Yu e memre disi ete?
Yu man memre san yu leisi na ini den Waktitoren di kon na doro a yari disi? Luku efu yu kan piki den aksi di e kon now:
Sortu wini wi o kisi te wi e meki ten fu taki nanga Yehovah, fu arki en, èn fu prakseri en?
Wi o man teki moro bun bosroiti, wi o tron moro bun leriman, a bribi fu wi o kon moro tranga, èn wi o kisi moro lobi gi Yehovah.—w22.01, blz. 30-31.
Sortu wini wi o kisi efu wi e leri fu frutrow tapu Yehovah nanga den sma di a poti fu teki fesi?
Now na a ten fu leri fu frutrow tapu a fasi fa Gado e du sani èn fu no tweifri na den rai nanga den bosroiti fu den owruman. Te a bigi banawtu bigin, wi no o abi problema fu gi yesi awinsi wi e kisi rai di no makelek fu frustan.—w22.02, blz. 4-6.
Na engel ben taigi Sakaria taki „[Granman] Serubabel abi wan pisi loto na ini en anu fu marki sani”. San na engel ben wani taki nanga dati? (Sak. 4:8-10)
A fisyun disi ben e gi a pipel fu Gado a dyaranti taki awinsi a tempel di den ben e bow no ben moi so leki a fosiwan, toku den ben o kaba meki en èn Gado ben o feni en bun.—w22.03, blz. 16-17.
Fa wi kan de wan eksempre na ini a fasi fa wi e taki? (1 Tim. 4:12)
Te wi e taki na wan switi fasi èn nanga lespeki nanga sma di wi e miti na ini a preikiwroko, te wi e singi nanga wi heri ati, te wi abi a gwenti fu gi piki na den konmakandra, te wi e taki san tru, te wi e gi trawan deki-ati, èn te wi e no e taki sani di e hati trawan.—w22.04, blz. 6-9.
San na ogri meti nanga den seibi ede di kari na ini Openbaring 13:1, 2 abi fu du nanga den fo ogri meti (noso kownukondre) na ini Danièl kapitel 7?
Na ogri meti fu Openbaring 13 a no wán grontapumakti nomo, soleki Rome. Na presi fu dati a e prenki ala grontapumakti di tiri libisma.—w22.05, blz. 9.
San na wan prenspari fasi fa wi kan sori taki wi abi a frutrow taki Gado o krutu sani na wan reti fasi?
Efu wan sma du wan hati sani nanga wi noso efu a du ogri nanga wi, dan wi e pruberi fu no ati bron èn fu no hori a sma na ati. Wi e libi sani gi Yehovah. A o puru ala den ogri sani di pasa nanga sma fu di trawan sondu.—w22.06, blz. 10-11.
San wan brada musu hori na prakseri te a kisi a kari fu begi na wan konmakandra?
A no musu gebroiki a begi fu gi a gemeente leri noso fu meki wan sani bekènti. Spesrutu na a bigin fu wan konmakandra, a no de fanowdu fu „taki furu sani” (Mat. 6:7).—w22.07, blz. 24-25.
Yesus ben taki dati „den sma di du takru sani, o opo baka fu kisi krutu”. San Yesus ben wani taki nanga dati? (Yoh. 5:29)
Den no o kisi krutu fu den sani di den ben du fosi den dede. Yesus o luku efu den sma disi e du san a leri den baka te den kisi wan opobaka.—w22.09, blz. 18.
Sortu deki-ati J. F. Rutherford gi sma na wan kongres na ini september 1922?
Na wan kongres di ben hori na ini Cedar Point, Ohio, na Amerkankondre, a meki bekènti: „Luku, a Kownu e tiri kaba! Yu na a sma di musu fruteri tra sma fu en. Dati meki, preiki, preiki, preiki, a Kownu nanga en Kownukondre!”—w22.10, blz. 3-5.
San na den dri fasi fa Gado e yepi wi fu horidoro, soleki fa Yesaya kapitel 30 e sori?
A kapitel disi e sori taki (1) a e arki den begi fu wi èn a e piki den tu (2) a e gi wi rai, èn (3) a e du bun sani gi wi now èn a o blesi wi na ini a ten di e kon.—w22.11, blz. 9.
Fu san ede wi kan taki dati den wortu fu Psalm 37:10, 11, 29 kon tru na ini owruten èn taki den o kon tru na ini a ten di e kon?
Den sani di David skrifi e sori krin fa a libi ben switi na ini Israel, soleki na a ten di Salomo ben e tiri. Yesus ben sori go na wan paradijs di ben o kon di èn a ben taki fu vers 11 (Mat. 5:5; Luk. 23:43).—w22.12, blz. 8-10, 14.