Unfa feti o du kaba?

GADU O PUU DEE TII U LIBISËMBË

Gadu o puu dee tii u libisëmbë a pasi, a di feti di di Bëibel ta kai Amagedona (Akoalimbo 16:16). A di ten dë, nöö „dee köndëköndë u goonliba tuu” o hai ko a wan, „u de feti di gaan feti a di Daka di di Gadu di abi hii makiti u mundu buta” (Akoalimbo 16:14). Di feti u Amagedon o dë di lasiti feti di o feti a goonliba.

Di Könuköndë u Gadu o puu hii dee tii u libisëmbë a pasi, nöö di Könuköndë fëën o dë a liba ala ta tii goonliba aki, nöö nöiti a o poi kaba a sösö (Daniëli 2:44). Gadu buta Jesosi Keesitu, di Womi Mii fëën, u tii kuma Könu (Jesaaja 9:6, 7; Mateosi 28:18). Di tii aki da di Könuköndëb di Jesosi bi lei dee bakama fëën u de begi be a ko (Mateosi 6:9, 10). Hii libisëmbë o dë a wan kodo tii basu, di tii u Jesosi.

Jesosi an o wooko ku di makiti fëën u du andi hënseei kë kumafa dee tiima u di goonliba aki ta du. Biga a ta du soni ku leti, söseei an ta paati bëë, fëën mbei u sa dë seiki taa an o libi hogi ku wan sëmbë u di a dë u wan woto lö nasö u wan woto köndë (Jesaaja 11:3, 4). An o dë fanöudu möön u libisëmbë feti u di leti di de abi. Faandi mbei? Wë u di Jesosi o buta pakisei a di dë di hiniwan libisëmbë musu dë bunu. „A o heepi dee pooti sëmbë dee ta bai ta suku heepi, te kisi dee möfina sëmbë ku hiniwan sëmbë di na abi sëmbë u heepi ën. . . . A o tjubi de libi, sö taa sëmbë an o sa peeta de möön, nasö du hogi ku de möön.”​—Psalöm 72:12-14.

Di Könuköndë u Gadu o puu hii dee fetilai dee dë a goonliba (Mika 4:3). Söseei a o puu hii dee hogihati sëmbë dee an kë disa feti, nasö dee sëmbë dee an kë libi fiifii ku wotowan (Psalöm 37:9, 10). Aluwasi na u kamian u goonliba wan womi, wan mujëë nasö wan mii go, de an o ta fëëë möön.​—Ezekiëli 34:28.

Te di Könuköndë u Gadu o tii goonliba, nöö hii sëmbë o abi wan bunu libi. A o puu dee soni dee ta mbei feti ta feti. Soni kuma di pooti di sëmbë ta pooti, hangi pena ku di pena di sëmbë ta pena u wan bunu tan kamian. Hiniwan sëmbë o sa feni gösöntu njanjan te a hia, söseei wan bunu kamian u libi.​—Psalöm 72:16; Jesaaja 65:21-23.

Di Könuköndë u Gadu o puu dee soni dee bi miti sëmbë u di feti bi ta feti. Na dee makei di sëmbë bi kisi nöö a o puu, ma a o puu dee senuwe ku dee fuka di sëmbë bi ko abi u di feti bi ta feti. Boiti di dë, dee sëmbë dee lasi libi seei, o weki ko a libi baka a goonliba aki (Jesaaja 25:8; 26:19; 35:5, 6). Hiniwan wosudendu o ko dë wan makandi baka, nöö de an o ta mëni dee hogi soni dee bi pasa di feti bi ta feti, u di „dee awoo soni dee bi dë tuu, pasa go kaa”.​—Akoalimbo 21:4.

GADU O PUU ZÖNDU

Te di Könuköndë u Gadu o tii goonliba aki, nöö hii sëmbë o ta dini di wan kodo tuutuu Gadu Jehovah,c di Gadu ka „lobi ku bööböö libi ta kumutu” (2 Kolenti 13:11). Libisëmbë o lei u ko sa’ u libi fiifii ku deseei (Jesaaja 2:3, 4; 11:9). Hii dee sëmbë dee o piki Gadu buka, an o abi zöndu möön.​—Loomë 8:20, 21.

GADU O PUU SAATAN KU DEE TAKU JEJE FËËN

Di Könuköndë u Gadu o kii dee sëmbë dee ta mbei taa feti ta feti a goonliba. Dee sëmbë dë, da Saatan ku dee taku jeje fëën (Akoalimbo 20:1-3, 10). U di Gadu o kii de, mbei taa bööböö libi o dë a hii së u goonliba.​—Psalöm 72:7.

U sa dë seiki taa di paamusi di Gadu paamusi u taa o puu feti o pasa tuutuu. A kë puu ën, söseei a sa du ën tu.

• Gadu abi di köni ku di kaakiti di dë fanöudu u puu feti ku hogidu (Jöpu 9:4). Na wan soni ta taanga dëën faa du.​—Jöpu 42:2.

• Gadu ta buuse di tja di sëmbë ta tja pena ku sitaafu (Jesaaja 63:9). Söseei a „ta buuse di sëmbë di lobi hogidu”.​—Psalöm 11:5.

• Hii juu Gadu ta du andi a taki. An sa mindi soni.​—Jesaaja 55:10, 11; Titusi 1:2.