Di soni mbei de lasi di tankamian u de

LUKU andi ta pasa aki. De jaka Adam ku Eva puu a di hanse djai u Eden. I sa’ faandi mbei ö?

U di de du wan gaan hogi. Fëën mbei Jehovah sitaafu de. I saandi da di hogi di Adam ku Eva du ö?

De du wan soni di Gadu bi piki de taa de an musu du. Gadu bi piki de taa de bi sa njan fuuta u hii pau u di djai. Ma Gadu bi piki de taa de an bi musu njan fuuta u wan u dee pau, ee nasö de bi o dëdë. Gadu bi hoi di pau dë fëën seei. Wë u sabi taa an bunu u tei woto sëmbë soni, na sö nö? Boo luku andi bi pasa.

Wan daka di Eva bi dë hën wanwan a di djai, hën wan sindeki ko fan ku ën. Pakisei pikisö! A piki Eva faa njan fuuta u di pau di Gadu bi piki de taa de an musu njan. Wë Jehovah an bi mbei sindeki u fan. Hën da wan sëmbë bi musu u mbei di sindeki fan. Ambë bi dë di sëmbë dë?

An bi dë Adam. Wë nöö a bi musu u dë wan engel. I sabi jeti taa Jehovah bi mbei dee engel gaanduwe a fesi ufö a mbei goonliba. Wa sa si dee engel ku wojo. Wan u de bi ko a’ gaanfasi. A bi bigi pakisei taa a musu dë wan tiima kuma Gadu. Nöö a bi kë taa sëmbë bi musu ta haikëën ka u de haika Jehovah. Hën bi dë di engel di bi mbei di sindeki fan.

Di engel dë bi ganjan Eva. Eva bi biibi ën di a piki ën taa a bi o ko kuma Gadu ee a njan di fuuta. Fëën mbei a njan, hën Adam njan tu. Adam ku Eva pasa Gadu buka, nöö fëën mbei de bi lasi di gaan waiti djai ka de bi ta libi.

Ma wan daka Gadu o mbei taa hii di goonliba ko hanse baka kuma di djai u Eden. Bakaten woo lei unfa i sa heepi ku di wooko dë. Ma boo buta mëni nöunöu a di soni di pasa ku Adam ku Eva.