’Den no ben kisi furu skoro èn den ben de gewoon sma’

1, 2. Sortu wondru Petrus nanga Yohanes ben du krosbei fu a tempel-portu?

A BAKADINA son e skèin na tapu den ip’ipi sma di e waka na ini a foto. Dyu di de fayafaya anbegiman èn sosrefi disipel fu Krestes e waka kon na ini a tempel-dyari. Dyonsro a ten ben o doro di „sma ben gwenti fu begi”a (Tori 2:46; 3:1). Petrus nanga Yohanes de na mindri den ip’ipi sma èn den e waka go na a tempel-portu di nen Moi Portu. Yu kan yere a tak’taki fu den someni sma èn yu kan yere fa den e waka psa. Na mindri ala a babari disi, wan begiman di malengri sensi a gebore èn di abi moro leki 40 yari, e bari kari sma fu gi en moni.​—Tori 3:2; 4:22.

² Te Petrus nanga Yohanes e kon moro krosbei, dan a begiman e begi den moni tu, soleki fa a gwenti du. Den apostel e tan tnapu èn a man e luku den fu di a e howpu taki den o gi en wan sani. Petrus e taigi en: „Solfru nanga gowtu mi no abi, ma san mi abi na dati mi o gi yu. Ini a nen fu Yesus Krestes fu Nasaret, mi e taigi yu: Opo, dan yu waka!” Prakseri fa den ip’ipi sma e ferwondru te den si fa Petrus hori a malengri man na en anu èn te a man disi e opo tnapu fu a fosi leisi na ini en libi! (Tori 3:6, 7) Yu e si kba fa a man disi piri en ai luku en futu di ben kon betre èn fa a e pruberi fu waka fu a fosi leisi? Iya, wi kan ferstan fu san ede a man disi bigin dyompodyompo èn fu san ede a e prèise Gado nanga wan tranga sten!

3. Sortu presenti di warti moro ala sani, a man di ben malengri fosi nanga den ip’ipi sma ben kan kisi?

³ Den ip’ipi sma e prisiri srefsrefi èn den e lon go na Petrus nanga Yohanes di de na a gadri fu Salomo. Na a srefi presi dati pe Yesus ben e tnapu e gi leri wan leisi, Petrus e sori den sma san a sani di psa didyonsro wani taki trutru (Yoh. 10:23). A e sori den sma èn sosrefi a man di ben malengri fosi taki den kan kisi wan presenti di warti moro solfru noso gowtu. A presenti dati no wani taki nomo dati siki sma o kon betre baka, ma a e gi sma na okasi fu sori berow, fu kisi pardon fu den sondu èn fu tron bakaman fu Yesus Krestes, a „Moro Prenspari Fesiman” di Yehovah poti.​—Tori 3:15.

4. (a) San psa baka di den apostel du wan wondru fu meki a begiman kon betre? (b) Sortu tu aksi o kisi piki?

⁴ Dati ben de trutru wan bigi dei! Wan sma ben kon betre èn now a man waka. Dusundusun tra sma ben kisi na okasi fu kon sabi Gado wortu soifri èn fu kon ferstan en moro krin, so taki den ben kan libi na wan fasi di Gado feni bun (Kol. 1:9, 10). Boiti dati, den sani di psa a dei dati, meki taki den tru bakaman fu Krestes kisi problema nanga den tiriman fu a pipel. Den tiriman disi ben o pruberi fu tapu den fu preiki a Kownukondre boskopu, soleki fa Yesus ben taigi en bakaman fu du (Tori 1:8). Petrus nanga Yohanes ben de sma di ’no ben kisi furu skoro èn den ben de gewoon sma’. San wi kan leri fu a fasi fa den ben e preiki gi den ip’ipi sma èn fu a fasi fa den ben e tyari densrefi?b (Tori 4:13) Fa wi kan du neleki fa den man disi nanga den tra disipel du di sma gens den?

Wi no du sani „nanga wi eigi krakti” (Tori fu den apostel 3:11-26)

5. San wi e leri fu a fasi fa Petrus ben taki nanga den ip’ipi sma?

⁵ Petrus nanga Yohanes ben e tnapu na fesi den ip’ipi sma èn den ben sabi taki no so langa psa, sonwan fu den ben bari taki Yesus musu dede (Mark. 15:8-15; Tori 3:13-15). Prakseri a dek’ati di Petrus sori di a taigi den sma sondro frede taki a malengri man ben kon betre na ini a nen fu Yesus. Petrus no ben frede fu taki san tru. A meki den sma kon ferstan krin taki den ben tyari a frantwortu tu gi a dede fu Krestes. Ma Petrus no ben hori den sma disi na feanti, bika den ’no ben sabi san den ben e du’ (Tori 3:17). A taki nanga den leki na brada fu en èn a poti prakseri na den moi sani fu a Kownukondre boskopu. Efu den ben o sori berow èn den ben o poti bribi na ini Krestes, dan Yehovah ben o ’gi den krakti’ (Tori 3:19). Wi musu sori dek’ati tu èn wi no musu frede fu taigi sma krin taki Gado o krutu libisma. Ma noiti wi no musu taki grofu nanga sma, noso taigi den hati sani èn noiti wi no musu krutu den. Na presi fu dati, wi e si den sma di wi e miti na ini a preikiwroko leki sma di kan tron wi brada nanga s’sa èn neleki Petrus wi e poti prakseri spesrutu na den moi sani fu a Kownukondre boskopu.

6. Fa Petrus nanga Yohanes ben e sori taki den ben abi sakafasi?

⁶ Den apostel ben de man di abi sakafasi. Den no teki a grani gi a wondru di den du. Petrus ben taigi den sma: „Fu san ede unu e luku wi neleki nanga wi eigi krakti wi meki a man disi waka? Unu denki taki na fu di wi e dini Gado fayafaya, meki wi ben kan meki a waka?” (Tori 3:12) Petrus nanga den tra apostel ben sabi taki san den ben du na ini a preikiwroko, den no ben du nanga den eigi krakti, ma nanga a krakti fu Gado. Sobun, na wan sakafasi den ben e gi Yehovah nanga Yesus ala grani.

7, 8. (a) Sortu presenti wi kan gi sma? (b) Fa a pramisi taki Gado ben o meki „ala sani kon bun baka”, e kon tru na ini a ten disi?

⁷ Te wi e teki prati na a Kownukondre preikiwroko, dan wi musu sori sakafasi tu. A tru taki na ini a ten disi a yeye fu Gado no e gi Kresten a krakti fu du wondru fu meki sma kon betre. Ma tòg wi kan yepi sma tu fu kon abi bribi na ini Gado nanga Krestes èn fu kisi a srefi presenti di Petrus ben gi a begiman: Dati na a okasi fu kisi pardon gi sondu èn fu kisi krakti baka fu Yehovah. Ibri yari, hondro dusundusun sma e teki a presenti disi èn den e tron dopu disipel fu Krestes.

⁸ Iya, wi e libi na ini a ten di Gado o meki „ala sani kon bun baka”, soleki fa Petrus ben taki. Soleki fa „Gado meki den santa profeiti fu en fu owruten taki”, a Kownukondre ben seti na hemel na ini 1914 (Tori 3:21; Ps. 110:1-3; Dan. 4:16, 17). Syatu baka dati, Krestes bigin seti a tru anbegi baka na grontapu. Leki bakapisi fu dati, milyunmilyun sma kisi blesi fu di den tron mati fu Gado èn fu di den tron memre fu Gado Kownukondre. Den kenki a fasi fa den ben de fosi èn den „kisi nyun fasi fu tron sma di de leki fa Gado wani” (Ef. 4:22-24). Neleki fa a ben de nanga a malengri begiman di ben kon betre, na so a kfalek moi wroko disi no du nanga libisma krakti, ma nanga a yeye fu Gado. Neleki Petrus, wi musu gebroiki Gado Wortu nanga dek’ati èn na wan yoisti fasi fu gi sma leri. Te wi man yepi trawan fu tron disipel fu Krestes, dan wi no e du dati nanga wi eigi krakti, ma nanga a krakti fu Gado.

„Wi no man tapu fu taki” (Tori fu den apostel 4:1-22)

9-11. (a) San den Dyu fesiman du di Petrus nanga Yohanes ben e preiki a boskopu fu den? (b) San den apostel bosroiti fu du?

⁹ Di Petrus taki nanga den ip’ipi sma èn di sma si fa a man di ben malengri fosi, ben e dyompodyompo èn ben e bari prèise Gado, dan wan bigi dyugudyugu kon de. A sani disi meki taki a tempel-edeman di ben musu sorgu taki ogri no psa na ini a tempel-dyari, lon go luku san psa èn den edeman fu den priester lon go luku tu. Soleki fa a sori, dan den man disi ben de Saduseiman. Disi ben de wan grupu kerki fesiman di ben gudu èn di ben de heihei sma na ini a politiek. Den ben e suku fu tyari freide kon na mindri a pipel nanga den Romesma. Den no ben e bribi den wet di den fosten leriman ben meki èn di den Fariseiman ben lobi so te. Den ben e spotu nanga a bribi di sma ben e bribi na ini na opobaka.c Di den si taki Petrus nanga Yohanes ben de na ini a tempel èn taki den no ben frede fu leri sma taki Yesus kisi wan opobaka, dan den ati bron srefsrefi.

¹⁰ Den gensman di ati ben e bron, poti Petrus nanga Yohanes na straf’oso èn a dei baka dati den srepi den kon na fesi a Grankrutu fu den Dyu. Den fesiman dati di ben e denki tumsi furu fu densrefi ben e si Petrus nanga Yohanes leki sma di ’no ben kisi furu skoro èn di ben de gewoon sma’. Den ben feni tu taki Petrus nanga Yohanes no ben abi a reti fu gi leri na ini a tempel. Petrus nanga Yohanes no ben teki leri na nowan fu den kerkiskoro di sma ben sabi na a ten dati. Ma fu di den ben e taki sani krin èn sondro fu tweifri, meki a krutubangi ben e ferwondru fu a fasi fa den ben e gi leri. Fa a du kon taki Petrus nanga Yohanes ben man gi leri na so wan moi fasi? Wan sani na taki den „ben e waka nanga Yesus” (Tori 4:13). A Masra fu den no ben e gi leri leki den leriman fu Wet, ma a fasi fa a ben e taki ben sori taki Gado ben e horbaka gi en.​—Mat. 7:28, 29.

¹¹ A krutubangi ben taigi den apostel fu tapu nanga a preikiwroko fu den. Na ini a libimakandra dati, a krutubangi ben abi furu makti. Soso wan tu wiki na fesi, den sma fu a srefi krutubangi disi ben taki dati Yesus ben „musu dede” (Mat. 26:59-66). Ma tòg Petrus nanga Yohanes no ben e frede. Di den tnapu na fesi den makti guduman disi di ben kisi heiskoro-leri, dan den taki sondro frede èn na wan lespeki fasi: „Na unu srefi musu sabi efu Gado feni en bun te wi e arki unu na presi fu en. Ma wi no man tapu fu taki fu den sani di wi si èn di wi yere.”​—Tori 4:19, 20.

12. San kan yepi wi fu kon abi moro dek’ati èn fu taki fu a bribi fu wi sondro fu tweifri?

¹² Yu man sori a srefi sortu dek’ati dati? Fa yu e firi te yu kisi na okasi fu preiki gi gudu sma, gi sma di kisi heiskoro-leri, noso gi prenspari sma na ini a kontren fu yu? Fa a de te den famiriman fu yu, den pkin na skoro, noso den sma na yu wrokope e spotu yu fu di yu na wan Kresten? Yu e frede? Efu dati de so, dan wan sani de di yu kan du fu no frede moro. Di Yesus ben de na grontapu, dan a leri den apostel fa den kan opo taki gi a bribi fu den na wan lespeki fasi èn sondro fu tweifri (Mat. 10:11-18). Baka di Yesus kisi wan opobaka, dan a pramisi den disipel fu en taki a ben o tan nanga den „ala dei te na a kaba fu a grontapu disi” (Mat. 28:20). Yesus e tiri „a koni srafu di de fu frutrow” fu leri wi fa wi musu opo taki gi a bribi fu wi (Mat. 24:45-47; 1 Petr. 3:15). Wi e kisi a leri dati na den gemeente konmakandra soleki a Wi Kresten libi nanga a preikiwroko-konmakandra èn nanga yepi fu Bijbel buku nanga tra sani soleki „Piki tapu aksi fu Bijbel” di yu kan feni tapu a jw.org website fu wi. Yu e gebroiki den seti disi bun? Efu yu e du dati, dan yu o kisi moro dek’ati nanga krakti fu taki fu a bribi fu yu sondro fu tweifri. Neleki fa a ben de nanga den apostel, na so yu no o meki noti tapu yu fu taki fu den moi tru tori di yu leri na ini Bijbel.

„Den . . . opo den sten begi Gado” (Tori fu den apostel 4:23-31)

13, 14. Te wi e kisi gens, dan san wi musu du èn fu san ede?

¹³ Di den lusu Petrus nanga Yohanes, dan wantewante den kon makandra nanga den tra memre fu a gemeente. „Den alamala opo den sten begi Gado” èn den aksi en fu gi den dek’ati fu tan preiki go doro (Tori 4:24). Petrus ben sabi heri bun taki te wan sma e fertrow na tapu en eigi krakti te a e pruberi fu du a wani fu Gado, dan dati na wan don sani. Wan tu wiki nomo na fesi, a ben e fertrow tumsi na tapu ensrefi èn a ben taigi Yesus: „Awansi ala den trawan o fadon te den si san pasa nanga yu, tòg mi no sa fadon noiti!” Ma soleki fa Yesus ben taki na fesi, dan Petrus broko kindi heri esi fu di a ben kon frede libisma èn a taigi den taki a no ben sabi en mati nanga en leriman. Ma Petrus ben leri fu a fowtu fu en.​—Mat. 26:33, 34, 69-75.

¹⁴ A no sari fu poti na yu ede nomo taki yu wani du a wroko di yu kisi fu de wan kotoigi fu Krestes. Te gensman e pruberi fu meki yu lasi bribi, noso te den e pruberi fu tapu yu fu preiki a bun nyunsu, dan a bun fu teki na eksempre fu Petrus nanga Yohanes. Begi Yehovah fu gi yu krakti. Suku yepi na a gemeente. Ferteri den owruman nanga tra lepi Kresten fu den problema di e miti yu. Te trawan e begi gi yu, dan dati kan de wan bigi yepi.​—Ef. 6:18; Yak. 5:16.

15. Fu san ede den sma di ben tapu fu preiki wan pisi ten, no musu las’ati?

¹⁵ Efu a psa kba taki yu tapu fu preiki wan pisi ten fu di sma ben e gens yu, dan no las’ati. Hori na prakseri taki baka di Yesus dede, ala den apostel ben e tapu fu preiki wan pisi ten, ma heri esi den bigin preiki baka (Mat. 26:56; 28:10, 16-20). Na presi taki yu e firi brokosaka fu di yu ben meki fowtu, a bun fu teki leri fu den sani di miti yu èn a bun tu fu gebroiki den sani di yu leri fu gi trawan dek’ati.

16, 17. San wi kan leri fu a fasi fa den bakaman fu Krestes na ini Yerusalem ben begi?

¹⁶ Gi san wi musu begi te sma di abi makti e kwinsi wi? Luku taki den disipel no ben aksi Gado fu kibri den gi tesi. Den ben sabi a sani disi ete di Yesus ben taigi den: „Efu den frufolgu mi, dan den o frufolgu unu tu” (Yoh. 15:20). Na presi fu dati, den ret’ati disipel disi aksi Yehovah fu „luku” den sani di den gensman ben e du fu tapu skreki gi den (Tori 4:29). Den disipel ben ferstan krin san ben e psa. Fu taki en leti, a ferfolgu di den kisi ben de wan kontru fu profeititori. Den ben sabi taki soleki fa Yesus ben leri den fu begi, a wani fu Gado ben o „pasa na grontapu”, awansi san libisma tiriman ben e taki.​—Mat. 6:9, 10.

¹⁷ Fu di den disipel ben wani gi yesi na Gado, meki den begi Yehovah: „Grantangi, meki den srafu fu yu tan taki a wortu fu yu sondro frede.” San Yehovah du wantewante? „A presi pe den ben kon makandra seki. Santa yeye kon na tapu den alamala èn den ben e taki a wortu fu Gado sondro frede” (Tori 4:29-31). Noti no kan tapu Gado fu du a wani fu en (Yes. 55:11). Awansi sortu problema de noso awansi o furu makti den gensman abi, efu wi e begi Gado fu yepi wi, dan a no abi misi taki a o gi wi a krakti fu tan taki a wortu fu en sondro frede.

’A no libisma, ma Gado’ wi musu gi frantwortu (Tori fu den apostel 4:32–5:11)

18. San den memre fu a gemeente na ini Yerusalem ben du gi makandra?

¹⁸ Heri esi a nyun gemeente na ini Yerusalem gro kon abi moro leki 5000 memre.d Aladi den disipel ben abi difrenti kulturu, tòg den ben abi „wán denki èn den ben de leki wán man” (Tori 4:32; 1 Kor. 1:10). Den no ben begi Yehovah nomo fu blesi a muiti di den ben e meki. Den ben e tranga a bribi fu makandra èn te a ben de fanowdu, den ben e prati sani nanga makandra (1 Yoh. 3:16-18). Fu eksempre, a disipel Yosef di den apostel ben e kari Barnabas sosrefi, ben seri wan pisi gron fu en. Sondro fu denki ensrefi a gi ala a moni di a meki fu yepi den sma di ben kmoto na farawe kondre, so taki den ben kan tan moro langa na ini Yerusalem. Na so den ben o man leri moro fu a nyun bribi fu den.

19. Fu san ede Yehovah kiri Ananias nanga Safira?

¹⁹ Ananias nanga en wefi Safira ben seri wan pisi gron tu èn den tyari moni gi den apostel. Den ben du neleki den gi ala a moni fu a gron, aladi ’kibrikibri den ben hori pkinso fu a moni na baka’ (Tori 5:2). Yehovah kiri den tu sma disi, no fu di den no ben gi nofo moni, ma fu di den ben gi a moni nanga wan takru ati èn fu di den ben wani bedrigi sma. ’A no gi libisma den lei, ma gi Gado’ (Tori 5:4). Neleki fa den hoigriman di Yesus ben krutu ben e suku fu kisi glori fu sma, na so Ananias nanga Safira ben e du tu, na presi taki den ben e suku fu kisi glori fu Gado.​—Mat. 6:1-3.

20. San wi e leri fu den sma di ben e gi Yehovah sani?

²⁰ Neleki fa den ret’ati disipel na ini Yerusalem fu a fosi yarihondro ben lobi fu gi trawan sani, na so milyunmilyun Kotoigi na ini a ten disi e gi sani fu horbaka gi a preikiwroko di e du na heri grontapu. Nowan sma de ferplekti fu gi en ten noso en moni fu horbaka gi a wroko disi. Iya, Yehovah no wani taki wi e dini en nanga krutukrutu, noso fu di sma dwengi wi (2 Kor. 9:7). Te wi e gi sani, dan Yehovah no e luku omeni wi e gi, ma a e luku fu san ede wi e gi (Mark. 12:41-44). Noiti wi wani de leki Ananias nanga Safira, iya, noiti wi musu dini Gado fu di wi e suku wi eigi bun, noso fu di wi wani kisi glori. Na presi fu dati, neleki Petrus, Yohanes, nanga Barnabas, a musu de so ala ten taki wi e dini Yehovah fu di wi abi trutru lobi gi en èn gi tra sma.​—Mat. 22:37-40.