Dee mati u Gadu ta du bunu soni

Te i abi wan mati di i lobi nasö di i ta lesipeki, nöö i ta biinga u dë kuma hën. Di Bëibel taki taa: „Jehovah dë wan bunu Gadu, söseei a ta du soni a wan leti fasi” (Psalöm 25:8). Ee u kë dë wan mati u Gadu, nöö u musu du bunu soni, söseei u musu libi a wan leti fasi. Bëibel taki taa: ’Un dee lobi mii, un musu mbei möiti be un ko kuma Gadu, kumafa wan mii kë djeesi ën tata a soni. Un musu lobi unu seei gaanfa e’ (Efeise 5:1, 2). Woo go luku wanlö fasi fa u sa du dee soni dë:

Heepi wotowan. „Un musu du bunu da hii sëmbë.”​—Galasia 6:10.

Wooko taanga. „Ee wan sëmbë i bi ta fufuu, nöö be i disa. Be i go suku bumbuu wooko ta du.”​—Efeise 4:28.

Dë limbolimbo a sinkii ku söseei a di fasi fa i ta libi. „Nöö un boo disa dee soni dee ta poi u hati ku dee ta poi u sinkii e. Un boo ta fëëë Gadu te u ta libi apaiti dëën gbelingbelin söndö föutu.”​—2 Kolenti 7:1.

Lobi dee famii fii, söseei lesipeki de. „Hiniwan womi musu lobi ën mujëë kuma hënseei sinkii. Nöö söseei tu hiniwan mujëë musu lesipeki ën manu. Un dee mii, un musu piki unu mama ku unu tata buka e.”​—Efeise 5:33–6:1.

Lobi wotowan. „Un dee lobi mati u mi dë, un boo lobi u seei e. Biga Masa Gadu hën abi lobi.”​—1 Johanisi 4:7.

Da jesi a dee wëti u lanti. „Hii sëmbë musu ta saka a dee tii u lanti basu e . . . Nöö un musu ta paka de kumafa a fiti. Ee möni fuun da de, nöö un da de e.”​—Loomë 13:1, 7.