-
Sortu libi Gado wani gi wi?Yu kan de koloku fu têgo!—Wan moi fasi fu studeri Bijbel
-
-
LES 25
Sortu libi Gado wani gi wi?
Bijbel e taki dati libisma e ’libi syatu èn taki den lai problema’ (Yob 14:1). Na a libi disi Gado wani gi wi? Efu a no dati a wani, dan sortu libi a wani gi wi? A o du san a abi na prakseri? Luku sortu moi piki Bijbel e gi.
1. Sortu libi Yehovah wani gi wi?
Yehovah wani taki wi abi wan koloku libi. Di a meki den fosi libisma, Adam nanga Eva, a poti den na ini wan moi paradijs di ben nen a dyari fu Eden. Baka dati „Gado blesi den. Dan a taigi den: ’Meki pikin èn kon furu, teleki unu kon lai na grontapu èn basi ala sani na grontapu’” (Genesis 1:28). Yehovah ben wani taki den meki pikin, taki den meki a heri grontapu tron wan paradijs èn taki den sorgu den meti. Yehovah ben wani taki ala libisma de gosontu èn taki den libi fu têgo.
Na ini a ten disi wi no abi a libi dati.a Ma Gado wani gi wi a libi dati ete (Yesaya 46:10, 11). A wani taki libisma di e gi yesi na en libi fu têgo na ini wan paradijs na grontapu.—Leisi Openbaring 21:3, 4.
2. Fa yu kan abi wan koloku libi now?
Libisma abi „Gado fanowdu”. (Leisi Mateyus 5:3-6.) Yehovah meki wi nanga a firi fu kon sabi en èn fu anbegi en. A wani taki wi tron bun mati fu en, taki wi ’du ala san a e aksi wi, taki wi lobi en’ èn taki wi dini en nanga ’wi heri ati’ (Deuteronomium 10:12; Psalm 25:14). Te wi e du den sani disi, wi kan de koloku awinsi wi abi problema. Te wi e du a wani fu Yehovah, dan wi o abi wan koloku libi.
SORTU TRA SANI YU KAN LERI?
Wi o si fa Yehovah sreka a grontapu gi wi èn fa disi e sori o furu a lobi wi. Wi o si tu fu san ede wi de na libi.
3. Yehovah wani taki libisma abi wan bun libi
Prei a FELEM èn taki fu na aksi disi:
Fu san ede Gado meki so wan moi grontapu gi wi?
Leisi Preikiman 3:11 èn taki fu na aksi disi:
Te yu luku a tekst disi, dan san Yehovah wani gi libisma?
4. Yehovah o du ete san a abi na prakseri
Leisi Psalm 37:11, 29 nanga Yesaya 55:11. Baka dati taki fu na aksi disi:
Fa wi du sabi taki Yehovah o du ete san a abi na prakseri?
Wan broko oso kan seti kon bun baka. Libisma pori grontapu, ma Gado o seti en kon baka gi den sma di lobi en
5. Te wi e anbegi Yehovah, wi o de koloku trutru
Te wi sabi fu san ede Gado meki wi, dan dati kan yepi wi fu abi wan koloku libi. Prei a FELEM èn taki fu na aksi disi:
Fa Terumi ben firi baka di a kon sabi fu san ede a de na libi?
Leisi Preikiman 12:13 èn taki fu na aksi disi:
Te wi luku o furu Yehovah du gi wi, dan fa wi kan sori taki wi de nanga tangi?
WAN SMA KAN AKSI YU: „Fu san ede wi de na libi?”
Fa yu ben o piki en?
SAN YU LERI?
Yehovah wani taki wi libi fu têgo na ini wan paradijs na grontapu. Te wi e anbegi en nanga wi heri ati, dan wi o abi wan koloku libi nownow kaba.
Fa yu ben o piki den aksi disi?
Fu san ede Yehovah ben meki Adam nanga Eva?
Fa wi du sabi taki Gado o du ete san a ben abi na prakseri gi libisma?
Fa yu kan de koloku trutru?
TRA SANI DI YU KAN LUKU
Na ini na artikel disi yu o si fu san ede wi kan bribi taki a dyari fu Eden ben de trutru.
„A dyari fu Eden ben de wan trutru presi?” (A Waktitoren, 1 yanuari 2011)
Na artikel disi e sori fu san ede wi kan bribi taki grontapu o tan fu têgo.
Fu san ede wi de na libi? Na ini na artikel disi yu kan leisi san Bijbel e taki.
Na ini a felem disi yu o si fa wan man di ben denki taki a ben abi ala sani, feni a sani di ben mankeri na ini en libi.
a Na ini a tra les wi o si fu san ede a libi lai problema now.
-
-
San na Gado Kownukondre?Yu kan de koloku fu têgo!—Wan moi fasi fu studeri Bijbel
-
-
2. Suma e tiri makandra nanga Yesus?
Yesus no e tiri en wawan. Bijbel e taki dati sma fu „ibri lo, tongo, pipel, nanga kondre . . . o tiri grontapu leki kownu” (Openbaring 5:9, 10). Omeni sma o tiri makandra nanga Krestes? Sensi di Yesus kon na grontapu milyunmilyun sma tron bakaman fu en. Ma 144.000 sma nomo o go na hemel fu tiri makandra nanga Yesus. (Leisi Openbaring 14:1-4.) Ala den tra bakaman fu en o libi na grontapu èn a Kownukondre o tiri den.—Psalm 37:29.
-
-
Den sani di a Kownukondre o duYu kan de koloku fu têgo!—Wan moi fasi fu studeri Bijbel
-
-
Den sani di a Kownukondre o du
Gado Kownukondre e tiri kaba na ini hemel. Heri esi a o tyari bigi kenki kon na grontapu. Kon meki wi luku wan tu fu den bun sani di a Kownukondre o du te a o tiri grontapu.
1. Fa Gado Kownukondre o sorgu taki freide de na grontapu èn taki sani waka na wan reti fasi?
Yesus, a Kownu fu Gado Kownukondre, o pori ala ogrisma èn a o puru ala regering na ini a feti fu Armagedon (Openbaring 16:14, 16). Na a ten dati a pramisi disi fu Bijbel o kon tru: „Ete wan syatu pisi ten èn den ogriwan no sa de moro” (Psalm 37:10). Leki Kownu fu a Kownukondre, Yesus o sorgu taki freide de na grontapu èn taki sani waka na wan reti fasi.—Leisi Yesaya 11:4.
2. Fa a libi o de te a wani fu Gado o pasa na grontapu?
Gado Kownukondre o sorgu taki ’den reti-ati sma kisi grontapu èn taki den libi fu têgo na en tapu’ (Psalm 37:29). Prakseri fa a o de te soso bun sma de na grontapu di lobi Yehovah èn di lobi makandra! Nowan sma o siki èn ala sma o libi fu têgo.
3. San Gado Kownukondre o du baka te a pori ogrisma?
Baka te Yesus pori den ogrisma, a o tiri leki Kownu 1000 yari langa. Na ini a pisi ten dati, en nanga den 144.000 sma di o tiri makandra nanga en o yepi sma na grontapu fu kon fri fu sondu. Baka den 1000 yari dati a heri grontapu o de wan moi paradijs èn ala sma o de koloku fu di den e gi yesi na den wet fu Yehovah. Te dati pasa, dan Yesus o gi a Kownukondre baka na en Papa, Yehovah. Dan Yehovah en ’nen o santa’ na heri grontapu (Mateyus 6:9, 10). Ala sma o si taki Yehovah na wan bun Tiriman di lobi sma. Yehovah o pori Satan, den ogri yeye nanga iniwan sma di e opo ensrefi teige en na a ten dati (Openbaring 20:7-10). Den bun sani di Gado Kownukondre o du na grontapu o tan fu têgo.
SORTU TRA SANI YU KAN LERI?
Wi o si fu san ede wi kan de seiker taki Gado o gebroiki a Kownukondre fu du ala san a pramisi na ini Bijbel.
4. Gado Kownukondre o puru ala den regering fu libisma
„Sensi di libisma bigin tiri tra libisma, sani no waka bun gi den” (Preikiman 8:9). Yehovah o gebroiki en Kownukondre fu kenki a sani disi.
Leisi Danièl 2:44 nanga 2 Tesalonikasma 1:6-8. Baka dati taki fu den aksi disi:
San Yehovah nanga en Manpikin Yesus o du nanga den libisma tiriman èn nanga den sma di e horibaka gi den?
Fu san ede yu de seiker taki Yehovah nanga Yesus o du sani na wan reti fasi?
5. Yesus na a moro bun Kownu
Leki Kownu fu Gado Kownukondre, Yesus o du furu bun sani gi sma na grontapu. Prei a FELEM fu si fa Yesus sori taki a wani yepi libisma èn taki a kisi a makti fu Gado fu du dati.
Di Yesus ben de na grontapu a sori san a Kownukondre o du. Sortuwan fu den blesi di kari dyaso yu wani si? Leisi den tekst di e taki fu den blesi disi.
DI YESUS BEN DE NA GRONTAPU . . .
KOMOTO FU HEMEL YESUS . . .
a ben basi a weer.—Markus 4:36-41.
o sorgu taki ala sani na ini a natuur kon bun baka.—Yesaya 35:1, 2.
a gi dusundusun sma nyanyan.—Mateyus 14:17-21.
o sorgu taki nowan sma na grontapu abi angri.—Psalm 72:16.
a dresi furu sikisma.—Lukas 18:35-43.
o sorgu taki ala sma de gosontu.—Yesaya 33:24.
a gi sma libi baka.—Lukas 8:49-55.
o wiki dedesma èn a o puru dede.—Openbaring 21:3, 4.
6. Gado Kownukondre o sorgu taki wi abi wan bun libi na ini a ten di e kon
A Kownukondre o sorgu taki libisma kisi a bun libi di Yehovah ben wani gi den sensi a bigin. Den o libi fu têgo na ini wan paradijs na grontapu. Prei a FELEM fu si fa Yehovah e gebroiki en Manpikin, Yesus, fu du san a abi na prakseri.
Leisi Psalm 145:16 èn taki fu na aksi disi:
Fa yu feni en taki Yehovah o „gi ala libisani san den e angri fu kisi”?
SON SMA E TAKI: „Efu wi alamala wroko makandra, wi kan lusu den problema fu grontapu.”
Sortu problema Gado Kownukondre o lusu di libisma regering no man lusu?
SAN YU LERI?
Gado Kownukondre o du san Gado ben abi na prakseri gi libisma. A o meki a heri grontapu tron wan paradijs pe soso bun sma o libi. Ala sma o dini Yehovah èn den o libi fu têgo.
Fa yu ben o piki den aksi disi?
Fa Gado Kownukondre o santa a nen fu Yehovah?
Fu san ede yu e bribi taki Gado Kownukondre o du san Gado e pramisi na ini Bijbel?
Sortuwan fu den bun sani di a Kownukondre o du, yu wani si?
TRA SANI DI YU KAN LUKU
Na ini na artikel disi yu o si san na Armagedon.
Luku san o psa na a ten di Yesus kari a „bigi banawtu”.—Mateyus 24:21.
Na ini a felem disi yu o si fa wan osofamiri e prakseri fa a o de na ini a paradijs.
Na ini na artikel „Furu aksi ben e dangra mi” yu kan leisi fa wan man di ben opo ensrefi teige lanti kon frustan taki na Gado wawan man lusu den problema fu wi.
-