Hoi iseei a Jehovah go dou te sëmbë libi hogi ku i

1-2. Unfa a sa pasa taa sëmbë libi hogi ku u?

JESOSI bi konda wan woto u wan mujëë di manu fëën bi dëdë. Di mujëë aki bi nango ta begi wan kuutuma nöömö, faa koti kuutu dëën a wan leti fasi. Dee bakama u Jesosi bi sa fusutan unfa di mujëë dë bi ta fii, biga sëmbë bi lo’ u libi hogi ku wotowan a di ten u de (Luk. 18:1-5). Useei sa fusutan unfa di mujëë dë bi ta fii tu, u di sëmbë libi hogi ku hiniwan fuu wan daka.

² Sömëni sëmbë an abi bunu fasi a di goonliba di u ta libi a di ten aki möön. Sömëni sëmbë ta libi hogi ku wotowan, de giii, söseei de ta buuse so kulupu u sëmbë u sömëni soni hedi. Fëën mbei an ta bigi da u te sëmbë an ta libi bunu ku u (Peleik. 5:8). Ma a sa bigi da u seei te wan baaa nasö wan sisa libi hogi ku u. Dee baaa ku dee sisa fuu an dë kuma dee sëmbë u di goonliba aki dee ta du ku u, u di biibi fuu hedi. Ma misi de ta misi du soni ku u, u di de da zöndu libisëmbë. U sa lei sömëni soni a di fasi fa Jesosi bi du soni, di wanlö sëmbë bi ta du ku ën u di biibi fëën hedi. Wë ee a dë sö taa u ta hoi pasensi ku dee sëmbë dee ta du ku u u di biibi fuu hedi, nöö wa musu ta möön hoi pasensi da dee baaa ku dee sisa fuu nö? Unfa Jehovah ta fii te dee sëmbë u di goonliba aki ta libi hogi ku u? Nöö unfa a ta fii te wan baaa nasö wan sisa libi hogi ku u? Dee soni dë ta toobi ën u?

3. A ta toobi Jehovah te sëmbë ta libi hogi ku u ö, nöö faandi mbei?

³ A ta toobi Jehovah gaanfa seei te a si taa sëmbë ta libi hogi ku u. „Jehovah da wan sëmbë di lobi leti libi” (Ps. 37:28). Jesosi bi lei u taa u sa dë seiki taa Jehovah „o ko hesihesi . . . ko kuutu soni” te di soifi ten dou (Luk. 18:7, 8). Nöö abiti möön a o puu hii dee soni dee ta mbei u ta tja sitaafu, söseei nöiti a o disa u fuu tja sitaafu möön.​—Ps. 72:1, 2.

4. Andi Jehovah ta du u heepi u a di ten aki?

⁴ Hii fa u ta wakiti di ten ka Jehovah o mbei letilibi ko dë a hii së u goonliba, tökuseei a ta heepi u nöunöu kaa, fuu sa sabi andi u musu du te sëmbë ta libi hogi ku u (2 Pet. 3:13). A ta lei u fa u musu du soni ku köni, u soni an ko möön hogi te sëmbë ta libi hogi ku u. Wan fasi fa a ta du di soni dë, hën da a ta lei u unfa di Womi Mii fëën bi ta du soni te sëmbë bi ta libi hogi ku ën. Söseei a ta da u köni lai a di Wöutu fëën di sa heepi u.

KÖNI FA I TA DU SONI TE SËMBË AN LIBI BUNU KU I

5. Faandi mbei u musu ta köni ku di fasi fa u ta du soni te sëmbë an libi bunu ku u?

⁵ A sa hati u, söseei a sa ta toobi u gaanfa seei te sëmbë libi hogi ku u (Peleik. 7:7). Jöpu ku Habaki seei bi ta fii sö tu, hii fa de bi abi wan taanga biibi (Jöpu 6:2, 3; Hab. 1:1-3). Wë hii fa an dë wan hogi soni ee u ta fii sö, tökuseei u musu ta köni ku di fasi fa woo du soni te sëmbë an libi bunu ku u. U musu ta köni fu wa du soni di an bunu.

6. Andi u ta lei a di woto u Absalöm? (Luku di peentje tu.)

⁶ Te sëmbë libi hogi ku u, nasö te sëmbë libi hogi ku wan sëmbë fuu, nöö a sa pasa taa u suku u du soni u sitaafu di sëmbë useei. Ma di soni dë sa mbei di soni ko möön hogi. Buta pakisei a di woto u di womi mii u Könu Dafiti de kai Absalöm. Hati fëën bi boonu seei di wan woto womi mii u Dafiti de kai Aminön bi kisi hën sisa Tamali. Di Wëti u Mosesi bi ta lei taa Aminön bi musu dëdë u di soni di a du (Leif. 20:17). Ma hii fa Abisalöm bi abi leti u hati fëën boonu, tökuseei nëën bi musu hopo du soni u sitaafu Aminön.​—2 Sam. 13:20-23, 28, 29.

7. Unfa wan dinima u Jehovah bi ta fii di a bi si fa di libi bi ta suti da dee hogiduma?

⁷ Te a ta djei kuma de an sitaafu wan sëmbë di du wan hogi, nöö u sa bigi ta pakisei taa u sösö seei u ta mbei möiti u libi bunu a Gadu wojo. Wan dinima u Jehovah bi ta si fa dee hogiduma bi ta libi hogi ku dee bunuhati sëmbë, ma tökuseei a bi ta djei kuma di libi bi ta suti da dee hogiduma. Di dinima u Jehovah dë bi taki taa: „Sö soni dë da dee hogiduma kaa. Nöiti de de ta abi booko hedi” (Ps. 73:12). Di hogi fasi fa sëmbë bi ta libi ku wotowan bi ta toobi ën sö tee taa, a bi ko ta pakisei taa u sösö seei a ta dini Jehovah. A bi taki taa: „Mi bi ta mbei möiti u ko fusutan di soni dë, ma a bi ta taanga da mi” (Ps. 73:14, 16). A bi taki tu taa: „Fa mi dë aki, nöö piki fika mi kumutu a di pasi. Bëina mi kooga kai” (Ps. 73:2). Wë sö wan soni hën bi o pasa tu ku wan baaa di woo kai Alberto.

8. Unfa di libi di sëmbë an ta libi bunu ku wotowan bi toobi wan baaa tjika?

⁸ Wanlö baaa bi ta taki taa Alberto ta fufuu di möni u di kemeente, hii fa na sö a bi dë tuu. Di soni dë bi mbei a lasi dee gaandi dee a bi abi. An bi dë gaanwomi u kemeente möön, söseei sömëni baaa ku sisa di bi jei di woto an bi ta lesipeki ën möön. Alberto bi taki taa: „A bi ta hati mi seei, nöö hati u mi bi boonu.” Alberto bi disa dee fii fëën mbei hën ku Jehovah an ko dë gaan mati sö möön. A bi tapa u go a dee komakandi feifi jaa longi. Di woto u di baaa aki ta lei u andi sa pasa ku u, ee wa hoi useei te hati fuu boonu, te sëmbë an libi bunu ku u.

DJEESI JESOSI A DI FASI FA A BI DU SONI

9. Unfa sëmbë bi libi ku Jesosi? (Luku di peentje tu.)

⁹ U sa djeesi Jesosi a di fasi fa a bi du soni di sëmbë an bi libi bunu ku ën. A bi du soni a wan soifi fasi. Sömëni sëmbë an bi libi bunu ku ën, te kisi dee sëmbë fëën famii seei an bi libi bunu ku ën tu. Dee sëmbë fëën bi taki taa a bi lasi hën fusutan. Dee hedima u keiki bi taki taa a ta wooko ku dee taku jeje. Nöö dee Loomë sodati bi ta mbei ën fa, söseei de bi fon mëën a wan hogi hati fasi, hën de kii ën (Maik. 3:21, 22; 14:55; 15:16-20, 35-37). Di Jesosi bi ta tja hii dee sitaafu aki, an bi toona du na wan hogi ku sëmbë baka. Andi u sa lei a di fasi fa a bi du soni?

10. Unfa Jesosi bi du soni di sëmbë an bi libi bunu ku ën? (1 Petuisi 2:21-23)

¹⁰ Lesi 1 Petuisi 2:21-23.a U sa djeesi Jesosi a di fasi fa a bi du soni te sëmbë an ta libi bunu ku u, u di Jesosi bi du soni söndö föutu, söseei u di hën da di möön bunu sëmbë di u sa djeesi. A bi sabi na un ten a bi musu fan, ku na un ten a bi musu dë piii (Mat. 26:62-64). Na hii juu a bi ta piki te sëmbë bi ta mindi soni dëën (Mat. 11:19). Ma te a bi ta piki, nöö an bi ta kosi dee sëmbë dee bi ta du ku ën, söseei an bi ta piki de taa a o du hogi ku de tu. Hii juu Jesosi bi ta hoi hënseei fu an taki soni nasö fu an du soni di an fiti, u di a bi ta disa hii soni „da di Sëmbë di ta kuutu [soni] a wan leti fasi”. Jesosi bi sabi taa Jehovah bi ta si taa sëmbë an ta libi bunu ku ën. Fëën mbei a bi ta biibi taa Jehovah bi o seeka hii soni a di soifi ten.

11. Unfa u sa köni ku dee soni dee u ta taki? (Luku dee peentje tu.)

¹¹ U sa lei taa u ta du soni kuma Jesosi, te u ta köni ku dee soni dee u ta taki, te wan sëmbë an ta libi bunu ku u. So soni di sëmbë ta du ku u an ta bigi sö, nöö fëën mbei an ta dë fanöudu fuu piki seei. Biga ee u misi taki wan soni, nöö a sa mbei di soni ko möön hogi (Peleik. 3:7; Jak. 1:19, 20). Ma so juu a ta dë fanöudu fuu hopo taki da di biibi fuu, nasö fuu hopo du wan soni u heepi wan sëmbë di wotowan ta du ku ën (Tjab. 6:1, 2). Te woo fan, nöö u musu mbei hii möiti fuu fan a wan lesipeki fasi söndö kai wolo.​—1 Pet. 3:15.b

12. Unfa u sa lei taa u ta disa hii soni „da di Sëmbë di ta kuutu [soni] a wan leti fasi”?

¹² U sa lei tu taa u ta du soni kuma Jesosi, te u ta disa hii soni „da di Sëmbë di ta kuutu [soni] a wan leti fasi”. Te wotowan an ta libi bunu ku u, nasö te de ta mindi soni da u, nöö u ta hoi taa Jehovah hën a sabi fa soni dë tuutuu. Te u ta biibi taa Jehovah o seeka hii soni, nöö di soni dë o heepi u fuu sa hoi dou. Ee u ta disa hii soni da Jehovah, nöö hati fuu an o fika boonuboonu, söseei wa o ta buuse wotowan. Dee lö fii dë sa mbei u du soni di an bunu, de sa mbei wa ta dë waiwai möön, söseei de sa mbei u ku Jehovah poi.​—Ps. 37:8.

13. Andi sa heepi u fuu sa ta hoi dou ku pasensi te sëmbë ta libi hogi ku u?

¹³ Wë an dë u taki taa wa o sa du soni söndö mbei föutu kuma Jesosi. So juu a sa pasa taa u taki soni, nasö taa u du soni di hati u bakaten (Jak. 3:2). Nöö so juu dee soni dee wotowan du ku u sa mbei u ta tja sitaafu hii u libi longi. Ee sö soni dë da i, nöö i sa dë seiki taa Jehovah sabi unfa soni ta taanga da i tjika. Jesosi seei ta fii da i tu, biga sëmbë bi libi hogi ku ën hii fa an bi du na wan hogi (Heb. 4:15, 16). Boiti di lei di Jehovah lei u taa u sa waka a di Womi Mii fëën baka, a ta da u lai a di Wöutu fëën tu di ta heepi u fuu sabi andi u musu du te wotowan an ta libi bunu ku u. Boo luku tu tëkisi u di buku Loomë di sa heepi u. 

„UN MUSU DISA PASI DA DI HATIBOONU U GADU”

14. Andi a kë taki u „disa pasi da di hatiboonu u Gadu”? (Loomë 12:19)

¹⁴ Lesi Loomë 12:19. Apösutu Paulosu bi piki dee Keesitu sëmbë u de „musu disa pasi da di hatiboonu u Gadu”. Wë u ta di disa pasi da di hatiboonu u Gadu, te u ta disa Gadu be hënseei taki na un ten, söseei na un fasi a o kuutu dee sëmbë dee an libi bunu ku u. Baka di de an bi libi bunu ku wan baaa de kai John, hën a bi taki taa: „Mi bi musu mbei möiti u duwengi miseei u ma du soni di an bunu. Di soni dë bi taanga da mi u du seei. Ma Loomë 12:19 bi heepi mi u mi hoi pasensi, söseei u mi buta futoou a Jehovah.”

15. Faandi mbei a möön bunu fuu disa Jehovah be hën seeka soni da u?

¹⁵ U ta feni wini te u ta disa Jehovah be a seeka soni da u. Te u ta du sö, nöö wa o ta booko u hedi sö möön, söseei wa o ta abi dee bookohedi dee wan sëmbë ta abi, te a ta biinga u seeka dee fuka fëën hënseei. Jehovah kë fuu disëën be a heepi u. A paamusi u taa a o kuutu soni da u a wan leti fasi, söseei a ta piki u fuu buta futoou nëën, nöö u wakiti di ten ka a o seeka soni da u. Ee u ta lei taa u ta biibi di paamusi di Jehovah paamusi u taa „te wan sëmbë du hogi, nöö [a] o pakëën nöömö”, nöö an o taanga da u fuu disa di soni nëën maun, u di u sabi taa a o du soni a wan leti fasi. Di soni dë hën bi heepi John, di baaa di u bi taki soni fëën a fesi. A bi taki taa: „Ee mi disa hii soni da Jehovah, nöö a o seeka di soni bunu möön fa mi bi o du ën.”

„I MUSU WINI HOGIDU KU BUNULIBI”

16-17. Unfa begi sa heepi u fuu ta mbei möiti go dou u „wini hogidu ku bunulibi”? (Loomë 12:21)

¹⁶ Lesi Loomë 12:21. Paulosu bi piki dee Keesitu sëmbë be de ta mbei möiti go dou u „wini hogidu ku bunulibi”. A di taki di Jesosi bi hoi a di kuun liba, a bi taki taa: „Un musu lobi dee felantima fuunu e. Un musu ta begi da dee sëmbë dee ta du hogi ku unu.” (Mat. 5:44). Jesosi bi du soni leti kumafa a bi taki dë. U lo’ u pakisei go a di sitaafu di Jesosi bi tja di dee Loomë sodati bi pekëën a di posu. Ma na piki pen a bi fii di daka dë. De bi du soni ku ën a wan gaan hogihati fasi seei. Wa sa kaba fusutan unfa a bi tja sitaafu tjika.

¹⁷ Jesosi bi hoi hënseei a Jehovah go dou, söseei a bi lobi ën go dou, hii fa a bi tja sitaafu. An bi hakisi Gadu faa sitaafu dee sodati dee bi du ku ën, ma a bi begi da de. A bi taki taa: „Taata o, na hoi dee sëmbë ta kii mi aki a bëë e, biga de an saandi de ta du” (Luk. 23:34). Te u ta begi da dee sëmbë dee ta libi hogi ku u, nöö a sa heepi u fu wa ko ta fii u hoi de a bëë. A sa heepi u u hati fuu an ta boonu sö möön, söseei fuu tooka di fasi fa u ta si de.

18. Unfa begi bi heepi Alberto ku John u de bi sa hoi dou di sëmbë an bi libi bunu ku de?

¹⁸ Begi bi heepi dee tu baaa dee u bi taki soni u de a fesi, u de hoi dou di sëmbë an bi libi bunu ku de. Alberto bi taki taa: „Mi bi begi da dee baaa dee an bi libi bunu ku mi. Sömëni pasi mi bi hakisi Jehovah faa heepi mi be mi disa di soni dë.” Nöunöu Alberto ta dini Jehovah ku hii hën hati baka. John bi taki taa: „Sömëni pasi mi bi ta begi da di baaa di bi libi hogi ku mi. Mi bi ta hakisi Jehovah faa heepi mi be mi dëën paadon. Di soni dë bi heepi mi u hati u mi an ta boonu ku ën möön, söseei u ma ta kuutu ën möön. Boiti di dë, mi bi ta fii taa mi bi dë bööböö.”

19. Andi u musu ta du solanga u dë a di hogi goonliba aki? (1 Petuisi 3:8, 9)

¹⁹ Sëmbë sa libi hogi ku u ufö di kaba u di hogi goonliba aki dou. Boo ta begi Jehovah nöömö faa heepi u aluwasi andi ta miti u. Boo ta djeesi Jesosi a di fasi fa a bi ta du soni te sëmbë an bi libi bunu ku ën, söseei boo ta wooko ku dee mama wëti u Bëibel go dou. Ee u ta du sö, nöö u sa dë seiki taa Jehovah o mbei u feni gaan bunu.​—Lesi 1 Petuisi 3:8, 9.