WOTO 11

Dë fajafaja

Loomë 12:11

DI SONI DI I MUSU DU: Dë fajafaja te i ta fan, fii sa da dee haikama degihati u du dee soni di de lei.

Dee soni dee i ta taki musu dou i hati. Te i ta seeka iseei u hoi wan taki, nöö pakisei fundu unfa di bosikopu fii dë fanöudu tjika. I musu sabi dee soni dee joo taki bunu, fii sa taki de kumutu a i hati.
Pakisei dee haikama fii. Pakisei un wini de o feni u di soni di joo lesi da de, nasö di joo lei de. Pakisei unfa i sa hoi di taki a sö wan fasi taa dee haikama sa möön tei dee soni dee i kë lei de u bigi.
Di taki fii an musu dë tjalitjali. I musu fan fajafaja. Dee soni dee joo ta mbei ku i maun ku i fesi, musu mbei dee haikama si unfa i ta fii u di woto di i ta konda.

Köni be ja ta mbei di wan seei soni ku i maun nöömö, nasö dee haikama an o buta pakisei a di bosikopu fii möön. Dee soni dee joo ta mbei ku i maun ku i fesi musu fiti. I musu fan fajafaja, möönmöön te i ta taki u wan fanöudu soni, söseei te i kë da dee haikama degihati u du wan soni. Na fan fajafaja a hii di taki fii, nasö dee haikama o ko wei u haika i.