Sëmbë di dëdë o weki baka u di Jesosi paka di lusupaima da u

Di mëni di u ta mëni di dëdë u Jesosi, ta da u di okasi u pakisei u dee gaan bunu dee woo feni a di ten di ta ko, u di a paka di lusupaima da u. Wan u dee bunu aki, da di weki di sëmbë di dëdë o weki baka. Nöiti Jehovah bi kë taa libisëmbë bi musu ta dëdë. Fëën mbei di tjali di u ta tjali te wan lobiwan fuu dëdë, da wan u dee möön hati soni di ta miti u (1Ko 15:26). A bi hati Jesosi seei di a bi si fa dee bakama fëën bi ta këë u di Lazalosi bi dëdë (Jo 11:33-35). U di Jesosi dë soifi kuma hën Tata, mbei u sa dë seiki taa a ta hati Jehovah tu, te a ta si taa u ta tjali u di wan lobiwan fuu dëdë (Jo 14:7). Jehovah dë kabakaba seei ta wakiti di ten ka a o weki dee dinima fëën dee dëdë ko a libi baka, nöö sö nöö useei musu ta wakiti u si di ten dë tu.​—Jöpu 14:14, 15.

Ma u di Jehovah da wan Gadu di an ta du soni fanjanfanjan, mbei u sa biibi taa te a o weki dee sëmbë dee dëdë, nöö soni an o waka fanjanfanjan tu (1Ko 14:33, 40). Sëmbë an o ta hoi dëdë wosu möön, ma kandë de o ta seti soni u ta da dee sëmbë dee bi dëdë wan suti ko. I ta pakisei fundu u di weki di sëmbë o weki ko a libi baka, möönmöön a di pisiten te i ta tjali u di wan sëmbë fii dëdë u? (2Ko 4:17, 18). I ta da Jehovah tangi u di lusupaima, söseei u di a konda da u a di Wöutu fëën taa dee sëmbë dee dëdë o ko a libi baka u?​—Kol 3:15.

• Undi u dee mati fii nasö famii fii di dëdë i ta wakiti u si baka?

• Undi u dee sëmbë di Bëibel ta taki soni fëën i kë miti seei fii sa fan ku ën?