Têgo kolokoe e wakti gi man di e dini Gado
„Gado ben lobi libisma sote, taki a ben gi en wan enkri gebore Manpikin, so taki ibriwan sma di sori bribi ini en, no ben sa go pori ma ben sa abi têgo libi.” — JOHANES 3:16.
1, 2. (a) Soema na a moro bigi Giman, èn san na en moro bigi presenti di a gi a libisma famiri? (b) Sortoe eigifasi Gado ben sori di a ben gi en moro bigi presenti?
JEHOVAH GADO na a moro bigi Giman foe alasma. Foe en, a Mekiman foe hemel nanga grontapoe, a kresten disipel Jakobus ben skrifi: „Ibri boen presenti èn ibri volmaakti kado e komoto foe tapoesei, bika a e saka kon foe na Tata foe den hemel leti èn na en kenki no de foe na drai foe na skaduw” (Jakobus 1:17). Jehovah de a Giman toe foe a moro bigi presenti di wan sma ben kan gi wan ten. Foe a moro bigi presenti foe en gi a libisma famiri, den ben taki: „Gado ben lobi libisma sote, taki a ben gi en wan enkri gebore Manpikin, so taki ibriwan sma di sori bribi na ini en, no ben sa go pori ma ben sa abi têgo libi.” — Johanes 3:16.
2 A takiman foe den wortoe disi ben de no wan sma moro leki a wan enkri Manpikin foe Gado srefi. Wan boi di a wan enkri manpikin foe wan papa, foe ensrefi ben sa warderi èn lobi so wan papa leki a fonten foe libi èn foe ala boen sani di a papa ben gi foe a njanboen foe en libi. Ma a lobi foe Gado no ben de soso gi a wan Manpikin disi wawan. Foe gi so wan presenti na den tra mekisani foe en, ben sa tjari a sori di Gado e sori lobi kon na krin na wan toemoesi aparti marki. (Teki gersi Romesma 5:8-10.) Disi na soso moro boeweisi te wi e ondrosoekoe san den wortoe „ben gi” wani taki troetroe ini a kontekst disi.
Gado presenti foe „a Manpikin foe en lobi”
3. Soema moro, boiti „a manpikin foe en lobi”, ben njanboen foe a lobi foe a hemel Tata?
3 Foe wan pisi ten di no abi marki, Gado ben njanboen foe a persoonlijk demakandra nanga a wan enkri Manpikin disi — „a Manpikin foe en lobi” — na ini hemel kondre (Kolosesma 1:13). Ala a ten dati, a Tata èn a Manpikin ben gro ini lobi èn dipi firi gi makandra sote, taki no wan tra lobi di sma kan abi gi makandra ben de leki di foe den. Den ben lobi den tra mekisani toe di Gado ben gi libi nanga jepi foe en wan enkri Manpikin, leki memre foe na osofamiri foe Jehovah. Lobi ben tiri so boen abra na heri osofamiri foe Gado. Nanga leti den skrifi ini den santa Boekoe taki „Gado na lobi” (1 Johanes 4:8). Na osofamiri foe Gado ben sa de foe dati ede den sma di a Tata, Jehovah Gado, lobi.
4. Fa a gi di Gado ben gi en Manpikin ben wani taki moro leki a lasi foe persoonlijk demakandra, èn foe na boen foe soema ede?
4 Den banti a mindri Jehovah nanga en fosigebore Manpikin ben de so tranga, taki efoe den ben sa koti so wan krosibei demakandra poeroe foe densrefi, dan dati ben sa de wan bigi lasi kaba (Kolosesma 1:15). Ma a ’gi’ foe a wan enkri Manpikin disi ben wani taki moro leki dati Gado ben koti a persoonlijk demakandra nanga „a Manpikin foe en lobi poeroe foe ensrefi”. A ben go srefi so fara taki Jehovah ben gi primisi foe en Manpikin ondrofeni dede èn na so fasi foe wan pisi ten no de wan memre foe na universeel osofamiri foe Gado. Disi ben de wan dede gi den sma di noiti ben de memre foe Gado osofamiri. Jehovah no ben kan gi wan moro bigi presenti gi a libisma famiri, di ben de ini nowtoe, leki foe gi en wan enkri Manpikin, di den Boekoe e meki sma kon sabi toe leki „a bigin foe den sani di Gado meki.” — Openbaring 3:14.
5. (a) San ben de a situwâsi foe den bakapikin foe Adam èn san a gerègtighèit foe Gado ben sa aksi foe a ben sa doe ini a tori foe wan foe En getrow manpikin? (b) San a moro bigi presenti foe Gado ben sa aksi foe a sei foe ensrefi?
5 A fosi libisma paar, Adam èn Eva, ben misi foe tan hori a presi foe den leki memre foe Gado osofamiri. Dati ben de a situwâsi na ini san den ben feni densrefi, baka di Gado ben jagi den komoto foe a djari foe Eden, foe di den ben sondoe teige En. No wawan den no ben de moro langa memre foe Gado osofamiri, ma den ben de toe na ondro a dedestrafoe. Dati ede a problema no ben de nomo a di foe meki den bakapikin foe den kon tron memre foe Gado osofamiri baka na a fasi fa en feni en boen, ma a problema ben de toe foe poeroe a dedestrafoe, di komoto foe Gado, na den tapoe. So leki fa a gerègtighèit foe Gado e wroko, dan disi ben sa wani taki, dati wan foe den getrow manpikin foe Gado, ben sa moesoe ondrofeni dede leki wan sani di ben kon na a presi foe a dedestrafoe, noso wan loesoe-prijs. Dati ede a bigi aksi ben de: A sma di den ben o teki, ben sa wani foe ondrofeni so wan dede di moesoe kon na a presi foe a dedestrafoe, gi sondoeman foe a libisma famiri? Boiti dati, foe doe disi ben sa wani taki dati wan wondroe ben moesoe pasa foe a sei foe na Almakti Gado. A ben sa wani taki toe dati Gado ben moesoe sori lobi na wan marki di no abi en speri. — Romesma 8:32.
6. Fa a Manpikin foe Gado ben man foe fiti na den fanowdoe foe a situwâsi di ben abi foe doe nanga a sondoe libisma famiri, èn san a ben taki foe a tori disi?
6 Soso Jehovah en fosigebore Manpikin ben man fiti gi den spesroetoe fanowdoe foe a situwâsi di ben abi foe doe nanga a sondoe libisma famiri. A de so wan prenki foe en hemel Tata ini a sori foe dipi firi gi memre foe na osofamiri di Gado ben meki, taki a no ben abi en speri a mindri den manpikin foe Gado. Foe di ala tra mekisani di abi froestan ben kon na libi nanga jepi foe en, a dipi firi gi den foe troe ben sa de pasa marki. Boiti dati, lobi de a moro prenspari eigifasi foe Jehovah en wan enkri Manpikin, Jesus Krestes, foe di „a de a prenki foe a glori foe [Gado] èn a krin marki foe a sma di a de” (Hebrewsma 1:3). Foe di Jesus ben sori taki a de klariklari foe meki a lobi disi kon foe si pasa a moro hei marki, foe di a ben o gi en libi gi a sondoe libisma famiri, meki a ben taigi en 12 apostel: „A Manpikin foe libisma no ben kon foe den dini en, ma foe en dini èn foe gi en sili leki wan loesoe-prijs na presi foe foeroe sma.” — Markus 10:45; loekoe so srefi Johanes 15:13.
7, 8. (a) San ben de a reide foe Jehovah seni Jesus Krestes kon na grontapoe foe libisma? (b) Sortoe wroko Gado ben seni en wan enkri Manpikin foe doe?
7 Jehovah Gado ben abi wan spesroetoe reide foe seni Jesus go na a libisma grontapoe disi di ben kon pôti srefisrefi. Lobi di e komoto foe Gado ben de a reide gi disi, foe di Jesus ensrefi ben taki: „Gado ben lobi libisma sote, taki a ben gi en wan enkri gebore Manpikin, so taki ibriwan sma di sori bribi na ini en, no ben sa go pori, ma ben sa abi têgo libi. Gado no ben seni en Manpikin kon na grontapoe so taki a ben sa kroetoe grontapoe, ma so taki grontapoe ben sa kisi a froeloesoe nanga jepi foe en.” — Johanes 3:16, 17.
8 Na wan lobifasi Jehovah ben seni en wan enkri Manpikin kon foe doe wan froeloesoewroko. Gado no ben seni en Manpikin kon dja, so taki a ben sa kroetoe grontapoe. Efoe Gado Manpikin ben seni kon foe doe so wan kroetoewroko, dan a froewakti foe a heri libisma famiri ben sa de sondro howpoe. A strafoe foe a takroe kroetoe di Jesus Krestes ben sa leisi gi a libisma famiri ben sa de a strafoe foe dede (Romesma 5:12). So boen, nanga na aparti fasi disi di Gado ben sori lobi, a ben sorgoe gi wan sani kontrari a dedestrafoe, di ben sa aksi foe a doe soifri geregtighèit.
9. Fa a psalm singiman David ben prakseri foe a gi di Jehovah ben gi?
9 Na ini ala sani, Jehovah Gado e sori èn e demo lobi leki wan toemoesi boen eigifasi foe a sma di a de. Èn wi kan taki en nanga leti taki na wan lobifasi Gado ben gi en getrow anbegiman na grontapoe moro leki san den abi fanowdoe ini a tori foe boen sani. Na psalm singiman David ben prakseri na a fasi dati foe na afersi di a ben taigi Gado: „Fa joe boenfasi de pasa marki, di joe ben poti na sei leki wan goedoe gi den di e frede joe! Di joe ben sori den, di e lon go kibri na joe, a fesi foe den libisma manpikin” (Psalm 31:19). Na a ten di David ben de kownoe foe a nâsi Israèl — ija, na ini en heri libi leki wan memre foe a nâsi dati di Gado ben teki spesroetoe — a ben ondrofeni foeroetron na boen-ati foe Jehovah. Èn David ben feni taki a ben de pasa marki.
A lasi di Israèl ben lasi wan bigi presenti di Gado ben gi den
10. San ede Israèl foe owroeten ben de tra fasi leki iniwan tra nâsi na grontapoe?
10 Foe di Israèl foe owroeten ben abi Jehovah leki Gado, den ben de tra fasi leki iniwan tra nâsi na grontapoe. Nanga jepi foe a profeiti Moses leki wan mindriman, Jehovah ben tjari den bakapikin foe Abraham, Isak èn Jakob na ini wan froebontoe matifasi nanga ensrefi. A no ben handri nanga no wan tra nâsi akroederi a fasi disi. Dati meki a psalm singiman ben man taki na ondro krakti foe santa jeje: „A e froeteri Jakob a wortoe foe en, den seti foe en èn Israèl den kroetoe bosroiti foe en. A no ben doe so gi no wan tra nâsi; èn ini a tori foe den kroetoe bosroiti foe en, den no ben sabi den. Prèise Jah!” — Psalm 147:19, 20.
11. Te oten Israèl ben njanboen foe en boen posisi nanga Gado èn fa Jesus ben sori a kenki ini a matifasi foe den?
11 A nâsi Israèl na skinfasi ben tan ini a boen matifasi disi nanga Gado te leki a nâsi ben trowe Jesus Krestes leki a Mesias ini a jari 33 foe wi Gewoon Teri. A no de foe taki, dati a ben de wan sari dei gi Israèl di Jesus ben sori den firi foe en na ini den sari wortoe disi: „Jerusalem, Jerusalem, di e kiri den profeiti èn e ston den sma di ben seni na oenoe — o foeroe tron mi ben wani tjari oen pikin kon makandra so leki wan mama-fowroe e tjari en pikin kon na ondro en frei! Ma joe no ben wani dati! Loekoe! Den e libi joe oso leigi na baka” (Mateus 23:37, 38). Den wortoe foe Jesus ben sori taki ala di Jehovah ben feni a nâsi Israèl boen na fesi, tokoe a nâsi ben lasi wan spesroetoe presenti di a ben kisi foe Gado. Fa so?
12. Soema ben de den ’pikin foe Jerusalem’, èn san a ben sa wani taki gi Jesus foe tjari den kon makandra?
12 Foe di Jesus ben gebroiki a wortoe „pikin”, a ben sori go soso na den djoe na skinfasi di ben besnij, di ben libi na ini Jerusalem èn di ben teki presi gi a heri djoe nâsi. Gi Jesus a tjari kon makandra foe den ’pikin foe Jerusalem’ ben sa wani taki foe tjari den „pikin” disi na ini wan njoen froebontoe nanga Gado, pe ensrefi ben sa dini leki a Mindriman a mindri Jehovah èn den djoe disi na skinfasi (Jeremia 31:31-34). Disi ben sa abi leki bakapisi a kisi pardon foe sondoe, bika so fara a lobi foe Gado ben go. (Teki gersi Maleaki 1:2.) Disi foetroe ben sa de wan moi presenti.
13. Sortoe lasi, na trowe di Israèl ben trowe Gado Manpikin, ben abi leki bakapisi, ma foe san ede na prisiri foe Jehovah no ben kon moro mendri?
13 Ini akroederi nanga en profeiti Wortoe, Jehovah ben wakti so langa leki a ben fiti bifo a ben gi no-djoe a presenti foe kon tron sma di ben o abi prati ini a njoen froebontoe. Ma foe di a nâsi Israèl na skinfasi ben trowe Gado eigi Manpikin, a Mesias, den ben lasi a bigi presenti disi. Dati ede Jehovah ben skeki na trowe di den ben trowe en Manpikin, nanga a gi foe a presenti disi na sma di ben de dorosei foe a djoe nâsi. Na a fasi dati, a prisiri foe Jehovah leki a Bigi Giman ben go doro sondro foe kon moro mendri.
A kolokoe foe gi
14. San ede Jesus Krestes de na moro kolokoe mekisani na ini a heri universum?
14 Jehovah de „a kolokoe Gado” (1 Timoteus 1:11). Na gi foe sani na trawan, na wan sani di e meki en kolokoe. Èn ini a fosi jarihondro G. T. en wan enkri gebore Manpikin ben taki: „A de moro kolokoe foe gi, leki foe kisi sani” (Tori foe den Apostel 20:35). Ini akroederi nanga a gronprakseri disi, Jesus ben tron a moro kolokoe mekisani foe a Mekiman foe a heri universum. Fa so? We, a baka Jehovah Gado ensrefi, dan Jesus Krestes ben gi a moro bigi presenti, foe di a ben gi en libi foe a boen foe a libisma famiri. Foe taki en leti, a de ’a kolokoe Sma di abi makti’ (1 Timoteus 6:15). Na so fasi Jesus ensrefi ben gi na eksempel foe san a ben taki foe a moro bigi kolokoe foe gi.
15. Foe san Jehovah noiti sa kaba foe de na eksempel foe en, èn fa den mekisani foe en di abi froestan kan ondrofeni wan marki foe a kolokoe foe en?
15 Nanga jepi foe Jesus Krestes, Jehovah Gado noiti sa misi foe de a Giman di lobi foe gi sani na ala en mekisani di abi froestan èn a sa de gi den ala ten a moro boen eksempel ini a gi foe sani. Neleki fa Gado e feni en wan prisiri foe gi boen presenti na trawan, na so a ben poti a jeje foe lobi foe gi sma sani ini na ati foe en mekisani na grontapoe di abi froestan. Na a fasi dati den e prenki èn e waka na baka a sma di a de èn e ondrofeni wan marki foe a de di a de kolokoe (Genesis 1:26; Efeisesma 5:1). A e fiti foe dati ede, taki Jesus ben taigi den bakaman foe en: „Oefen foe gi sani, èn den sa gi joe sani. Wan toemoesi boen marki di stanpoe, di seki èn di e pasa marki, den sa trowe na tapoe joe tapoe foetoe. Bika nanga a marki di oenoe e teki foe marki trawan, den sa teki foe marki joe toe.” — Lukas 6:38.
16. Na sortoe gi Jesus ben sori go ini Lukas 6:38
16 Jesus ben gi den disipel foe en wan toemoesi moi eksempel foe di a ben meki a fasi foe gi sani, kon de wan gwenti. A ben taki, dati wan boen piki tapoe so wan gi ben sa kon foe a sei foe den sma di o kisi sani. Na ini Lukas 6:38 Jesus no ben sori nomo na a gi foe sani na skinfasi. A no ben froeteri en disipel foe feti a baka wan waka nanga libi di ben sa meki den kon pôti na skinfasi. Na presi foe dati, a ben tjari den go na wan waka nanga libi di ben sa gi den wan firi foe satisfaksi na jejefasi.
Têgo kolokoe de seiker
17. Sortoe toemoesi moi presenti Gado ben gi den Kotoigi na ini den lasti dei disi?
17 Fa Jehovah, na Edeman foe ala mekisani, ben gi en Kotoigi wan toemoesi moi presenti ini den lasti dei disi! A ben gi wi a boen njoensoe foe a Kownoekondre foe en. Wi abi a bigi grani foe de sma di e meki a seti foe Gado Kownoekondre bekènti di de ini anoe foe en Manpikin di e tiri, Jesus Krestes (Mateus 24:14; Markus 13:10). Foe kon tron kotoigi foe a Moro Hei Gado nanga den wortoe foe wi, na wan presenti di joe no kan teki gersi nanga tra sani, èn a moro boen fasi fa wi kan oefen a gi foe sani, foe di wi e waka na baka Gado, na foe prati a Kownoekondre boskopoe nanga trawan bifo a kaba foe na ogri seti foe sani disi kon.
18. San wi leki Jehovah Kotoigi moesoe gi na trawan?
18 Na apostel Paulus ben sori na den pina di a ben moesoe ondrofeni di a ben meki a Kownoekondre boskopoe bekènti na trawan (2 Korentesma 11:23-27). Den disi ten Kotoigi foe Jehovah moesoe foe ondrofeni pina toe èn moesoe poti persoonlijk winsi na wan sei, foe di den e doe moeiti foe gi trawan a Kownoekondre howpoe. Wi no abi a firi kande foe go na sma doro, spesroetoe te wi de froeleigi. Ma leki bakaman foe Krestes, wi no kan tan farawe foe, noso lon gi, a grani foe gi trawan sani na jeje fasi nanga a preiki foe a „boen njoensoe disi foe na kownoekondre” (Mateus 24:14). Wi moesoe abi a srefi fasi foe denki di Jesus ben abi. Di a ben tanapoe a fesi dede, a ben begi: „Mi Tata, . . . no so leki mi wani, ma so leki joe wani” (Mateus 26:39). Ini a tori foe gi a boen njoensoe foe a Kownoekondre na trawan, den foetoeboi foe Jehovah moesoe doe Gado wani, no den eigi wani — san en wani e teri, no san den ben sa wani.
19. Soema na den Sma di abi „den têgo libipresi”, èn fa wi kan tron mati nanga den?
19 So wan gi sa aksi ten foe wi èn den sani di wi lobi foe doe, ma foe di wi de giman di abi gadofasi, wi de seiker taki a kolokoe foe wi sa de foe têgo. Foe san ede? Foe di Jesus ben taki: „Meki mati nanga jepi foe onregtfardiki goedoe [„grontapoe goedoe”, New International Version], so taki te disi gowe libi joe, den mag teki joe ini den têgo libipresi” (Lukas 16:9). A moesoe de a marki foe wi foe gebroiki „onregtfardiki goedoe” foe meki mati nanga den Sma di abi „den têgo libipresi.” Foe di a Mekiman, Jehovah abi ala sani, èn leki Erfgenaam foe ala sani en fosigebore Manpikin abi prati ini na eiginarireti dati (Psalm 50:10-12; Hebrewsma 1:1, 2). Efoe wi wani de mati nanga den, wi moesoe gebroiki goedoe na wan fasi di den e feni boen. Disi wani taki so srefi foe abi a joisti fasi foe denki ini a gebroiki foe sani na skinfasi gi a boen foe trawan. (Teki gersi Mateus 6:3, 4; 2 Korentesma 9:7.) Wi kan gebroiki moni na wan joisti fasi foe meki a matifasi foe wi nanga Jehovah Gado èn Jesus Krestes kon moro tranga. Foe eksempel, wi e doe disi foe di wi e gebroiki san wi abi nanga prisiri foe kan jepi sma di de troetroe ini nowtoe èn foe di wi e gebroiki den sani di wi abi foe meki den belang foe Gado Kownoekondre go a fesi. — Odo 19:17; Mateus 6:33.
20. (a) San ede Jehovah èn Jesus kan tjari wi go na ini „têgo libipresi”, èn pe den presi disi kande sa de? (b) Sortoe grani sa de gi wi foe ala ten?
20 Foe di Jehovah Gado èn Jesus Krestes no e dede noiti, den kan de wi mati foe ala ten èn den kan tjari wi go na ini „têgo libipresi.” Disi de so efoe a de now ini hemel nanga ala den santa engel, noso na disi grontapoe na wan Paradijs di meki kon njoen baka (Lukas 23:43). Jesus Krestes, a presenti di Gado ben gi na wan lobifasi, ben meki taki ala disi man (Johanes 3:16). Èn Jehovah Gado sa gebroiki Jesus foe tan gi na ala mekisani, gi En eigi toemoesi aparti kolokoe. Foe taki en leti, dan na ondro na universeel soevereiniteit foe Jehovah Gado èn na ondro a kownoewroko foe en wan enkri Manpikin, wi Masra èn Froeloesoeman, Jesus Krestes, foe têgo wisrefi sa abi a grani foe gi. Disi sa abi leki bakapisi têgo kolokoe gi ala giman di e dini Gado.
Joe kan memre ete?
◻ San a moro bigi presenti foe Gado ben sa aksi foe en sei?
◻ Sortoe wroko Gado ben seni en Manpikin foe doe?
◻ Soema na a moro kolokoe mekisani na a heri universum èn foe san ede?
◻ Fa giman di e dini Gado sa ondrofeni têgo kolokoe?
[Prenki na tapoe bladzijde 23]
Joe e warderi na presenti foe Gado taki a gi en Manpikin leki wan loesoe-ofrandi?
[Prenki na tapoe bladzijde 25]
Joe e soekoe a Kownoekondre foe Gado fosi foe di joe e preiki a boen njoensoe èn foe di joe e gi jepi na a wroko dati nanga den sani di joe abi?