Woto u di Jaarboek u 2015
Wan lö mii di an abi mama ku tata nango a zali
Wan sisa di de ta kai Angela di ta libi a Saana, bi go a wan kamian ka de ta hoi miii di an abi mama ku tata möön. Di kamian dë zuntu ku ka a ta libi. Di sëmbë di ta luku dee mii aki da wan sisa di an nango a komakandi möön. A bi piki Angela taa a bi sa peleiki da dee mii. Angela bi peleiki da 85 mii, nöö a bi lei de so u dee fëlön dee dë a jw.org. Bakaten a bigi lei sömëni u dee mii soni u Bëibel. Tu pionili sisa bi go heepi ën. De bi paati dee mii a dii kulupu, nöö hiniwan u de bi tei wan kulupu. Di sisa di an bi nango a komakandi möön, bi taki taa a bi lei dee mii so u dee kanda u di kanda buku fuu, nöö te ndeti, nöö a bi ta lesi Bëibel woto da de. A bi taki taa a kë go a dee komakandi seei, ma an sa disa hii dee 85 mii wanwan a wosu. Fëën mbei de bi seti soni u tja di sisa ku hii dee mii tuu ko a komakandi. U di di kamian ka dee mii ta libi an longi ku di zali, mbei dee baaa bi go heepi ën u tja dee mii ko a komakandi. Nöunöu di sisa ku hii dee 85 mii nango hii juu a komakandi.
„Gadu hën manda i ko”
Di wan sisa a Balaziliköndë de kai Jennifer bi ta paati di talakitaati de kai Dëdë sëmbë sa toona libi baka tuutuu ö?, hën a bi naki a wan döö u wan mujëë di bi ta seeka u go a wan bei u wan mati fëën di dëdë. Jennifer bi piki ën taa a bi kë dëën wan talakitaati di ta taki taa dee sëmbë dee dëdë o toona ko a libi baka. Di mujëë bi foondo seei, nöö a bi tei di talakitaati. Di Jennifer bi hakisi ën ee a kë möön u di talakitaati dë, u tja go paati da dee famii u di mati fëën di dëdë, hën di mujëë piki ën taa a bi o dë wan bunu soni u du. Hën a tei neigi talakitaati möön a Jennifer.
Bakaten di Jennifer toona go a di mujëë aki baka, hën di mujëë piki ën taa: „Di daka di mi ku i miti, hën mi bi ko fusutan bakaten taa Gadu hën manda i ko. Gadu hën bi manda i fii ko konda wan bosikopu da mi di mi bi abi fanöudu seei, nöö di da mi kötöhati.” Di mujëë bi paati hii dee talakitaati. Wan famii u di mati fëën di dëdë, hën bi hoi di taki a di bei, nöö a bi lesi hii di talakitaati da dee sëmbë. Di mujëë bi taki taa hii sëmbë bi tei ën u bigi seei, nöö de bi ta dëën tangi u di di bosikopu di sikifi a di talakitaati bi da de kötöhati seei. Nöunöu Jennifer ta lei di mujëë soni u Bëibel.
De bi manda sms da sëmbë a tjuba ten
Wan baaa de kai Greg ku ën mujëë Alma, bi foloisi go libi a wan paati de kai Catanduanes di dë a di köndë Filipijnen, u di möön hia peleikima dë fanöudu a di köndë dë. So u dee kamian abi hia kuun, nöö so juu Greg ku hën mujëë Alma musu ta waka söwan 19 kilomëti u de sa dou a so u dee kamian ka de nango peleiki. So juu de ta puu boto sö wan tu juu longi u sa go peleiki a dee woto paati u di köndë dë. Ma te di tjuba ten toona, nöö de an sa nango a sëmbë pisi u go peleiki da de. Ma ka u de sindo a wosu piii u di de an sa go peleiki da sëmbë a dee pisiten dë, hën de seti soni u ta peleiki da sëmbë ku tëlëfön. De bi go sindo pakisei taa de bi sa wooko ku di seti di di tëlëfön masikapei u di köndë u de abi, taa sëmbë sa ta manda te hia sms go da woto sëmbë söndö u paka hia möni.
Greg taki taa di fosu soni di a ta sikifi te a ta manda sms go da sëmbë, da hën në. Nöö baka di dë, a taa a ta sikifi da di sëmbë taa: „Mi kë konda wan soni u Bëibel da i.” Wan u dee Bëibel tëkisi di a si taa ta heepi hia sëmbë, da di tëkisi u Johanisi 17:3. Baka te a manda di Bëibel tëkisi da di sëmbë, nöö a ta buta dee tu hakisi aki dëën: Ambë da di tuutuu Gadu ku ambë da Jesosi Keesitu? Nöö a ta hakisi di sëmbë unfa a bi o piki. Te di sëmbë piki, nöö Greg ta manda wan woto tëkisi dëën. A ta manda di tëkisi u Psalöm 83:18 dëën nasö wan woto tëkisi. Te di sëmbë ta piki go dou, nöö a ta hakisi di sëmbë ee a sa bëli ën u de fan möön bunu. Greg ku hën mujëë Alma taki taa sömëni sëmbë bi piki dee sms di de bi manda da de.
Wan mujëë di Greg ku Alma bi manda sms da, bi abi sömëni soni di a bi kë hakisi di nama ku Bëibel, nöö i sa fusutan kaa taa na piki sms de bi ta manda da deseei. Te u kaba fëën de bi bigi ta lei di mujëë soni u Bëibel. Di mujëë bi ta konda dee soni dee a bi ta lei da wan famii fëën ku wan mujëë di hën ku ën bi ta wooko a di wan kamian. Te u kaba fëën, hii dee dii sëmbë aki bi tei dopu.