De wan sma di man fiti ensrefi. Aksi yusrefi: ’Sma e si mi leki wan sma di mi man fiti ensrefi, di no strak tumsi, èn di e lespeki a fasi fa trawan e si sani? Noso den feni taki mi strak tumsi, taki mi no e hori trawan na prakseri, noso taki mi tranga-ede? Mi e arki trawan fu man du sani soleki fa den wani te dati fiti?’ O moro wi de klarklari fu fiti wisrefi, o moro wi e teki na eksempre fu Yehovah nanga Yesus. Wi musu man fiti wisrefi te a situwâsi fu wi kenki. Den kenki dati kan tyari problema kon gi wi di wi no ben ferwakti noiti. Kande wi e kon siki wantronso. Noso kande wantronso bigi kenki e kon na ini na ekonomia noso a regering di kan meki a libi hebi gi wi (Preik. 9:11). A kan muilek srefi gi wi efu na organisâsi gi wi wan tra toewijzing. Wi kan fiti wisrefi na nyun situwâsi efu wi e du den fo sani disi: (1) ferstan taki yu situwâsi kenki èn teki en leki fa a de, (2) luku go na fesi, (3) tan poti prakseri na bun sani, èn (4) du sani gi trawan. w23.07 21-22 ¶7-8

A profeiti Danièl ben de wan yonguman di den Babilonsma teki en tyari gwe leki katiboman, farawe fu Yerusalem. Ma a de krin taki den sani di den heihei man fu Babilon ben si na Danièl ben hari a prakseri fu den. Den ben si „soso san na ai e si”. Den ben si taki nowan sani ben e mankeri Danièl, a ben moi èn a ben de fu wan prenspari famiri (1 Sam. 16:7). Dati meki den Babilonsma gi en leri fu wroko gi Kownu (Dan. 1:3, 4, 6). Yehovah ben lobi Danièl. A no fu di Danièl ben moi noso fu di a ben wroko gi Kownu meki Yehovah ben lobi en, ma na fu di a yonguman disi ben teki bun besroiti ini en libi. Fu taki en leti, a kan taki Danièl ben abi sowan 20 yari di Yehovah ben taki dati a ben de leki Noa nanga Yob. Sobun, aladi Danièl ben yongu, tòg Yehovah ben si en leki wan ret’ati sma neleki Noa nanga Yob di ben dini en getrow furu yari langa (Gen. 5:32; 6:9, 10; Yob 42:16, 17; Esek. 14:14). Danièl ben libi langa èn a ben abi wan aparti libi. Èn Yehovah tan lobi Danièl en heri libi langa.​—Dan. 10:11, 19. w23.08 2 ¶1-2

Te yu wani bai wan oso, dan yu sa wani go luku ala sani fu na oso finfini gi yusrefi. Wi kan du wan srefi sortu sani te wi e leisi èn studeri Bijbel. Efu yu e leisi Bijbel es’esi, dan yu o kon sabi soso „den moro makelek sani fu den santa boskopu fu Gado” (Hebr. 5:12). Ma neleki fa yu ben o luku ala sani finfini na ini na oso fu sabi fa a de, na so yu musu ondrosuku Bijbel finfini tu fu ferstan en moro krin. Wan moi fasi fa yu kan studeri Bijbel, na te yu e kon sabi fa den difrenti sani na ini abi fu du nanga makandra. Pruberi fu ferstan san yu e bribi èn fu san ede yu e bribi taki den sani disi tru. Fu man ferstan Gado Wortu finfini, wi musu kon sabi den dipi tru tori fu Bijbel. Na apostel Paulus ben gi den Kresten brada nanga sisa fu en dek’ati fu studeri Gado Wortu fayafaya so taki den ben kan „ferstan finfini san na a bradi nanga a langa nanga a hei nanga a dipi” fu den tru tori fu Gado (Ef. 3:14-19). Na dati wi musu du tu. w23.10 18 ¶1-3