Tyari wan kba kon fu têgo na a universele strei-aksi
„Yehovah srefi di de na yu reti anu seiker sa masi kownu na a dei fu en atibron.” — PSALM 110:5.
1, 2. Sortu sani di ben psa na ini 70 G.T. kande ben meki tweifri kon na ini a tori fu a soevereiniteit fu Yehovah Gado na ini hemel nanga grontapu, ma tapu suma a bun wani fu en ben abra go na a ten dati?
NA UNIVERSEEL soevereiniteit fu a Mekiman fu hemel nanga grontapu na a moro prenspari strei-aksi di libisma nanga engel e tanapu na en fesi. Dyonsro a strei-aksi sa tyari kon na wan kba fu ala ten, ma hondrohondro yari langa den feyanti fu Yehovah ben tyalensi en soevereiniteit. Iya, a pori fu a foto Yerusalen na ini 70 G.T., makandra nanga en tenpri di den ben gi abra na Yehovah, kande ben meki tweifri kon ini a tori fu a soevereiniteit fu a Mekiman na ini hemel nanga grontapu. Toku wan bun reide ben de fu san-ede ini a ten dati Yehovah ben frukisi fu no de wan Gado di e feti orloku gi na Israèl na skinfasi.
2 San ben de a reide? Na a ten dati Yehovah ben meki en bun-ati abra go na tapu wan nyun nâsi, wan Israèl na yeyefasi, „a Israèl fu Gado”, so leki fa na apostru Paulus e kari a gemeente fu Yeises Krestes (Galasiya sma 6:16). Ma te nanga now, na ini a heri ten fu a sokari pisiten fu kresten sma, Yehovah no feti gi a Israèl na yeyefasi leki wan Gado di e feti orloku, so leki fa a ben du dati gi a Israèl na skinfasi di ben de na ondro a wèti-frubontu fu Moses. A ben gi pasi srefi taki den dyu ben gi den Romeini srudati tranga fu kiri Yeises na wan pina-udu na ini Golgotha. Dati ben de 37 yari bifo a di fu tu pori fu Yerusalen nanga anu fu den Rome sma, na ini 70 G.T.
3, 4. Fa Gado ben sori taki a de wan orlokuman na ini den dei fu Moses te nanga den di fu Hiskiya, ma fa a ben de nanga a Israèl na yeyefasi na ini a tori fu a feti fu Gado nanga den feti fu den?
3 Fu sensi den dei fu a profeiti Moses te nanga a tiri fu Kownu Hiskiya fu Yerusalen, Yehovah ben feti gi a nâsi Israèl na wan fasi di e gi fruwondru, èn den Israèl sma ben feti na ondro en tiri nanga fetisani di e kiri sma (Deuteronomium 1:30; 3:22; 20:3, 4; Yosuwa 10:42). Ma dati no de so nanga a Israèl na yeyefasi! Fu sensi a dede fu Yeises Krestes na dorosei fu Yerusalen èn na heri pisiten disi fu wi gewoon teri moro fara, dan a Gado disi di e feti orloku no ben frukisi fu feti wan orloku na skinfasi gi a Israèl fu Gado. Ini akruderi nanga disi, meki a no ben gi a Israèl na yeyefasi, di de na kresten gemeente, a makti fu feti orloku nanga fetisani na skinfasi. Kresten abi wan tra sortu orloku e feti.
4 Ini akruderi nanga disi, dan wan fu den moro prenspari fetiman gi a kresten bribi, ben skrifi den konpe kresten na ini na Korente ini Grikikondre: „Den fetisani fu na orloku di wi e feti no de na skinfasi, ma nanga krakti fu a sei fu Gado fu trowe sani di ben skotu tranga. Bika wi e trowe redeneri na gron èn ibri hei sani di sma e opo kontrari a sabi fu Gado; èn wi e tyari ibri prakseri kon ini katibo fu meki a gi yesi na Krestes; èn wi e hori wi srefi klariklari fu A strafu ibri trangayesi-fasi, sodra yu eigi gi di yu e gi yesi du dorodoro” (2 Korente sma 10:4-6). Na fesi kba na ini a srefi brifi, Paulus ben taki fu „den fetisani fu regtfardikifasi na a reti-anu sei èn na a kruktu-anu sei”. — 2 Korente sma 6:7; luku so srefi Efeisiya sma 6:11-18).
Yehovah sa feti na Armagedon
5. Sortu sei Yeises ben teki na ini a dyari fu Gethsemane ini a tori fu a kobroiki fu fetisani na skinfasi fu kibri en srefi, èn sortu fasi fu handri den disipri fu en e teki?
5 Di Yeises ben de na grontapu, dan noiti a ben go abra fu teki fetisani di kan kiri sma fu tapu slag gi en srefi. A neti di den ben tori en na ini a dyari fu Gethsemane, dan a disipri fu en di ben e gi en srefi, Simon Petrus, ben hari wan feti-owru èn ben koti a yesi puru fu a srafu fu a dyu heipristri. Ma na wan fruwondru fasi Yeises ben meki a yesi kon bun baka na en presi èn a ben taki: „Ala sma di e grapu a feti-owru, sa kisi pori nanga a feti-owru. Ofu yu denki taki mi no kan begi mi Tata fu gi mi na a momenti disi moro leki twarfu legioen engel? Efu dati de so, dan fa den Buku ben sa kontru taki a musu psa na a fasi disi?” (Mateyus 26:52-54) Nanga ala den sani disi na prakseri, dan den tru bakaman fu a Manpikin fu Gado, di gi en srefi abra leki wan srakti-ofrandi, e kibri den neutraalfasi èn no e teki prati na a feti fu orloku fu grontapu efu a de now na wan direkt ofu indirektfasi. — Yohanes 17:16; 18:36.
6. Sortu sei Yehovah Kotoigi sa teki na ini a orloku fu a bigi dei fu Gado na Almaktiwan na Armagedon?
6 Meki den nâsi sabi dan taki ini a ten fu „a orloku fu a bigi dei fu Gado a Almaktiwan” na „a presi di den e kari Har–Mágedon na ini Hebrewtongo”, Yehovah Kotoigi no sa teki prati na a feti. Den sa libi dati abra gi a Gado di e feti orloku, „Yehovah fu den legre”, makandra nanga den legioen engel fu en, ondro a tiri fu Yeises Krestes. — Openbaring 16:14-16; 19:11-21; Psalm 84:12.
Yehovah de fu bigin den srudati wroko fu en baka
7. Nanga sortu titel Yehovah ben kon de bekenti leki wan Gado fu orloku, èn a de disi te now ete?
7 Sma ben kon sabi, èn ben kari na Gado fu a Israèl fu owruten leki Yehovah tseva·ʼōthʹ, ofu Yehovah fu den legre (1 Samuwel 1:3, 11). Na ini Rome sma 9:29 (Statenvertaling), na apostru Paulus e sori go na Yesaya 1:9 èn a e skrifi: „Efu Masra Sebaôth no ben libi wan siri abra gi wi, dan wi ben sa tron neleki Sodom, èn ben sa meki kon de a srefi leki Gomora.” A kresten disipri Yakobus e skrifi tu: „Na krei fu den wan di koti nnyan, doro te na ini den yesi fu Masra Sebaôth” (Yakobus 5:4, SV). Na so Gado ben de Yehovah fu den legre gi Paulus nanga Yakobus, na ini a fosi yarihondro fu wi gewoon teri. Na ini den tina-aiti yarihondro baka dati, Gado no ben feti orloku na skinfasi gi na Israèl na yeyefasi, a Israèl fu Gado, so leki fa a ben du dati gi na Israèl fu owruten, ma toku a de te now ete Yehovah fu den legre.
8-10. (a) Suma ben gi komando fu feti na orloku na ini hemel, èn fu san-ede Michaël ben bekwaam moro ala tra sma fu feti a feti disi? (b) San ben de a bakapisi fu a orloku na ini hemel, èn omeni ten fika ete bifo na orloku fu a bigi dei fu Gado broko kon?
8 Di na Mesiyas kownukondre ben kon gebore na ini 1914 na a kba fu „den ten fu den hèiden”, dan wan orloku ben bigin na ini a hemel kondre fu Yehovah Gado (Lukas 21:24, SV) Suma ben gi a komando fu feti a orloku dati? Yehovah Gado srefi. En ben seni en Manpikin, di den ben poti na tapu a kownu-sturu, go ini a strei nanga a nen fu Michaël, fu di a wan Disi de moro bekwaam fu gi piki tapu a aksi di de na ini a nen dati, dati na, „Suma de leki Gado?” Wantewante Michaël ben opo fu handri leki a fetiman di e teki presi gi Yehovah fu den legre.
9 Ini akruderi nanga dati wi e leisi na ini Openbaring 12:7-10: „Èn orloku ben bigin na ini hemel: Michaël nanga den engel fu en ben feti nanga a draak, èn a draak nanga den engel fu en ben feti, ma a no ben wini, èn so srefi den no ben feni presi gi den moro na ini hemel. Den ben iti fu dati-ede na bigi draak go na gron, na fosi sneki, di den e kari Ddibri nanga Satan, di e kori a heri grontapu pe sma e libi; den ben iti en go na grontapu, èn den engel fu en den ben iti go na gron nanga en. Èn mi ben yere wan tranga sten na ini hemel e taki: ’Now na frulusu èn na krakti èn na kownukondre fu wi Gado, èn na makti fu en Krestes kon, bika na kragiman di e kragi den brada fu wi, dei nanga neti na fesi fu Gado, den iti go na gron!’”
10 Now, di wi de moro leki 70 yari moro fara fu a feti dati na ini hemel, dan soso „wan syatu pisiten” tan abra ete bifo na orloku fu a bigi dei fu Gado na Almaktiwan bigin èn taki Gado sa meki a disiten libisma geslakti kon sabi en leki Yehovah fu den legre. — Openbaring 12:12; Sakariya 14:3.
A fetiman fu regtfardiki Yehovah
11. Tapu sortu fasti ten a fikapisi fu a pikin ipi nanga a bigi ipi e wakti, èn san den sa erken nanga prisiri bbari?
11 Na koni kownu Salomo fu a Israèl fu owruten ben skrifi ondro krakti fu a santa yeye: „Gi ala sani wan fasti ten de, iya, wan ten gi ala afersi na ondro hemel: . . . wan ten gi orloku èn wan ten gi vrede” (Preikiman 3:1-8). Dyaso na grontapu den disipri fu a kownu di e tiri èn di „bigi moro leki Salomo” e wakti a ten èn na okasi taki A sa tyari den engel fu hemel di e wini feti go na ini a feti na Har–Mágedon (Mateyus 12:42; Openbaring 19:11-16). Drape a sa „wei [den nâsi] nanga wan isri tiki”, èn broko den „nanga wan isri tiritiki” (Openbaring 19:15; Psalm 2:9). Fa den disipri fu en di lobi vrede èn di ben kisi kibri sa erken en nanga prisiri fu a fri di a fri den na wan fasi di e gi respeki! A fri disi sa de gi a fikapisi fu a „pikin ipi” fu den medeërfgenaam fu en fu a kownukondre èn na „bigi ipi” fu den „tra skapu” di abi a howpu fu kisi a Paradèisi grontapu na ondro en dusun yari tiri fu vrede (Lukas 12:32; Openbaring 7:9-17; Yohanes 10:16). Nanga prisiri bbari na, „ondro na skaduw srefi fu a Almaktiwan”, den sa erken nanga prisiri a bigi wini di a Herder èn Kownu, Yeises Krestes, ben wini fu regtfardiki a universeel soevereiniteit fu Yehovah Gado. — Psalm 91:1.
12. Fu pe kofar gi orloku e sutu en ede e kon gi den nâsi, èn nanga sortu bakapisi akruderi Psalm 68:1, 2?
12 Sondro fu taki sani moro bigi leki fa a de, dan yu kan taki now taki wan orloku di de bun fara fu a kontren fu libisma, de e wakti ala nâsi fu grontapu, efu den de wan memre fu a orga fu a Verenigde Nâsi ofu no, wan orloku pe den sa meki kobroiki fu fetisani di seti soifri fu sutu go na pe den musu go èn di abi moro krakti leki den kernbom fu libisma. Arki: „Meki Gado opo tanapu, meki den feyanti fu en panya gwe, èn meki den wan di no wani si en na ai srefisrefi, lon gi en. Meki a de so taki yu wai den gwe neleki fa smoko e wai gwe; neleki fa faya e smelti onikaka, meki den gadolowsuwan dede so tu komoto na fesi fu Gado.” — Psalm 68:1, 2.
13. Na suma den taki na a yoisti ten den wortu fu Psalm 45:1-6 gi, ala di den sani di e sreka gi na orloku e tan go doro?
13 Den sani di musu sreka gi a orloku fu ala den orloku e du nownow kba. Wan memre fu a nâsi Israèl ben skrifi na ondro krakti fu santa yeye den wortu di e kon now gi a moro prenspari Fetiman fu Gado di e feti fu regtfardiki Yehovah: „Yu de trutru moro moi leki den manpikin fu libisma. Moifasi kanti poti tapu yu mofobuba. Fu dati-ede Gado ben blesi yu te ten di no skotu. Gepsi yu feti-owru na yu bowtu, ow maktiwan, nanga yu wartifasi èn yu moifasi. Èn go doro na ini yu moifasi te na a winimarki; rèi gi a afersi fu waarheid èn fu sakafasi èn fu regtfardikifasi, èn yu reti-anu sa leri yu sani di e gi frede. Den peiri fu yu srapu — pipri e tan fadon na ondro yu — na ini a ati fu den feyanti fu a kownu. Gado na yu kownu-sturu te ten di no skotu, iya, fu têgo; na tiritiki fu yu kownukondre na wan tiritiki fu reti.” — Psalm 45:1-6.
Den nâsi e bondru kon na wan kontrari Yehovah
14, 15. Baka di den apostru ben kon fri fu a sroto di den ben sroto den, dan sortu wortu fu Psalm 2 den apostru ben teki taki fu di den ben si taki den ben kontru, èn san den ben aksi Gado?
14 Syatu baka di a kresten gemeente ben opo na a dei fu penkstri, na ini 33 G.T., dan salfu kresten ben kon frustan wan fu den sani di Psalm 2:1, 2 ben wani taki. A beibri tekst disi e taki: „Fu san-ede den nâsi de na ini bruya èn den nationaal grupu srefi e tan taki fu wan soso sani? Den kownu fu grontapu e poti den srefi na ini grupu èn den heiman srefi ben bondru kon na wán kontrari Yehovah èn kontrari en salfuwan.” Baka di den feyanti dyu ben sroto èn ben krawasi den apostru fu a Salfuwan fu Yehovah fu a fosi tron, dan den ben go baka na den konpe kresten èn dan ben teki den wortu disi taki, di kownu David ben skrifi na ini Psalm 2. Tori fu den Apostru 4:23-30 e taki fu na afersi nanga den wortu:
15 „Baka di den ben kon fri, dan den ben go na den eigi pipri èn ben fruteri san den gran pristri nanga owruman ben taigi den. Di den ben yere a tori disi, dan makandra den ben opo den sten go na Gado, ala di den ben taki: ’Soeverein Masra, yu na a Wan di meki hemel nanga grontapu nanga se nanga ala den sani di de na ini èn di ben taki nanga yepi fu santa yeye nanga mofo fu wi grantata David, yu knekti: „Fu san-ede den nâsi kon na ini bruya èn den pipri e denki fu soso sani? Den kownu fu grontapu ben poti den srefi na ini grupu èn den tiriman ben bondru kon na wán kontrari Yehovah èn kontrari en salfuwan.” So yu ben abi Herodus nanga Pontius Pilatus makandra nanga den sma fu den nâsi nanga den pipri fu Israèl na ini a foto disi, di ben kon makandra trutru kontrari yu santa knekti Yeises, di yu ben salfu, fu du den sani di yu anu nanga rai ben bosroiti na fesi kba. Èn now Yehovah, poti prakseri tapu a skreki di den tapu skreki gi wi, èn meki den srafu fu yu kan taki nanga ala fri èn sondro frede, ala di yu e langa yu anu fu e dresi sma èn ala di marki nanga wondru e du nanga yepi fu a nen fu yu santa knekti Yeises.’”
16, 17. (a) Wan sani psa na ini a heri libisma historiya di yu kan teki gersi nanga san ben bigin fu psa na ini 1914? Fruklari disi. (b) Nanga sortu libifasi den nâsi e tan go doro, èn san den e dwengi Yehovah fu skrifi ini a tori fu ’a buku fu den orloku’?
16 Ma te a e go fu nâsi di de ini bruya, kownu di poti den srefi makandra ini grupu, politik fesiman di bondru kon a wán kontrari Yehovah èn en Salfuwan, Yeises Krestes, dan sortu sani ini a heri libisma historiya wi kan teki gersi nanga san ben bigin 76 yari psa na ini 1914? Dati no ben de soso a yari di a libismafamiri ben si fu a fositron ini den libi a kon fu wan grontapu feti, ma spesrutu a yari di den ten fu den hèiden, „den fasti ten fu den nâsi”, ben kon na wan kba! (Lukas 21:24) A de krin fu si taki, Psalm 2 ben abi wan moro bigi kontru bigin nanga na yari dati.
17 Na a kba fu den ten fu den hèiden na ini 1914, yu no ben abi nowan nâsi — srefi no den nâsi fu a sokari krestenhèit pe furu borgru fu a kondre e si den srefi leki Israèl sma na yeyefasi — di ben abi a firi fu gi wan switikon na a Salfuwan fu Yehovah, Yeises Krestes, tapu a kownu-sturu fu tirimakti na a heri grontapu. Èn now, 71 yari baka di „a bun nyunsu fu a kownukondre” ben bigin „fu preiki” na ini 1919, „na a heri grontapu pe libisma e libi leki wan kotoigi gi ala nâsi”, dan den nâsi di de na inisei èn dorosei fu a krestenhèit seiker no sa teki na Kownu fu Yehovah di sma ben preiki bun langa fu en èn den no sa sweri taki den de kotrow na en ala di den e poti den eigi tirimakti fu grontapu na wan sei (Mateyus 24:14). Kontrari fu dati, den doro te fu kba a ten èn situwâsi pe, te yu luku en bun, den e dwengi Yehovah fu skrifi a moro prenspari èn lasti kapitri gi „a buku fu den Orloku fu Yehovah”. — Numeri 21:14.
Wan barinen wini gi a Gado di e feti orloku
18. Sortu du fu a sei fu Yehovah wi e feni bun, èn te yu luku bun dan suma sa de na en sei fu meki Psalm 110 kontru?
18 Go dan na ini a strei, ow Yehovah fu den legre, nanga yu Manpikin di de kownu, Yeises Krestes, na yu sei! Gi en den e taki den profeiti wortu: „Go, poti na yu ondro na mindri den feyanti fu yu. Yehovah srefi di de na yu reti anu seiker sa broko kownu na pisipisi na a dei fu en atibron. A sa hori krutu na mindri den nâsi; a sa meki taki bun furu dede skin de. Seiker a sa broko na pisipisi a edeman fu wan kondre di lai nanga sma.” — Psalm 110:2, 5, 6.
19. Te wi e hori na orloku fu a bigi dei fu Gado na Almaktiwan di de leti a mofo doro na prakseri, dan san wi e begi Gado fu a bun fu a bigi ipi fu tra skapu?
19 Ow Yehovah fu den legre, meki den kotrow diniman fu yu na grontapu tron den kotoigi di e bari wan prisiri bbari fu a wini fu yu di no abi en speri, èn di o kon nanga yepi fu yu Fetiman èn Kownu, Yeises Krestes, na a ten fu a orloku fu a bigi dei fu Gado na Almaktiwan na a presi di den e kari na ini Hebrewtongo Har–Mágedon! (Openbaring 16:14) Meki, sei a fikapisi fu a tru Israèl na yeyefasi, a bigi ipi fu sma di gersi skapu èn di ’wasi den langa tapusei krosi kon weti na ini a brudu fu a Lam’, „psa na bigi banawtu” nanga bbari fu prisiri fu de kotoigi fu yu na grontapu fu ala ten! (Openbaring 7:14) Meki na ondro a tiri fu yu lobi sorgu, den psa libilibi sondro fu dede èn go na ini a kondre sondro orloku fu yu fektori Manpikin, di sa tiri a grontapu di kon krin èn di o tron wan moi paradeisi ini akruderi nanga yu fosi prakseri. Meki den de wan kotoigi di de fu si gi ala sma di o wiki komoto fu dede, fu regtfardiki a soevereiniteit di nanga reti de fu yu na ini a heri universum! Wi e taigi yu tangi taki yu tyari fu têgo wan kba kon na a universeel strei-aksi!
Yu kan memre disi?
◻ San na a moro prenspari strei-aksi na fesi san libisma nanga engel de?
◻ Sortu difrenti de na mindri a feti fu Yehovah gi a Israèl fu owruten èn gi a Israèl na yeyefasi?
◻ Sortu sei Yehovah kotoigi sa teki na ini Armagedon, èn fu san-ede?
◻ Oten Psalm 2:1, 2 ben abi wan kontru di no abi en speri ete?
◻ Fa a strei-aksi fu hemel nanga grontapu sa kon na wan kba fu têgo?
[Prenki na tapoe bladzijde 12, 13]
A „bigi ipi” o erken nanga prisiri a Herder èn Kownu di wini