Faandi mbei wa nango a feti kuma dee Isaëli sëmbë fu awooten?

WAN Nazi sodati bi bai piki wanlö Jehovah Kotoigi a di pisiten u di u Tu Goonliba Feti taa: „Ee wan fuunu taki taa an o heepi u feti ku Gaan Faansiköndë nasö ku Ingisiköndë, nöö hii unu tuu o dëdë!” Hii fa dee Nazi sodati bi dë taanputaanpu leti a dee baaa bandja, tökuseei na wan u de bi pasa Jehovah buka. Dee baaa aki bi abi degihati seei! Di woto aki ta lei u unfa Jehovah Kotoigi ta si feti. De an nango a feti, hii fa de sa lasi de libi ee de an du ën.

1. DEE SËMBË U GADU BI DË WAN KODO NASIÖN SËMBË

A di ten di pasa, Jehovah bi tei sëmbë u wan nasiön u de ko dë sëmbë fëën. A bi tei dee Isaëli sëmbë. Nöö a bi taki taa de dë „wan apaiti gudu . . . a hii dee woto föluku mindi” (Ëki. 19:5). Gadu bi da de wan apaiti köndë tu. Fëën mbei te Gadu bi piki dee Isaëli sëmbë u de go feti ku dee woto köndë sëmbë, nöö na ku sëmbë di bi ta dini Jehovah de bi ta feti.a

A di ten aki, dee dinima u Jehovah dë sëmbë dee „kumutu a hii pei nasiön, ku hii pei lö, ku hii pei föluku, ta fan hii dee peipei töngö u goonliba tuu” (Ako. 7:9). Ee dee dinima u Jehovah go a feti, nöö a sa pasa taa de kii woto dinima u Jehovah.

2. JEHOVAH HËN BI TA MANDA DEE ISAËLI SËMBË GO A FETI

A di ten di pasa, Jehovah hën bi ta taki na un ten dee Isaëli sëmbë bi musu go a feti, söseei faandi mbei de musu go a feti. Gadu bi piki dee Isaëli sëmbë u de go feti ku dee Kaana sëmbë, u di de bi ta dini taku jeje, u di de bi ta libi fanafiti a di së u manu ku mujëë soni, söseei u di de bi ta tjuma dee mii u de da poipoi gadu. Jehovah bi piki de u de kii dee sëmbë aki puu a di Paamusi Köndë, sö taa de an waka a de baka (Leif. 18:24, 25). Baka di dee Isaëli sëmbë go ta libi a di Paamusi Köndë, hën so juu Gadu bi ta manda de u de go a feti, sö taa de bi sa wini dee felantima u de dee bi ta du ku de (2 Sam. 5:17-25). Nöiti Jehovah bi da dee Isaëli sëmbë pasi u de taki da deseei na un ten de musu go a feti. Ma te de bi go söndö u Jehovah manda de, nöö hogi bi lo’ u miti de.​—Nöb. 14:41-45; 2 Klon. 35:20-24.

A di ten aki, Jehovah an ta manda sëmbë u de go a feti. Te dee köndë ta feti, nöö na bunu u Gadu de ta suku, ma de ta suku wini da deseei. Kandë de ta feti u di de kë di köndë u di wotowan, u di de kë ko abi möön hia möni, nasö u di de kë mbei sëmbë ko ta pakisei kuma de te a nama ku politiki soni u di köndë. Ma unfa a dë ku dee sëmbë dee ta taki taa de ta feti da Gadu söseei taa de ta feti da di biibi u de, nasö taa de ta heepi Gadu kii dee felantima fëën? Wë abiti möön Jehovah o tjubi dee tuutuu dinima fëën, nöö a di ten di ta ko a o kii dee felantima fëën a di gaan feti de kai Amagedon (Ako. 16:14, 16). Na dee dinima u Gadu dee dë a goonliba aki de o feti di feti aki, ma dee ëngëli u Gadu de o feti di feti.​—Ako. 19:11-15.

3. DEE ISAËLI SËMBË AN BI TA KII DEE SËMBË DEE BI TA LEI TAA DE TA BIIBI JEHOVAH

A di ten di pasa, dee sëmbë u Gadu bi ta abi tjalihati u dee sëmbë dee bi ta lei taa de ta biibi Jehovah, ma de bi ta kii dee sëmbë dee Jehovah bi kuutu taa de fiti u dëdë. Di Jehovah bi piki dee Isaëli sëmbë u de booko di foto Jelikou kaba a sösö, nöö de an bi kii Lakabu ku dee famii fëën, u di a bi abi biibi (Jos. 2:9-16; 6:16, 17). Bakaten, hii dee sëmbë u di köndë Gibion bi fika a libi, u di de bi ko ta lesipeki Gadu.​—Jos. 9:3-9, 17-19.

A di ten aki, te dee köndë nango feti ku deseei, nöö de an ta buta taa de an o kii sëmbë di ta dini Gadu, nasö taa de an o kii sëmbë di an dë sodati.

4. DEE ISAËLI SËMBË BI MUSU TA HOI DEE WËTI U GADU TE DE BI NANGO A FETI

A di ten di pasa, Jehovah bi ta piki dee Isaëli sodati unfa de bi musu du soni te de bi nango a feti. So juu a bi ta piki de u de hakisi dee felantima u de „ee de kë disa di feti” (Deto. 20:10). Jehovah bi piki de tu taa de bi musu ta dë limbolimbo hii juu, söseei taa di kampu ka de ta dë musu ta dë limbolimbo tu. Boiti di dë, de bi musu ta köni taa de an nama ku fanafiti soni (Deto. 23:9-14). Dee woto nasiön bi ta kisi dee mujëë u dee felantima u de, ma Jehovah bi piki dee Isaëli sëmbë taa de an musu du di soni dë. Boiti di dë, de bi musu wakiti wan liba ufö de bi sa tööu ku dee mujëë u dee köndë di de bi wini.​—Deto. 21:10-13.

A di ten aki, gaansë u dee köndë taki fiti ku deseei, hën de buta wëti di ta taki na un ten de abi leti u go feti ku wotowan. Ma a tjali taa hii fa de buta dee wëti aki u tjubi dee sëmbë dee an dë sodati, tökuseei a ta pasa hia taa so köndë an ta hoi dee wëti aki.

5. GADU HËN BI TA HEEPI DEE SËMBË FËËN FETI

A di ten di pasa, nöö Jehovah bi ta heepi dee sëmbë fëën wini feti a wan foombo fasi. Unfa Jehovah bi heepi dee Isaëli sëmbë u de feti wini di foto Jelikou? Jehovah bi piki dee Isaëli sëmbë taa: „Hii sëmbë musu kai wan gaan wolo kuma te sodati nango a feti. Nöö dee peni o booko kai holou.” Di soni aki bi mbei an bi taanga da de sö möön u de feti wini di foto (Jos. 6:20). Wë nöö unfa de bi wini di feti di de bi feti ku dee Amoliti sëmbë? „Jehovah bi mbei gaan ëisi pisi kai kumutu a liba ala ko naki de . . . Sö a ko pasa taa dee Amoliti sëmbë di dee pisipisi ëisi bi kii, bi hia möön dee Amoliti sëmbë di dee Isaëli sëmbë bi kii ku feti ufangi.”​—Jos. 10:6-11.

TUUTUU KEESITU SËMBË TA SUKU U LIBI FIIFII KU WOTOWAN

Kumafa u si, nöö di fasi fa soni dë da u a di ten aki, tooka gaanfa seei ku di fasi fa soni bi dë da dee Isaëli sëmbë fu awooten. Tökuseei, na dee soni dë wanwan mbei wa nango a feti. Ma Gadu bi taki a fesi taa a dee lasiti daka, nöö dee sëmbë dee a bi o ta lei soni, an bi „o lei u feti möön”. Boiti di dë, de an bi o ta feti tu (Jes. 2:2-4). Jesosi bi taki tu taa dee bakama fëën an bi o dë ’ku di goonliba aki a wan së’, söseei taa de an bi o ta tei së a feti soni u di goonliba aki.​—Joh. 15:19.

Jesosi bi taki taa woto soni dë di dee bakama fëën bi musu du jeti. A bi piki de taa de bi musu köni ku dee manii dee sa mbei de hoi sëmbë a bëë, dee sa mbei hati u de boonu, söseei dee sa mbei de hopo go feti ku wotowan (Mat. 5:21, 22). Boiti di dë, a bi piki dee bakama fëën taa de musu ko dë sëmbë di ta „mbei sëmbë ku sëmbë ko fii ku deseei”, söseei a bi piki de taa de musu lobi dee felantima u de.​—Mat. 5:9, 44.

Unfa u sa du di soni aki? An dë u taki taa wa kë go a feti. Ma a bi pasa wan daka kaa taa i bi si wan sëmbë u di kemeente kuma wan felantima fii ö? Boo mbei möiti go dou fuu puu dee lö fii aki a u hati.​—Jak. 4:1, 11.

Wa nango a feti. Ma u ta suku u libi fiifii ku wotowan, söseei u ta mbei möiti u lobi u na u (Joh. 13:34, 35). Boo mbei möiti fu wa nama ku politiki soni u köndë, ma boo ta wakiti di daka ka Jehovah o puu hii pei feti a goonliba u teego.​—Ps. 46:9.