WOTO 8

Konda woto u heepi sëmbë u fusutan dee soni dee i kë lei de

Mateosi 13:34, 35

DI SONI DI I MUSU DU: Konda woto di o hai dee haikama pakisei ku di an o taanga da de u fusutan, söseei di o lei de wan fanöudu soni.

Konda woto di an taanga u fusutan. Te Jesosi bi ta lei sëmbë soni, nöö an bi ta taki u soni di bi taanga u fusutan, ma a bi ta taki u soni di sëmbë bi sabi, u heepi de u de bi sa ko fusutan soni di bi taanga da de u fusutan. Nöö di wan seei soni u musu du tu. Na taki te a hia soni di o mbei di woto di i ta konda taanga u fusutan. Di woto di joo konda musu nama ku di soni di i kë lei dee haikama. Te i ta du ën sö, nöö ja o buuja dee haikama.

I musu ta luku soni. Ta luku andi ta pasa a di hii daka libi, ta lei soni a dee buku fuu, söseei ta haika bunu te sëmbë di sa’ u da lei ta hoi wan taki. Ee i ta du sö, nöö i sa sikifi woto di i sa wooko ku de u lei sëmbë soni. I sa tjubi de a wan kamian, kuma wan computer sö, ka i sa feni de te i abi de fanöudu.
Pakisei dee haikama fii. Konda woto u soni di dee haikama sabi, ku soni di de guwenti. Köni be dee woto dee joo konda a mbei sen kisi dee sëmbë nasö taa de fii wan fasi.
Konda woto u lei sëmbë dee möön fanöudu soni. Buta pakisei a dee fanöudu pisi u di woto, ma na buta pakisei a dee pisi dee an dë sö fanöudu. Sölugu taa dee haikama an mëni di woto nöö, ma de musu mëni di soni di i bi kë lei de ku di woto tu.