Gi ala sortoe foe libisma grani
„Gi ala sortoe foe libisma grani, . . . frede Gado, gi na kownoe grani.” — 1 PETRUS 2:17.
1. (a) Soema boiti Gado nanga Krestes nanga reti e kisi grani? (b) Tapoe sortoe kontren den moesoe sori libisma grani leki fa 1 Petrus 2:17 e taki?
WI SI taki wi abi na plekti foe sori Jehovah Gado nanga Jesus Krestes grani. Disi na a joisti, koni èn lobi sani foe doe. Ma na Wortoe foe Gado e sori toe taki wi moesoe gi kompe libisma grani. „Gi ala sortoe foe libisma grani”, so den e taigi wi (1 Petrus 2:17). Foedi na vers disi e bosroiti nanga na komando: „gi na kownoe grani”, dan disi wani taki taki grani moesoe gi na den sma di fiti foe kisi grani foe na posisi ede di den abi. Soema na den sma dan, di wi moesoe gi grani na wan joisti fasi? A kan taki na nomroe foe den wan di fiti foe kisi grani, moro bigi leki san son sma kande e denki. Wi ben sa kan taki taki fo kontren de pe wi moesoe sori tra sma grani.
Gi den politiek tiriman grani
2. Fa wi sabi taki „na kownoe” di den e taki foe en ini 1 Petrus 2:17 abi foe doe nanga ibri libisma kownoe ofoe politiek tiriman?
2 Na fosiwan foe den kontren disi abi foe doe nanga den tiri foe kondre. Wi moesoe gi politiek tiriman grani. Foe san-ede wi e taki taki Petrus ben abi politiek tiriman na prakseri di a ben gi na rai: „Gi na kownoe grani?” Foedi a e taki foe na situwâsi na dorosei foe na kresten gemeente. Leti na fesi a ben taki: „Saka joe srefi na ondro ibri libisma mekisani: efi a de na ondro wan kownoe, leki na sma di hei, ofoe na ondro den granman, leki den wan di a seni”. Loekoe so srefi taki Petrus e poti Gado abrasei foe „na kownoe”, te a taki: „Frede Gado, gi na kownoe grani” (1 Petrus 2:13, 14). „Na kownoe” di wi moesoe gi grani so leki fa Petrus e gi deki-ati, abi soboen foe doe nanga libisma kownoe èn politiek tiriman.
3. Soema na den „hei tirimakti”, èn san sma moesoe gi den?
3 Na a srefi fasi na apostel Paulus e komanderi: „Saka joe srefi na ondro den hei tirimakti”. Den „hei tirimakti” disi a no Jehovah Gado ofoe Jesus Krestes, ma den na den politiek tiriman, den hei man foe lanti. Nanga den sma disi na ini prakseri Paulus e taki morofara: „Gi na ala sma san den fiti foe kisi: . . . na en di e aksi foe kisi grani, sowan grani”. Ija, den sortoe sma dati, di Gado gi pasi foe abi politiek makti, abi reti foe kisi grani. — Rome sma 13:1, 7.
4. (a) Fa sma kan sori politiek tiriman grani? (b) Sortoe eksempel na apostel Paulus ben gi ini na sori foe grani na tiriman?
4 Fa wi e sori den politiek tiriman grani? Wán fasi na foedi wi e behandel den nanga dipi respeki. (Teki gersi 1 Petrus 3:15.) Èn foe na posisi foe den ede a fiti foe gi den na respeki dati, awansi den de gadolowsoe sma. Na historia skrifiman Tacitus foe Rome ben taki foe granman Feleks leki wan man di „ben denki taki a ben kan doe ibri sjen sani sondro foe kisi strafoe”. Tokoe Paulus ben bigin djompo foe taki gi ensrefi na fesi foe Feleks nanga wortoe di ben sori na respekifasi foe en. So srefi Paulus ben sori kownoe Herodes Agripa II respeki foedi a e taki: „Mi e firi mi srefi kolokoe . . . taki mi kan djompo foe taki gi mi srefi na fesi foe joe”, awansi Paulus ben sabi taki Agripa ben libi wan incest libi (libi nanga en eigi famiri). Paulus ben gi granman Festus grani toe foedi a ben kari en „Joe Excellentie” aladi Festus ben de wan anbegiman foe kroektoe gado. — Tori foe den Apostel 24:10; 26:2, 3, 24, 25.
5. Sortoe fasi moro den lanti tirimakti e kisi grani, èn fa den Kotoigi foe Jehovah e gi wan boen eksempel ini na tori disi?
5 Ete wan fasi fa wi e sori den hei man foe lanti grani, Paulus ben sori na tapoe di a ben skrifi taki sma moesoe gi den lanti tirimakti san den fiti foe kisi. A ben taki taki den ben moesoe gi „na en di aksi foe na belasting, na belasting; na en di aksi foe na edemoni, na edemoni” (Rome sma 13:7). Jehovah Kotoigi e doe den plekti dati, na ini awansi sortoe kondre pe den e libi na grontapoe. Na ini Italië na kranti La Stampa ben taki: „Den na den moro loyaal borgroe di sma kan winsi foe abi: den no e dok gi belasting èn no e proeberi foe boro komoto na ondro froeferi wet foe na boen foe den srefi”. Èn na njoensoe papira The Post di e kon na doro na ini Palm Beach (Florida, V.S.) ben taki foe Jehovah Kotoigi: „Den e pai den belasting. Den de wan toe foe den moro eerlijk borgroe foe na Republiek”.
Sori wrokobasi grani
6. Na soema moro soleki den apostel Paulus nanga Petrus e taki sma moesoe gi grani?
6 Wan di foe toe kontren pe a fiti foe wi gi grani, de na presi pe wi e wroko. Den apostel Paulus nanga Petrus den alatoe ben poti krakti a tapoe o prenspari a de taki kresten sori grani na den wan di de na den tapoe ini wan wrokomakandra. Paulus ben skrifi: „Meki ala sma di de leki srafoe na ondro wan tjatjari, tan loekoe den eiginari foe den leki sma di warti foe kisi grani dorodoro, so taki noiti sma kan taki takroe foe na nen foe Gado èn na leri. Meki boiti foe dati den wan di abi eiginari di de na bribi, no loekoe na wan lagi fasi na den tapoe foedi den na brada. Na presi foe dati, meki den wani foe de srafoe moro srefi”. Petrus ben taki: „Den oso-knekti moesoe saka den srefi na ondro den eiginari nanga ala frede di den moesoe gi, no wawan na den boen èn reidelek wan, ma so srefi na den di a tranga foe plisi den”. —1 Timoteus 6:1, 2; 1 Petrus 2:18; Efeise sma 6:5; Kolose sma 3:22, 23.
7. (a) San na a joisti fasi na ini na ten disi foe gebroiki na bijbel rai gi „srafoe” foe sori den „eiginari” foe den grani? (b) Tapoe san kresten wrokoman di abi wan kresten basi moesoe poti prakseri finifini?
7 A no de foe taki, katibo no panja na ala sei na ini na ten disi. Ma den gronprakseri di ben tiri kresten ini na demakandra foe srafoe nanga eiginari, kan gebroiki ini na wrokomakandra foe wrokoman nanga basi. Kresten wrokoman abi soboen na frantiwortoe foe gi grani srefi na basi di a tranga foe sma plisi den. Èn efoe now na basi de so srefi wan kompe bribiman? Na presi foe froewakti taki a moesoe gi en spesroetoe prakseri ofoe e behandel en moro betre moro trawan foe na matifasi dati-ede, dan na wrokoman moesoe wani foe dini en kresten basi moro srefi èn noiti na awansi sortoe fasi a sa soekoe foe feni wini nomo foe en.
Grani ini na osofamiri
8, 9. (a) Soema pikin abi na plekti foe gi grani? (b) Foe san-ede pikin moesoe sori na grani disi, èn fa den kan sori disi?
8 Wan di foe dri kontren pe wi moesoe gi grani de, na ini na osofamiri. Pikin-nengre foe eksempel de na ondro na plekti foe gi den papa nanga mama grani. Disi no ben de soso wan sani di na wet di Gado ben gi na Moses ben aksi, ma so srefi wan plekti gi den kresten. Na apostel Paulus ben skrifi: „Oenoe pikin, gi jesi na oenoe papa nanga mama ini wanfasi nanga Masra, bikasi disi de regtfardiki: ’Gi joe papa nanga joe mama grani’”. — Efeise sma 6:1, 2; Exodus 20:12.
9 Foe san-ede pikin moesoe gi den papa nanga mama grani? Pikin moesoe gi papa nanga mama grani foe na tirimakti ede di Gado gi na den leki papa nanga mama èn so srefi foe den sani di den papa nanga mama doe, bikasi den ben meki den kon gebore èn foe sensi den pikin-nengre ten den sorgoe den èn kweki den kon bigi. Fa den pikin moesoe gi den papa nanga mama grani? Den moesoe doe disi spesroetoe foedi den e gi jesi èn e saka den srefi na den ondro (Odo 23:22, 25, 26; Kolose sma 3:20). Sori so wan grani kan aksi taki pikin di kon bigi kaba moesoe gi aparti jepi na den owroe papa nanga mama ofoe granpa nanga granma foe den, na skinfasi èn so srefi na jejefasi. Na wan froestan fasi disi moesoe tjari kon ini balansi nanga tra frantiwortoe, soleki na sorgoe gi wan sma en eigi pikin èn wan dorodoro prati na kresten demakandra èn preikiwroko. — Efeise sma 5:15-17; 1 Timoteus 5:8; 1 Johanes 3:17.
10. Na soema den trow-oema abi na plekti foe sori grani, èn na sortoe fasi den kan doe disi?
10 Ma pikin no de den wan enkriwan ini na osofamiri di abi na plekti foe sori trawan grani. Den wefi moesoe gi den masra grani. Na apostel Paulus ben taki toe taki „na wefi moesoe abi dipi respeki gi en masra” (Efeise sma 5:33; 1 Petrus 3:1, 2). Sori trowmasra „dipi respeki”, seiker abi na ini taki den moesoe gi den grani. Sara ben gi en trowpatna, Abraham, grani di a ben kari en „masra” (1 Petrus 3:6). Oenoe trow-oema waka soboen na Sara baka. Gi na trowmasra foe joe grani foedi joe e teki den bosroiti foe en èn foedi joe e wroko na den foe meki den kon abi boen bakapisi. Foedi joe e doe ala sani san joe man foe jepi na trowmasra foe joe foe a tjari na lai foe en na presi foe meki a kon moro hebi, joe e sori en grani.
11. Sortoe plekti trowmasra abi na a kontren foe sori grani, èn foe san-ede?
11 Èn den trowmasra? Den e kisi na rai na ini Gado Wortoe: „Oenoe mansma, tan libi so srefi na [joe trow-oema] akroederi sabi, foedi oenoe e sori en grani leki na wan moro swaki patoe, na oemasma fasi, foedi oenoe toe de erfgenaam makandra nanga den foe na no-froedini prisiri foe na libi, sotaki den begi foe oenoe no e ondrofeni hendri” (1 Petrus 3:7). Disi seiker moesoe poti ibri trowmasra foe go denki. A de neleki wan trow-oema e tjari na etiket: „Diri. A kan broko! Handri en nanga koni! Gi en grani!” Meki den trowmasra so boen hori na prakseri taki den sa pori na matifasi foe den nanga Jehovah Gado efoe den no e sori na wefi foe den grani foedi den e sori taki den e hori en na prakseri na wan fasi di fiti, bika den begi foe den sa ondrofeni hendri. A de troetroe foe na boen foe ala toe sei te memre foe wan osofamiri e gi makandra grani.
Ini na gemeente
12. (a) Soema abi na frantiwortoe na ini a gemeente foe sori grani? (b) Fa Jesus ben sori taki a joisti foe kisi grani?
12 Morofara joe abi na frantiwortoe di ibriwan sma abi foe sori grani na ini a kresten gemeente. Wi e kisi na rai: „Teki fesi ini na sori foe grani na makandra” (Rome sma 12:10). Jesus ben sori na ini wan foe den agersitori foe en taki a de joisti foe kisi grani. A ben taki taki wi, efoe den e kari wi kon foe wan fesa njanjan, taki wi moesoe teki na moro lagi presi, bika dan na sma di teki sma na oso sa aksi wi foe kon teki presi pikinso moro hei èn wi sa kisi grani na fesi foe ala den kompe fisitiman foe wi (Lukas 14:10). Foedi wi alamala e warderi en te wi e kisi grani, dan wi no moesoe abi firi gi trawan èn sori makandra grani? Fa wi kan doe disi?
13. San na wan toe fasi fa wi kan sori trawan na ini na gemeente grani?
13 Wortoe foe warderi gi wan wroko di doe boen de a srefi leki a gi foe grani. Soboen wi kan gi makandra grani foedi wi e gebroiki wortoe foe prèise, kande foe wan lezing ofoe wan komentaar di wan sma e gi na ini na gemeente. Boiti foe dati wi kan gi makandra grani foedi wi e tai wi mindri nanga sakafasi foe jeje kontrari wi kresten brada nanga sisa, foedi wi e handri den nanga dipi respeki (1 Petrus 5:5). Na sofasi wi e sori taki leki kompe foetoeboi foe Jehovah Gado di abi grani wi e si den leki wan diri sani.
14. (a) Fa den brada na ini na gemeente kan sori den sisa grani di den fiti foe kisi? (b) San e sori taki a gi foe presenti na wan fasi foe sori grani?
14 Na apostel Paulus ben gi na jongoe Timoteus na rai foe handri moro owroe kresten sisa leki mama èn moro jongoe wan leki sisa na skinfasi, „nanga ala krinfasi”. Ija, te den brada e loekoe boen foe no de toemoesi fri nanga den kresten sisa foe den, soleki foe tjari den srefi na wan famiriari fasi (tjari en srefi na wan toemoesi frifasi) di no joisti, den e sori den grani. Paulus ben skrifi moro fara: „Gi weduwe grani di de troetroe weduwe”. Wán fasi fa sma moesoe gi wan weduwe di ben de ini nowtoe grani, de nanga jepi foe sani na skinfasi. Ma foe kon abi na reti foe kisi disi, a moesoe de so taki den e „gi froeklari foe en foe toemoesi boen wroko” (1 Timoteus 5:2-10). Ini na tori foe presenti na skinfasi Lukas ben skrifi foe den sma tapoe na eilanti Malta: „Boiti foe dati den ben gi wi grani nanga foeroe presenti, èn di wi ben saka gowe nanga boto den ben lai wi nanga ala sani di wi ben abi fanowdoe” (Tori foe den Apostel 28:10). Soboen sma kan sori trawan grani foedi den e gi den presenti na skinfasi.
15. (a) Na soema na wan spesroetoe fasi wi abi na plekti foe sori grani? (b) San na wán fasi fa wi kan gi grani na den sma di e teki fesi?
15 Te a e go morofara nanga en brifi gi Timoteus, Paulus e skrifi: „Den [owroeman] di e teki fesi na wan toemoesi boen fasi, sma moesoe erken taki den warti foe kisi dobroe grani, spesroetoe den wan di e wroko tranga ini na tori foe taki èn foe leri sma” (1 Timoteus 5:17). Na sortoe fasi wi kan gi owroeman ofoe opziener grani? Paulus ben taki: „Tron sma di e waka na mi baka soleki mi e waka na Krestes baka (1 Korente sma 11:1). Te wi e poti prakseri tapoe den wortoe foe Paulus foe tron sma di e waka na en baka, dan wi e sori en grani. Disi kan gebroiki toe gi den di e teki fesi na wi mindri na ini na ten disi. Foe sofara wi e waka na den baka foedi wi e waka baka na eksempel foe den, wi sa sori den grani.
16. Sortoe fasi de moro foe sori grani na den wan di e teki fesi?
16 Wan tra fasi fa wi kan sori den opziener grani, na foedi wi e poti prakseri tapoe na deki-ati: „Gi jesi na den di e teki fesi na wi mindri èn saka oenoe srefi, bikasi den e hori wakti gi oenoe sili leki libisma di moesoe gi frantiwortoe” (Hebrew sma 13:17). Net so leki fa pikin e gi den papa nanga mama grani foedi den e gi den jesi, na so wi e gi den wan di e teki fesi na wi mindri grani foedi wi e gi jesi na den èn e saka wi srefi na den ondro. Èn soleki fa den sma di ben libi na ini Malta èn di ben abi switifasi ben gi Paulus èn den kompe foe en grani nanga jepi foe den presenti na skinfasi, na so wan fasi foeroe sma di e rèis èn teki presi gi na Genootschap ben kisi grani ibri joeroe baka. Ma a no de foe taki taki noiti den moesoe aksi foe den presenti disi ofoe poti prakseri a tapoe taki den ben sa prisiri foe kisi dati ofoe taki den ben sa de fanowdoe.
17. Sortoe froeplekti den wan di abi na grani foe opziener, abi ini na tori foe na sori foe grani?
17 Na a tra sei dan ala den wan di abi posisi foe opziener ini na theokrasia organisâsi — efoe a de now na ini na gemeente na ini a presi pe joe de, na ini wan kring ofoe distrikt leki opziener di e rèis ofoe wan foe den bijkantoro foe na Waktitorengenootschap ofoe ini na osofamiri — abi na plekti foe sori den wan di de na ondro den sorgoe grani. Disi e aksi taki den moesoe abi empathie èn taki den moesoe firi gi trawan. Ala ten sma moesoe kan kon na den foedi den abi safri-ati èn sakafasi foe ati èn jeje, soleki Jesus Krestes ben taki taki en ben de. — Mateus 11:29, 30.
Wroko na en foe gi makandra grani
18. (a) San kan tapoe pasi gi wi foe sori grani na den di e froedini dati? (b) Foe san-ede sma no kan regtfardiki wan negatief èn krakeri jeje fasi?
18 Wi alamala moesoe wroko tranga na en foe gi makandra grani, foedi wan sani de di e tapoe pasi tranga gi wi foe doe disi. Na sani disi di e tapoe pasi ofoe e hendri na wi onvolmaakti ati. „Na tranga firi foe libisma ati de takroe foe bigin foe en jongoe jari” (Genesis 8:21). Wan foe den tranga firi foe libisma di ben sa kan tapoe wi foe sori trawan grani di den fiti foe kisi, na wan negatief, krakeri jeje fasi. Wi alamala na swaki, onvolmaakti libisma di abi na sari-ati fasi èn boenfasi foe Jehovah fanowdoe (Rome sma 3:23, 24). Foedi wi e froestan disi, meki wi loekoe boen taki wi no tan tanapoe tiri na den swaki fasi foe den brada foe wi èn no taki taki den brada foe wi abi boeweigi foe ati di joe moesoe tweifri na en.
19. San sa jepi wi foe go kontrari ibri negatief jeje fasi?
19 Na dresi di boen srefisrefi teige den sortoe negatief tranga firi disi na lobi èn dwengi joe srefi. Ini a tori foe wi brada nanga sisa wi moesoe sori wan froestan, loyaal, positief fasi èn si den toemoesi boen eigifasi foe den. Efoe wan sani de di wi no e froestan, dan meki wi de klari ala ten foe gi den brada foe wi na wini foe na tweifri èn poti prakseri tapoe na rai foe Petrus: „Na tapoe ala sani, abi dipi lobi gi makandra, bika lobi e tapoe foeroe sondoe” (1 Petrus 4:8). Na sortoe foe lobi dati wi moesoe abi efoe wi wani sori den brada foe wi grani di den e fiti foe kisi.
20, 21. (a) San na ete wan tranga firi di kande sa prei wi te wi sa sori makandra grani? (b) San sa jepi wi foe feti nanga a jeje fasi disi?
20 Wan tra eigifasi di so leki fa a sori sa prei wi na ini na tori foe sori foe grani di trawan fiti foe kisi, na a tranga firi foe ati-bron esi-esi ofoe firi sani esi-esi pasa marki. Na fasi foe firi sani esi-esi, foe en srefi no fowtoe. Sma di e froestan doe wan wroko boen, moesoe abi wan fini firi gi babari ofoe kloroe leki wan pisi foe na wroko foe den. Ma firi sani esi-esi pasa marki ofoe atibron esi-esi na ini den demakandra foe wi nanga trawan, na wan fasi foe soekoe joe eigi boen nomo di kan hari na vrede foe wi poeroe foe wi èn kan tapoe wi foe sori trawan grani.
21 Den wortoe di de foe feni na ini Preikiman 7:9, e gi wi boen rai na ini a tori disi: „No hasti joe na ini joe jeje foe mandi, bika mandi de na ini na ati foe sma di no abi froestan.” A e tjari soboen wan mankeri foe koni èn gesontoe froestan kon a krin, so srefi wan mankeri foe lobi, te wi e firi sani esi-esi pasa marki ofoe e mandi esi-esi.
22. Na sortoe fasi na froeplekti foe wi foe sori grani, kan taki sjatoe?
22 Seiker wi abi foeroe reide foe sori trawan grani. Èn soleki fa wi si, dan toemoesi foeroe fasi de fa wi kan sori na grani dati. Ala ten wi moesoe loekoe boen taki nowan enkri fasi pe wi soekoe wini gi wi srefi nomo ofoe negatief fasi e tapoe wi foe no sori grani. Spesroetoe wi moesoe loekoe boen finifini foe sori den wan di de memre foe wi osofamiri grani, man nanga wefi na makandra, èn pikin na den papa nanga mama. Èn na ini a gemeente wi abi na froeplekti foe sori kompe-bribiman grani, spesroetoe den wan di e wroko tranga na wi mindri na ini frantiwortoe leki opziener. Na tapoe ala den kontren disi a abi wini gi wi foe sori den sma di kari na tapoesei grani di fiti, bikasi so leki fa Jesus ben taki: „A moro kolokoe foe gi leki foe kisi”. — Tori foe den Apostel 20:35.
Fa joe ben sa piki?
◻ Foe san-ede èn fa wi moesoe gi den lanti tirimakti grani?
◻ Sortoe Bijbel rai kan gebroiki gi na wrokoman-basi wrokomakandra?
◻ Fa grani moesoe sori na ini na osofamiri?
◻ Sortoe spesroetoe grani kan sori na ini a gemeente, èn foe san-ede?
◻ Fa sma kan wini swakifasi foe libisma, di e meki taki sma e misi foe gi trawan grani?