No gi Didibri no wan pasi!
„No meki son dongo aladi joe de na ini wan atibronfasi èn no gi Didibri nowan pasi”. — EFESE 4:26, 27.
1. Fa Petrus ben skrifi foe Didibri, ma fa wi kan kisi kibri leki fa den wortoe foe na apostel taki?
WAN ogri-ati wildermeti de a pasi e loeroe foe kiri sani. A abi wan lostoe di no e tapoe foe kiri kristensma. Petrus e warskow: „Hori joe ferstan na wan, de nanga ai. Joe gensman Didibri, e waka lontoe leki wan krasi lew , e soekoe foe swari wan sma. Ma kakafoetoe gi en, faste na ini bribi . . . Ma baka te joe ben njan pina foe wan sjatoe ten, na Gado foe ala no-ferdini-boenfasi sa meki joe kon stanfaste, a sa meki joe kon tranga.” — 1 Petrus 5:8-10.
2. (a) Sortoe omstandigheid e meki dati den aanval foe Satan kan kisi wi moro esi? (b) Foe san-ede wan sma di fadon gi a fadon komoto na bribi no kan gi a fowtoe na nowan tra sma leki na ensrefi? (c) Sortoe swakifasi ben opo na pasi foe Didibri meki Judas Iskáriot kisi na ini en ati foe tori Jezus?
2 Wi kan de séker dati Didibri nanga en wrokosani, den ogrijeje èn libisma tanapoe klarklari foe feni wini foe ibri degedege di wan sma abi, ibri serjoesoe swakifasi na ini a sma di wi moe de, èn ibri mi-no-ke-fasi foe wi sé foe tan tranga na ini bribi. Ma Jehovah Wortoe e gi na djaranti dati Didibri no sa swari wi efoe wi kakafoetoe gi en (Jakobus 4:7 Foe eksempre, no wan sma e fadon komoto foe bribi foedi disi de wan sani di no kan komoto a pasi gi en. No wan sma den ben poti dati a fesi kaba dati a boo libi a bribi foe en. Réde di e bewégi na ati de ini a tori. Johannes foetroe ben taki foe son sma dati den „ben kon foe wi, ma den no ben de foe wi sortoe” (1 Johannes 2:19). Ma disi ben psa foe di densrefi ofoe ben teki a bosroiti dati foe fadon komoto na bribi ofoe sensi a bigin kaba ben kon ini Jehovah organisaatsi nanga wan fowtoe bewégi foe ati. Judas Iskáriot ben abi wan boen ati di a ben kisi kari foe de wan foe den twarfoe apostel foe Jezus, ma Didibri wroko na tapoe na swakifasi foe Judas na ini a tori foe big’ai. Srefi ete bifo na neti di a ben tori Jezus, „Didibri ben poti kaba na ini a ati foe Judas Iskáriot, a manpikin foe Simon foe tori en.” — Johannes 13:2.
3. Sortoe sani kan abi sowan krakti na tapoe wan sma dati a fadon komoto foe bribi?
3 Wan sma e go waka wan fowtoe pasi foe di a e gi pasi dati en égi gridi tak-go-tak-kon, en égi lostoe foe kisi bigi nen èn den mati di a teki nanga a birti e vorm en denki èn e bepaal gi en sortoe sé a wani foe en o go. Paulus ben taki foe son sma di ’ben kon ini a leti wan dé, èn di ben tesi na fri presenti foe hemel, ma ben fadon komoto foe bribi’ (Hebrewsma 6:4-6). Efoe wi no loekoe boen alaten, dan Didibri kan meki wi ati kon safoe foe teki wan denki di falsi nanga jepi foe en finifini propaganda. Ma fa Didibri e meki wan sma now troetroe kon de kande wan sma di fadon komoto na bribi?
4. San kan psa te wi gi wisrefi abra na bitafasi, hori sma na ati nanga soekoe foe fowtoe na tra sma?
4 Foeroe fasi di e kon foeroetron èn di Didibri e loeroe na tapoe de bitafasi, hori sma na ati èn feni fowtoe na trawan. Den sortoe firi dati kan kon so tranga dati presi no ben tan abra gi lobi nanga warderi. Kande wan ofoe tra problema di no loesoe e tan gro doro, sodati wan sma e firi atibron èn e feni en regtvaardiki foe tan gwe foe den toemsi prenspari kristen komakandra. Foedi foe wan moro langa pisten a de tan nanga atibron, ’dan a e gi Didibri pasi’ (Efese 4:27). Na sma di broeja e si soso libisma swakifasi foe en brada, na presi dati a e pardon en „sébitenti tron sébi”, aladi a e libi en na wan sé foe gebroiki den omstandigheid di de leki wan tesi leki okasi foe tjari kristen égifasi kon de volmaakti (Mattéus 18:22). Efoe wan sma taki nanga na kristen di de nanga bita-ati èn e ferteri en, dati Jehovah organisaatsi e kwinsi sma ofoe e poti skotoe ofoe srefi na ini bepaalde boen prenspari leri no abi leti, dan dati kan safoe en ati gi den sortoe sani disi di taki èn di no abi no wan enkri fundamenti. Fa a de foe dat’ede fanowdoe foe no meki bitafasi èn na hori foe sma na ati meki roetoe na ini wi ati! No meki a psa dati son dongo aladi joe ati e bron. Na presi foe dati, meki lobi kon moro foeroe na fesi na ini joe libi.
5. (a) Fa hémemre nanga atibron kan de wan trapoe ini a tori foe rai di gi na wan sma foe kenki en libi? (b) Foe san-ede sakafasi de prenspari foe kan tan hori faste na ini bribi?
5 Na sortoe tra toestand foe ati nanga jeje Satan e loekoe? We, foe eksempre bigi-memre, wan firi dati wan sma de prenspari èn hori sma na ati foe di wan sma no e kisi na presi di a denki a abi reti a tapoe. Disi de alamala trapoe di Didibri e gebroiki (Romeini 1:3). Efoe joe e kisi rai ofoe srefi kisi pir’ai ini a tori foe wan fowtoe libifasi ofoe doe, dan disi ooktoe kan de gi Didibri wan moi momenti foe gi joe faja foe aksi joesrefi efoe joe de ini na joisti organisaatsi. De foe dat’ede nanga sakafasi. De tevréde efoe joe e tjari joesrefi leki „wan mendriwan”. No meki hémemre ofoe wan firi foe prensparifasi meki joe sekseki, sodati joe no tan tanapoe moro langa faste na ini bribi. — Lukas 9:48; 1 Petrus 5:9.
6, 7. (a) San a wantoe fasi foe lasi pasensi di Satan e gebroiki esesi? (b) San wan sma moe doe efoe a mankeri koni?
6 Lasi pasensi na ete wan sani di Didibri e loekoe foe en. Kande wi e denki dati kenki moe tjari kon; wi wani sani doe esesi, kisi piki wantewante. ’A problema disi moe loesoe nownow, noso mi e stop. Mi moesoe kisi a piki tapoe a aksi disi wantewante, noso mi no e go moro fara. Armageddon nanga a njoen seti foe sani de now kaba omeni jari ben „krosbé”. Mi weri foe wakti.’ De séker dati Didibri de klarklari foe sai siri foe degedege nanga oproeroe tapoe den sortoe gron disi te wan sma lasi pasensi. Horidoro èn bribi de fanowdoe. — Hebrewsma 10:36, 39.
7 Jakobus ben taki: „Meki na horidoro doe en wroko, sodati joe kan tan dorodoro èn na ini ala fasi sondro fowtoe no e misi ini nowan sani. Efoe wan sma foe oenoe foe dat’ede e mankeri koni, dan a moe tan aksi Gado, bika en e gi na ala sma sondro foe gridi èn sondro verwéti; èn a sa kisi en. Ma a moe tan aksi na ini bribi, no e degedege kwetkweti, bika a sma di e degedege de leki wan skwala foe na se, di a winti e tjari-go-tjari-kon. A sma dati te joe loekoe en boen no moe méne dati a sa kisi wan sani foe Jehovah; a de wan man di no e teki bosroiti, no tanapoe faste na ini ala en pasi” (Jakobus 1:4-8). No meki Didibri meki joe tron wan soema foe fadon komoto na bribi foe di joe e aksi toemsi foeroe sani èn e lasi pasensi èn foe di joe go degedege na ini den pramisi foe Gado! De nanga pasensi, de nanga tangi. Wakti tapoe Jehovah. — Psalm 42:5.
8. Fa a firi foe wan sma foe meki oproeroe tége makti e opo a pasi gi Didibri foe kori en foe trowe den skotoe di a bijbel e poti?
8 San Didibri e gebroiki moro ete na ini den moeiti foe en foe hari oen poeroe foe na waarheid? A no ben proeberi alaten foe gi faja na sma foe meki oproeroe èn foe boewégi Jehovah dienstknegti foe soekoe fowtoe na den sma di e teki fesi? ’Den owroeman no e ferstan a tori. Den e soekoe fowtoe toemsi, den e aksi toemsi foeroe’, son sma e taki kande. Wan sma kan go moro fara èn taki dati na Tiri Skin foe Jehovah Kotoigi ofoe tra frantwortoe brada e bemoei nanga na fri foe na konsensi èn na „reti” foe apartisma foe tjari a bijbel kon na krin. Ma prakseri den sakafasi wortoe foe Jozef: „Tjari sani kon na krin no de wan afersi foe Gado?” (Genesis 40:8) Èn Jezus no ben taki na fesi dati na ini den laatste dé disi wan organisaatsi foe salfoewan, „na getrow èn koni srafoe” ben sa kisi na wroko foe gi jeje njanjan na a reti ten? (Mattéus 24:45-47) Loekoe boen nanga den sma di e tjari den prakseri foe den ègi di de tra fasi kon na fesi. Loekoe boen ooktoe nanga den sma di wani poeroe ala skotoe ofoe di e pramisi foe gi fri èn di e taki dati Jehovah Kotoigi de srafoe! Petrus ben taki foe falsi leriman: „Aladi den e pramisi joe fri, dan densrefi de srafoe foe a pori. Bika ala sma di e meki wan tra sma wini en, e meki a sma dati meki en tron wan srafoe.” — 2 Petrus 2:1, 19.
9. Fa den sma di e si fowtoe na tra sma de nofotron nanga den sma di e teki fesi?
9 San de nofotron na bewégi foe ati foe den sma di e feni fowtoe na a Genootschap ofoe na den sma di e teki fesi? A no de foeroetron so, dati na wan ofoe tra ferstan foe wan pisi foe bijbel e abi foe doe persoonlek nanga den libi? Na presi foe den fiti densrefi akroederi na gesontoe leri èn akroederi na gesontoe tiri, den den wani dati na organisaatsi moe kenki. Meki wi tjari disi kon na krin nanga wan toe eksempre.
10. Fa na hori tranga na wan aparti fasi foe weri krosi èn a drès foe wisrefi kan abi leki bakapisi dati wan sma ’gi Didibri pasi’?
10 Wan brada e tan hori na wan ofoe tra aparti sortoe foe krosi ofoe a fasi fa ai dresi. Den owroeman abi na méne dati a no de wan boen eksempre èn no e gi en bepaalde grani, soleki foe leri tapoe podium. En ati e bron èn ai taki dati tra sma e proeberi foe teki en kristen fri. Ma san de na baka so wan tak-go-tak-kon? A no de moro foeroetron hémemre, wan srefi denki fasi ofoe wan pikinnengre lostoe foe doe san wan sma srefi wani? Aladi a gersi dati disi na wan pikin sani, dan sowan sma tokoe ben sa kan „gi nanga sowan tak-go-tak-kon Didibri pasi”. Ma lobi nanga sakafasi sa tjari wi go so fara foe sorgoe dati a krosi foe wi nanga a fasi fa wi e dresi de bescheiden èn di sma e feni boen. Wi moe wani foe doe ala sani foe meki na boen njoensoe go na fesi èn no foe plisi wisrefi. — Romeini 15:1, 2; 1 Korinte 10:23, 24.
11. San ben kan de a baka te wan sma e degedege na Jehovah gebod foe hori ensrefi fara foe broedoe?
11 Meki wi teki wan tra eksempre. Wawantron joe e jere kande dati wan sma e degedege efoe a tapoe di bijbel tapoe wi na ini a njan foe broedoe abi foe doe troetroe nanga transfusie. Ma san de na baka sowan tak-go-tak-kon? A de frede — frede dati wan sma kande kan lasi en disiten libi ofoe a libi foe wan lobiwan? A de so, dati na howpoe tapoe na opobaka e kon flaw? Getrow kristen no e meki spotoe nanga na hori foe den wèt foe Gado èn no e soekoe fasi ooktoe foe swaki dati. Foe hori joesrefi farawe foe broedoe leki njanjan gi joe skin de net so fanowdoe leki a hori joesrefi farawe foe hoeroedoe nanga afkodré, èn na bosroiti foe den apostel nanga den owroeman na ini Jeruzalem di santa jeje ben tjari e kroetoe ala den pasa disi foe a wèt foe Gado. — Tori foe den Apostel 15:19, 20, 28, 29.
12. Foe san-ede fowtoe loyaliteit no moe tjari oenoe so fara foe pasa wèt foe bijbel foe tan fara foe prisiri demakandra nanga sma di poti na dorosé foe na gemeente?
12 Son sma di abi na fasi foe soekoe fowtoe e taki dati Jehovah organisaatsi e hori ensrefi toemsi tranga ini a tori foe broko prisiri kontakti nanga sma di den poti a dorosé foe a gemeente (2 Johannes 10, 11). Ma foe san-ede den sortoe sma disi di e lobi foe soekoe fowtoe abi na prakseri disi? Den e poti wan krosbé famiri banti ofoe fowtoe loyaliteit di den abi gi wan mati moro hé leki loyaliteit gi Jehovah nanga en markitiki èn wèt? Prakseri ooktoe dati foe tan abi prisiri demakandra nanga wan sma di de dorosé foe na gemeente, srefi wan sma di de wan krosbé famir’man foe joe, kan meki a psa dati na sma di lasi pasi e teki a bosroiti dati na fasi foe doe foe en no de so toemsi ogri, san kan meki dati doe en moro ogri. Ma efoe wi e tapoe a demakandra disi nanga en, dan na ini en kande wan tranga lostoe e kon foe san a ben lasi èn a wani foe kisi ala sani baka. A pasi foe Jehovah de alaten a moro boen wan èn a de foe kibri wi. — Odo 3:5.
13. Fa na fasi foe wi moe de nanga na publiki prékiwroko oso foe oso?
13 Dan baka wan tra sma no nanga leti kan taki dati na bijbel no e hori baka gi na préki-wroko foe oso foe oso. Ma a e taki disi foe di a no lobi kwetkweti na prenspari wroko disi èn a e soekoe wan eskus foe no afoe teki prati na en? Lobi gi Gado nanga gi sma na wi sé moesoe bewégi wi foe ferstan na tranga fanowdoe fasi foe na wroko disi di de foe ferloesoe libi. Ooktoe na ini a fasi disi hori-doro de fanowdoe. Na apostel Paulus ben taki foe na hori-doro di ensrefi ben sori foe di ’a ben gi kotoigi finifini a den djoe èn Griki’ aladi na ini publiki èn oso foe oso a ben gi leri (Tori foe den Apostel 20:18-21). Wi no moe waka loyaal na baka a toemsi moi eksempre foe en na presi foe wi kragi? Loekoe pikinso na den doesoendoesoen sma di tjari kon makandra na ini na ’wán ipi’ foe di Jehovah blesi de na tapoe na oso foe oso wroko! (Johannes 10:16) Èn no fergiti den toemsi moi eksepre di wi e kisi tapoe a kontren foe leri, tranga leri èn a tranga foe wi bribi efoe wi e go doro foe doro foe miti sma nanga na boen njoensoe. — Teki gersi nanga Tori foe den Apostel 5:42; 1 Timotéus 4:16.
14. Fa wi moe doe leki fa joe e denki te sma di e soekoe fowtoe na trawan e kragi Jehovah Kotoigi taki den de falsi proféti?
14 Leki laatste sani wi ben sa kan loekoe san na Genootschap ben skrifi na ini a ten di psa ini a tori foe a teri foe ten (Chronologie). Son gensman e taki dati Jehovah Kotoigi de falsi proféti. Den gensman disi e taki dati datums ben poti, ma dati noti ben psa. Agen wi e aksi: San de na bewégi foe ati foe den sma disi di e soekoe fowtoe? Den e gi dek’ati na a pipel foe Gado foe tan na ai ofoe den e proeberi moro foeroe foe krin densrefi foe di den fadon go na ini sribi èn no e wroko moro? (1 Thessalonika 5:4-9). Èn san de moro prenspari, fa joe sa doe te joe jere den sortoe fowtoe di sma e feni? Efoe wan sma e degedege efoe wi e libi na ini den „laatste dé” foe na seti foe sani disi ofoe kande abi a prakseri dati Gado abi someni sar’ati dati na ini a ten foe na „bigi benawtoe” séker no sa tjari a dede kon, foe someni miljoenmiljoen sma, dan a sma disi e sreka en ati kaba a fesi foe gi jesi na den sortoe feni foe fowtoe disi. — 2 Timotéus 3:1; Mattéus 24:21.
15. San e bewijsi dati Jehovah Kotoigi, na presi dati den de falsi proféti, e poti bribi ini a Wortoe foe Gado èn na ini den séker pramisi di skrifi na ini?
15 Ija, Jehovah dienstknegti ben moe go loekoe njoen baka na froewakti foe den ten na ten. Foe a réde foe na faja lostoe foe wi, wi ben howpoe dati na njoen seti ben sa kon moro biten leki ben kan tapoe na fundamenti foe a teri foe Jehovah ten. Ma wi e sori wi bribi na ini a Wortoe foe Gado èn na ini den séker pramisi di de na ini foe di wi e meki na bijbel boskopoe bekènti na tra sma. Boiti foe dati na fanowdoe foe loekoe pikinso njoen baka a ferstan di wi e ferstan sani no e meki oenoe de falsi proféti èn ooktoe disi no e kenki wan sani na a troe tori dati wi e libi troetroe na ini den „laatste dé” èn heri esi sa si na „bigi benawtoe” di sa opo a pasi foe wan grontapoe paradijs kon. Fa a de wan law sani foe teki a bosroiti dati, foe di ferwakti moesoe kenki pikinso wan sma moe degedege na a heri waarheid! Den troe tori e sori krin dati Jehovah ben gebroiki èn e tan gebroiki en wan enkri organisaatsi, pe na „getrow èn koni srafoe” e teki fesi. Foe dat’ede wi e denki na a srefi fasi leki Petrus di ben taki: „Masra na soema wi sa go? Joe abi wortoe foe tégo libi.” — Johannes 6:68.
16, 17. (a) Fa na geboiki foe Jezus wortoe na ini Mattéus 7:15-20 e jepi wi foe kon sabi na organisaatsi di abi na blesi foe Jehovah? (b) San de wan toe foe den boen froktoe di de na ini a libi foe Jehovah troe dienstknegti?
16 Soso na ini a jeje paradijs, na mindri Jehovah Kotoigi, wi kan feni na lobi di e offer ensrefi di, so leki Jezus ben taki, ben sa de na en troe discipel herken den (Johannes 13:34, 35). Falsi proféti den bere e poeroe kon na doro foe san den de troetroe nanga jepi foe den takroe froktoe foe den. Ma Jezus ben sori dati den boen bon ben sa de foe herken na den toemsi boen froktoe foe den (Mattéus 7:15-20). Èn fa joe abi toemsi moi froktoe na ini a jeje paradijs! Pikin moro na ini ibri kondre joe abi wan toemsi moi gro. Moro leki dri miljoen sma di saka den srefi na ondro Gado kownoekondre na a heri grontapoe de na libi bewijsi dati Jehovah abi wan pipel na grontapoe.
17 Foe di Gado ben gi leri na Jehovah Kotoigi, meki den e tjari troetroe den froktoe foe a kristendom kon a ini den libi (Jesaja 54:13). Soso Jehovah pipel ben broko krinkrin nanga a bijgeloof foe Babylon. Soso den wawan abi wan organisaatsi di e hori ensrefi dorodoro na san a Wortoe foe Gado e taki foe seks hoeroedoe, a poeroe foe bere, droengoefasi, foefoeroe, afkodré, kroetoe wan sma a fesi nanga a ras di a de èn tra grontapoe bezigheid nanga doe. Èn den de den wan-enkri wan di e gi jesi na a gebod foe préki na boen njoensoe foe Jehovah kownoekondre (Mattéus 24:14). Gado égi Wortoe e sori sondro foe degedege na Jehovah Kotoigi leki na wan enkri orga groepoe di abi en blesi!
18. Sortoe bosroiti Jehovah dienstknegti moe teki te den tanapoe na fesi leri di komoto foe sma di fadon komoto na bribi?
18 Ija, wi abi na overtoigi dati Jehovah waarheid de wan moi sani di te now ete e gi satisfaksi na ala sma di e hori-doro getrow èn loyaal na ini na kristen libifasi — srefi moro ete leki di den ben jere na waarheid foe na fostron. Teki toe dat’ede na ini joe ati na bosroiti dati joe no sa fasi srefi a gif di sma di fadon komoto na bribi sa wani foe joe dringi en pikinsopikinso. Poti prakseri na tapoe den koni ma krakti gebod foe Jehovah foe tan farawe krinkrin foe den sma di ben sa wani bedrigi èn kori joe èn di ben sa wani joe waka na pasi foe dede. Efoe wi lobi Jehovah nanga wi heri ati, wi sili nanga wi ferstan èn lobi den sma di de na wi sé leki wisrefi, dan wi no sa gi pasi dati wan falsi fasi foe denki meki roetoe na ini oen jeje (Mattéus 22:37-39). Wi no sa gi Didibri wan presi èn wi no sa abi na lostoe foe loekoe na wan tra presi. Wi sa ’no sa meki wi denki broeja esesi’ nanga na wan ofoe tra falsi leri. — 2 Thessalonika 2:1, 2.
19. Sortoe libifasi sa gi wi na djaranti dati ’nowan sma no kan foefoeroe na prijs foe wi’ foe tégo libi?
19 Meki wi abi alaten warderi gi na grani dati wi de na ini Jehovah jeje paradijs, pe wi e njan boen foe someni bigi blesi. Wi sabi den sma di e hori getrow na den wortoe foe tégo libi. Tan foe dat’ede krosbé na den, aladi joe sabi dati den de wi loyaal èn troe brada nanga sisa na ini na bribi. Meki wi tan hori na srefi prisiri nanga satisfaksi di wi ben abi di wi ben jere na waarheid foe na fositron. Disi sa gi wi na djaranti dati na moro bigi prijs foe tègo libi na ini Jehovah njoen seti foe sani no sa lasi gwe. Fa a de wan sani di fiti di Paulus ben taki: ’No meki den foefoeroe na nowan sma foe oenoe na prijs’! — Kolosse 2:18.
Joe kan piki disi?
◻ Foe san-ede wi kan taki dati foe nowan sma a ben bepaal a fesi kaba taki a sa libi a bribi?
◻ Fa a hori foe sma na ati, hémemre nanga a lasi foe pasensi kan meki dati wi gi Didibri pasi na ini wi ati?
◻ San de moro foeroetron a baka a feni fowtoe tapoe na rai foe den sma di a teki fesi?
◻ Sortoe froktoe di Jehovah Kotoigi abi e sori dati den de na wan enkri organisaatsi di Gado e gebroiki?
[Prenki na tapoe bladzijde 6]
Efi wi e poti na rai a wan sé, dan wi kan ’gi Didibri pasi’
[Prenki na tapoe bladzijde 7]
Hémemre kan tjari wi go ini wan trapoe, pe wi no kan komoto kande na ini
[Prenki na tapoe bladzijde 9]
Faja èn kolokoe dienstknekti foe Jehovah ’no e gi wan presi na Didibri’ ofoe na prakseri foe sma di fadon komoto foe bribi