Josua toon fesima

MOSESI kë go ku dee Isaëli sëmbë a Kaana. Fëën mbei a hakisi Jehovah taa: ’Jehovah o, be mi aba Joodan lio fu mi sa si di bunu köndë baa.’ Ma Jehovah piki ën taa: ’A tjika awaa! Na taki di soni dë möön!’ I sa’ faandi mbei Jehovah piki ën sö u?

U di Mosesi an bi da Jehovah gaandi di a bi naki di sitonu sö taa dee Isaëli sëmbë bi sa feni wata u bebe. Hën ku Alon tuu an bi da Jehovah gaandi. De an bi piki dee sëmbë taa Jehovah hën bi mbei wata kumutu a di sitonu. U di soni dë mbei Jehovah piki de taa an bi o mbei de go a Kaana.

Fëën mbei wan tu liba baka di Alon dëdë, Jehovah piki Mosesi taa: ’Kai Josua ko, nöö be a taanpu a fesi u Eliazali di Gaan Mindima ku dee sëmbë. Nöö a hii dee sëmbë dë fesi i musu konda taa Josua toon fesima.’ Mosesi du leti kumafa Jehovah piki ën, kumafa i ta si a di peentje.

Hën Jehovah piki Josua taa: ’I musu a’ degihati, na fëëë e. Ju wë o tja dee Isaëli sëmbë go a di köndë Kaana di mi paamusi de, nöö mi o dë ku i.’

Bakaten Jehovah piki Mosesi faa subi go te a di kuun hedi de kai Neebo a di köndë Moab. A di kuun hedi dë Mosesi sa si di hanse köndë Kaana te a luku dou di woto banda u Joodan Lio. Hën Jehovah taki taa: ’Disi da di köndë di mi paamusi dee bakamii u Abahamu, Isaki ku Jakopu. Mi mbei i si di köndë, ma ja o go nëën dendu.’

A di kuun hedi dë Mosesi dëdë. A bi a’ 120 jaa. A bi dë kaakaa jeti, nöö wojo fëën an bi dungu jeti. Dee sëmbë bi tjali seei, nöö de bi ta këë u di Mosesi dëdë. Ma de bi wai taa Josua toon fesima u de.