WOTO 37
Andi di Bëibel ta taki u möni ku wooko?
I bi booko i hedi wan daka kaa ku wooko nasö möni ö? A sa dë wan taanga soni da u fuu ta feni dee soni dee u abi fanöudu, söseei fuu ta dini Jehovah a di fasi fa a kë, a di wan seei ten. Di Bëibel abi lai di sa heepi u.
1. Andi di Bëibel ta taki u wooko?
Gadu kë fuu ta piizii ku di wooko di u ta du. Di Bëibel ta taki taa „di möön bunu soni di wan libisëmbë sa du . . . hën da u piizii ku di taanga wooko fëën” (Peleikima 2:24). Jehovah ta wooko taanga. Te u ta wooko taanga leti kuma Jehovah, nöö a o ta wai ku u, söseei woo ta fii bunu.
Wooko dë fanöudu. Ma nöiti a musu ko dë di möön fanöudu soni möön di dini di u ta dini Jehovah (Johanisi 6:27). Jehovah paamusi u taa te u ta buta di dini fëën a di fosu kamian a u libi, nöö a o da u hii dee woto soni dee u abi fanöudu.
2. Unfa u musu ta si möni?
Di Bëibel ta taki taa „möni” da wan heepi, ma a ta piki u tu taa möni wanwan an o mbei u dë waiwai tuutuu (Peleikima 7:12). Fëën mbei di Bëibel ta bai u fu wa lobi möni, ma fuu dë „tifihedi ku dee soni dee u abi kaa”. (Lesi Hebelejën 13:5.) Te u dë tifihedi ku dee soni dee u abi, nöö wa o ta abi bookohedi u di u ta suku möön soni. Di soni dë o mbei taa wa o mbei paima di an dë fanöudu (Nöngö 22:7). Boiti di dë, u ta köni tu fu wa go pëë möni pëë, u di u kë ko gudu hesihesi.
3. Unfa u sa wooko ku di möni fuu a wan bunu fasi?
Jehovah da wan Gadu di lo’ u da sëmbë soni, nöö u ta djeesi ën te u „lo’ u da sëmbë soni”, söseei te u ta dë „kabakaba u paati andi u abi ku wotowan” (1 Timoteo 6:18). U ta lei taa u ta wooko ku di möni fuu a wan bunu fasi, te u ta heepi di kemeente ku woto sëmbë di abi heepi fanöudu, möönmöön dee baaa ku dee sisa fuu a di biibi. Jehovah an ta buta pakisei a di hia möni di u ta da, ma a ta buta pakisei a di soni mbei u ta da. Te u ta da soni ku hii u hati, nöö woo ta dë waiwai, söseei Jehovah o ta wai ku u tu.—Lesi Tjabukama 20:35.
WOTO SONI DI I SA LEI
Woo luku dee wini dee u ta feni te u ta si wooko kumafa Jehovah kë fuu si ën, söseei te u dë tifihedi ku dee soni dee u abi.
4. Tja gafa ko da Jehovah ku di fasi fa i ta wooko
Di dë di u ku Jehovah dë mati musu mbei u ta si wooko kumafa Jehovah ta si ën. Pëë di FËLÖN, nöö piki dee hakisi aki.
Andi i lobi u di fasi fa Jason bi ta tja hënseei a wooko, ku di fasi fa a bi ta du di wooko fëën?
Andi bi heepi ën u di wooko fëën an bi ko dë di möön fanöudu soni dëën?
Lesi Kolosën 3:23, 24, nöö piki di hakisi aki:
Faandi mbei a dë fanöudu fuu ta du di wooko fuu ku hii u hati?
Wooko dë fanöudu. Ma nöiti u musu mbei a ko dë di möön fanöudu soni möön di dini di u ta dini Jehovah
5. U ta feni wini te u dë tifihedi
Sömëni sëmbë ta suku u ko abi gaan hia möni. Ma di Bëibel ta piki u wan woto soni. Lesi 1 Timoteo 6:6-8, nöö piki di hakisi aki:
Andi di Bëibel ta da u taanga fuu du?
Aluwasi wa abi hia soni, tökuseei u sa ta dë waiwai. Pëë di FËLÖN, nöö piki di hakisi aki.
Andi bi mbei dee sëmbë u dee wosudendu a di fëlön bi ta dë waiwai, hii fa de an bi gudu?
Ma unfa a dë ee u abi hia soni kaa, ma u kë möön? Jesosi bi konda wan woto u lei u un hogi di soni aki sa tja ko da u. Lesi Lukasi 12:15-21, nöö piki di hakisi aki:
Andi i lei a di woto u Jesosi?—Luku vers 15.
Lesi Nöngö 10:22 ku 1 Timoteo 6:10. Baka di dë, nöö piki dee hakisi aki:
Andi i si kuma da di möön fanöudu soni? Fii ku Jehovah dë mati, naa fii abi hia möni? Faandi mbei i taki sö?
Un bookohedi a ta tja ko da wan sëmbë te a ta suku u ko abi hia möni?
6. Jehovah o da u dee soni dee u abi fanöudu
Te u abi bookohedi a di së u möni nasö wooko soni, nöö di soni dë sa lei unfa u ta biibi Jehovah tjika. Pëë di FËLÖN fii si andi u sa du te u abi dee lö bookohedi aki, nöö piki dee hakisi aki.
Un tesi bi ta miti di baaa?
Andi a bi du faa bi sa pasa di tesi dë?
Lesi Mateosi 6:25-34, nöö piki di hakisi aki:
Andi Jehovah paamusi dee sëmbë dee ta lei taa de lobi ën möön hii woto soni?
SO SËMBË TA TAKI TAA: „Mi musu wooko taanga u sölugu dee sëmbë u mi wosudendu. Ma o sa nango a dee komakandi hiniwan wiki.”
Un tëkisi a Bëibel ta mbei i biibi taa te i buta di dini u Jehovah a di fosu kamian a i libi, nöö a dë di möön bunu soni di i ta du?
ANDI I LEI?
Möni ku wooko dë fanöudu, ma de an musu mbei wa dini Jehovah kumafa u musu dini ën.
Andi i bi o piki?
Andi sa heepi i fii ta si wooko kumafa Jehovah kë fuu si ën?
Un wini joo feni te i dë tifihedi ku dee soni dee i abi?
Unfa i sa lei taa i ta biibi taa Jehovah o da dee sëmbë fëën dee soni di de abi fanöudu?
WOTO SONI DI I SA LUKU
Lesi di woto aki fii si ee di Bëibel ta taki taa möni da Didibi.
Lesi di woto aki fii si unfa u sa wooko ku di möni fuu a wan fasi di ta kai ku Gadu.
„San Bijbel e taki fu a gi di yu e gi sma sani?” (Woto a di website fuu)
Lesi di woto aki fii si ee a dë wan hogi soni te wan sëmbë ta pëë möni pëë.
Lesi di woto aki fii si andi bi heepi wan womi di bi ta pëë möni pëë, söseei di bi ta fufuu faa tooka hën libi.
„Mi ben lobi asi streilon” (A Waktitoren, 1 u ëlufumu-liba 2011)