Andi i sa du fii ko ta lei soni u Bëibel möön bunu, söseei fii ko lobi ën?

Josua ta lesi di Wëti u Gadu. Dee peni u Jelikou ta kai, ma di wosu u Lakabu an ta kai. Josua ta hopo maun a liba ta begi Gadu

JOSUA bi musu tja dee Isaëli sëmbë go a di Paamusi Köndë. Di soni aki bi o dë wan gaan wooko seei. Fëën mbei Jehovah bi dëën degihati, söseei a bi dëën taanga, di a bi piki ën taa: „Abi degihati, nöö na fëëë.” Jehovah bi piki Josua taa ee a bi ta lesi di Wëti fëën, söseei ee a bi ta du kumafa di Wëti taki, nöö a bi o sa du soni a wan köni fasi, söseei soni bi o waka bunu dëën.—Josua 1:7, 8.

U ta libi a „wan tumisi hogi ten”. Fëën mbei soni sa ta taanga da u seei (2 Timoteo 3:1). Ee u kë u soni waka bunu da u kumafa soni bi waka da Josua, nöö u musu ta du dee soni dee Jehovah bi piki Josua faa du. U musu ta lesi di Bëibel hiniwan daka, söseei u musu ta wooko ku dee soni dee u ta lei, fuu sa du soni a wan bunu fasi.

Ma kandë so fuu an sabi unfa u musu lei soni u Bëibel, nasö kandë so fuu an lo’ u lei soni u Bëibel. Ma tökuseei a dë fanöudu fuu ta lei soni u Bëibel. Te i lesi di pisi „Pooba dee soni aki luku”, nöö joo feni wantu soni di sa heepi i fii feni wini u di lei di i ta lei soni u Bëibel, söseei di sa heepi i fii ko lobi ën möön gaanfa.

Di Psalöm sikifima bi kanda taa: „Be mi hoi dee wëti fii, u di mi ta piizii u du ën” (Psalöm 119:35). Iseei sa ta piizii u lei soni a di Wöutu u Gadu tu. Joo lei sömëni bunu soni te i ta lei soni u Bëibel nöömö.

Hii fa ja ta tii wan hii nasiön sëmbë kumafa Josua bi ta du ën, tökuseei i abi fii seei bookohedi. Fëën mbei i musu ta lei soni a di Wöutu u Gadu, söseei i musu ta du dee soni dee i ta lei, leti kumafa Josua bi ta du ën. Te i ta du sö, nöö joo du soni a wan köni fasi, söseei soni o waka bunu da i.

POOBA DEE SONI AKI LUKU

Begi ufö i lei soni u Bëibel. Dee pakisei u Jehovah hën sikifi a di Bëibel, nöö a mbei sëmbë sikifi de u de sa tja wini ko da u. Fëën mbei te i ta lesi di Bëibel, nöö i musu hakisi Jehovah faa heepi i fii fusutan dee soni dee i ta lesi, fii sa hoi de, söseei fii sa wooko ku de u du soni a wan bunu fasi.—Ësala 7:10.
I musu ta hakisi iseei soni, te i ta lesi di Bëibel ku dee woto buku fuu dee ta taki soni u Bëibel. I sa hakisi iseei dee soni aki: ’Andi di pisi aki ta lei mi u Jehovah? Unfa di soni aki nama ku di möön fanöudu bosikopu u di Bëibel? Unfa mi sa wooko ku dee soni aki u heepi wotowan?’
Pakisei fundu u dee soni dee i ta lei. Dë piii sö, nöö pakisei fundu u di soni di i lesi dë. Hakisi iseei dee soni aki: ’Unfa mi ta fii? Faandi mbei mi ta fii sö? Unfa di soni di mi lesi aki nama ku wan soni di bi miti mi, unfa a nama ku wan soni di ta miti mi nöunöu, nasö unfa a nama ku dee soni dee sa miti mi a di ten di ta ko? Unfa mi sa wooko ku dee mama wëti u Bëibel ku dee soni dee mi lei aki?’ (Jöpu 23:5; Psalöm 49:3) Te i ta pakisei fundu u dee soni dee i ta lesi a Bëibel, nöö luku ee i bi o sa konda da wan sëmbë ee faandi mbei wa ta du so soni. Söseei pakisei unfa soni bi o waka ee di sëmbë di i ta lesi soni fëën a Bëibel dë, bi du soni woto fasi.—Detolonomi 32:28, 29.
Pakisei unfa soni bi sa dë te i ta lesi di Bëibel. I ta mëni fa soni bi dë di dee baaa u Josëfu bi sei ën da dee Ismaëli sëmbë u? (Kenesesi 37:18-28) Andi i ta si, andi i ta jei, andi i ta sumëë? Pakisei unfa a bi o dë ee i bi dë a dee sëmbë dë kamian. Andi de bi ta pakisei, nasö unfa de bi ta fii? Te i ta du di soni aki, nöö joo ko ta lei soni u Bëibel a wan möön bunu fasi.
Wooko ku dee soni di di ölganisaasi u Jehovah ta da u. Te i ta wooko ku de, nöö de ta mbei di öndösuku di i ta öndösuku soni ko möön suti da i. I musu ko sa’ u wooko ku dee soni dee dë a i mamabëë töngö, aluwasi ee di soni dë a Internet, nasö a pampia. Na fëëë u hakisi wotowan u de heepi i fii ko sabi unfa i sa wooko ku dee soni aki, sö taa i sa wooko ku de a wan möön bunu fasi. Di buku Ondrosuku Bijbel moro fini-Gi Yehovah Kotoigi, sa heepi i fii feni dee soni di di ölganisaasi taki u wan soni, söseei de o konda soni u sömëni Bëibel tëkisi da i finifini. U sa wooko ku di buku Studeri Gado Wortu moro fini tu. Di buku aki ta taki u so kamian, a ta taki unfa soni bi pasa baka-na-baka, söseei a ta taki unfa sëmbë bi ta wegi soni ta maaka soni, söseei a ta taki u woto soni jeti.
Hoi dee möön fanöudu pisi. Te i du di soni aki, nöö a u heepi i fii toona mëni dee soni dee i bi lei. A bi o möön bunu fii konda dee soni dee i lei da wotowan. Kandë i sa wooko ku dee soni dee i lei, a di peleikiwooko. Te i ta du dee soni aki, nöö joo hoi dee möön fanöudu soni, söseei joo sa heepi woto sëmbë ku dee soni dee i lei.