini di u ta dini Jehovah. Di Jesosi bi ta taki u dee soni dee u abi fanöudu, hën a bi taki taa: „Ma nöö a di fosu kamian un musu biinga fuun ta dë a di Tii u Masa Gadu dendu ta libi kumafa a kë, nöö hii dee soni u taki dë tuu woon feni” (Mateosi 6:33). Ma unfa u sa sabi ee u ta si di wooko di u ta du a wan soifi fasi? U sa hakisi useei di soni aki: ’Di wooko di mi ta du ta da mi piizii möön dee soni dee mi ta du u dini Gadu ö?’ Te u hakisi useei di soni aki, nöö a o heepi u fuu sabi andi u lobi tuutuu.

10. Un fanöudu soni Jesosi bi lei u?

¹⁰ Jesosi bi lei u andi u musu buta a di fosu kamian a di libi fuu. Wan daka, hën a bi go a Malia ku Maita pisi. Wantewante dë hën Maita bigi ta seeka soni u boi dëën, ma Malia bi go sindo a Jesosi bandja ta haika dee soni dee a bi ta lei de. Maita bi ta guunjan taa Malia an bi ta ko heepi ën. Hën Jesosi piki Maita taa: „Fa i si Malia ko sindo ta haika mi aki, nöö hën du di möön bunu soni, nöö ma o puu ën nëën” (Lukasi 10:38-42). Jesosi bi lei u wan fanöudu soni aki. Ee wa kë dee soni dee u abi fanöudu puu u pakisei a di dini u Gadu, söseei ee u kë lei Keesitu taa u lobi ën, nöö u musu „du di möön bunu soni”. Di soni aki kë taki taa hii juu di dë di u ku Jehovah dë mati musu dë di möön fanöudu soni a u libi.

DI FASI FA U TA SI PIIZII

11. Andi di Bëibel taki u di böö di u musu ta böö dendu?

¹¹ U di u ta abi sömëni soni ta du, mbei so juu a ta dë fanöudu fuu go böö dendu. A di Bëibel u ta lesi taa: „Di möön bunu soni di wan libisëmbë sa du, hën da faa njan, faa bebe, söseei faa piizii u di taanga wooko di a ta du” (Peleikima 2:24). Jesosi bi sabi taa dee bakama fëën bi musu ta böö tu. Wë, baka di de bi wooko taanga seei a di peleikiwooko, hën Jesosi piki de taa: „Un sabi nö? Un boo go a wan pii kamian u wanwan ka sëmbë an dë, fuu sa böö abiti sö.”—Maikusi 6:31, 32.

12. Konda faandi mbei u musu ta köni ku di piizii di u ta kë piizii.

¹² Di piizii di u ta mbei sa heepi u fuu böö dendu. Ma u musu ta köni be di piizii di u ta piizii an musu ko dë di möön fanöudu soni a u libi. Sömëni sëmbë fu awooten an bi du di soni aki. Fëën mbei de bi ta taki taa: „Un boo bia ta njan ta bebe ta libi kumafa u kë, biga amanjan te u dëdë nöö kaba u kaba” (1 Kolenti 15:32). Di wan seei soni dee sëmbë u di ten aki ta du. Wan njönku kijoo di ta libi a Europa bi bigi nango a dee komakandi. Ma a bi lo’ u mbei piizii tee taa an bi kë hulu dee Jehovah Kotoigi möön. Ma bakaten a ko si taa di soni aki bi tja sömëni fuka ko dëën. Hën a bigi ta lei soni u Bëibel baka, nöö an bi tei longi seei, hën a bigi ta peleiki. Baka di a tei dopu, hën a taki taa: „Di wan kodo soni di ta hati mi, hën da mi lasi sömëni ten ufö mi ko fusutan taa di dini u Jehovah ta mbei u möön piizii, möön di kule di u ta kule a dee piizii soni u di goonliba aki baka.”

13. (a) Konda wan woto di ta lei faandi mbei an bunu fuu ta tei hii di ten fuu u mbei piizii. (b) Andi sa heepi u fuu ta si piizii a wan soifi fasi?

¹³ Piizii musu heepi u fuu böö dendu, söseei fuu kisi kaakiti baka. Fëën mbei unfa u musu piizii tjika? Wë fuu sa piki di hakisi aki, nöö u sa pakisei di soni aki. Sömëni sëmbë lo’ u njan kuku. Ma u sabi taa ee u ta njan kuku hii juu, nöö a sa tja hogi ko da u. Ee u kë abi wan bunu gösöntu, nöö u musu ta njan soni di bunu da u sinkii. A di wan seei fasi ee u ta tei hii di ten fuu u mbei piizii, nöö a o mbei u ku Jehovah an dë mati möön. Andi sa heepi u fuu sabi ee u ta si piizii a wan soifi fasi? Wan soni di u sa du, hën da u sa tei wan wiki, nöö u sikifi dee juu dee u ta du soni di nama ku di dini u Jehovah. U sa sikifi dee juu dee u nango a komakandi, a peleikiwooko, ku dee juu dee u ta lei useei soni u Bëibel. Baka di dë, nöö u sa sikifi dee juu dee u ta tei u mbei piizii a di wan seei wiki dë. U sa sikifi dee juu dee u ta du sport, dee u ta luku teefei, ku dee juu dee u ta pëë game. Andi u ta ko si te u tei dee tu juu aki maaka ku deseei? U musu tooka soni a u libi ö?—Lesi Efeise 5:15, 16.

14. Andi sa heepi u fuu sabi un piizii u musu mbei?

¹⁴ Jehovah da u di okasi fuu taki un piizii woo mbei, nöö dee hedima u dee wosudendu seei musu luku un piizii dee sëmbë u de sa mbei tu. Jehovah da u mama wëti a di Bëibel fuu sa ko sabi unfa a ta pakisei. Dee mama wëti aki ta heepi u fuu du soni a wan bunu fasi.a (Luku di pisi a basu.) Piizii da wan „gaan bunu di Gadu” da u (Peleikima 3:12, 13). A dë sö tuu taa na hii sëmbë lo’ u mbei di wan seei piizii (Galasia 6:4, 5). Ma aluwasi un piizii woo mbei, tökuseei u musu ta köni. Jesosi bi taki taa: „Ka gudu fii dë, nöö naandë di hati fii ta dë tu” (Mateosi 6:21). Di lobi di u lobi di könu fuu Jesosi, ta mbei u pakisei soni, taki soni, nasö a ta mbei u du soni u lei taa di Könuköndë da di möön fanöudu soni a u libi.—Filipi 1:9, 10.

DI MÖITI DI U TA MBEI U NA FETI A GUDU BAKA

15, 16. (a) Unfa a sa ko pasa taa u go ta kule a gudu baka? (b) Un lai Jesosi bi da u di nama ku gudu?

¹⁵ Sömëni sëmbë u di ten aki ta si kuma de musu abi dee möön njunjun soni u bisi, njunjun tëlëfön, njunjun computer ku woto soni. De ko ta lobi gudu, hën da di si di wan sëmbë ta si möni ku dee soni u di goonliba aki, kuma di möön fanöudu soni. Andi i ta si kuma di möön fanöudu soni a i libi? Hakisi iseei di soni aki: ’Mi ta möön pakisei soni u dee möön njunjun wagi, ku dee möön njunjun soni u bisi, möön fa mi ta buta pakisei a di seeka di mi musu ta seeka miseei da dee komakandi ö? Mi ta dë ta du woto soni sö tee taa ma ta abi ten u begi, nasö u lesi di Bëibel ö? Ee wa luku bunu, nöö u sa ko möön lobi gudu, möön fa u lobi Keesitu. U musu pakisei dee soni dee Jesosi bi taki di a bi taki taa: „Un musu mëni unu seei fu wan abi langawojo a soni” (Lukasi 12:15). Faandi mbei a bi taki di soni aki?

¹⁶ Jesosi bi taki taa „na wan sëmbë sa dini tu masa makandi”. A bi taki tu taa: „Ja sa waka a Masa Gadu baka ku dee gudu u goonliba aki baka makandi e.” Wa o sa du hii soni di u kë du da Jehovah, nöö a di wan seei ten u ta kule a gudu baka. Jesosi bi taki taa „i musu fu lobi wan möön wan, nasö „joo hëngi a wan möön wan” (Mateosi 6:24). U di u da zöndu libisëmbë, mbei u musu ta mbei möiti fu wa „ta libi kumafa u kë”, söseei fu wa kule a gudu baka.—Efeise 2:3.

17. (a) Faandi mbei a ta taanga da so sëmbë u si dee gudu u di goonliba aki a wan soifi fasi? (b) Andi o heepi u fu wa kule a gudu baka?

¹⁷ Sömëni sëmbë ta möön buta pakisei a dee soni di de lobi, nöö fëën mbei a ta taanga da de u si gudu a wan soifi fasi. (Lesi 1 Kolenti 2:14.) U di dee sëmbë aki an ta pakisei bumbuu soni, mbei a sa taanga da de u sabi andi da bunu ku andi da hogi (Hebelejën 5:11-14). Möönmöön de o ta pakisei u ko abi gudu. Nöö möön de abi gudu, möön de ta kë abi gudu (Peleikima 5:10). Ma wan soni dë di u sa du fu wa ta pakisei gudu nöömö. Te u ta lesi di Bëibel hiniwan daka, nöö a o heepi u fu wa ta pakisei u ko abi möön gudu (1 Petuisi 2:2) Di pakisei di Jesosi bi ta pakisei fundu u di köni u Jehovah, bi heepi ën faa hoi hënseei a Jehovah di Didibi bi ko poobëën (Mateosi 4:8-10). Ee wa kë ko dë wan sëmbë di ta kule a gudu baka a di ten aki, nöö u musu ta du dee soni dee sikifi a di Wöutu u Gadu. A sö wan fasi Jesosi o si taa u lobi ën möön dee gudu u di goonliba aki.

18. Andi i dë kabakaba u du?

¹⁸ Di Jesosi bi hakisi Petuisi taa „I lobi mi möön dee disi ö?”, nöö a bi kë lei Petuisi taa di dini u Jehovah musu dë di möön fanöudu soni nëën libi. Di në u Petuisi kë taki „sitonu pisi”. U sa tei dee bunu fasi u Petuisi maaka ku wan sitonu (Tjabukama 4:5-20). A di ten aki u kë ko lobi Keesitu möön gaanfa tu. Fëën mbei wa musu mbei wooko, piizii, nasö dee gudu u du goonliba aki ko dë di möön fanöudu soni a u libi. Nöö a o dë kuma u ta taki di soni di Petuisi bi taki, di a bi taki taa: „Wë aai Masa, i seei sabi taa mi lobi i e.”