Djeesi di tjabukama—Nahum
1. Andi u sa lei u di Bëibel buku Nahum?
1 Dee bookobooko pisi u di awoo foto Ninifei, ta lei taa dee soni di di tjabukama Nahum bi taki a fesi, bi pasa tuu. A bi taki fa Jehovah bi o paka dee felantima fëën, nöö dee möön hogihati felantima fëën seei, an bi o sa feti ku ën (Nah. 1:2, 6). Te u öndösuku di tjabukama woto u Nahum aki, nöö a sa lei u sömëni soni di sa heepi u a di peleikiwooko.
2. Unfa u sa ta lei taa di bunu buka di u ta paaja, bunu?
2 Da wotowan kötöhati ku houpu: A di fosu kamian di buku u Nahum ta taki u di sitaafu di Ninifei, di nëbai foto u Asilia fu awooten bi o kisi (Nah. 1:1; 3:7). Di dee sëmbë u Jehovah bi jei di buka aki, de bi wai seei. Di në u Nahum kë taki „kötöhati”, nöö a bi da dee Dju di kötöhati taa dee felantima u de an bi o dë möön! Nahum bi taki tu taa Jehovah da „wan tjubi kamian te fuka dë” (Nah. 1:7). Useei ta paaja wan bunu buka te u ta peleiki, söseei u ta da wotowan taanga u suku tjubi a Jehovah.—Nah. 1:15.
3. Unfa u sa wooko ku woto nasö nöngöwoto leti kuma Nahum?
3 Woto ku nöngöwoto u lei sëmbë soni: Jehovah bi mbei Nahum taki fa di foto Ninifei bi o poi kaba a sösö, leti kumafa dee Asilia sëmbë bi poi di Egepiti foto Tebësi (No-amöni) (Nah. 3:8-10). Te u ta fan ku sëmbë u di poi di di hogi goonliba aki o poi, nöö u sa taki u dee tjabukama woto u Bëibel, u lei taa hii dee soni Jehovah ta taki, o pasa tuu. Kuma di dee Babilon sëmbë ku dee Media sëmbë bi ko u ko feti ku dee sëmbë u Ninifei a 632 Bi.K, hën gaan tjuba bi kai fuu di Tigilisi Lio te a bi booko dee peni u di foto tuwë. Dee peni dë bi ta mbei taa sëmbë an bi sa pasa go a di foto dendu. Hesihesi de bi tei di foto Ninifei, leti kumafa Jehovah bi taki a fesi.—Nah. 1:8; 2:6.
4. Unfa u sa mbei sëmbë fusutan gbelingbelin andi u ta taki te u dë a peleikiwooko?
4 Mbei sëmbë fusutan gbelingbelin andi i ta taki: Nahum bi sikifi di woto a söwan fasi taa hii soni bi dë gbelingbelin u fusutan (Nah. 1:14; 3:1). A di wan seei fasi u kë taki soni di an o taanga da sëmbë u fusutan (1 Kol. 14:9). Di fosu pasi te i miti wan sëmbë, nöö piki ën wantewante faandi mbei i ko nëën. Te i ta lei sëmbë soni u Bëibel, nöö heepi de u ko abi biibi a Jehovah ku di Wöutu fëën. Söseei heepi de u fusutan fa dee soni de ta lei fiti de tu.—Lom. 10:14.
5. Un paamusi u ta feni a di tjabukama woto u Nahum?
5 Di buku Nahum ta lei taa hii juu Nahum bi ta biibi taa dee soni Jehovah ta taki o pasa tuu. Möön di kaba u di goonliba u Saatan ta ko zuntu, möönmöön u ta feni kötöhati a dee soni dee Gadu taki. A taa: „Gaan fuka an o ko di u tu pasi möön.”—Nah. 1:9.