Te i abi wan siki di data an sa kula

„Di mi bi jei taa mi abi kankël, nöö mi bi dë seiki taa mi bi o dëdë. Ma di mi kumutu a data toona ko a mi pisi, hën mi taa: ’Soni hogi möön fa mi bi mëni, ma tökuseei mi musu feni wan fasi u libi ku di siki aki.’”—Linda, di abi 71 jaa.

„Mi abi wan siki di ta mbei mi ta fii pen gaanfa seei a wan së fesi u mi. U di di pen ta hebi, mbei mi bi ta fii bookosaka so juu. Mi bi ta si kuma na wan sëmbë a’ toobi ku mi, nöö so juu mi bi ta mëni u kii miseei tu.”—Elise, di abi 49 jaa.

Wan womi dë sindosindo a wan sikima sutuu, nöö dee famii fëën dë nëën bandja

EE I abi wan taku siki di data an sa kula, nasö ee wan sëmbë fii abi sö wan siki, nöö i sabi unfa a sa hebi tjika. Boiti di dë, a sa pasa taa hati fii ta boonu, nasö taa i ta fëëë. So sëmbë sa ta fëëë nasö de sa ta booko de hedi ku soni, u di de musu nango hii juu a data, u di de an ta feni di deesi di de abi fanöudu, u di de an ta abi di möni u bai dee deesi, nasö u di dee deesi di de ta bebe ta mbei de an ta fii bunu. Di libi sa ta taanga da dee lö sëmbë dë seei, u di de ta dë ku fuka a hati, söseei u di di siki di de abi ta möön de.

Naasë u sa go suku heepi? Wë sömëni sëmbë bi feni kötöhati di de bi go suku heepi a Gadu. De bi ta begi ën, söseei de bi ta lesi tëkisi a Bëibel di ta da de kötöhati. Wan woto soni di sa heepi u, hën da di lobi di dee famii fuu ku dee mati fuu ta lei taa de lobi u, ku di heepi di de ta heepi u.

SONI DI BI HEEPI SO SËMBË U DE HOI DOU

Wan womi de kai Robert, di abi 58 jaa taki taa: „I musu ta biibi Gadu, nöö a o heepi i fii hoi dou ku di siki di i abi. I musu ta begi Jehovah. Konda dëën unfa i ta fii. Begi ën faa da i di santa jeje fëën. Hakisi ën faa da i kaakiti fii hoi dou a wan fasi di o da dee famii fii taanga, söseei fii sa tja di siki fii ku pasensi.

Di soni di sa heepi i seei, hën da te dee famii fii ta da i taanga. Hiniwan daka wan nasö tu famii u mi ta bëli mi, nöö de ta hakisi mi ee unfa a nango ku mi. Dee mati u mi di ta libi a peipei kamian seei ta da mi taanga tu. De ta taki soni di ta mbei mi fii bunu, nöö di soni dë ta heepi mi u mi hoi dou.”

Ee i da wan sëmbë di nango ta luku wan mati fii di abi wan siki, nöö luku andi wan mujëë de kai Linda taki: „Di sëmbë di dë ku siki ta kë libi kumafa woto sëmbë ta libi tu, nöö na hii juu a o ta kë taki soni u di siki fëën. Fëën mbei i musu ta fan ku ën kumafa i bi o fan ku woto sëmbë di an dë ku siki.”

Wë u di Gadu ta da u kaakiti, u di di Wöutu fëën ta da u kötöhati, söseei u di dee famii ku dee mati fuu ta heepi u, mbei u sa dë seiki taa di libi sa ta suti da u jeti fuu sa kë libi go dou, aluwasi u abi wan taku siki.

Bëibel tëkisi di sa heepi i

Buta futoou a Gadu.

„Di mi begi Jehovah faa heepi mi, hën a piki mi. Hën a heepi mi u ma fëëë möön. Mi sö wan möfina sëmbë bai kai Gadu, hën Jehovah seei haika mi.”—Psalöm 34:4, 6.

Linda, di u bi taki fëën kaa, taki taa: „Nöiti mi bi ta begi Gadu faa mbei mi ko bëtë. Ma hii juu mi bi ta begi ën faa heepi mi u ma fii bookosaka, söseei mi bi ta begi ën faa heepi mi u mi hoi dou ku di siki u mi.”

Lesi di Wöutu u Gadu be a da i taanga.

„Na wan hojo sëmbë o taki taa: ’Mi suwaki.’”—Jesaaja 33:24.

Pakisei fundu u dee soni Gadu paamusi u da di ten di ta ko. Di soni dë o da i taanga fii sa hoi dou.

Hakisi dee famii fii ku dee mati fii u de heepi i.

„Wan tuutuu mati ta lobi [hën mati] hii juu, nöö hën da wan baaa di de pai u te fuka dë.”—Nöngö 17:17.

Elise di u bi taki fëën kaa, bi taki: „Ja musu ta dë i wanwan a wan kamian. Da dee mati fii pasi be de heepi i. So juu joo ta fii kuma i dë i wanwan, söseei taa Gadu seei an ta haika i, ma aluwasi i ta fii sö, tökuseei na disa u hulu wotowan.”