Di fosu womi ku di fosu mujëë

ANDI dë a di peentje aki di an bi dë a dee fosuwan? Wë, sëmbë dë a di peentje aki. Dee sëmbë aki da di fosu womi ku di fosu mujëë. Ambë mbei de? Wë Gadu. I sabi Gadu në u? Hën në da Jehovah. Di womi ku di mujëë de kai Adam ku Eva.

Luku fa Jehovah Gadu bi mbei Adam. A bi tei goondoti, hën a mbei wan telutelu womi sinkii. Hën a böö ventu go a di womi nusu, hën Adam ko a libi.

Jehovah Gadu bi a’ wan wooko da Adam. A bi piki Adam taa a musu da hii dee peipei mbeti wan në. Sonte Adam bi luku dee mbeti longi sö taa a bi sa da de në di fiti de. Ma di Adam bi ta da dee mbeti në, a si wan soni. I saandi a bi si ö?

Hii dee mbeti bi abi wan womi wan ku wan mujëë wan. Womi zaun ku mujëë zaun bi dë, nöö womi lëun ku mujëë lëun bi dë tu. Ma Adam an bi abi mujëë. Fëën mbei Jehovah mbei Adam duumi wan gaan duumi, hën a tei wan bandja papai bonu fëën. Jehovah mbei wan mujëë da Adam ku di bandja papai bonu dë, nöö hën a toon mujëë fëën.

Soni bi suti da Adam seei! Pakisei fa a bi suti da Eva taa a bi sa libi a sö wan hanse djai! De bi o sa pai miii, nöö de bi o libi suti makandi seei.

Jehovah bi kë u Adam ku Eva libi u teego. A bi kë taa de bi musu mbei hii di goonliba ko hanse leti kuma di djai u Eden. Adam ku Eva bi musu u wai seei te de bi ta pakisei fa de bi o du di wooko dë! Ja bi o feni taa a dë wan suti wooko u mbei goonliba toon wan hanse djai ö? Ma di piizii u Adam ku Eva an hoi tjatja dou seei. Boo luku faandi mbei.