Jehovah o piki dee begi u mi ö?

1-2. Faandi mbei u sa ta fii kuma Jehovah an ta piki dee begi fuu?

„I MUSU ta piizii gaanfa seei ku Jehovah, nöö a o da i di soni di i hati kë” (Ps. 37:4). Wan gaan bunu soni seei Gadu paamusi u aki! Ma di soni dë kë taki taa Jehovah o da u wan soni wantewante te u hakisi ën u? Faandi mbei a bunu fuu hakisi useei di soni aki? Boo luku wan woto. Wan sisa di an tööu jeti bi ta begi Jehovah faa heepi ën faa sa go a di Siköö da Könuköndë Peleikima. Ma tökuseei baka sömëni jaa de an bi kai ën faa go a di siköö möönsö. Wan njönku baaa ta hakisi Jehovah faa heepi ën faa ko bëtë u wan siki di a abi, sö taa a sa du möön soni a di kemeente. Ma tökuseei an ko bëtë möönsö. Wan mama ku wan tata di dë Keesitu sëmbë ta begi u di mii u de fika a di tuutuu lei. Ma tökuseei di mii buta taa an o dini Jehovah möön.

² A kan taa iseei hakisi Jehovah wan soni ma ja feni ën jeti. Nöö kandë i ta pakisei taa an ta piki dee begi fii, ma a ta piki dee u woto sëmbë. Nasö kandë i sa ta pakisei taa i du wan soni di an bunu. Wan sisa de kai Janice bi ta fii sö tu. Hën ku hën manu bi ta hakisi Jehovah faa heepi de u de sa go wooko a Bëtëli. Sisa Janiceb bi taki taa: „Mi bi ta biibi taa u bi o go a Bëtëli seei hesihesi.” Ma tökuseei baka sömëni jaa de an bi feni di okasi u go wooko a Bëtëli möönsö. Sisa Janice bi taki taa: „Mi bi ta tjali seei, söseei ma bi saandi mi bi musu du. Mi bi ta hakisi miseei ee mi bi du wan soni di Jehovah an lobi. Mi bi hakisi ën sömëni pasi faa heepi mi u mi sa go wooko a Bëtëli. Ma faandi mbei Jehovah an bi ta piki dee begi u mi?”

3. Fu un soni woo taki a di woto aki?

³ So juu a sa pasa taa u ta hakisi useei ee Jehovah ta haika dee begi fuu. Sömëni sëmbë fu awooten di bi abi wan taanga biibi, bi ta booko de hedi ku di soni aki tu (Jöpu 30:20; Ps. 22:2; Hab. 1:2). Andi sa heepi i fii dë seiki taa Jehovah o piki dee begi fii? (Ps. 65:2) Fuu sa feni di piki u di hakisi aki, nöö woo buta pakisei a dii soni. Di fosu wan da, andi Jehovah o du? Di u tu da, andi Jehovah kë fuu du? Nöö di u dii soni da, faandi mbei a dë fanöudu fuu tooka so u dee soni dee u ta hakisi Jehovah?

ANDI JEHOVAH O DU?

4. Andi Jehovah paamusi u taa a o du, te u luku Jelemia 29:12?

⁴ Jehovah paamusi u taa a o ta haika dee begi fuu. (Lesi Jelemia 29:12.) Di Gadu fuu lobi u, u di u ta dini ën ku hii u hati, nöö fëën mbei hii juu a o ta buta pakisei a dee begi fuu (Ps. 10:17; 37:28). Ma di soni dë an kë taki taa a o ta da u hiniwan soni di u ta hakisi ën. Kandë a o dë fuu wakiti di njunjun goonliba fuu sa feni so u dee soni dee u ta hakisi ën.

5. Na andi Jehovah ta buta pakisei te a ta haika dee begi fuu?

⁵ Jehovah ta buta pakisei a di fasi fa dee soni dee u ta hakisi ën nama ku dee soni dee a abi a pakisei u du (Jes. 55:8, 9). Wan u dee soni di Jehovah kë taa musu pasa, hën da u hii di goonliba musu ko fuu ku sëmbë di ta dë waiwai, söseei di ta saka deseei a di tii fëën basu. Ma Saatan ta taki taa libisëmbë o ta möön dë waiwai te de ta tii deseei (Ken. 3:1-5). U di Jehovah kë lei taa Didibi ta mindi soni, mbei a disa libisëmbë u de tii deseei. Te kuma tide, u ta si taa di tii di libisëmbë ta tii ta tja sömëni fuka ko (Peleik. 8:9). U ta fusutan taa Jehovah an o puu hii dee fuka fuu nöunöu aki. Ee a bi o du di soni dë, nöö so sëmbë bi o taki taa libisëmbë ta tii bunu, söseei taa de sa puu hii dee fuka u de deseei.

6. Faandi mbei a dë fanöudu fuu dë seiki taa hii juu Jehovah ta du soni ku lobi, söseei a wan leti fasi?

⁶ Sömëni sëmbë sa begi hakisi Jehovah di wan seei soni, ma a sa pasa taa an piki dee begi u de a di seei fasi. Di Könu Esikia bi suwaki te a fika piki a dëdë, hën a bi begi Jehovah faa mbei a ko bëtë. Jehovah bi haika di begi fëën, hën a ko bëtë (2 Kön. 20:1-6). Ma di apösutu Paulosu bi begi Jehovah faa puu di soni di bi ta tjökö ën „kuma maka”, hën Jehovah an bi puu ën dëën. A kan taa wan siki Paulosu bi abi (2 Kol. 12:7-9). Buta pakisei a di woto u Jakobosi ku Petuisi. Könu Helodi bi kë kii de. Dee baaa ku dee sisa u di kemeente bi begi da Petuisi ku Jakobosi tuu. Ma tökuseei de kii Jakobosi, ma wan ëngëli ko heepi Petuisi (Tjab. 12:1-11). Ma kandë u ta hakisi useei taa: ’Faandi mbei Jehovah bi heepi Petuisi, ma an heepi Jakobosi?’ Wë di Bëibel an ta piki u faandi mbei.c Ma tökuseei u sa dë seiki taa „na wan hogilibi dë” a Jehovah (Deto. 32:4). U sabi tu taa Jehovah bi feni Petuisi ku Jakobosi tuu u bunu (Ako. 21:14). So juu a kan taa Jehovah an piki dee begi fuu kuma fa u bi o kë. Ma u di u abi di biibi taa hii juu Jehovah ta du soni ku lobi, söseei a wan leti fasi, mbei wa ta fii wan fasi te a piki di begi fuu a wan fasi di wa bi mëni.​—Jöpu 33:13.

7. Andi u ta mbei möiti u na ta du, nöö faandi mbei?

⁷ U ta mbei möiti u na ta tei di fasi fa soni dë da u, maaka ku di fasi fa soni dë da wotowan. Boo taa i begi Jehovah faa heepi i a wan soni, ma te u kaba fëën ja feni di soni di i hakisi ën. Bakaten, hën i ko jei taa wan woto sëmbë bi begi hakisi Jehovah di seei soni, nöö a djei kuma Jehovah piki di begi fëën. Di soni aki bi miti wan sisa de kai Anna. A bi begi Jehovah u hën manu Matthew ko bëtë, u di kankël bi kisi ën. A di ten dë, tu sisa di bi gaandi u Matthew seei bi abi di siki dë tu. Anna bi ta begi gaanfa seei da Matthew ku dee tu sisa dë. Dee tu sisa tuu bi ko bëtë, ma Matthew bi lasi libi. Anna bi ko ta hakisi hënseei ee Jehovah hën bi heepi dee sisa dë u de ko bëtë. Nöö ee a dë sö taa Jehovah hën bi heepi de, nöö faandi mbei an heepi hën manu tu? Wë fuu taki ën, nöö wa sabi faandi mbei dee tu sisa dë ko bëtë. Ma u sabi taa Jehovah o puu hii dee soni dee ta mbei u ta fuka, söseei taa a kë weki dee mati fëën dee lasi libi.​—Jöpu 14:15.

8. (a) Unfa Jehovah ta heepi u, te u luku Jesaaja 43:2? (b) Unfa begi sa heepi u te fuka ta miti u? (Luku di fëlön Begi e yepi wi na ini muilek ten.)

⁸ Hii juu Jehovah o ta heepi u. U di Jehovah lobi u mbei an ta kë fuu pena (Jes. 63:9). Ma tökuseei an ta puu hii dee fuka dee ta miti u, dee u sa tei maaka ku lio nasö ku faja. (Lesi Jesaaja 43:2.) Hii fa a dë sö, tökuseei a ta paamusi u taa a o heepi u fuu sa „pasa” de. Nöö an o disa dee fuka fuu be de tapa u fuu dini ën. Boiti di dë, Jehovah ta da u di santa jeje fëën di ta heepi u fuu sa hoi dou (Luk. 11:13; Fil. 4:13). U sa dë seiki taa hii juu Jehovah o ta da u dee soni dee u abi fanöudu fuu sa hoi dou, söseei fuu sa dini ën ku hii u hati go dou.d

ANDI JEHOVAH KË FUU DU?

9. Faandi mbei u musu abi di futoou taa Jehovah o heepi u, te u luku Jakobosi 1:6, 7?

⁹ Jehovah kë fuu futoou ën (Heb. 11:6). So juu a ta djei kuma dee soni dee ta miti u ta hebi pasa maaka poi. A sa pasa taa u sa bigi ta hakisi useei ee Jehovah o heepi u tuutuu. Ma di Bëibel ta piki u taa Gadu sa mbei u „subi wan peni”, te a da u di santa jeje fëën (Ps. 18:29). Fëën mbei ka fuu bigi hakisi useei ee Jehovah o heepi u tuutuu, nöö a bi o möön bunu fuu begi ën fajafaja ku di biibi taa a o heepi u, söseei u musu abi di futoou taa a o piki dee begi fuu.​—Lesi Jakobosi 1:6, 7.

10. Konda wan woto di ta lei unfa u sa du soni di ta kai ku dee soni dee u ta hakisi Jehovah.

¹⁰ Jehovah kë taa useei musu du soni di ta kai ku dee soni dee u ta hakisi ën. Boo taa wan baaa hakisi Jehovah faa heepi ën u di basi fëën sa dëën wantu daka fu a go a könklësi. Unfa i si kuma Jehovah o piki di begi dë? A sa da di baaa degihati faa go fan ku di basi fëën. Ma tökuseei di baaa o abi u hakisi di basi faa dëën dee daka dë. Kandë a o abi u hakisi ën sömëni pasi. Nasö kandë a o abi u hakisi ën faa wooko a dee daka u wan woto wookoma. Nöö ee a dë fanöudu tu, nöö kandë a sa piki di basi taa an dë faa pakëën da dee daka dë.

11. Faandi mbei wa musu ta wei u begi Jehovah te u kë faa heepi u ku wan soni di u abi fanöudu?

¹¹ Jehovah kë taa u musu ta begi nöömö u dee soni dee dë fanöudu da u (1 Tes. 5:17). Dee soni dee Jesosi bi taki ta lei u taa na hii juu woo ta feni dee soni dee u ta hakisi wantewante (Luk. 11:9). Fëën mbei wa musu ko wei! Ma u musu ta begi fajafaja nöömö (Luk. 18:1-7). Te u ta begi nöömö u wan soni di u kë, nöö a sö wan fasi u ta lei Jehovah taa u kë di soni dë tuutuu. Söseei u ta lei taa u ta biibi taa a sa heepi u.

FAANDI MBEI A DË FANÖUDU FUU TOOKA SO U DEE SONI DEE U TA HAKISI JEHOVAH?

12. (a) Andi bi o bunu fuu hakisi useei, nöö faandi mbei a bunu fuu hakisi useei di soni dë? (b) Unfa u sa ta lei hii juu taa u ta lesipeki Jehovah te u ta begi ën? (Luku di pisi „Dee soni dee mi ta hakisi Jehovah ta lei taa mi abi lesipeki dëën u?”)

¹² Ee wa feni di soni di u hakisi Jehovah, nöö a bi o bunu fuu hakisi useei dee dii soni aki. Di fosu soni di u sa hakisi useei da, ’Mi ta begi da di soni di mi abi fanöudu tuutuu ö?’ So juu u ta si kuma u sabi andi möön bunu da u. Ma a kan taa dee soni dee u ta begi u de, an o mbei u feni wini u wan longi pisiten. Ee u ta begi Jehovah faa heepi u ku wan fuka fuu, nöö a kan taa wan möön bunu fasi dë fa a sa heepi u, möön di fasi fa uu ta pakisei. A sa pasa taa so u dee soni dee u ta hakisi Jehovah an ta kai ku di pakisei fëën (1 Joh. 5:14). Buta pakisei a di woto u di mama ku di tata di u bi taki soni u de a bigi u di woto. De bi hakisi Jehovah faa mbei di mii u de fika a di tuutuu lei. A djei kuma wan bunu soni de hakisi dë. Ma Jehovah an ta musu na wan sëmbë u de dini ën. A kë u hiniwan fuu seei buta taa woo dini ën, te kisi dee mii fuu (Deto. 10:12, 13; 30:19, 20). Dee gaansëmbë u di mii sa hakisi Jehovah faa heepi de, u dee soni di de ta lei di mii sa dou hën hati, faa a sa ko lobi Jehovah, söseei faa sa ko dë mati ku ën.​—Nöng. 22:6; Ef. 6:4.

13. Na un ten Jehovah o piki di begi fuu, te u luku Hebelejën 4:16?

¹³ Di u tu soni di u sa hakisi useei da, ’Di ten u Jehovah dou faa heepi mi ku di soni di mi bi hakisi ën u?’ Wë u sa pakisei taa a bi o bunu faa piki di begi fuu wantewante. Ma fuu taki ën, nöö Jehovah sabi di möön bunu ten ka a musu heepi u. (Lesi Hebelejën 4:16.) Te Jehovah an piki di begi fuu wantewante, nöö a sa pasa taa u ta si kuma an kë da u di soni di u hakisi ën. Ma a kan taa di ten an dou jeti faa da u ën. Toona buta pakisei baka a di woto u di njönku baaa di bi begi Jehovah faa mbei a ko bëtë. Ee Jehovah bi du wan foombo soni u mbei a ko bëtë, nöö Saatan bi o sa taki da Jehovah taa di baaa ta dini ën go dou, u di a mbei di baaa ko bëtë (Jöpu 1:9-11; 2:4). Ma Jehovah buta wan ten kaa, ka a o puu hii pei siki a mundu (Jes. 33:24; Ako. 21:3, 4). Solanga di ten dë an dou, nöö an bi o dë wan köni soni fuu ta dë ku di mëni taa Jehovah o kula u a wan foombo fasi. Fëën mbei di baaa sa hakisi Jehovah faa heepi ën faan ta booko hën hedi poi, söseei faa dëën di taanga di a abi fanöudu faa sa dini ën go dou.​—Ps. 29:11.

14. Andi i lei a di woto u Sisa Janice?

¹⁴ Toona buta pakisei baka a di woto u sisa Janice, di bi ta begi Jehovah faa sa go wooko a Bëtëli. Baka feifi jaa ufö a bi ko fusutan unfa Jehovah bi piki di begi fëën. A bi taki taa: „Jehovah bi ta lei mi sömëni soni a dee feifi jaa dë, söseei a bi heepi mi u mi ko dë wan möön bunu bakama u Keesitu. Mi bi musu ko ta möön futoou ën. Mi bi musu ta tei ten u lei soni u Bëibel möön bunu. Mi bi ko fusutan tu taa mi sa ta dë waiwai a di dini u Jehovah aluwasi un wooko mi ta du dëën.” Bakaten, hën de hakisi Sisa Janice ku hën manu u de du di keling-wooko. Te u kaba fëën, hën Sisa Janice bi taki taa: „Jehovah bi piki di begi u mi, ma an bi du soni a di fasi fa mi bi mëni. A bi tei ten ufö mi ko fusutan taa Jehovah bi piki di begi u mi a wan gaan bunu fasi seei. Mi ta tei ën u bigi seei taa mi si fa Jehovah lei mi taa lobi mi.”

15. Faandi mbei a sa möön bunu fu wa ta piki Jehovah hii juu finifini andi u kë? (Luku dee peentje tu.)

¹⁵ Di u dii soni di u sa hakisi useei da: ’Mi musu hakisi Jehovah wan woto soni ö?’ Te u ta begi, nöö a bunu fuu ta konda finifini da Jehovah andi u kë. Ma so juu a sa möön bunu fu wa du ën. A sö wan fasi u sa ko sabi andi Jehovah kë fuu du. Buta pakisei a di woto u wan sisa di bi ta begi Jehovah faa sa go a di Siköö da Könuköndë Peleikima. Di sisa aki an tööu, nöö a bi kë go a di siköö dë, sö taa a bi sa go heepi ka peleikima bi möön dë fanöudu. Di a bi ta hakisi Jehovah faa heepi ën faa go a di siköö, hën a bi hakisi ën faa heepi ën be a ko sabi dee woto fasi fa a sa du soni u dini ën möön gaanfa (Tjab. 16:9, 10). Fa a begi dë, nöö a sa hopo du soni u mbei Jehovah piki di begi fëën. A sa hakisi di keling-gaanwomi ee wan kemeente dë a zuntu dë, di abi baaa ku sisa fanöudu u du di pioniliwooko. Nasö a sa sikifi biifi manda hakisi di bëikantoo naasë peleikima möön dë fanöudu.e

16. Fu un soni u sa dë seiki?

¹⁶ Leti kumafa u si kaa, nöö u sa dë seiki taa Jehovah o piki dee begi fuu a wan leti fasi, söseei a wan fasi di ta lei taa a lobi u (Ps. 4:3; Jes. 30:18). So juu a sa piki de a wan fasi di wa bi mëni. Ma nöiti a o dë sö taa an ta butu pakisei a dee begi fuu. Jehovah lobi u gaanfa seei. Söseei u sa dë seiki taa a o dë ku u, u nöömö (Ps. 9:10). Nöö fëën mbei u musu ta ’buta futoou nëën hii juu’, ta konda hii dee soni dee dë a u hati dëën te u ta begi ën.​—Ps. 62:8.