Blesi a santa nen fu Yehovah!
„Mi mofo sa taki fu na prèise fu Yehovah; èn meki ala skin blesi en santa nen te ten di no skotu, iya fu têgo.” — PSALM 145:21.
1, 2. (a) Na sortu fasi Satan tyalansi Gado tirimakti? (b) Sortu aksi e kon a fesi ini a tori fu Psalm 145:11-21?
YEHOVAH de sondro fu degedege na Universeel Soeverein. Ma Satan tyalansi na regtfardikifasi nanga na retifasi fu Gado tirimakti (Genesis 2:16, 17; 3:1-5). Didibri so srefi taki taki ala dienstknekti fu Gado na ini hemel nanga grontapu no sa man kibri na soifri retifasi fu den (Yob 1:6-11; 2:1-5; Lukas 22:31). Fu dati-ede Yehovah gi ten fu ala mekisani di abi frustan si den takru froktu fu na opo di sma opo kontrari en tirimakti èn fu den kan sori pe den tanapu ini den strei-aksi disi.
2 Psalm 145 e yepi wi fu teki wan fasti bosroiti na a sei fu Gado tirimakti. Fa so? San David e taki fu Yehovah kownuwroko? Èn fa Gado e handri nanga den fesiman fu en kownuwroko? A piki di e yepi wi de fu feni na ini Psalm 145:11-21.
Taki fu Yehovah kownuwroko
3. Efu Yehovah kownuwroko de diri gi wi, dan san wi sa du?
3 Yehovah tirimakti ben de wan sani di David ben broko en ede srefisrefi di a ben taki: „Fu na glori fu yu kownuwroko den sa taki èn fu yu makti den sa taki, fu meki en makti du nanga na glori fu wan moifasi fu en kownuwroko bekenti na den libisma pikin” (Psalm 145:11, 12). Sma e taki fu sani di abi den belangstelling. Na so wan man e taki fu en osofamiri, en oso, den nyanyan fu en di a prani. „Wan bun sma e tyari bun sani komoto fu na bun gudu fu en ati”, Yeises ben taki (Lukas 6:45). Efu na tirimakti fu Gado de wan diri sani gi wi ati, dan wi sa begi taki en Kownukondre kon, èn wi sa fruteri tra sma fu na retidu, vrede nanga regtfardikifasi di sa de ondro en tiri. Wi sa prèise Yehovah leki na „Kownu fu têgo ten” èn wi sa taki fu fa a e sori en soevereiniteit nanga yepi fu na Mesiyas Kownukondre ini anu fu en lobi Manpikin, Yeises Krestes (Openbaring 15:3; Yesaya 9:6, 7). Fa a de wan grani fu taki fu na hemel glori fu Yehovah kownuwroko, di heri esi sa de fu si ini na moifasi fu wan grontapu Paradèis di furu nanga koloku mekisani di de volmaakti!—Lukas 23:43.
4. Oten wi abi na okasi fu taki fu Yehovah „makti”, èn fa wi e kisi yepi na ini na aktiviteit disi?
4 Warderi so srefi sa buweigi wi fu taki fu Yehovah „makti”. Aladi „a de hei na ini krakti”, toku a no e kobroiki en noiti na wan fowtu fasi (Yob 37:23). A ben kobroiki en makti fu meki grontapu nanga a libismafamiri èn a sa kobroiki en fu wai den ogriwan puru. Wi abi na okasi fu taki fu na makti fu Gado te wi e meki na bun nyunsu bekenti. Èn wi no de grantangi taki na Moro Hei Fonten disi fu krakti e gi wi tranga fu du a wroko disi? (Yesaya 40:29-31). Iya, Gado krakti nanga yeye e hori baka gi wi leki Yehovah Kotoigi na ini santa diniwroko. Na a fasi disi wawan a Kownukondreboskopu e preiki nanga wondru winimarki na a heri grontapu.—Psalm 28:7, 8; Sakaria 4:6.
5. San wi musu du fu di ipi-ipi sma no sabi fu Yehovah „makti du”?
5 A de fanowdu taki wi meki den „makti du” fu Yehovah bekenti na den libisma pikin, neleki fa den Israèl sma ben fruteri den pikin fu den fu na fasi fa Yehovah ben fri den puru fu katibo fu Egepti (Exodus 13:14-16). Libisma e bow monument gi sma di den du fu den den e si leki aparti, ma omeni sma sabi fu den makti du fu Gado? So leki wan koniman taki en: „Den e marki den du fu den deki-atiman fu den na tapu kopro sani, ma den glori du fu Yehovah ben skrifi tapu santi, èn na lon fu a ten wasi den puru fu na memre di sma e memre sani na a ten disi.” Den du dati no wasi gwe trutru, aladi ipi-ipi sma no sabi den. Fu dati-ede na ini wi oso-fu-osowroko, te wi e hori osobijbel studi, èn na tra okasi, meki wi taki nanga faya fu den makti du fu Gado.
6. (a) Na sortu okasi yari psa kba na faya yeyefasi ben kon bun na fesi, di wi ben du wi diniwroko nanga en? (b) Te yu luku en bun, san ben taki na ini 1922 fu na preiki fu na Kownukondre?
6 So srefi nanga faya wi musu meki na glori fu Gado kownuwroko bekenti. Faya gi so wan Kownukondredienst seiker ben de krin fu si, di na ini 1922 J. F. Rutherford, di na a ten dati ben de presidenti fu na Watch Tower Bible and Tract Society ben taki nanga den kongresfisitiman na Cedar Point, Ohio, èn ben taki: „Fu sensi 1914 na Kownu fu glori teki en makti . . . Na Kownukondre fu hemel de krosibei; a Kownu e tiri; Satan kownukondre e fadon broko; milyunmilyun sma di e libi now noiti sa dede. Yu e bribi dati? . . . Dan go baka na a veld, ow unu manpikin fu na Moro Hei Gado! Tai yu fetisani na yu mindri! De seryusu, de na ai, de nanga faya, abi deki-ati. De kotrow èn tru Kotoigi gi Masra. Go a fesi ini na feti teleki ibri marki fu Babilon didon pori. Preiki na boskopu na ala sei. Grontapu musu sabi taki Yehovah na Gado èn taki Yeises Krestes de na Kownu fu den kownu èn Masra fu den masra. Disi na a Dei fu den dei. Luku, na Kownu e tiri! Unu na den bariwrokoman fu en. Fu dati-ede: Preiki, preiki, preiki, na Kownu nanga en Kownukondre.”
7. Fa wi musu denki fu na aktiviteit fu wi leki Kownukondrepreikiman?
7 Fa a de wan prisiri fu ’denki na a nen fu Gado’, fu fruteri tra sma fu en tirimakti, èn fu preiki na Mesiyas Kownukondre fu en lobi Manpikin! (Maleaki 3:16) Leki Kownukondre preikiman èn horibakaman wi e feni en na grani fu wi fu meki na bun nyunsu bekenti èn fu drai na ati fu trawan go na Gado, Krestes nanga na Kownukondre. Na inisei fu wi wan tranga lostu musu de fu fruteri tra sma fu na glori moifasi fu Yehovah kownuwroko.—Teki gersi Yeremia 20:9.
8. (a) San e teki presi gi na tirimakti fu Yehovah na ini na ten disi? (b) San-ede wi kan taki taki Gado tirimakti de „fu ala geslakti di sa kon baka makandra”?
8 Sani musu buweigi wi fu meki Gado Kownukondre bekenti nanga bigi faya, bika David ben taki moro fara: „Yu kownuwroko na wan kownuwroko fu ten di no skotu, èn yu tirimakti de ini ala geslakti di sa kon baka makandra” (Psalm 145:13). Te na Psalmsingiman moro fara e denki dipi fu Yehovah kownuwroko, dan a ben kenki den voornaamwortu fu „en” go na „yu”, èn e taki den wortu fu en di de leki wan begi langalanga gi Gado. A no de fu taki, taki Yehovah tirimakti, so leki a de na ini na Mesiyas Kownukondre, no e teki a presi fu Gado têgo kownuwroko. Te yu luku en bun, te den opo a libismafamiri di e gi yesi go miti volmaaktifasi, dan Krestes sa gi a Kownukondre abra na en Tata (1 Korente sma 15:24-28). Gado abi sobun tirimakti „ini ala geslakti di e kon baka makandra”. Yehovah ben de kownu, di den ben meki Adam èn a sa abi tirimakti tapu regtfardiki libisma fu têgo.
9. San wi kan taki fu wan vers na ini Psalm 145, di e bigin nanga na Hebrew letter nun?
9 Na ini na psalm disi di de wan acrostichon, na masoretisch tekst no poti wan vers di e bigin nanga a Hebrew letter nun. Ma ini akruderi nanga na Griki Septuaginta, na Siria Pesjita, èn na Latijn Vulgaat, dan wan Hebrew anuskrifi e taki: „Yehovah de kotrow ini ala en wortu, èn a abi switifasi na wan lobi fasi [ofu, „loyaal”] ini ala en wroko.” (New World Translation of the Holy Scriptures—with references, futuwortu) Gado e meki ala en pramisi kon tru èn a de loyaal, èn a abi lobifasi èn de nanga switifasi na ala sma di e warderi en bunfasi.—Yosuwa 23:14.
Na yepi fu Yehovah noiti e misi
10. Fa Gado ’e gi wi yepi’?
10 Na Têgo Kownu no e luku psa den muilek omstandigheid fu en dienstknekti. Dati-meki David ben kan taki: „Yehovah e gi yepi na ala sma di e fadon, èn e opo ala sma tanapu di ben beni go na gron” (Psalm 145:14). Fu sensi den dei fu Abel, dan Yehovah ben hori baka gi en anbegiman. Efu den ben libi wi na wi srefi, dan wi ben sa fadon furu tron na ondro den lai fu wi. Wi no abi nofo krakti fu tyari ala den hebi fu a libi èn fu kakafutu gi na frufolgu di e kon tapu a pasi fu wi leki a pipri fu Gado, ma Yehovah e hori wi tanapu. Na vorm fu na Hebrew werkwortu di kobroiki dya e sori taki Gado ’e yepi wi’ doronomo. Wi kan si taki Yohanes na Dopuman èn Gado eigi Manpikin ben yepi opo sondari di ben fadon na moreel sei. Te den sma disi ben sori berow èn ben tron futuboi fu Yehovah, dan den ben kisi na wondru blesi fu a yepi fu Gado.—Mateyus 21:28-32; Markus 2:15-17.
11. Na sortu fasi Yehovah e ’opo ala sma tanapu di beni go na gron’?
11 A de wan trowstu fu sabi taki Yehovah ’e opo ala suma tanapu di den difrenti tesi e beni den go na gron’. A e gi deki-ati na den wan a mindri wi di lasi howpu, a e trowstu den wan fu wi di abi sari, èn e yepi wi fu taki en wortu nanga deki-ati te wi e kisi frufolgu (Tori fu den Apostru 4:29-31). Noiti a e gi pasi taki den lai fu wi masi wi, efu wi teki nomo a yepi fu en (Psalm 55:22). Sobun, leki na „umapikin fu Abraham” di ben „bokru” ma di Yeises ben dresi na skin fasi, na so wi musu „gi grani na Gado” te na wan lobi fasi a e opo wi tanapu na yeye fasi (Lukas 13:10-17). Den salfuwan di ben beni go na gron na ini katibo fu Babilon ben de grantangi di Gado ben opo den na ini 1919, èn fu sensi 1935 a e opo „tra skapu” di abi warderi.—Yohanes 10:16.
12. Fa „den ai fu ala sma e luku go nanga howpu” na Gado?
12 Yehovah noiti e libi en pipri na wan sei, soleki David e tyari kon na krin moro fara, te a taki: „Na yu den ai fu ala sma e luku go nanga howpu, èn yu e gi den a nyanyan fu den na a reti ten. Yu e opo yu anu èn e satisferi na lostu fu ibri sani di e libi” (Psalm 145:15, 16). A de neleki den ai fu ala mekisani di e libi, e drai ini howpu go na a Universele Soeverein. Den engel e luku go na Yehovah fu tan libi go doro. Èn soleki wan pikin di e luku go na wan papa ofu wan mama fu kisi sani di den abi fanowdu, na so wi e luku go na wi Hemel Tata. Te yu e luku en bun, dan libisma nanga meti e kisi nyanyan fu en. Nowan tra sma kan satisferi den fanowdu disi fu den. Gado e gi den „a nyanyan fu den na a reti ten”, dati wani taki, te a de fanowdu.
13. Na sortu fasi Yehovah ’e opo en anu èn e satisferi na lostu fu ibri sani di e libi’?
13 Gado ’e opo en anu èn e satisferi na lostu fu ibri sani di e libi’ (Psalm 104:10-28). Fu tru, son meti e dede fu di den mankeri nyanyan. Furu libisma angri e kiri den leki wan bakapisi fu gridifasi, poti sma ondro dwengi, èn na fowtu kobroiki fu sani. Boiti fu dati, Yeises ben taki a fesi, taki „mankeri fu nyanyan” ben sa de wan pisi fu „na marki” fu en denoya ini den lasti dei disi (Mateyus 24:3, 7). Ma nowan fu den sani disi e psa fu di Yehovah gridi ofu no man fu sorgu fu sani. Prakseri pikinso den dusundusun milyun mekisani di e kisi nyanyan! Boiti fu dati, a psalm disi e gi na dyaranti taki ondro na tiri fu na Kownukondre, te ’libisma no sa tiri tapu wan tra libisma fu na lasi fu en’, dan Gado sa satisferi den fanowdu fu wi na skin fasi èn na yeye fasi (Preikiman 8:9; Yesaya 25:6). Srefi ini a ten disi, wi no abi fanowdu fu angri fu yeye nyanyan, fu di Gado e sorgu fu dati psa marki na a reti ten nanga yepi fu na ’kotrow èn koni srafu” (Mateyus 24:45-47; 1 Petrus 2:2). Te wi taki en na yeye fasi, dan Yehovah Kotoigi de sma di kisi nyanyan moro bun na grontapu. Yu e sori dipi warderi gi so wan nyanyan di de bogobogo?
Yehovah e kibri den sma di lobi en
14. Fu san-ede David ben kan taki Yehovah de regtfardiki ini ala en pasi èn loyaal na ini ala en wroko’?
14 Na lawfasi fu wi kan ’bruya wi pasi’ èn tyari problema kon gi wi, ma noiti wi musu gi Gado a fowtu fu den muilekheid disi (Odo 19:3). David e sori fu san-ede, te a e taki: „Yehovah de regtfardiki ini ala en pasi èn loyaal na ini ala en wroko” (Psalm 145:17). Gado e handri alaten na ini wan opregti, regtfardiki nanga sari-ati fasi. En sari-ati spesrutu de krin fu si na ini den sani di a sorgu gi frulusu nanga yepi fu Yeises frulusu ofrandi (Tori fu den Apostru 2:21; 4:8-12). Yehovah de so srefi „loyaal na ini ala en wroko”, alaten kotrow, nanga lobi, èn no e teki sma partèi. Leki „sma di e waka a baka Gado”, meki wi de opregti, regtfardiki, nanga sari-ati, no e teki sma partèi èn de loyaal.—Efeisia sma 5:1, 2; Deuteronomium 32:4; Psalm 7:10; 25:8; Yesaya 49:7; Tori fu den Apostru 10:34, 35.
15. Fa wi ’kari na nen fu Yehovah na ini waarheid’ èn san ben kon leki bakapisi di wi du so?
15 Fu di Gado de regtfardiki èn loyaal meki a e hari wi go na en. Boiti fu dati, David e gi wi na dyaranti: „Yehovah de krosibei fu ala sma di e kari en, ala sma di e kari en ini waarheid” (Psalm 145:18). Fu di wi teki dopu leki bribiman di gi den srefi abra, meki wi ben kari a nen fu Yehovah (Tori fu den Apostru 8:12; 18:8; Rome sma 10:10-15). Sobun fu di wi e hari go krosibei na Gado, meki a e hari kon krosibei na wi (Yakobus 4:8). Wi „e kari en na ini waarheid” fu di wi e du dati na a tru fasi, nanga yepi fu Yeises Krestes. Èn Yehovah sa tan krosibei efu wi e anbegi en „ini yeye èn waarheid”, e sori „bribi sondro hoigrifasi” èn ’e go doro fu de stanfaste leki wi e si a Wan di no de fu si’ (Yohanes 4:23, 24; 1 Timoteyus 1:5; Hebrew sma 11:27). Dan wi no sa begi fu soso ofu abi fu kon tanapu wi wawan na fesi Satan grontapu, ma wi sa go doro fu nyanbun fu a yepi nanga tiri fu Gado (Psalm 65:2; 1 Yohanes 5:19). Fa disi sa wani taki seikerfasi!
16. Fu san-ede èn fa Yehovah ’du akruderi den lostu fu den sma di e frede en’?
16 Wi abi so srefi tru seikerfasi fu tra sani ede di Yehovah du fu a bun fu wi. David ben taki: „A sa du akruderi na lostu fu den di e frede en, èn na babari fu den fu kisi yepi a sa yere èn a sa frulusu den” (Psalm 145:19). Yehovah ’e du akruderi na lostu fu wi’ fu di wi abi dipi respeki gi Gado èn wan gosontu frede fu no meki a kisi atibron (Odo 1:7). Na ati fu wi di e gi yesi ben buweigi wi fu gi wi srefi abra na Yehovah, èn na yeyefasi fu wi de: „Meki yu wani feni presi”. Fu di a de a wani fu en taki wi meki na Kownukondreboskopu bekenti, dan a e meki a lostu fu wi fu du a wroko dati kon tru (Mateyus 6:10; Markus 13:10). Gado ’e du akruderi a lostu fu wi’ fu di wi no e begi fu wi srefi nomo, ma e aksi fu sani ini akruderi nanga en wani. A e gi san de ini akruderi nanga a wani fu en èn fu na tanbun fu wi.—1 Yohanes 3:21, 22; 5:14, 15; teki gersi Mateyus 26:36-44.
17. Fu san-ede wi kan de seiker taki Gado sa yere a „babari fu wi fu kisi yepi”?
17 Leki Yehovah loyaal Kotoigi, wi kan de so srefi seiker taki a „babari fu wi fu kisi yepi” noiti sa kon na dofuman yesi. Gado ben fri David puru fu ranpu èn ben frulusu Yeises, iya, ben opo en baka fu dede. Te a feianti kon ròs wi, spesrutu ini na ten fu na kon di Gog o kon fu feti, dan wi kan de seiker taki Yehovah sa frulusu wi (Eseikièl 38:1–39:16). Te yu luku en bun, ini iniwan ten fu problema neleki David wi kan begi nanga frutrow: „Sori mi bun-ati, ow Yehovah, bika mi de na ini hebi banawtu. . . . Mi yere na takru nyunsu di furu sma fruteri, skreki di de na ala sei. Te den ari kon makandra leki wán man kontrari mi, dan a de fu teki mi sili puru meki den e meki plan. Ma mi—na ini yu mi poti mi frutrow, ow Yehovah. Mi taki: ’Yu na mi Gado.’”—Psalm 31:9-14.
18. Fa a e tyari wini kon fu sabi taki Yehovah ’e kibri ala den sma di e lobi en’ ma ’sa wai den ogriwan puru’?
18 Yehovah Gado de alaten klari fu yepi wi. So leki David e taki: „Yehovah e kibri ala den sma di e lobi en, ma ala den ogriwan a sa wai puru” (Psalm 145:20). Iya, efu wi lobi Gado, dan a sa blesi èn kibri wi (Numeri 6:24-26). A ’e pai den heimemrewan psa marki’ ma e kibri den sakafasi futuboi fu en, èn no e meki noti psa, di sa du den ogri di e tan. Fu di Yehovah de nanga wi, meki wi de nanga deki-ati (Psalm 31:20-24; Tori fu den Apostru 11:19-21). ’No wan fetisani di kon kontrari wi sa wini’ (Yesaya 54:17; Psalm 9:17; 11:4-7). Dati na a ondrofeni fu den sma di buweisi na lobi fu den gi Gado leki en kotrow dienstknekti di gi den srefi abra. Yehovah Kotoigi leki wan grupu sa psa na wan bun fasi na „bigi banawtu” di sa tyari kon tapu den ogriwan (Openbaring 7:14). Èn fa a sa de wan blesi gi „ala sma di lobi en” te na bigi strei-aksi fu Yehovah universeel kownuwroko sa lusu!
Go doro fu blesi Yehovah santa nen
19. Fu san-ede den mofo fu wi e taki fu „den prèise fu Yehovah”?
19 David e bosroiti na Psalm disi di e buweigi yu ati nanga den wortu: „Mi mofo sa taki fu a prèise fu Yehovah; èn meki ala skin blesi en santa nen te ten di no skotu, iya fu têgo” (Psalm 145:21). Leki Yehovah Kotoigi wi e warderi Gado granfasi, bunfasi, bun-ati kownuwroko, yepi di no e misi, èn sorgu sondro fu a weri. Fu dati-ede neleki David, wi mofo e taki fu den prèise fu Gado. Sani e buweigi wi fu gi wi srefi ini a dini fu en wawan, fu taki en tangi fu den furu blesi fu en, èn fu prèise en „tumusi moi nen”.—1 Kronieken 29:10-13; Exodus 20:4-6.
20. Nanga têgo ten na wi fesi, dan san musu de wi fasti bosroiti now?
20 Fu di Yehovah e blesi wi aladei, meki alaten wi e blesi en, ofu e taki bun fu en. Meki wi preiki na bun nyunsu fayafaya leki prèise gi Gado, èn e fruteri tra sma taki heri-esi ’ala skin sa blesi en santa nen’. O moi a sa de fu libi te ala sma di o libi na grontapu—fu tru, ala mekisani di abi frustan na ini na universum—sa singi prèise gi wi hemel Tata! (Psalm 148:1-13). Blesi musu de gi Yehovah fu di a tyari en nen kon na krin èn gi unu na grani fu de en Kotoigi (Psalm 83:18; Yesaya 43:10-12). Meki wi tyari wi srefi na wan fasi di fiti den sma di e si na nen dati leki santa èn di e begi fu a kon santa (Lukas 11:2). Meki wi dini Gado loyaal so taki na ini en nyun seti wi sten kan de fu yere na ini den koor fu den sma di e blesi Yehovah santa nen fu têgo.
San na den piki fu yu?
◻ San wi sa du efu Yehovah kownuwroko de diri gi wi?
◻ San e teki a presi fu Gado kownuwroko na ini na ten disi?
◻ Fa Yehovah ’e opo ala den sma di beni go na gron’?
◻ Na sortu fasi Gado ’e opo en anu èn e satisferi na lostu fu ibri sani di e libi’?
◻ Fa wi kan blesi Yehovah santa nen?
[Prenki na tapoe bladzijde 29]
Na ini 1922 den wortu ’preiki na Kownu èn na Kownukondre’ ben gi horibakaman fu Yehovah kownuwroko tranga fu du moro bigi wroko