Unfa u sa du di diniwooko fuu möön bunu​—Tapa u lei wan sëmbë soni u Bëibel ee an nango a fesi a di biibi

FAANDI MBEI A DË FANÖUDU: Sëmbë musu kai di në u Jehovah u de sa feni tjubi (Lo 10:13, 14). Tökuseei, na hii dee sëmbë dee kë lei soni u Bëibel ta kë hoi dee wëti u Jehovah. U ta buta hii u ten a di peleikiwooko u heepi dee sëmbë dee kë tooka soni a de libi tuutuu u Jehovah feni de bunu. Ee u ta lei wan sëmbë soni u Bëibel wan hii pisiten kaa, hën an ta tooka na wan soni nëën libi, nöö a bi o dë wan köni soni fuu disa di sëmbë dë, nöö u go suku dee sëmbë dee Jehovah ta hai ko nëën, söseei dee a ta hai ko a di ölganisaasi fëën (Jo 6:44). Ma ee te u kaba fëën di sëmbë ta lei gbelingbelin taa a dë wan u „dee sëmbë dee a kai da u de feni di libi u teego”, nöö u sa bigi ta lei ën soni u Bëibel baka.​—Tja 13:48.

FA U MUSU DU ËN:

• Gafa di studie fii u di a kë lei soni u di tuutuu lei.​—1Ti 2:4

• Lei ën faandi mbei a dë fanöudu u du dee soni dee a ta lei. ​—Lu 6:46-49

• Konda di woto u Jesosi dëën u di womi di bi ta paandi soni, nöö hakisi ën be a pakisei luku ee andi ta tapëën faa du dee soni dee a ta lei.​—Mt 13:18-23

• Piki ën a wan köni fasi faandi mbei ja o lei ën soni u Bëibel go dou

• Piki ën taa joo ta ko luku ën wanwan pasi fii dëën taanga, nöö piki ën tu taa i sa bigi lei ën soni u Bëibel baka, ee a o ta du dee soni dee a ta lei

LUKU DI FËLÖN, NÖÖ BAKA DI DË PIKI DEE HAKISI AKI:

• Andi i si a di fëlön di ta lei taa di studie an bi ta mbei möiti u go a fesi a di biibi?

• Unfa di peleikima bi heepi di studie faa ko fusutan taa a musu tooka soni nëën libi?

• Unfa di peleikima bi mbei di studie ko fusutan taa a sa bigi lei ën soni u Bëibel baka, te a kë?