„Nowan sma abi moro lobi leki a sma di gi en libi”

1-4. (a) San e pasa te Pilatus e tyari Yesus kon na dorosei fu en palèisi na fesi wan grupu sma di de nanga bigi atibron? (b) San Yesus du di sma pina en èn gi en syen? Sortu prenspari aksi e opo kon?

„LUKU! A man!” Nanga den wortu disi a Rome tiriman Pontius Pilatus e tyari Yesus Krestes kon na fesi wan grupu sma di de nanga bigi atibron. Den sma disi de na dorosei fu a palèisi fu a tiriman, tapu a mamanten fu a Paskafesa fu a yari 33 (Yohanes 19:5). Wan tu dei na fesi nomo den ipi-ipi sma ben prèise Yesus di a ben kon na ini Yerusalem leki a Kownu di Gado poti. Ma now, den sma disi no wani si en na ai èn den e denki heri tra fasi fu en.

² Sma weri wan redi-paars dyakti gi en di kownu gwenti weri, èn wan kownu-ati de na tapu en ede. Ma a dyakti di e anga na en skowru e tapu den koti marki na en baka di e brudu, èn a kownu-ati fu maka na tapu en ede di e brudu now, na fu spotu en leki kownu. Den sma di opo densrefi fu di den priester gi den deki-ati fu du dati, no wani si a man di den ben fon, na ai. Den priester bari taki: „Spikri en na wan postu! Spikri en na wan postu!” Na wan ogri-ati fasi den sma bari taki: „A musu dede.”​—Yohanes 19:1-7.

³ Yesus e hori ensrefi èn nanga deki-ati, a e teki ala a syen nanga a pina sondro fu kragi.a A de klariklari fu dede. Moro lati tapu a Paskafesa dati, a ben de klariklari fu nyan pina na wan ogri-ati fasi èn fu dede na wan pina-postu.​—Yohanes 19:17, 18, 30.

⁴ Fu di Yesus gi en libi, meki a sori taki a de wan trutru mati fu en bakaman. A ben taki: „Nowan sma abi moro lobi leki a sma di gi en libi gi den mati fu en” (Yohanes 15:13). A sani disi e meki wan tu prenspari aksi opo kon. Yesus ben musu nyan pina trutru èn dede te fu kaba? Fu san ede a ben de klariklari fu du dati? Fa wi leki „mati fu en” èn leki bakaman fu en, kan teki na eksempre fu en?

Fu san ede Yesus ben musu nyan pina èn dede?

5. Fa Yesus ben man sabi finifini sortu tesi ben o miti en?

⁵ Leki a Mesias di Gado ben pramisi, Yesus sabi san ben o pasa nanga en. A ben sabi den furu profeititori na ini den Hebrew Buku fu Bijbel, di e sori taki a Mesias ben o nyan pina èn dede (Yesaya 53:3-7, 12; Danièl 9:26). Moro leki wán leisi, a ben taigi den disipel fu en sortu tesi ben o miti en (Markus 8:31; 9:31). Di a ben de na pasi e go na Yerusalem gi a lasti Paskafesa di a ben o hori, a taigi den apostel fu en: „Sma o tyari a Manpikin fu libisma go na den edeman fu den priester èn na den leriman fu Wet, dan den o krutu en taki a musu dede, èn den o tyari en go na den trakondre sma; den o lafu en, den o spiti na en tapu, den o wipi en èn den o kiri en” (Markus 10:33, 34). Den sani disi pasa trutru. Soleki fa wi si, dan trutru sma ben spotu Yesus, den spiti na tapu en, den fon en, èn den kiri en.

6. Fu san ede Yesus ben musu nyan pina èn dede?

⁶ Ma fu san ede Yesus ben musu nyan pina èn dede? Difrenti prenspari reide de fu san ede a ben musu du dati. Na a fosi presi, te Yesus ben o tan gi yesi na Gado, dan na so fasi a ben o sori taki a e tan du san reti èn taki a e horibaka gi Yehovah di abi a reti fu tiri. Memre taki Satan ben taki dati libisma e dini Gado soso fu di den e suku den eigi bun (Yob 2:1-5). Fu di Yesus tan gi yesi na Gado „te na dede . . . na wan pina-postu”, meki a gi a moro bun buweisi taki den sani di Satan taki, no tru (Filipisma 2:8; Odo 27:11). A di fu tu sani, na taki a pina èn a dede fu a Mesias ben o meki sma kisi pardon fu den sondu (Yesaya 53:5, 10; Danièl 9:24). Yesus gi „en sili leki wan lusu-paiman fu frulusu furu sma”. Disi meki taki wi man tron mati fu Gado (Mateyus 20:28). Leki lasti, fu di Yesus horidoro di a kisi difrenti tesi èn sma pina en, meki a „kisi tesi na ala fasi neleki wi”. Fu dati ede, en na wan Granpriester di abi sari-ati èn di man „frustan den swakifasi fu wi”.​—Hebrewsma 2:17, 18; 4:15.

Fu san ede Yesus ben de klariklari fu gi en libi?

7. Sortu sani Yesus gowe libi na baka di a kon na grontapu?

⁷ Fu man frustan san Yesus ben de klariklari fu du, prakseri a sani disi: Sortu man ben o libi en famiri nanga en oso èn froisi go na wan tra kondre, efu a sabi taki furu fu den sma drape no ben o wani si en na ai? Noso efu a sabi taki den ben o wisiwasi en, taki den ben o pina en èn taki den ben o kiri en te fu kaba? Prakseri now san Yesus du. Bifo a kon na grontapu, a ben abi wan hei posisi sei en Tata na ini hemel. Toku Yesus ben de klariklari fu gowe libi en tanpresi na hemel èn kon na grontapu leki wan libisma. A du disi aladi a sabi taki furu fu den sma no ben o wani si en na ai, den ben o wisiwasi en, den ben o pina en, èn den ben o kiri en na wan ogri-ati fasi (Filipisma 2:5-7). San meki taki Yesus ben gi ensrefi na so wan fasi?

8, 9. Fu san ede Yesus gi en libi?

⁸ A moro prenspari reide fu san ede Yesus gi en libi, na taki a ben abi bigi lobi gi en Tata. Fu di Yesus horidoro, meki a sori taki a lobi Yehovah. A lobi dati meki taki Yesus ben broko en ede nanga a nen fu en Tata èn a no ben wani taki en Tata kisi porinen (Mateyus 6:9; Yohanes 17:1-6, 26). A sani di ben de moro prenspari gi Yesus, na taki a ben wani a nen fu en Tata kon krin fu ala lei. Fu dati ede Yesus ben si en leki wan bigi grani fu nyan pina fu man du san reti, fu di a ben sabi taki a ben o santa a bigi nen fu en Tata efu a tan du dati.​—1 Kroniki 29:13.

⁹ Wan tra reide fu san ede Yesus ben gi en libi, na taki a lobi libisma. A lobi libisma sensi a bigin di Gado meki den. Langa ten bifo Yesus kon na grontapu, Bijbel taki fa a ben si libisma. Bijbel e taki: „Den sani di mi ben lobi trutru, ben de den manpikin fu libisma” (Odo 8:30, 31). A lobi fu en ben de krin fu si di a ben de na grontapu. Soleki fa wi si na ini den dri kapitel na fesi, dan na furu fasi Yesus sori taki a lobi libisma, èn spesrutu den bakaman fu en. Ma tapu 14 Nisan fu a yari 33 a ben de klariklari fu gi en libi fu wi ede (Yohanes 10:11). Iya, wan moro moi fasi no de fa Yesus ben kan sori lobi gi wi. Wi musu teki na eksempre fu en? Iya. Fu taki en leti, wi e kisi a komando fu du dati.

„Un musu lobi makandra, neleki fa mi lobi unu”

10, 11. San na a nyun komando di Yesus gi den bakaman fu en, èn san a wani taki? Fu san ede a de prenspari taki wi e gi yesi na a komando dati?

¹⁰ A neti bifo Yesus dede, a taigi den disipel di ben tan horibaka gi en: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra” (Yohanes 13:34, 35). „Un musu lobi makandra.” Fu san ede disi na „wan nyun komando”? Na ini a Wet di Gado ben gi Moses, sma ben kisi a komando disi kaba: „Un musu lobi tra sma leki fa unu lobi unsrefi” (Lefitikus 19:18). Ma a nyun komando e gi sma deki-ati fu sori wan moro bigi lobi, iya, a lobi disi musu meki wi gi wi eigi libi gi a bun fu trawan. Yesus srefi ben tyari disi kon na krin di a taki: „Disi na a komando fu mi, taki un musu lobi makandra neleki fa mi lobi unu. Nowan sma abi moro lobi leki a sma di gi en libi gi den mati fu en” (Yohanes 15:12, 13). Fu taki en leti, a nyun komando e taki: „Un musu lobi tra sma, no leki fa wi lobi wisrefi, ma moro leki fa wi lobi wisrefi.” A fasi fa Yesus libi èn a dede fu en, e sori wi trutru san na a lobi disi.

¹¹ Fu san ede a de prenspari taki wi e gi yesi na a nyun komando? Memre taki Yesus ben taki: „Na a fasi disi [te wi de klariklari fu gi wisrefi fu di wi lobi trawan] ala sma o sabi taki unu na mi disipel.” Iya, te wi de klariklari fu gi wisrefi fu di wi lobi trawan, dan sma o sabi wi leki tru Kresten. Wi kan agersi a lobi disi nanga wan karta di e sori sma suma na wi. Den sma di e go na den alayari kongres fu Yehovah Kotoigi, e weri wan lapelkarta. A karta e sori fa a sma nen, èn fu sortu gemeente a de. Te wi e sori a lobi di e meki taki wi de klariklari fu gi wisrefi, dan dati e sori suma na tru Kresten. Fu taki en leti, a lobi di wi e sori makandra musu de so krin fu si, taki a de leki wan marki noso a karta di e sori tra sma taki wi na tru bakaman fu Krestes. A bun taki ibriwan fu wi e aksi ensrefi: ’A de krin fu si na ini mi libi taki mi de klariklari fu gi misrefi fu di mi lobi trawan?’

San a wani taki fu de klariklari fu gi wisrefi fu di wi lobi trawan?

12, 13. (a) Te o fara wi musu go fu sori taki wi lobi makandra? (b) San a wani taki fu de klariklari fu gi wisrefi fu di wi lobi trawan?

¹² Wi leki bakaman fu Yesus, musu lobi makandra neleki fa Yesus lobi wi. Disi wani taki dati wi musu de klariklari fu gi wisrefi gi wi Kresten brada nanga sisa. Te o fara wi musu go fu du dati? Bijbel e taigi wi: „Na so wi kon sabi san na lobi, bika a sma dati gi en libi fu a bun fu wi. Wi de fruplekti fu gi wi libi fu a bun fu den brada fu wi” (1 Yohanes 3:16). Neleki Yesus, wi musu de klariklari fu dede gi makandra efu dati de fanowdu. Te sma e frufolgu wi, dan wi o de klariklari fu gi wi eigi libi na presi fu tori wi Kresten brada nanga sisa, fu di dati kan meki den lasi den libi. Na ini kondre pe sma fu difrenti ras nanga kulturu e feti nanga makandra, wi o de klariklari fu lasi wi libi soso fu kibri wi brada nanga sisa, awansi fu sortu ras noso kulturu den de. Te kondre e go feti, dan wi de klariklari fu go na strafu noso fu dede srefi, na presi fu go feti teige wi brada nanga sisa, noso tra sma.​—Yohanes 17:14, 16; 1 Yohanes 3:10-12.

¹³ Te wi de klariklari fu gi wi libi gi wi brada nanga sisa, dan dati a no a wan-enkri fasi fa wi kan sori taki wi lobi den. Fu taki en leti, furu fu wi no abi fu du so wan bigi sani. Ma efu wi lobi wi brada nanga sisa so te, taki wi kan dede gi den, dan a no de fu taki dati wi musu de klariklari fu du pikin sani gi den, a no so? Fu gi wisrefi wani taki dati wi musu poti wi eigi afersi, noso sani di wi lobi na wan sei, gi a bun fu trawan. Wi e si den sani di trawan abi fanowdu èn a tanbun fu den, moro prenspari leki wi eigi afersi, srefi efu wi ben o feni en muilek fu yepi den na a momenti dati (1 Korentesma 10:24). San na wan tu sani di wi kan du fu sori taki wi de klariklari fu gi wisrefi fu di wi lobi trawan?

Na ini a gemeente èn na ini na osofamiri

14. (a) Sortu muiti owruman musu du? (b) Fa yu e denki fu a tranga wroko di den owruman fu yu gemeente e du?

¹⁴ Gemeente owruman e du furu muiti fu „luku den skapu” (1 Petrus 5:2, 3). Boiti taki den e luku den eigi osofamiri, den e gebroiki den ten son leisi fu sorgu gi gemeente afersi na netiyuru, noso tapu satra nanga sonde. Den musu sreka densrefi tu gi den prati di den abi na den konmakandra, den e go luku preikiman fu gi den deki-ati, èn den de na ini krutu komte. Furu owruman e du tra sani tu, soleki fu wroko tranga na den bigi konmakandra nanga den kongres, den e dini leki memre fu Ati-oso Kontakti Komte, Fisiti Grupu gi Sikisma, nanga Bowkomte. Owruman, noiti no frigiti taki te unu de klariklari fu dini, iya, te unu e gi un ten, un krakti nanga den sani di unu abi fu luku den skapu, dan unu e sori trutru lobi (2 Korentesma 12:15). A no Yehovah wawan e warderi a muiti di unu e du, ma a gemeente di unu e luku abi warderi tu.​—Filipisma 2:29; Hebrewsma 6:10.

15. (a) Sortu sani den wefi fu owruman de klariklari fu du? (b) Fa yu e denki fu den wefi di e horibaka gi den masra di de owruman na ini yu gemeente?

¹⁵ Ma fa a de nanga den wefi fu den owruman? A no de so taki den wefi disi di e horibaka gi den masra, e du muiti tu, so taki den masra fu den kan luku den skapu? A no de fu taki dati den uma disi e gi densrefi te den masra fu den musu gi den ten gi gemeente afersi, aladi den masra ben kan gebroiki a ten dati gi den osofamiri. Prakseri sosrefi den wefi fu den kring-opziener nanga distrikt-opziener. Den e gi densrefi tu fu di den e go makandra nanga den masra, fu a wan gemeente go na a trawan, èn fu a wan kring go na a trawan. Den no abi wan oso èn kande den abi fu sribi na tapu wan tra bedi ibri wiki. Wefi di de klariklari fu si den afersi fu a gemeente moro prenspari leki den eigi afersi, musu kisi prèise fu a moi fasi fa den e sori trutru lobi.​—Filipisma 2:3, 4.

16. Sortu muiti Kresten papa nanga mama e du gi den pikin fu den?

¹⁶ Fa wi kan sori na ini na osofamiri taki wi de klariklari fu gi wisrefi fu di wi e sori lobi? Papa nanga mama, a no de fu taki dati yu e du furu muiti fu sorgu gi yu pikin èn fu kweki den „nanga a leri fu Yehovah èn frumane den, so taki den kan kisi a denki fu en” (Efeisesma 6:4). Kande yu abi fu wroko furu yuru langa èn yu e weri. Ma yu e du dati fu di yu wani taki nyanyan de èn taki yu pikin abi bun krosi nanga wan presi fu tan. A no de fu taki dati yu ben o libi wan tu sani na baka, fu man gi den pikin fu yu den sani di den abi fanowdu. Yu e du furu muiti tu fu studeri nanga yu pikin, fu tyari den go na den Kresten konmakandra èn fu wroko nanga den na ini a preikiwroko (Deuteronomium 6:6, 7). A tranga muiti di yu e du, e plisi a Sma di seti na osofamiri-libi, èn a kan abi leki bakapisi taki yu pikin kisi têgo libi.​—Odo 22:6; Efeisesma 3:14, 15.

17. Fa Kresten masra kan teki na eksempre fu Yesus di no ben e denki ensrefi nomo?

¹⁷ Un masra, fa unu kan teki na eksempre fu Yesus na ini a fasi fa a ben sori lobi? Bijbel e piki: „Un masra, tan lobi un wefi, neleki fa Krestes lobi a gemeente èn neleki fa a ben gi ensrefi gi a gemeente” (Efeisesma 5:25). Soleki fa wi si, dan Yesus ben lobi den bakaman fu en so te, taki a dede gi den. Wan Kresten owruman e teki na eksempre fu Yesus di „no ben plisi ensrefi” (Romesma 15:3). So wan masra de klariklari fu si den sani di en wefi abi fanowdu nanga den sani di a lobi, moro prenspari leki den sani di ensrefi wani. A no de nomonomo taki sani musu pasa soleki fa en wani, ma a de klariklari fu fiti ensrefi te dati no de teige Bijbel gronprakseri. Te wan masra de klariklari fu sori lobi na so wan fasi, dan Yehovah sa feni en bun èn en wefi nanga den pikin fu en o lobi en èn lespeki en.

San yu o du?

18. Fu san ede wi e gi yesi na a nyun komando fu lobi makandra?

¹⁸ A no makriki fu gi yesi na a nyun komando fu lobi makandra, ma wi abi bun reide fu du dati. Paulus ben skrifi: „A lobi di Krestes abi, e naki wi ati, fu di wi kon frustan taki wán sma dede gi ala sma . . . , èn a dede gi ala sma, so taki den sma di e libi, no ben sa libi gi densrefi moro, ma gi a sma di dede gi den èn di opo baka” (2 Korentesma 5:14, 15). Yesus dede gi wi. Sobun, dati musu naki wi ati so te, taki wi e libi gi en, a no so? Wi kan du dati te wi de klariklari fu gi wisrefi fu di wi lobi trawan, neleki fa Yesus du dati.

19, 20. Sortu warti kado Yehovah gi wi èn fa wi kan sori taki wi e teki a kado dati?

¹⁹ Yesus no ben meki bigi di a taki: „Nowan sma abi moro lobi leki a sma di gi en libi gi den mati fu en” (Yohanes 15:13). A ben de klariklari fu gi ensrefi gi a bun fu wi, èn dati na a moro moi fasi fa a sori lobi gi wi. Ma wan tra sma sori moro bigi lobi gi wi. Yesus ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Gado lobi wi so te, taki a gi en Manpikin leki wan lusu-paiman, so taki wi kan kon fri fu sondu nanga dede (Efeisesma 1:7). A lusu-paiman na wan warti kado di Yehovah gi wi, ma a no e dwengi wi fu teki a kado dati.

²⁰ A de na wi fu bosroiti efu wi o teki a kado di Yehovah gi wi. Fa wi kan du dati? Wi kan du dati te wi „e bribi” na ini en Manpikin. Ma a no nofo fu taki dati wi abi bribi. Wi e sori taki wi abi bribi na a fasi fa wi e libi, noso nanga den sani di wi e du (Yakobus 2:26). Wi e sori taki wi e bribi na ini Yesus Krestes te wi e waka baka en ibri dei. Te wi e du dati, dan wi o kisi furu blesi now èn na ini a ten di e kon, soleki fa a lasti kapitel fu a buku disi e sori.