Mateyus e fruteri
28 Baka Sabat-dei, na a musudei mamanten fu a fosi dei fu a wiki, Maria Makdalena nanga a tra Maria kon luku a grebi.
2 Ne den si taki wan bigi gronseki ben de, fu di na engel fu Yehovah ben saka kon fu hemel. A ben lolo a ston gowe di ben de na fesi a grebi èn a ben e sidon na en tapu. 3 A ben e brenki leki faya di e koti na hemel èn en krosi ben weti srefisrefi. 4 Den waktiman ben e beifi èn den ben e frede te fu dede.
5 Na engel taigi den uma: „No frede, bika mi sabi taki unu e suku Yesus di sma ben spikri na wan postu. 6 Ma a no de dya, bika a opo baka soleki fa a ben taki. Kon luku a presi pe a ben didon. 7 Esi-esi, go taigi den disipel fu en taki a opo baka. Taigi den: ’A de na pasi e go na Galilea. Drape unu o si en. Disi na san mi ben musu taigi unu.’”
8 Dati meki den uma gowe fu a grebi esi-esi. Den ben e frede, ma den ben e prisiri trutru tu. Na so den lon go fruteri den disipel fu en. 9 Ne wantronso Yesus waka kon miti den èn a taki: „Odi!” Den go na en, den boigi gi en, dan den hori en na en futu. 10 Dan Yesus taigi den: „No frede! Un go fruteri den brada fu mi taki den kan go na Galilea. Den o si mi drape.”
11 Di den ben de na pasi, wan tu fu den waktiman go na a foto fu fruteri den edeman fu den priester ala san pasa. 12 Baka di den edeman fu den priester kon makandra nanga den owru man èn den taki fu a tori, den gi den srudati wan heri ipi solfru moni. 13 Ne den taki: „Un musu taki: ’Den disipel fu en ben kon na neti èn den fufuru en skin di wi ben e sribi.’ 14 No bruya. Efu a granman kon yere a tori disi, wi o taki nanga en fu a no du unu noti.” 15 Dati meki den teki a solfru moni èn den du san den edeman fu den priester taigi den fu du. Te na a dei fu tide den Dyu e fruteri a tori disi.
16 Sobun, den erfu disipel go na Galilea na a bergi pe Yesus ben taigi den fu go. 17 Di den si en, den boigi gi en, ma son sma ben e tweifri efu na en. 18 Di Yesus kon moro krosibei, a taigi den: „Mi kisi ala makti na ini hemel èn na grontapu. 19 Fu dati ede, go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. 20 Leri den fu du ala san mi taigi unu fu du. Unu o si taki mi o de nanga unu ala dei te na a kaba fu grontapu.”