Unfa i sa ko ta libi bööböö aluwasi ee feti ta feti?

Wan baaa de kai Gary, di bi dë wan sodati fosu, bi taki taa: „Ufö mi bigi lei soni u Bëibel, nöö ma bi sa’ faandi mbei sëmbë bi ta libi hogi ku wotowan, söseei ma bi sa’ faandi mbei sömëni feti bi ta feti a goonliba. Ma nöunöu hati u mi ko kötö. Mi sabi taa Jehovah Gadu o mbei di goonliba ko dë wan kamian ka sëmbë o ta libi bööböö.

Na Gary wanwan nöö ta pakisei sö, ma woto sëmbë dë di di Bëibel bi heepi tu.

DI BËIBEL TA TAKI TAA: „Jehovah, i da wan bunu Gadu, nöö i dë kabakaba u da sëmbë paadon.”—Psalöm 86:5.

DI FASI FA DI TËKISI AKI HEEPI SËMBË: „Di tëkisi aki heepi mi u ko dë seiki taa Jehovah abi tjalihati u sëmbë. Mi sabi taa a dë kabakaba u da mi paadon, u hii dee hogi dee mi bi du, di mi bi go a feti.”—Wilmar, Kolombia.

DI BËIBEL TA TAKI TAA: „Mi o mbei wan njunjun mundu ku wan njunjun goonliba. Sëmbë an o mëni dee fesiten soni möön, nöö dee soni dë an o ta toobi de möön.”—Jesaaja 65:17.

DI FASI FA DI TËKISI AKI HEEPI SËMBË: „U di mi bi go a sodati, mbei dee hogi soni dee pasa ala, bi ta toobi mi a mi fusutan. Ma di tëkisi aki heepi mi u hoi a pakisei taa abiti möön Jehovah o mbei mi fëëkëtë hii dee hogi soni aki. De an o dë a mi fusutan möön, de o kaba fiaa. A o dë wan gaan bunu soni seei!”—Zafirah, Amëëkanköndë.

DI BËIBEL TA TAKI TAA: „Te a o tii, nöö di sëmbë di ta libi leti o dë kuma ahun di ta göö. Sëmbë o dë bööböö u te di libawojo an dë möön.”—Psalöm 72:7.

DI FASI FA DI TËKISI AKI HEEPI SËMBË: „Mi lo’ u pakisei dee soni dee sikifi a di tëkisi aki. Abiti möön, feti ku hii dee hogi soni dee ta pasa an o dë möön, nöö wa o ta dë pantapanta da dee sëmbë fuu möön.”—Oleksandra, Ukalaini.

DI BËIBEL TA TAKI TAA: „Dee sëmbë fuunu dee dëdë o libi. . . . Un dee sëmbë dee dë a goon doti, un weki, nöö un kai wolo u di un ta piizii!”—Jesaaja 26:19.

DI FASI FA DI TËKISI AKI HEEPI SËMBË: „Bëina de kii hii dee sëmbë u di famii u mi u di de bi dë sëmbë u wan lö de kai Tutsi. Ma di tëkisi aki ta heepi mi u dë seiki taa mi o toona si de baka. Mi ta wakiti di juu di mi o jei di suti töngö u de, te de o weki ko a libi baka!”—Marie, Luwanda.

DI BËIBEL TA TAKI TAA: „Wan sati pisiten nöö fika, nöö hogi sëmbë an o dë möön . . . Ma dee sakafasi sëmbë o feni di goonliba, nöö de o piizii seei biga bööböö libi o dë pasa maaka.”—Psalöm 37:10, 11.

DI FASI FA DI TËKISI AKI HEEPI SËMBË: „Hii fa di feti kaba, tökuseei sëmbë ta libi hogi ku wotowan jeti, söseei hogihati sëmbë dë jeti. Dee tëkisi aki bi heepi mi, te na soni. Jehovah ta si hii soni, nöö a sabi andi ta miti mi. A ta paamusi u taa abiti möön sëmbë an o ta tja sitaafu möön, nöö wa o ta mëni de möön.”—Daler, Tajikistan.

Dee sëmbë dee u taki soni u de a di woto aki, da wantu u dee milionmilion Jehovah Kotoigi di di Bëibel bi heepi u feni kötöhati. Di Bëibel heepi dee sëmbë aki u de an buuse sëmbë u wan woto lö, u wan woto köndë, söseei u de an buuse sëmbë u di fasi fa de dë (Efeise 4:31, 32). Dee Jehovah Kotoigi an ta tei së a politiki soni, söseei de an nango a feti.—Johanisi 18:36.

Boiti di dë, dee Jehovah Kotoigi ta heepi de na de a hii së u goonliba (Johanisi 13:35). Oleksandra di u bi taki soni fëën kaa, bi musu lowe kumutu nëën köndë u di feti bi ta feti dë. A bi taki taa: „Di u kumutu a di köndë fuu haba go a wan woto köndë, hën wantewante dë seei u si dee Jehovah Kotoigi ta wakiti u naandë, hën de tei u ku wai. Di fasi fa de bi libi ku u, bi heepi u fuu ko guwenti di köndë ka u ta libi nöunöu aki.”

Ku piizii seei u ta kai i fii ko a dee komakandi fuu, ka u ta lei unfa u sa libi fiifii ku wotowan nöunöu kaa, söseei ka u ta lei taa di Bëibel ta paamusi u taa woo libi bööböö a goonliba aki, a di ten di ko. I sa go a jw.org, nöö i suku wan kamian ka u ta hoi komakandi di dë zuntu ku ka i ta libi, nasö i sa hakisi wan Jehovah Kotoigi u ko lei i soni u Bëibel söndö u paka, ku di buku I sa dë waiwai u teego!