Andi di Bëibel ta taki u di duumi di womi ku mujëë ta duumi ku deseei?

Sömëni sëmbë ta sen u taki u di duumi di womi ku mujëë ta duumi ku deseei. Ma, te di Bëibel ta taki fëën, nöö a ta taki fëën a wan lesipeki fasi. Dee soni di di Bëibel ta taki u di duumi di womi ku mujëë ta duumi ku deseei, ta tja wini ko da u, nöö de dë fanöudu soni. Boiti di dë, u di di Bëibel kumutu a Jehovah, di Gadu di mbei u, mbei a sabi andi möön bunu da u. A ta piki u unfa u musu tja useei u libi fuu sa ta kai ku ën, söseei a ta piki u andi sa heepi u fuu sa dë waiwai u teego.

1. Unfa Jehovah ta si di duumi di womi ku mujëë ta duumi ku deseei?

Di duumi di womi ku mujëë ta duumi ku deseei da wan kado di Jehovah da libisëmbë. Nöö a kë u womi ku mujëë di tööu ta piizii fëën. Di kado aki an ta da womi ku mujëë di tööu di okasi u pai mii nöö a kaba, ma a ta da de pasi tu u lei unfa de lobi deseei a wan apaiti fasi tjika, söseei unfa de ta fii da deseei. Fëën mbei di Wöutu u Gadu ta taki taa: „Wai ku di mujëë fii di i tei sensi di bi njönku” (Nöngö 5:18, 19). Jehovah kë u Keesitu sëmbë di tööu hoi deseei a di sëmbë di de ku ën tööu, nöö nöiti de musu waka da deseei.​—Lesi Hebelejën 13:4.

2. Andi da fanafiti libi a di së u manu ku mujëë soni?

Di Bëibel ta piki u taa „sëmbë di ta libi fanafiti a di së u manu ku mujëë soni an o feni di Könuköndë u Gadu” (1 Kolenti 6:9, 10). Dee sëmbë dee sikifi di Bëibel a Giikitöngö wooko ku di wöutu porneya, di ta lei andi da fanafiti libi a di së u manu ku mujëë soni. Porneya nama ku (1) te tu sëmbë di an tööu ta duumi ku deseeia, (2) te womi ku womi ta duumi ku deseei, nasö te mujëë ku mujëë ta duumi ku deseei, ku (3) te womi nasö mujëë ta duumi ku mbeti. Te wa ta libi „fanafiti libi a di së u manu ku mujëë soni”, nöö u ta mbei Jehovah ta wai ku u, söseei a ta tja wini ko da u tu.​—1 Tesalonika 4:3.

WOTO SONI DI I SA LEI

3. Köni ku fanafiti libi a di së u manu ku mujëë soni

Wan womi di de bi ta kai Josëfu, di bi ta hoi hënseei a Jehovah, bi piki nönö di wan mujëë bi ta kai ën u duumi ku ën. Lesi Kenesesi 39:1-12, nöö piki dee hakisi aki:

• Andi bi da Josëfu di degihati faa kule go? ​—Luku vers 9.

• I si kuma Josëfu bi du di möön bunu soni ö? Faandi mbei i taki sö?

FËLÖN: Kule da fanafiti libi a di së u manu ku mujëë soni (5:06)

Jehovah kë taa hii u tuu musu kule da fanafiti libi a di së u manu ku mujëë soni. Lesi 1 Kolenti 6:18, nöö piki dee hakisi aki:

• Andi sa mbei taa wan sëmbë go libi fanafiti libi a di së u manu ku mujëë soni?

• Unfa i sa kule da fanafiti libi a di së u manu ku mujëë soni?

4. I sa finga futu da tesi

FËLÖN: Te i ta lesi Bëibel, nöö a o heepi i fii köni ku fanafiti libi a di së u manu ku mujëë soni (3:02)

• Andi di baaa a di fëlön bi du di a ko fusutan taa dee soni di a bi ta pakisei ku dee soni di a bi ta du, bi sa mbei a waka da di mujëë fëën?

So juu Keesitu sëmbë seei di ta dini Jehovah ku hii de hati, musu mbei taanga möiti u na ta pakisei soni di an bunu. Andi i sa du fu ja ta pakisei soni di nama ku fanafiti libi a di së u manu ku mujëë soni? Lesi Filipi 4:8, nöö piki dee hakisi aki:

• Andi u musu ta pakisei?

• Unfa di lesi di woo ta lesi di Bëibel ku di du di woo ta du hia soni a di dini u Jehovah, sa heepi u fu wa go du wan zöndu?

5. Dee wëti u Jehovah ta tja wini ko da u

FËLÖN: Si di hogi di sa miti i (9:31)

• Te i luku di tëkisi aki, nöö unfa a du ko taa soni bi miti di njönku kijoo?​—Luku Nöngö 7:8, 9.

• Kumafa Nöngö 7:23, 26 ta taki, nöö hogi sa miti sëmbë di ta libi fanafiti libi a di së u manu ku mujëë soni. Un bookohedi wa o abi te wa ta libi fanafiti a di së u manu ku mujëë soni?

• Te u ta tja useei a wan fasi di fiti a di së u manu ku mujëë soni, nöö un bunu woo feni a di ten di ta ko?

Te u luku andi di Bëibel ta taki u di duumi di womi ku womi ta duumi ku deseei nasö u di duumi di mujëë ku mujëë ta duumi ku deseei, nöö so sëmbë ta feni taa Gadu an lobi u. Ma Jehovah, di Gadu u lobi, kë u hii sëmbë feni di libi u teego. Ee u kë feni di libi dë, nöö u musu ta hoi useei a dee wëti fëën. Lesi 1 Kolenti 6:9-11, nöö piki di hakisi aki:

• Di duumi di womi ku womi ta duumi ku deseei, ku di duumi di mujëë ku mujëë ta duumi ku deseei da di wan kodo soni di Jehovah an lobi ö?

Ee u kë u libi fuu ta kai ku Jehovah, nöö hii u tuu musu tooka soni a u libi. Di tooka di woo tooka soni a u libi o tja wini ko da u ö? Lesi Psalöm 19:8, 11, nöö piki dee hakisi aki:

• I si kuma dee wëti u Jehovah taanga poi u hoi ö? Faandi mbei i taki sö?

ANDI I LEI?

Di duumi di womi ku mujëë ta duumi ku deseei da wan kado di Jehovah da womi ku mujëë di tööu u de ta piizii ku deseei.

Andi i bi o piki?

• Andi da fanafiti libi a di së u manu ku mujëë soni?

• Andi o heepi u fuu wa go libi fanafiti libi a di së u manu ku mujëë soni?

• Un wini u ta feni te u ta hoi useei a dee wëti u Jehovah?

WOTO SONI DI I SA LUKU

Lesi di woto aki fii si faandi mbei Gadu kë taa wan womi ku wan mujëë di kë libi ku deseei musu tööu.

„San Bijbel e taki fu libi nanga makandra sondro fu trow” (Woto a di website fuu)

Lesi di woto aki fii si taa di taki di di Bëibel ta taki taa womi ku womi an musu duumi ku deseei, nasö taa mujëë ku mujëë an musu duumi ku deseei an kë taki taa u musu ta buuse dee lö sëmbë dë.

„A fowtu fu de wan homo?” (Woto a di website fuu)

Lesi di woto aki fii si unfa dee wëti u Gadu dee a da u ta tjubi u da hii dee peipei fasi fa sëmbë ta duumi ku deseei.

„Orale seks na seks trutru?” (Woto a di website fuu)

Lesi di woto „Den sori lespeki gi mi”, fii si andi bi heepi wan womi di bi ta duumi ku woto womi faa tooka ko ta libi a wan fasi di ta kai ku Gadu.

„Bijbel e kenki sma libi” (A Waktitoren, 1 u piki-deewei-liba 2011)