Andi di Bëibel ta taki u sëmbë di tööu ku sëmbë di an tööu?

A so föluku, sëmbë ta biibi taa te wan sëmbë tööu ufö a sa ta dë waiwai. Ma tökuseei, na hii sëmbë di tööu ta dë waiwai, söseei na hii dee sëmbë dee an tööu ta dë tjalitjali. Di Bëibel ta taki taa aluwasi i tööu nasö ja tööu, hii de tuu da soni di Jehovah ta feni bunu.

1. Andi da wantu wini di wan sëmbë ta feni te an tööu?

Di Bëibel ta taki taa: „Di sëmbë di tööu ta du bunu, ma di sëmbë di an tööu ta du möön bunu.” (Lesi 1 Kolenti 7:32, 33, 38.) Na un futu wan sëmbë di an tööu ta „du möön bunu”? Wan Keesitu sëmbë di an tööu, an abi di faantiwöutu u sölugu da wan woto sëmbë. Fëën mbei de abi möön hia ten u du möön hia soni. So sëmbë di an tööu sa go a wan woto köndë u go paaja di bunu buka. Ma di möön fanöudu soni, hën da de ta abi möön hia ten u du soni u de ku Jehovah ko dë möön gaan mati.

2. Andi da wantu wini di wan sëmbë ta feni te a tööu a lanti?

Te wan sëmbë tööu, nöö di soni dë sa mbei a feni sömëni wini, leti kumafa wan sëmbë di an tööu ta feni sömëni wini. Di Bëibel ta taki taa „tu sëmbë bunu möön wan” (Peleikima 4:9). Fëën mbei te wan womi ku wan mujëë di tööu ta libi ku dee mama wëti u Bëibel a di tööu libi u de, nöö soni o ta waka bunu da de. Sëmbë di tööu a lanti ta paamusi deseei taa de o lobi deseei u nöömö, de o ta lesipeki deseei, söseei de o ta sölugu da deseei. Di soni aki mbei taa de an ta fëëë taa de o paati u pikipiki soni hedi, kumafa a ta pasa ku sëmbë di ta libi ku deseei, ma de an tööu. Te i tööu, nöö un tu sëmbë sa kiija dee mii fuunu a wan möön bunu fasi.

3. Unfa Jehovah ta si di tööu libi?

Di Jehovah bi tööu dee tu fosu sëmbë, hën a bi taa: „Wan womi o go disa hën mama ku hën tata, nöö a o go nama ku hën mujëë” (Kenesesi 2:24). Jehovah kë u wan womi ku hën mujëë lobi deseei, nöö de musu dë ku deseei solanga de dë a libi. Di wan kodo soni di mbei Jehovah ta da pasi taa de sa booko tööu, hën da te wan u de waka da di wotowan. Te sö wan soni pasa, nöö Jehovah ta da di sëmbë di an waka da di wotowan fëën, di leti faa taki ee a o booko di tööu nasö ee an o booko ëna (Mateosi 19:9). Jehovah an ta da Keesitu sëmbë pasi u de abi möön leki wan mujëë nasö möön leki wan manu.​—1 Timoteo 3:2.

WOTO SONI DI I SA LEI

4. Wooko a wan bunu fasi ku di ten fii te ja tööu

Jesosi bi sabi taa wan sëmbë di an tööu sa du möön hia soni da Jehovah (Mateosi 19:11, 12). Lesi Mateosi 4:23, nöö piki di hakisi aki:

• Unfa Jesosi bi wooko ku di ten fëën a wan bunu fasi u di an bi tööu, faa bi sa du möön soni da hën Tata, söseei u heepi woto sëmbë?

Keesitu sëmbë di an tööu sa ta dë waiwai leti kuma Jesosi, te de ta wooko ku di ten u de u du soni da Jehovah ku wotowan. Pëë di FËLÖN, nöö piki di hakisi aki.

FËLÖN: Dee sëmbë dee an tööu, dee ta dini Jehovah ku hii de hati (3:11)

• Andi da wantu soni di Keesitu sëmbë di an tööu sa du?

I bi sabi di soni aki ö?

Di Bëibel an ta piki u un mëni jaa u musu abi ufö u sa tööu. Ma a ta da wan sëmbë taanga faa „pasa dee njönku jaa fëën”, u di a dee jaa dë, dee manu ku mujëë fii fëën ta möön taanga, nöö de sa mbei a du soni u di dee fii fëën ta basi ën.​—1 Kolenti 7:36.

5. Luku bunu ku ambë joo tööu

Wan u dee möön fanöudu soni di joo du a i libi, hën da di luku di joo luku ku ambë joo tööu. Lesi Mateosi 19:4-6, 9, nöö piki di hakisi aki:

• Faandi mbei wan Keesitu sëmbë an musu biinga go tööu?

Di Bëibel sa heepi i fii sabi ambë da wan bunu sëmbë di i sa tööu ku ën. Ma di möön fanöudu soni, hën da i musu suku wan sëmbë di lobi Jehovah.b Lesi 1 Kolenti 7:39 ku 2 Kolenti 6:14. Nöö piki dee hakisi aki:

• Faandi mbei ku wan sëmbë di ta dini Jehovah nöö u musu tööu?

• Unfa i si kuma Jehovah o fii ee u tööu ku wan sëmbë di an lobi ën?

6. I musu ta si di tööu libi kumafa Jehovah ta si ën

Na awooten a di köndë Isaëli, nöö so womi bi ta booko tööu ku dee mujëë u de u pikipiki soni hedi. Lesi Maleaki 2:13, 14, 16, nöö piki di hakisi aki:

• Faandi mbei Jehovah ta buuse di booko di wan sëmbë ta booko tööu söndö u di wotowan fëën waka dëën?

Pëë di FËLÖN, nöö piki di hakisi aki.

FËLÖN: Tu sëmbë di tööu musu dë ku deseei u nöömö (4:30)

• Ee i tööu ku wan sëmbë di an ta dini Jehovah, nöö andi sa heepi i fii sa abi wan bunu tööu libi tökuseei?

7. Hoi iseei a dee mama wëti u Jehovah dee nama ku di tööu libi

FËLÖN: Joo sa hoi iseei a dee wëti u Jehovah dee nama ku di tööu libi (4:14)

Lesi Hebelejën 13:4, nöö piki dee hakisi aki:

• I si kuma dee mama wëti u Jehovah dee nama ku di tööu libi taanga poi u hoi ö? Faandi mbei i taki sö?

Jehovah kë taa wan Keesitu sëmbë musu sikifi hën në a lanti buku te a tööu, söseei ee a booko tööu, u di a dë wan wëti u lanti a gaansë u dee köndë. Lesi Titusi 3:1, nöö piki di hakisi aki:

• Ee i tööu, nöö di tööu fii sikifi a lanti buku ö?

ANDI I LEI?

Ee i tööu nasö ja tööu, hii de tuu da soni di Jehovah lobi. Nöö i sa ta dë waiwai solanga i ta libi kumafa Jehovah taki.

Andi i bi o piki?

• Andi da wantu soni di Keesitu sëmbë di an tööu sa du?

• Faandi mbei di Bëibel ta taki taa u musu tööu ku wan sëmbë di ta dini Jehovah?

• Andi da di wan kodo soni di di Bëibel ta da pasi u wan sëmbë booko tööu?

WOTO SONI DI I SA LUKU

Andi a kë taki u tööu ku „wan biibima”?

„Aksi fu leisiman” (A Waktitoren, 1 u höndima-liba 2004)

Luku dee tu fëlön aki fii si andi sa heepi i fii sabi andi i musu du te i kë tööu, ku te i ta lei sabi wan sëmbë u tööu.

Seeka da di tööu libi (11:53)

Luku di fëlön aki fii si faandi mbei wan baaa bi ko si taa dee soni dee Jehovah dëën bunu möön dee soni dee a disa a baka.

Mi bi kë seei faa ko lei soni u di tuutuu lei (1:56)

Andi da wantu soni di wan sëmbë musu buta pakisei nëën ufö a booko tööu, nasö ufö a paati ku di sëmbë di hën ku ën tööu?

„Abi lesipeki da di tööu libi di Gadu seti” (Di Hei Wakitimawosu, tuwalufumu-liba u 2018)