I nango suku heepi a Jehovah u?

1. Unfa sömëni dinima u Gadu ta fii u di de dë zöndu libisëmbë?

APÖSUTU Paulosu bi taki taa: „Ee maingë, unfa seei mi o du te mi kumutu a di fuka aki basu?” (Loomë 7:24) Sömëni dinima u Gadu ta lasi hati a di ten aki kumafa Paulosu bi lasi hati. Wë faandi mbei di soni aki ta pasa sö? Wë biga hii fa u ta kë du soni di ta kai ku Jehovah, tökuseei hii u tuu da zöndu libisëmbë, nöö u ta mbei föutu. Fëën mbei a sa pasa taa u ta lasi hati te wa bi du soni di ta kai ku Jehovah. So Keesitu sëmbë di bi du wan gaan zöndu, bi ta si kuma Jehovah an bi o sa da de paadon nöiti.

2. (a) Unfa Psalöm 34:22 ta lei taa an dë u dee dinima u Gadu ta kuutu deseei poi te de du wan gaan zöndu? (b) Andi woo lei a di woto aki? (Luku di pisi „A dë wan woto ka u sa lei wan soni nëën, naa wan woto di ta lei u taa wan gaan soni o pasa bakaten?”)

² Di Bëibel ta piki u taa ee u go suku heepi a Jehovah, nöö an o dë fuu ta kuutu useei möön. (Lesi Psalöm 34:22.) Ma andi a kë taki u go suku heepi a Jehovah? Andi u musu du ee u kë taa Jehovah abi tjalihati fuu, söseei ee u kë faa da u paadon? U sa feni dee piki u dee hakisi aki, te u ko sabi soni u di kule di sëmbë bi sa ta kule go tjubi a wan lowema foto na awooten. Di Wëti u di buka hën bi ta taki u di seti aki, ma sëmbë an bi ta hoi deseei a di seti aki möön sensi di Pensiti daka u di jaa 33. Ma Jehovah hën bi da dee sëmbë fëën di Wëti aki. Fëën mbei te u luku di seti u di lowema foto, nöö woo ko fusutan unfa Jehovah ta si zöndu, unfa a ta si zöndu libisëmbë, söseei unfa a ta si dee sëmbë dee ta tjali u dee zöndu u de. Ma boo luku faandi mbei dee Isaëli sëmbë bi abi lowema foto, söseei unfa soni bi seti a dee lowema foto aki.

„UN SA LUKU UN FOTO WOON TEI KO LOWEMA FOTO”

3. Andi dee Isaëli sëmbë bi musu du ee wan u de bi kii wan wotowan?

³ A bi ta toobi Jehovah gaanfa seei te de bi kii wan sëmbë. Ee wan Isaëli sëmbë bi kii wan sëmbë, nöö wan womi sëmbë u di famii u di sëmbë di a kii, bi musu kii ën baka. Di Bëibel ta taki taa hën da „di sëmbë di abi di leti u kii” ën baka (Nöbu 35:19). A sö wan fasi di sëmbë di bi kii di wotowan fëën bi ta toona paka ku di libi fëën. Ee de an bi toona kii di sëmbë dë wantewante, nöö di Paamusi Köndë bi o poi, nasö an bi o dë wan santa kamian möön. Jehovah bi piki dee Isaëli sëmbë taa: „Wan musu poi di köndë ka un ta dë.” Jehovah bi taki sö, u di ee de bi kii wan sëmbë, nöö di buuu u di sëmbë bi o poi di köndë.​—Nöbu 35:33, 34.

4. Andi bi ta pasa ee wan Isaëli sëmbë bi kii wan sëmbë, ma na ku hënseei kë?

⁴ Ma andi bi ta pasa ee wan Isaëli sëmbë bi kii wan sëmbë, ma na ku hënseei kë? Hii fa na ku hënseei kë a bi kii di sëmbë, tökuseei a bi ta tja di në taa a kii wan sëmbë (Kenesesi 9:5). Te a bi pasa sö, nöö Jehovah bi ta taki taa de sa abi tjalihati fëën. A bi sa kule da di sëmbë di abi di leti u kii ën, nöö a bi sa go a wan u dee sikisi lowema foto. Ee de bi hoi ën a wan u dee foto dë, nöö de an bi o sa feni ën kii. Ma an bi musu kumutu a di foto dë, solanga di Gaan Mindima bi dë a libi.​—Nöbu 35:15, 28.

5. Faandi mbei u sa taki taa di seti di de bi seti dee lowema foto ta heepi u fuu ko sabi Jehovah möön bunu?

⁵ Jehovah seei hën bi seti soni u sëmbë bi sa kule go a dee lowema foto. A bi piki Josua taa: „I musu piki dee Isaëli sëmbë taa: ’Mi bi mbei Mosesi piki unu taa un sa luku un foto woon tei ko lowema foto.’” Dee foto aki bi dë „santa foto.” Jehovah seei hën bi buta dee foto aki apaiti sö taa de bi sa dë santa (Josua 20:1, 2, 7, 8). Di seti di de bi seti dee lowema foto ta heepi u fuu ko fusutan möön bunu unfa Jehovah abi tjalihati tjika. Söseei a ta heepi u fuu ko fusutan unfa useei sa go suku heepi a Jehovah a di ten aki.

A MUSU „PIKI DEE GAANWOMI U DI FOTO ANDI PASA”

6, 7. (a) Konda andi dee gaanwomi bi musu du ee wan sëmbë bi kii wan wotowan fëën, ma na ku hënseei kë. (Luku di peentje a bigi u di woto.) (b) Faandi mbei a bi o dë wan köni soni ee wan sëmbë di bi kii di wotowan fëën, bi go fan ku dee gaanwomi?

⁶ Ee wan Isaëli sëmbë bi kii wan sëmbë, ma na ku hënseei kë, nöö a bi musu kule go a wan lowema foto. Söseei te a bi dou ala, nöö a bi musu taanpu a di gaan döö fesi, nöö a „piki de gaanwomi u di foto andi pasa”. Dee gaanwomi bi musu hoi di sëmbë aki a di foto (Josua 20:4). Baka wan pisiten, nöö de bi musu mandëën go baka, sö taa dee gaanwomi u di foto ka a bi kii di sëmbë bi sa kuutu di taki fëën. (Lesi Nöbu 35:24, 25.) Te dee gaanwomi u di foto dë bi kuutu taa na ku hënseei kë a bi kii di sëmbë, nöö de bi ta toona mandëën go a di lowema foto.

⁷ Faandi mbei di sëmbë di bi kii di wotowan fëën bi musu go fan ku dee gaanwomi? Wë a sö wan fasi dee gaanwomi bi o seeka soni sö taa di kemeente u dee Isaëli sëmbë bi sa dë limbolimbo a Jehovah wojo, söseei de bi o heepi di sëmbë faa bi sa dë a fa u Jehovah lei taa a abi tjalihati fëën. Wan sëmbë di ta öndösuku soni u Bëibel bi taki taa ee di sëmbë an bi kule go a dee gaanwomi, nöö de bi o kii ën, nöö a bi o dë taa hënseei suku ën, u di an bi du di soni di Gadu bi piki ën faa du. Ee wan sëmbë bi kii di wotowan fëën, ma na ku hënseei kë, nöö a bi musu go suku heepi, söseei a bi musu mbei de heepi ën ee a bi kë fika a libi. Ee an bi kule go a wan u dee lowema foto, nöö wan famii u di sëmbë di a bi kii, bi o abi di leti faa kii ën baka.

8, 9. Faandi mbei wan Keesitu sëmbë di du wan gaan zöndu musu go fan ku dee gaanwomi?

⁸ A di ten aki, ee wan Keesitu sëmbë du wan gaan zöndu, nöö a musu go a dee gaanwomi u de heepi ën fu hën ku Jehovah sa ko dë mati baka. Faandi mbei di soni aki dë fanöudu? Wë di fosu soni, hën da u di Jehovah hën buta dee gaanwomi u de kuutu soni te wan sëmbë du wan gaan zöndu (Jakobosi 5:14-16). Di u tu soni, hën da Jehovah buta dee gaanwomi u de heepi wan sëmbë di ta tjali u di zöndu di a du fu hën ku Gadu sa ko dë mati baka, söseei fu an go du di zöndu dë möön (Galasia 6:1; Hebelejën 12:11). Di u dii soni, hën da Gadu hën buta dee gaanwomi a wooko, nöö a lei de fa de musu heepi wan sëmbë di ta tjali u di zöndu di a du, söseei a lei de unfa de sa heepi di sëmbë fu an ta kuutu hënseei poi. Jehovah ta taki taa dee gaanwomi aki dë kuma „wan kamian ka i sa go tjubi da gaan ventu ku gaan tjuba” (Jesaaja 32:1, 2). Di seti aki da wan fasi fa Gadu ta lei u taa a abi tjalihati fuu.

⁹ Sömëni dinima u Gadu bi fii bunu baka di de bi go fan ku dee gaanwomi, söseei baka di dee gaanwomi bi heepi de. Wan baaa de kai Daniel bi du wan gaan zöndu, ma sömëni liba bi pasa, nöö an bi go fan ku dee gaanwomi. A bi taki taa: „U di sömëni liba bi pasa kaa, mbei mi bi ta si kuma dee gaanwomi an bi o sa heepi mi möön.” Ma di baaa aki bi ta fëëë tu taa sëmbë bi o ko sabi taa a du wan gaan zöndu, söseei a bi ta fii taa te a bi o ta begi Jehovah, nöö a bi musu ta hakisi ën faa dëën paadon ufö a taki u woto soni. Te u kaba fëën, hën a bi go suku heepi a dee gaanwomi. A bi taki taa: „A dë sö tuu taa mi bi ta fëëë u go fan ku de. Ma baka di mi go fan ku de, nöö mi bi fii taa mi bi böö fëëë sö.” Daniel bi sa ta fan ku Jehovah ku hii hën hati baka. Háti fëën an bi ta fon mën möön, nöö nöunöu a dë wan dinai u kemeente.

A MUSU „KULE GO A WAN U DEE LOWEMA FOTO”

10. Ee wan sëmbë bi kii wan sëmbë, ma na ku hënseei kë, nöö andi a bi musu du?

¹⁰ Ee wan sëmbë bi kii wan wotowan fëën, ma na ku hënseei kë, nöö a bi musu kule go a di lowema foto di bi dë möön zuntu ku di kamian ka a bi dë, ee a bi kë u de dëën paadon. (Lesi Josua 20:4.) Di kule di a bi o kule go a di foto ku di fika di a bi o fika ala u te di gaan mindima dëdë, hën bi o mbei taa de an kii ën. Di soni dë bi musu u dë wan gaan soni da di sëmbë di bi kii di wotowan fëën. A bi musu go disa di wooko fëën, di bumbuu wosu fëën, söseei an bi o sa go a woto kamian kumafa a bi o kë.a (Luku di pisi a basu.) (Nöbu 35:25) Ma ee a bi go disa dee soni aki, nöö a bi o feni wini fëën. Ee a bi kumutu a di lowema foto, nöö a bi o lei taa an abi toobi taa a kii wan sëmbë, nöö di soni dë bi o sa tja dëdë kii ën.

11. Unfa wan Keesitu sëmbë sa lei taa a ta tei di tjalihati u Gadu u bigi?

¹¹ A di ten aki, ee wan sëmbë du wan gaan zöndu, nöö wantu soni dë di a musu du tu ee a kë u Gadu dëën paadon. A musu kaba ku di zöndu fasi fa a ta libi. Di soni aki kë taki tu taa a musu koti pasi da hiniwan soni di sa mbei a go du wan gaan zöndu. Apösutu Paulosu bi taki andi so Keesitu sëmbë u Kolenti bi du u lei taa de bi ta tjali u dee zöndu u de. A bi taki taa: „Fa i si a dë taa di biifi hati unu kumafa Gadu kë naandë, nöö hën wë mbei un ko ta mbei möiti seei fuun libi bunu nëën wojo awaa. Biga un ko si hogi u di soni di pasa a unu mindi naandë te un tei hatiboonu seei. Un ko panta te un ta biinga a hii fasi fuun puu di föutu dë a unu liba” (2 Kolenti 7:10, 11). Ee u ta du hii soni di u sa du fu wa du di zöndu dë möön, nöö woo lei Jehovah taa di soni di u du ta hati u gaanfa seei, söseei woo lei ën taa wa ta si kuma a musu u abi tjalihati fuu.

12. Andi da wantu soni di wan Keesitu sëmbë musu du ee a kë taa Jehovah musu ta abi tjalihati fëën hii juu?

¹² Andi da wantu soni di wan Keesitu sëmbë musu du ee a kë taa Jehovah musu ta abi tjalihati fëën hii juu? A musu dë kabakaba u disa so soni di a lobi gaanfa seei ee a dë taa dee soni dë o mbei a go du wan gaan zöndu (Mateosi 18:8, 9). Kandë dee mati fii ta mbei i du soni di an ta kai ku Jehovah. Ma ee a dë sö, nöö joo ta hulu dee mati fii dë jeti ö? Ee i sabi taa a ta taanga da i fu ja bebe daan pasa maaka, nöö joo nango a kamian ka a sa taanga da i fii hoi iseei ö? Ee i sabi taa a ta taanga da i fu ja pakisei fanafiti soni a di së u manu ku mujëë soni, nöö joo go ta luku fëlön, nasö soni a Internet, nasö a woto kamian di sa mbei i pakisei soni di an fiti ö? Hoi a pakisei taa hiniwan soni di u ta du u hoi dee wëti u Jehovah o tja wini ko da u. Di fii di wan sëmbë ta fii taa Jehovah an dë ku ën möön da di möön hogi soni di sa miti ën. Ma na wan soni dë di bunu möön di fii di wan sëmbë ta fii taa Jehovah lobi ën.​—Jesaaja 54:7, 8.

WOON SA „KULE GO TJUBI A WAN U DEE FOTO AKI”

13. Konda faandi mbei u sa taki taa wan sëmbë di bi kule go a wan lowema foto, bi sa abi wan bunu libi.

¹³ Te wan sëmbë bi kii wan wotowan fëën, hën a kule go a wan lowema foto, nöö sëmbë an bi o sa feni ën kii. Jehovah bi piki dee sëmbë fëën taa: „Te wan sëmbë kii wan sëmbë, ma an du di soni dë ku hënseei kë, nöö a sa kule go tjubi a wan u dee foto aki” (Josua 20:2, 3). Jehovah an bi taki taa te di sëmbë bi dë a di foto kaa, nöö de bi musu toona kuutu ën. Boiti di dë, di sëmbë di bi abi di leti u kii ën an bi sa denda go a di foto faa go kii ën. Ee a bi dë a di foto kaa, nöö Jehovah bi ta tjubi ën. An bi ta dë kuma a dë a dunguwosu. A bi sa ta wooko fëën ta heepi wotowan, söseei a bi sa ta dini Jehovah bööböö. Boo taa a bi sa abi wan suti libi!

14. Fuun soni Keesitu sëmbë di ta tjali u dee zöndu u de, sa dë seiki?

¹⁴ So u dee dinima u Gadu di bi du wan gaan zöndu ta kuutu deseei jeti hii fa de bi lei taa de tjali u di soni di de bi du. So u de ta fii kuma nöiti Jehovah o sa da de paadon u di soni di de du. Ee sö iseei ta fii tu, nöö gaantangi, hoi a pakisei taa te Jehovah da wan sëmbë paadon nöö a ta dëën paadon ku hii hën hati. Fëën mbei an dë fii ta kuutu iseei möön. Di soni aki di baaa de kai Daniel di u bi taki fëën, bi ko si. Baka di dee gaanwomi bi fan ku ën, söseei di de bi heepi ën u háti fëën an ta fon mën möön, hën a bi fii bunu seei. A bi taki taa: „Ma bi ta kuutu miseei möön. Di zöndu dë an bi dë a mi liba möön. Jehovah bi taki taa a ta tei dee fuka fuu, nöö a ta buta de longi ku u. Wa o ta si de möön.” Te wan sëmbë bi kule go a di lowema foto kaa, nöö an bi dë faa fëëë taa di sëmbë di bi abi di leti u kii ën bi o sa ko kii ën möön. Sö nöö a dë taa te Jehovah da u paadon u dee zöndu fuu, nöö an dë fuu fëëë taa a o hopo di taki dë möön, söseei an o da u sitaafu fu ën möön tu.​—Lesi Psalöm 103:8-12.

15, 16. Faandi mbei u sa biibi taa Jehovah abi tjalihati fuu?

¹⁵ A di ten aki, u abi möön soni di ta mbei u biibi taa Jehovah abi tjalihati fuu. U di Paulosu an bi sa ta piki Jehovah buka söndö fu an mbei föutu, mbei a bi bai taa: „Ee maingë, unfa seei mi o du te mi kumutu a di fuka aki basu?” Ma baka di dë, hën a bi taki taa: „Gaantangi u Gadu di a dë taa a manda heepi ko a Jesosi Keesitu u Masa” (Loomë 7:25). Andi Paulosu bi kë taki ku di soni aki? Wë fosufosu Paulosu bi ta du soni di an ta kai ku Gadu, ma a bi bia libi. Hën da a bi ta biibi taa Jehovah bi dëën paadon u di Jesosi paka di lusupaima. Nöö u di Jesosi paka di lusupaima, mbei u sa abi wan limbo háti, söseei u sa abi kötöhati (Hebelejën 9:13, 14). U di Jesosi da di Gaan Mindima fuu, „mbei a sa tjubi dee sëmbë dee a ta heepi u dou a Gadu fesi, u di a ta libi nöömö faa sa ta fan ku Gadu da de” (Hebelejën 7:24, 25, NW). Na awooten, di Gaan Mindima bi ta heepi dee Isaëli sëmbë u de abi di futoou taa Jehovah o da de paadon u dee zöndu u de. U di Jesosi da di Gaan Mindima fuu, mbei u musu möön abi di futoou taa Gadu „o abi tjali fuu, nöö a o ta heepi u a soni ku ën bunuhati te u dë a wan fuka”.​​—Hebelejën 4:15, 16.

¹⁶ Ee u kë u Jehovah tjubi u, nöö u musu abi biibi a di lusupaima u Jesosi. Ja musu ta si kuma Jesosi dëdë paka da libisëmbë nöö a kaba, ma i musu ta biibi taa iseei sa feni wini u di lusupaima tu (Galasia 2:20, 21). I musu biibi taa Jehovah sa da i paadon u dee zöndo fii, u di Jesosi paka di lusupaima. I musu biibi taa di lusupaima hën o mbei i feni di libi u teego. Di lusupaima u Jesosi da wan kado di Jehovah da i!

17. Faandi mbei i kë go suku heepi a Jehovah?

¹⁷ Dee lowema foto fu awooten, ta heepi u fuu ko fusutan unfa Jehovah abi tjalihati tjika. Di soni di Jehovah bi seeka aki, ta lei u taa a ta si di libi kuma wan gaan soni. A ta lei u tu unfa dee gaanwomi sa heepi u, a ta mbei u ko fusutan andi a kë taki te wan sëmbë ta tjali tuutuu u wan zöndu di a du, söseei faandi mbei u sa dë seiki taa Jehovah ta da u paadon ku hii hën hati. I nango suku heepi a Jehovah u? Wë na wan woto kamian dë ka i sa go feni heepi (Psalöm 91:1, 2). A di woto di ta ko, woo luku unfa di woto u dee lowema foto sa heepi u fuu sa djeesi Jehovah, di sëmbë di ta möön kuutu soni a wan leti fasi, söseei di ta lei taa a abi tjalihati u sëmbë.