De aba Joodan Lio

LUKU fa dee Isaëli sëmbë ta aba Joodan Lio! Ma unfa a du ko taa di lio dëë? U di gaan tjuba ta kai a di pisiten dë u di jaa, mbei wan tu miniti a fesi di lio bi fuu seei. Ma di wata kule go! Nöö dee Isaëli sëmbë ta aba a dëëdëë goon leti kumafa de bi aba di Bë Ze! Naasë hii di wata kule go? Wë boo go luku.

Di di juu dou u dee Isaëli sëmbë aba Joodan Lio, hën Jehovah piki Josua faa taki da dee sëmbë taa: ’Dee mindima musu tei di Këdë u di Buka, nöö de musu go a u fesi. Te de buta de futu a di wata u Joodan Lio, nöö di wata o tapa kule.’

Hën dee mindima hopo di Këdë tei ta waka a dee sëmbë fesi. Di de dou a Joodan, dee mindima waka tololoo go a di wata dendu. Di wata ta kule taanga seei, nöö di kamian fundu tu. Ma fa i si futu u de nama a di wata, hën di wata tapa kule! A dë wan foombo soni! Jehovah tapa di wata a liba së. U di soni dë mbei hesihesi di lio wata an ko dë u si möön!

Hën dee mindima dee ta tja di Këdë, go langalanga a leti mindi u di dëëdëë lio. I ta si de a di peentje u? Di juu ten de taanpu naandë, hii dee Isaëli sëmbë waka tololoo aba Joodan Lio a dëëdëë goon!

Di hii sëmbë aba kaa, hën Jehovah piki Josua faa taki da 12 taanga womi taa: ’Un go a di lio ka dee mindima dë taanputaanpu ku di Këdë u di Buka. Un tei 12 sitonu naandë, nöö un buta de a wan hipi ka hii unu tuu o dë tide ndeti. Nöö bakaten, te dee mii fuunu o hakisi unu andi da dee sitonu aki, nöö un musu piki de taa di wata bi tapa kule di di Këdë u Jehovah bi aba Joodan. Dee sitonu o mbei un ta mëni di foombo soni aki!’ Söseei Josua buta 12 sitonu ka dee mindima bi taanpu a di goon u di lio.

Te u kaba fëën, Josua piki dee mindima dee ta tja di Këdë u di Buka taa: ’Un kumutu a di Joodan.’ Di de kaba du sö kaa, hën di lio bigi kule baka.