Psalm
Gi a fesiman fu den pokuman. Wan singi fu David.
31 Yehovah, na yu mi kon suku kibri.
No meki mi kisi syen noiti.
Ferlusu mi, bika yu na wan Gado fu retidu.
Kon es’esi èn ferlusu mi.
De leki wan bergi gi mi pe mi kan go kibri,
iya, wan tranga fortresi* pe mi kan feni kibri,
3 bika yu de leki wan bigi ston nanga wan fortresi gi mi.
Yu o sori mi a pasi èn yu o tyari mi, so taki yu nen kan kisi glori.
4 Yu o puru mi na ini a nèt di den seti gi mi,
bika yu na mi fortresi.
5 Mi poti mi libi na ini yu anu.
Yehovah, na yu ferlusu mi. Yu na a Gado di e taki san tru.
6 Mi e teige den sma di e anbegi popki di no man du noti.
Ma mi e fertrow tapu Yehovah.
7 Mi o breiti srefsrefi fu di yu du bun* gi mi
èn fu di yu si a banawtu fu mi.
Yu sabi heri bun fa mi e pina.
9 Tye Yehovah, du bun gi mi, bika mi de na nowtu.
Mi e krei so furu taki mi ai kon weri, iya, mi heri skin kon swaki.
10 Mi libi furu nanga sari nanga geme.
Mi no abi krakti moro fu di mi sondu.
Den bonyo fu mi kon swaki.
11 Ala den feanti fu mi e wiswasi mi.
Den birtisma fu mi e wiswasi mi moro srefi.
Den mati fu mi e frede mi.
Te den e si mi na strati den e lon gi mi.
12 Den no e prakseri mi moro. Den fergiti mi neleki fa sma e fergiti den dedewan.
Mi kon de leki wan broko prapi.
13 Mi yere den takru sani di furu sma e ferteri fu mi.
Na ala sei sma de di e meki mi frede.
Den e bondru kon na wán
fu luku fa den kan kiri mi.
14 Ma Yehovah, na yu mi e fertrow.
Mi taki: „Yu na mi Gado.”
15 Mi libi de na ini yu anu.
Puru mi na ini na anu fu mi feanti èn fu den sma di wani du ogri nanga mi.
16 Du bun gi yu futuboi.
Ferlusu mi, fu di yu na wan Gado di abi sar’ati.*
17 Yehovah, mi e begi yu. No meki mi kisi syen, bika na yu mi kari fu yepi mi.
Meki den ogriwan kisi syen.
Meki den tan pî na ini Grebi.*
18 Tapu a mofo fu den wan di e ferteri lei.
Fu di den abi heimemre, meki den e gi den ret’ati sma bigitaki èn den e wiswasi den.
19 Yu du furu bun sani gi den wan di abi bigi lespeki gi yu.
Leti na fesi ala sma yu du bun gi den wan di kon suku kibri na yu.
20 Yu o kibri den krosbei fu yu,
so taki sma no du den ogri.
Yu o kibri den na ini a tenti fu yu,
so taki sma no kon feti nanga den.*
21 Blesi fu Yehovah,
bika a sori taki a lobi* mi di mi ben de na ini wan foto di feanti ben lontu na ala sei.
22 Ma mi ben bruya èn mi taki:
„Mi o dede leti na yu fesi.”
Ma di mi kari yu fu yepi mi, yu yere den begi fu mi.
23 Un musu lobi Yehovah, ala un sma di e tai hori na en!
Yehovah e kibri den wan di e tan dini en.
Ma a e gi ala sma di abi heimemre hebi strafu.
24 Un sma di e wakti Yehovah nanga pasensi,
abi dek’ati èn no frede.