Mëni di woto aki

Jehovah an o disa takuhati sëmbë poi di Paladëisi. Dee mati fëën wanwan tö o libi naandë. Andi o pasa ku dee takuhati sëmbë? Fuu feni di piki, un boo luku di woto u Noa. A pasa sömëni dusu jaa kaa di Noa bi dë a libi. A bi dë wan bunu womi di hii juu kaa bi ta mbei taanga möiti u du dee soni Jehovah kë. Ma dee woto sëmbë u goonliba bi ta du hogi soni. Hën mbei Jehovah bi piki Noa taa a bi o mbei wan gaan gindi tjuba kai, kii dee hogi sëmbë tuu. A bi piki Noa taa a bi musu mbei wan gaan gindi boto, di de bi ta kai wan ark. Sö wan fasi, hën ku di wosudendu fëën an bi o dëdë te di gaan gindi tjuba bi o ko.​—Kenesesi 6:9-18.

Noa ku di wosudendu fëën bi mbei di ark. Noa bi ta bai dee sëmbë taa di gaan gindi tjuba bi o ko. Ma de an bi haikëën. De bi ta du dee hogi soni u de go dou. Di de kaba mbei di ark, Noa bi tja mbeti go a di ark dendu. Hën ku di wosudendu fëën seei go a di ark dendu. Hën wë Jehovah tja wan gaan gindi tjuba ko. Di tjuba bi kai 40 daka ku 40 ndeti. Hën di wata singi hii di goonliba tuu piii.​—Kenesesi 7:7-12.

Dee takuhati sëmbë bi dëdë, ma Noa ku di wosudendu fëën bi pasa libilibi. Jehovah tja de pasa di gaan wata dë libilibi, go a wan goonliba teka hogidu an bi dë möön (Kenesesi 7:22, 23). Di Bëibel taki taa wan juu o dou baka, ka Jehovah o kii dee sëmbë dee an ta libi fa a kë. Dee bunuhati sëmbë an o dëdë. De o libi u teego a di Paladëisi a goonliba.​—2 Petuisi 2:5, 6, 9.

Nöunöu sömëni sëmbë ta du hogi. Hogi fuu goonliba. Hii juu, Jehovah ta manda dee Kotoigi fëën u bai dee sëmbë a soni. Tökuseei, gaansë u de an ta haika Jehovah buka. De an ta bia libi möönsö. De an kë tei di buka u Gadu, te a piki de andi bunu ku andi an bunu. Andi o pasa ku dee sëmbë aki? De o bia libi wan daka u? Gaansë u de an o bia libi möönsö. Di juu ta dou ka Gadu o kii dee takuhati sëmbë. De an o libi möön seei.​—Psalöm 92:7.

Di goonliba an o booko, a o ko toon wan paladëisi. Dee sëmbë dee ko toon mati u Gadu o libi u teego a di Paladëisi a goonliba.​—Psalöm 37:29.