Andi sa heepi i fii ta lei soni u Bëibel hiniwan wiki?

A TA taanga da i fii ta lei soni u Bëibel hiniwan wiki ö? Hii u tuu a ta taanga da so juu. Ma buta pakisei a dee soni dee u musu ta du hiniwan daka. Wan u de da di wasi di u musu ta wasi. Te u ta wasi nöö a ta tei ten, söseei u musu ta mbei möiti u du ën. Ma baka te u wasi, nöö u ta fii bunu seei! Sö nöö a dë taa baka te u lei soni u Bëibel, nöö u ta fii bunu u di u wasi „ko limbo ku di wata u di Wöutu u Gadu” (Ef. 5:26). Boo buta pakisei a wantu soni di sa heepi i.

• Buta ten a wan së. U sabi taa di lei di u musu ta lei soni u Bëibel da wan u „dee möön fanöudu soni” di wan Keesitu sëmbë musu ta du (Fil. 1:10). Di soni di sa heepi i u na fëëkëtë di daka, ku di juu di i buta taa joo lei soni u Bëibel, hën da te i sikifi ën buta a wan pampia, buta a wan kamian ka i sa si ën. Di woto soni di sa heepi i tu, hën da te i buta wan alarm a di tëlëfön fii, sö taa a sa mëni i te di juu dou fii lei soni u Bëibel.

• Luku andi sa heepi i fii dë ku hii i pakisei a di lei di i ta lei soni u Bëibel. Unfa i lo’ u lei soni u Bëibel? I sa buta pakisei longi a wan soni, naa i sa du ën u wan kölö pisi ten nöö? Wë i sabi iseei bunu. Fëën mbei a bunu fii ta lei soni u Bëibel a di fasi di ta kai ku i. Ee i ta fii kuma ja abi peesa u lei soni u Bëibel a di juu di i bi buta, nöö i sa buta taa joo du ën teni miniti nöö. Aluwasi ee i lei soni u Bëibel teni miniti nöö, tökuseei i sa lei sömëni soni a di kölö pisiten dë. Kandë dee teni miniti dë suti da i sö tee taa i kë lei soni go dou.​—Fil. 2:13.

• Buta a fesi andi u Bëibel i kë lei. Ee i ta tei di juu di i musu lei soni u Bëibel u sindo pakisei andi i kë lei, nöö ja o „feni okasi fii du wan bunu soni” (Ef. 5:16). I sa sikifi dee soni dee i kë lei buta a pampia. Ee i abi wan hakisi u wan soni di ja bi fusutan, nöö sikifi ën buta a pampia. Hiniwan pasi te i kaba u lei soni u Bëibel, nöö kandë i sa abi woto soni di i bi o kë go öndösuku jeti, nöö i sa sikifi ën buta a pampia tu.

• Tooka soni ee a dë fanöudu. So juu i sa ta tooka soni a di fasi fa i buta taa joo ta lei soni u Bëibel. Kandë i sa tooka di mëni juu di joo lei soni u Bëibel, nasö dee soni dee i buta taa i kë lei. Biga na di pisiten, di longi, nasö di soni di i buta taa i kë lei da di möön fanöudu soni, ma di lei di i musu ta lei soni u Bëibel hiniwan wiki hën möön dë fanöudu.

Ee u ta lei soni u Bëibel hiniwan wiki, nöö woo feni wini fëën. U ta ko dë möön zuntu ku Jehovah, u ta lei u du soni a wan köni fasi, söseei u ta feni kaakiti baka.​—Jos. 1:8.