WOTO 2

Fan kumafa i guwenti fan

2 Kolenti 2:17

DI SONI DI I MUSU DU: Fan kumafa i guwenti fan, nöö be dee haikama si taa di woto di i ta konda dë fanöudu da i, be de si taa a kumutu a i hati, söseei taa i kë lei de wan soni.

FA I MUSU DU ËN:

Begi, nöö seeka iseei bunu. Begi Jehovah faa heepi i u na buta pakisei a di senuwe fii, ma fii buta pakisei a dee soni dee joo taki. Hoi dee möön fanöudu soni dee i kë tja ko a fesi a pakisei. Taki dee soni kumafa i fusutan de, ma na lesi de langalanga kumutu a di pampia.

Ee joo lesi wan pisi a di Bëibel nasö a wan buku, nöö lesi ën sömëni pasi a fesi fii sa lesi ën söndö föutu. Ee wan sëmbë hën taki di pisi di i joo lesi, nöö lesi ën ku fii, ma na a wan fasi di o puu sëmbë pakisei.
Dee soni dee joo taki musu kumutu a i hati. Pakisei faandi mbei a dë fanöudu u dee haikama jei di soni di i kë konda da de. Di fasi fa joo taanpu ku dee soni dee joo ta mbei ku i maun, söseei ku di fasi fa joo ta luku de nasö di fasi fa joo ta fan, o lei taa i ta booko i hedi ku de, söseei taa i abi sutifasi.

Fan kumafa i guwenti fan. Ee i kë u dee sëmbë si taa dee soni dee i ta taki dë fanöudu, nöö i musu fan a wan lesipeki fasi, söseei dee soni dee joo taki musu dë gbelingbelin u fusutan, nöö i musu ta fan di töngö bunu tu.
Luku dee haikama. Ee a fiti, nöö i sa luku wan sëmbë nëën wojo. Te i ta hoi wan taki, nöö wanwan pasi i sa ta luku wan kodo sëmbë nöö, ka fii ta luku hii dee sëmbë lontu ko kai.