Unfa u sa ko ta begi möön bunu?

1. Andi Jehovah ta da dee dinima fëën taanga u de du? (Luku di peentje tu.)

AMBË sa da u kötöhati, söseei ambë sa tii di libi fuu? Wë hii u tuu sabi di piki u di hakisi dë. U sa begi Jehovah Gadu, nöö u suku heepi nëën. Jehovah ta da u taanga fuu ta begi. Di Bëibel ta piki u taa u musu ta begi „hiniwanten”. Di soni dë ta lei u taa a kë fuu ta begi hii juu (1 Tes. 5:17). U sa begi Gadu te u kë, nöö u sa hakisi ën faa tii di libi fuu (Nöng. 3:5, 6). Jehovah lo’ u da sëmbë soni. Fëën mbei a piki u taa u sa begi ën hiniwan ten.

2. Fuun soni woo taki a di woto aki?

² U ta tei ën u bigi seei taa Jehovah ta da u pasi fuu begi ën. Ma so juu a sa ta taanga da u fuu feni ten u begi, u di u ta abi sömëni soni u du. Kandë u ko si tu taa u musu ko sa’ u begi möön bunu. U ta wai taa u sa feni heepi a di Wöutu u Gadu. A di woto aki woo luku andi u sa lei u Jesosi a di seeka di a bi ta seeka soni faa sa ta begi hii juu. Söseei woo luku feifi soni di sa heepi u fuu sa ko ta begi möön bunu.

JESOSI BI TA SEEKA SONI SÖ TAA A BI SA TA BEGI

3. Andi Jesosi bi sabi u begi?

³ Jesosi bi sabi taa Jehovah ta si dee begi fuu kuma gaan fanöudu soni. Gaanduwe ufö a bi ko a goonliba aki, a bi si unfa hën Tata bi ta piki dee begi u dee dinima fëën. Jesosi bi sai dë di hën Tata bi piki dee begi u sëmbë kuma Hana, Dafiti, ku Elia (1 Sam. 1:10, 11, 20; 1 Kön. 19:4-6; Ps. 32:5). Fëën mbei Jesosi bi lei dee bakama fëën taa de musu ta begi hii juu, söseei taa de musu ta biibi taa Gadu ta haika dee begi u de!​—Mat. 7:7-11.

4. Andi u ta lei a Jesosi te a nama ku begi?

⁴ Di fasi fa Jesosi bi ta begi Jehovah, bi sa heepi dee bakama fëën u deseei ko sabi unfa de musu ta begi. Jesosi bi lo’ u begi te a bi ta du di diniwooko fëën. A bi ta seeka soni sö taa a bi sa begi, u di hii juu a bi ta abi sömëni soni u du, söseei u di sëmbë bi lo’ u go suku heepi nëën (Maik. 6:31, 45, 46). A bi ta hopo fuuku, sö taa a bi sa dë hën wanwan faa begi (Maik. 1:35). Wan pasi a bi begi wan hii ndeti, u di a bi musu du wan fanöudu soni (Luk. 6:12, 13). Nöö a di ndeti ufö a dëdë, a bi begi sömëni pasi, u di a bi musu du wan gaan fanöudu soni.​—Mat. 26:39, 42, 44.

5. Unfa u sa djeesi Jesosi te a nama ku begi?

⁵ Di woto u Jesosi ta lei u taa aluwasi ee u abi sömëni soni u du, tökuseei u musu ta seeka soni sö taa u sa ta begi. Leti kuma Jesosi, a o dë fuu suku wan ten fuu ta begi. Kandë a o dë fuu hopo fuuku mamate, nasö kandë a o dë fuu go kandi pikisö möön lati, fuu sa feni ten fuu begi. Te u ta mbei dee möiti dë, nöö u ta lei Jehovah taa u ta tei ën u bigi taa u sa ta begi ën. Wan sisa de kai Lynne ta mëni unfa a bi bigi dëën tjika di a bi ko fusutan taa a sa ta begi Jehovah. A bi taki taa: „Mi bi ko fusutan taa mi sa ta fan ku Jehovah hiniwan ten. Di soni dë bi heepi mi u mi si ën kuma wan gaan mati u mi, söseei a bi da mi taanga u mi begi möön bunu.” An dë u taki taa sömëni fuu ta fii sö tu. Wë boo luku feifi fanöudu soni dee u sa taki te u ta begi.

FEIFI FANÖUDU SONI DI U SA TA TAKI TE U TA BEGI

6. Andi Jehovah fiti u kisi, te u luku Akoalimbo 4:10, 11?

⁶ Gafa Jehovah. Apösutu Johanisi bi si wan wojolimbo sunjan ka a bi si 24 gaanwomi ta dini Jehovah a liba ala. De bi ta gafa Gadu, ta taki taa a fiti u kisi gafa, taa a fiti u kisi hei, söseei taa a fiti u kisi makiti. (Lesi Akoalimbo 4:10, 11.) Dee ëngëli dee ta hoi deseei a Jehovah ta gafëën tu. De ta du di soni dë, u di de ku Jehovah dë a liba ala, nöö de ko sabi ën bumbuu. Te de ta luku dee soni dee a ta du, nöö de ta ko si dee bunu fasi fëën. Te de si dee soni dee Jehovah ta du, nöö de ta gafëën.​—Jöpu 38:4-7.

7. Da un soni u sa ta gafa Jehovah?

⁷ Te u ta begi, nöö u musu ta gafa Jehovah tu. U sa ta du di soni aki, te u ta piki ën faandi mbei u lobi ën, söseei faandi mbei u ta lesipeki ën. Te i ta lei soni a Bëibel, nöö mbei möiti u si dee fasi dee Jehovah abi dee ta mbei i ko ta möön lobi ën (Jöpu 37:23; Lom. 11:33). Baka di dë, nöö i sa piki Jehovah unfa i ta si dee fasi dee a abi. Boiti di dë, u sa gafa Jehovah u di a ta heepi u, söseei u di a ta heepi dee baaa ku dee sisa fuu. Hii juu a ta sölugu u, söseei hii juu a ta tjubi u.​—1 Sam. 1:27; 2:1, 2.

8. Andi da wantu soni di mbei u sa ta da Jehovah tangi? (1 Tesalonika 5:18)

⁸ Da Jehovah tangi. U sa da Jehovah tangi da sömëni soni, te u ta begi. (Lesi 1 Tesalonika 5:18.) U sa dëën tangi da hii dee bunu soni dee u abi, u di hii bumbuu soni ta kumutu a Jehovah (Jak. 1:17). U sa ta dëën tangi u di waiti fasi fa a mbei di goonliba, ku dee woto soni dee dë nëën. U sa ta dëën tangi da di libi di a da u, u sa ta dëën tangi taa u abi mati, ku famii. U sa ta dëën tangi tu u di a seeka soni sö taa abiti möön u sa ko abi wan möön bunu libi. Boiti di dë, u sa ta dëën tangi u di a da u pasi fuu ku ën sa ko dë gaan mati.

9. Faandi mbei u musu ta mbei möiti fuu ko ta tei dee soni dee Jehovah ta du da u u bigi?

⁹ Kandë a o dë fuu kai pakisei luku faandi mbei u musu ta tei dee soni dee Jehovah ta du da u u bigi. Sömëni sëmbë u di ten aki an ta tei soni u bigi. De lo’ u buta pakisei nöö a dee soni di de musu du u feni dee soni di de kë. De an ta buta pakisei a dee soni di de sa ta du u lei taa de ta wai ku dee soni di de abi kaa. Ee u ko ta pakisei kuma dee lö sëmbë dë, nöö te woo begi, nöö hakisi nöö woo ta hakisi Jehovah faa ta du soni da u. Fëën mbei ee wa kë ko ta pakisei sö, nöö hii juu u musu ta tei hii dee soni dee Jehovah ta du da u u bigi, söseei u musu ta du soni di ta lei taa u ta tei de u bigi.​—Luk. 6:45.

10. Unfa di tei di wan sisa bi ta tei soni u bigi bi heepi ën faa hoi dou? (Luku di peentje tu.)

¹⁰ Te u lo’ u tei soni u bigi, nöö a sa heepi u fuu hoi dou te soni ta taanga da u. Buta pakisei a di woto u wan sisa de kai Kyung-sook. U sa feni di woto fëën a Di Hei Wakitimawosu u 15 u jailiba u di jaa 2015. Data bi piki di sisa aki taa a abi kankël nëën fuköfukö, nöö di kankël bi hogi seei. Di sisa bi taki taa: „Di siki aki bi mbei mi lasi hati seei. Mi bi ta fii kuma mi bi kaba a sösö, söseei mi bi ta fëëë seei.” Andi bi heepi di sisa aki faa hoi dou? A bi taki taa hiniwan ndeti ufö a go kandi, a bi nango a wan kamian a liba u di wosu fëën u da Jehovah tangi u feifi soni di a bi du dëën di daka dë. Di soni aki bi heepi ën fu an booko hën hedi ku soni sö möön, söseei a bi heepi ën faa möön lei Jehovah unfa a lobi ën tjika. Di sisa aki bi ko si unfa Jehovah ta heepi dee dinima fëën te gaan fuka ta miti de, söseei a bi ko si taa dee bunu dee Jehovah ta da u hia möön dee tesi dee ta miti u. Leti kuma Kyung-sook, useei sa lei Jehovah unfa u ta tei dee soni dee a ta du da u u bigi, aluwasi ee u dë ku wan fuka. Te u ta begi Jehovah ta piki ën unfa u ta tei soni u bigi, nöö a o heepi u fuu hoi dou, söseei a o heepi u fuu dë waiwai go dou.

11. Faandi mbei dee bakama u Jesosi bi abi degihati fanöudu baka di Jesosi bi toona go a liba ala?

¹¹ Hakisi Jehovah faa da i degihati fii sa ta du di peleikiwooko. Kölö sö ufö Jesosi bi toona go a liba ala, a bi toona mëni dee bakama fëën taa de musu konda soni fëën da sëmbë a ’Jelusalen te dou hii Judea köndë te kisi Samalia köndë, söseei a hii dee köndëköndë u goonliba tuu ka sëmbë dë’ (Tjab. 1:8; Luk. 24:46-48). Kölö sö baka di dë, hën dee fesima u dee Dju kisi apösutu Petuisi ku apösutu Johanisi, hën de tja de go a di kuutuwosu u dee Dju. Di de bi dou ala, hën de piki Petuisi ku Johanisi taa de an musu peleiki möön, ee nasö de o du ku de (Tjab. 4:18, 21). Andi Petuisi ku Johanisi bi du?

12. Andi dee bakama u Jesosi bi du, te u luku Tjabukama 4:29, 31?

¹² Petuisi ku Johanisi bi piki dee hedima u di Dju keiki taa: „Lanti, fa un taki da u aki, nöö u jei. Un bai u taa wa musu konda soni u Masa Jesosi. Ma Masa Gaangadu manda u fuu musu konda. Nöö unfa un mëni? Undi u dee buka un si kuma Masa Gaangadu o kë fuu musu piki? Wë nöö wa sa tjubi dee soni u wojo bi si ku dee u jesi bi jei. U musu konda de nöömö” (Tjab. 4:19, 20). Di de bi disa Petuisi ku Johanisi be de go, hën de begi Jehovah. De piki Jehovah soni di nama ku di kë fëën. De bi begi taa: „U begi i, Masa, fii da u dee futuboi fii degihati, be u sa ta konda di Buka fii nöömö söndö fëëë.” Wë Jehovah bi piki di begi u de.​—Lesi Tjabukama 4:29, 31.

13. Andi u sa lei u di woto u Baaa Jin-hyuk?

¹³ U sa djeesi dee bakama u Jesosi ee dee tiima piki u fu wa peleiki möön. Boo luku di woto u wan baaa de kai Jin-hyuk. De bi buta di baaa aki a dunguwosu, u di an bi kë go a sodati. Di a bi dë a dunguwosu, hën de bi butëën faa luku so u dee sitaafuma di de bi söötö de wanwan a wan piki kamba. Te di baaa aki bi ta fan ku dee sitaafuma dë, nöö u soni di de abi fanöudu nöö a bi musu taki. An bi sa konda soni u Bëibel da de. Ma a bi begi Jehovah hakisi ën faa dëën degihati, söseei faa heepi ën faa du soni ku köni, sö taa a bi sa ta peleiki hiniwan ten (Tjab. 5:29). Di baaa bi taki taa: „Jehovah bi piki dee begi u mi, u di a bi heepi mi u mi bigi lei sömëni sëmbë soni u Bëibel. Söwan feifi miniti mi bi ta lei de soni u Bëibel, leti a di döö buka u de kamba. Te ndeti, mi bi ta sikifi biifi, nöö di debooko fëën mi bi ta da de u de lesi.” Useei sa dë seiki taa Jehovah o heepi u fuu sa du di peleikiwooko. U sa hakisi Jehovah faa da u degihati, söseei faa da u köni leti kuma Jin-hyuk.

14. Andi sa heepi u te fuka ta miti u? (Psalöm 37:3, 5)

¹⁴ Hakisi Jehovah faa heepi i fii hoi dou hii fa fuka ta miti i. Sömëni fuu ta tja sitaafu u di u dë ku wan suwaki, nasö u di u dë ku wan bookohedi. Söseei sömëni fuu ta tja sitaafu u di wan sëmbë fuu lasi libi, u di wan soni pasa a di wosudendu fuu, u di sëmbë ta du ku u, nasö u woto soni hedi. Nöö soni kuma gaan feti ku taku siki di ta paaja a hii së u goonliba ta mbei soni ko möön taanga da u. Konda hii soni di dë a i hati da Jehovah. Konda hii soni dëën leti kumafa i bi o kondëën da wan gaan mati fii. I sa dë seiki taa „hënseei o heepi i”.​—Lesi Psalöm 37:3, 5.

15. Unfa begi sa heepi u fuu „ta tja sitaafu ku pasensi”? Konda wan woto.

¹⁵ Te u ta begi nöömö, nöö a o heepi u fuu „ta tja sitaafu ku pasensi” (Lom. 12:12). Jehovah sabi andi ta miti dee dinima fëën, nöö a ta jei de te de ta bai ta suku heepi nëën (Ps. 145:18, 19). Wan sisa de kai Kristie, di abi 29 jaa, söseei di ta du di pioniliwooko bi si taa sö di soni aki dë tuutuu. A bi bigi ta dë ku suwaki wan pasi vou sö. Di soni dë bi mbei taa a bi bigi ta booko hën hedi gaanfa seei. Bakaten a bi ko jei taa hën mama bi abi wan siki di o mbei a lasi libi. Kristie bi taki taa: „Hiniwan daka mi bi ta begi Jehovah faa da mi di taanga di mi bi abi fanöudu sö taa mi bi sa pasa di daka dë. Mi bi ta mbei möiti u go a hii dee komakandi, söseei u mi lei soni u Bëibel.” A bi taki tu taa: „Di begi di mi bi ta begi, bi ta heepi mi u mi pasa dee taanga pisiten dë. Mi bi sabi taa hii juu Jehovah bi dë ku mi, nöö di soni dë bi heepi mi u mi fii möön bunu. Hii fa ma bi ko bëtë wantewante, tökuseei Jehovah bi piki dee begi u mi, u di a bi heepi mi u ma ta fëëë möön.” A bunu fuu hoi a pakisei taa „Gadu sabi fa faa puu dee sëmbë dee ta libi bunu nëën wojo” a fuka.​—2 Pet. 2:9.

16. Faandi mbei u musu hakisi Jehovah faa heepi u fuu sa finga futu da tesi?

¹⁶ Hakisi Jehovah faa heepi i fii finga futu da tesi. U di u da zöndu libisëmbë, mbei hii juu u musu ta mbei taanga möiti u du soni di bunu. Saatan ta du hii soni di a sa du, u mbei soni ko möön taanga da u. A ta wooko ku fanafiti soni di sëmbë ta du u mbei piizii u poi di fasi fa u ta pakisei. Dee soni dë sa mbei u ta pakisei soni di an bunu, söseei de sa mbei u go du wan gaan zöndu.​—Maik. 7:21-23; Jak. 1:14, 15.

17. Andi u musu du baka te u hakisi Jehovah faa heepi u fuu finga futu da tesi? (Luku di peentje tu.)

¹⁷ Ee u kë finga futu da wan tesi, nöö u abi Jehovah fanöudu, sö taa a sa heepi u fuu ta du soni di bunu. Jesosi bi taki wan fanöudu soni di a bi lei dee bakama fëën unfa de musu begi. A bi taki taa: „Na disa u be soni pooba u e, ma puu u a di hogi maun dendu” (Mat. 6:13). Jehovah kë heepi u, ma u musu go suku heepi nëën. Te u suku heepi nëën te u kaba, nöö u musu mbei möiti tu fu koti pasi da soni di sa mbei u du wan gaan zöndu. U musu mbei möiti fu wa lesi soni, nasö luku soni di sa mbei u ko ta pakisei kumafa dee sëmbë u di goonliba u Saatan aki ta pakisei (Ps. 97:10). U sa ta pakisei soni di bunu te u ta lesi di Bëibel, söseei te u ta lei soni nëën. U musu nango a dee komakandi, söseei u musu ta du di peleikiwooko. Jehovah paamusi u taa te u ta du dee soni dë, nöö an o disa u u tesi musu wini u.​—1 Kol. 10:12, 13.

18. Andi hii u tuu musu ta du, te a nama ku begi?

¹⁸ Hiniwan fuu musu ta begi ta hakisi Jehovah faa heepi u fuu hoi useei nëën, möönmöön fa u ta libi a wan taanga pisiten aki. Seeka soni hiniwan daka fii sa ta begi. Jehovah kë fuu ’konda hii dee soni dee dë a u hati dëën’ te u ta begi ën (Ps. 62:8). Gafa Jehovah, nöö dëën tangi da hii dee soni dee a ta du. Hakisi ën faa da i degihati fii du di peleikiwooko. Begi ën faa heepi i ku dee fuka fii, söseei fii finga futu da tesi. Na mbei na wan sëmbë, söseei na mbei na wan soni tapa i fii ta begi Jehovah hii juu. Ma unfa Jehovah ta piki dee begi fuu? Woo taki u di soni aki a di woto di ta ko.