„Waka a pasi foe lobi foe ontfanga sma boen”

„Prati sani nanga den santawan akroederi san den abi fanowdoe. Waka a pasi foe lobi foe ontfanga sma boen.” — ROMESMA 12:13.

1. San na wan prenspari sani di libisma abi fanowdoe, èn fa disi e kon na krin?

TE JOE e waka latilati na neti na ini wan tiri strati ini wan birti di joe no sabi, dan na ini a ten disi dati kan de wan ondrofeni di e seki joe. Ma a kan de wan banawtoe sani toe foe de na mindri wan ipi sma èn joe no sabi no wán sma noso sma no sabi joe. Ija, wan prenspari pisi foe a fasi fa libisma de, na taki den abi en fanowdoe foe sma sorgoe gi den, foe sabi taki sma abi den fanowdoe, èn foe sma lobi den. No wan sma lobi en te trawan e doe nanga en leki a de wan freimdesma noso wan sma foe dorosei.

2. Fa Jehovah sorgoe gi a matifasi di wi abi fanowdoe?

² Jehovah Gado, a Mekiman foe ala sani, sabi heri boen taki libisma abi kompe fanowdoe. Gado, leki a Sma di prakseri fa foe meki den libisma di a meki, ben sabi sensi a bigin taki a no ben „boen taki libisma tan en wawan”, èn a ben doe wan sani na dati (Genesis 2:18, 21, 22). Bijbeltori lai nanga eksempre foe a fasi fa Jehovah nanga den foetoeboi foe en ben handri na wan switi fasi nanga libisma. Disi meki taki wi man leri fa foe „waka a pasi foe lobi foe ontfanga sma boen”, so taki trawan kan prisiri foe dati èn wisrefi kan de tevrede. — Romesma 12:13.

Waran firi gi freimdesma

3. Tjari kon na krin san na a moro prenspari sani di a lobi foe ontfanga sma boen, wani taki?

³ Den vertaal den wortoe „foe lobi foe ontfanga sma boen” soleki fa den e gebroiki en na ini bijbel, foe a Griki wortoe phi·lo·xe·niʹa, san abi toe gron wortoe na ini di wani taki „lobi” nanga „freimdesma”. So boen, foe lobi foe ontfanga sma boen moro foeroe wani taki „foe lobi freimdesma”. Ma disi a no soso wan plekti noso wan sani di abi foe doe nanga boen maniri. A abi na ini toe, wan sma en firi nanga en firi foe lobi. A werkwortoe phi·leʹo, soleki fa na Exhaustive Concordance of the Bible foe James Strong e taki en, wani taki „foe de wan mati (foe abi waran firi gi [wan sma noso wan sani]), dati wani taki, abi firi foe lobi gi (san e sori na tapoe wan persoonlijk banti, di abi foe doe nanga firi)”. Foe dati ede, foe lobi foe ontfanga sma boen, de moro leki foe sori lobi di abi en fondamenti na tapoe gronprakseri, di sma e doe kande leki wan froeplekti. Moro foeroe a de wan fasi foe sori troetroe waran firi, firi foe lobi, nanga matifasi.

4. Gi soema wi moesoe sori a lobi foe ontfanga sma boen?

⁴ A sma di e kisi a waran firi nanga a firi foe lobi disi na a „freimdesma” (Grikitongo, xeʹnos). Soema disi ben sa kan de? Agen a Concordance foe Strong e taki foe a wortoe xeʹnos, dati a de wan ’freimde sani’ (troetroe a wani taki dorosei sani, noso na agersifasi a wani taki njoen sani); wi ben sa kan taki, wan fisitiman noso (na a tra sei) wan freimdesma’. So boen, foe lobi foe ontfanga sma boen, soleki fa bijbel e sori dati, kan sori a switifasi di wi abi gi wan sma di wi abi waran firi gi, noso a kan de srefi gi wan freimdesma di wi no sabi srefisrefi. Jesus ben tjari kon na krin: „Efoe oenoe lobi den wan di lobi oenoe, sortoe pai oenoe e kisi dan? Den belasting man no e doe a srefi sani toe? Èn efoe oenoe e taki soso den brada foe oenoe odi, sortoe spesroetoe sani oenoe e doe dan? Den sma foe den nâsi no e doe a srefi sani toe?” (Mateus 5:46, 47) Troetroe lobi foe ontfanga sma boen, e wini a pratifasi èn a desko di sma e desko makandra, san e kon te den e kroetoe sma sondro reide èn foe di den frede.

Jehovah, a volmaakti Sma di lobi foe doe trawan boen

5, 6. (a) San Jesus ben abi na prakseri di a ben taki: „Joe hemel Tata de volmaakti”? (b) Fa wi kan si a lobi di Jehovah lobi foe gi sani?

⁵ Baka di Jesus ben sori go na den fowtoe di de na ini a lobi di libisma abi gi makandra, soleki fa dati ben skrifi na tapoesei, dan a ben taki den wortoe disi toe: „Foe dati ede oenoe moesoe de volmaakti, soleki fa oen hemel Tata de volmaakti” (Mateus 5:48). A no de foe taki dati Jehovah de volmaakti na ini ala sani (Deuteronomium 32:4). Ma Jesus ben poti prakseri na wan spesroetoe sani foe a volmaaktifasi foe Jehovah, soleki fa a ben taki kaba: „[Gado] e meki en son opo kon gi den godelowsoe sma èn gi den boen sma èn a e meki alen fadon gi den regtfardiki sma nanga den onregtfardiki sma” (Mateus 5:45). Te disi abi foe doe nanga a sori foe switifasi, dan Jehovah no e teki sma sei.

⁶ Foe di a de a Mekiman, meki Jehovah na a sma di abi ala sani. „Ibri werdri meti foe boesi na foe mi, den meti na tapoe doesoen bergi. Mi sabi ibri mekisani foe bergi di e frei, heri boen èn den foeroe meti di e tan na ini na opo veld, de nanga mi”, Jehovah e taki (Psalm 50:10, 11). Tokoe a no gridi foe hori ala sani gi ensrefi. Foe di a lobi foe gi sani, meki a e sorgoe gi ala den mekisani foe en. A psalm singiman ben taki foe Jehovah: „Joe e opo joe anoe èn e meki den lostoe foe ala libisani kon troe.” — Psalm 145:16.

7. San wi kan leri foe a fasi fa Jehovah e handri nanga freimdesma èn nanga den wan di de na nowtoe?

⁷ Jehovah e gi sma san den abi fanowdoe — srefi sma di no sabi en, di de freimdesma gi en. Paulus nanga Barnabas ben memre den sma foe a foto Listra di ben anbegi kroektoe gado, taki a no ben de so taki Jehovah „no ben gi kotoigi foe ensrefi foe di a ben doe boen, foe di a e gi oenoe alen foe hemel nanga boen jariten, èn foe di a e foeroe oen ati bogobogo nanga njanjan èn nanga bigi prisiri” (Tori foe den Apostel 14:17). Spesroetoe gi den wan di de na nowtoe, Jehovah abi switifasi èn a lobi foe gi den sani (Deuteronomium 10:17, 18). Wi kan leri foeroe foe san Jehovah e doe foe sori switifasi nanga a lobi di a lobi foe gi trawan sani — a lobi di a lobi foe doe trawan boen.

8. Fa Jehovah sori taki a lobi foe gi sani, foe di a e sorgoe gi san wi abi fanowdoe na jejefasi?

⁸ Boiti taki Jehovah e sorgoe heri boen foe den materia sani di den mekisani foe en abi fanowdoe, a e sorgoe toe gi den sani di den abi fanowdoe na jejefasi. Jehovah ben sori na a moro moi fasi taki a lobi foe gi sani gi a tanboen foe wi na jejefasi, srefi fosi iniwan foe wi ben froestan taki wi ben de na ini wan takroe situwâsi na jejefasi. Wi e leisi na ini Romesma 5:8, 10: „Gado e rikomanderi en eigi lobi na wi na ini disi, taki Krestes dede gi wi ala di wi ben de sondari ete. . . . Di wi ben de feanti, wi ben kon verzoen nanga Gado nanga a dede foe en Manpikin.” A seti dati e sorgoe taki sondoe libisma man kisi wan kolokoe famiri banti nanga wi hemel Tata (Romesma 8:20, 21). Jehovah ben sorgoe toe taki wi e kisi a joisti tiri nanga jepi, so taki wi kan meki sani waka boen na ini libi, ala di wi de na ini wan sondoe èn onvolmaakti situwâsi. — Psalm 119:105; 2 Timoteus 3:16.

9, 10. (a) Foe san ede wi kan taki dati Jehovah de a volmaakti Sma di lobi doe trawan boen? (b) Fa troe anbegiman moesoe doe ini disi leki fa Jehovah e doe?

⁹ Te wi e hori disi na prakseri, dan wi kan taki dati na someni fasi Jehovah de troetroe a volmaakti sma di e doe trawan boen. A no e frigiti den wan di de na nowtoe, den sakafasiwan, nanga den mofinawan. A e sori troetroe belangstelling nanga broko-ede gi freimdesma, srefi gi den feanti foe en, èn a no e froewakti taki den sa pai en baka. Na ini ala den sani disi, a no de a moro boen eksempre foe wan volmaakti sma di lobi foe doe trawan boen?

¹⁰ Foe di a de wan Gado di abi so wan lobi boen-atifasi nanga a lobi di a lobi foe gi sani, meki Jehovah wani taki den anbegiman foe en doe leki fa en e doe. Na ini heri bijbel, wi e si toemoesi moi eksempre foe a switi eigifasi disi. Na Encyclopaedia Judaica e taki dati „na Israèl foe owroeten, a lobi di sma ben lobi foe ontfanga trawan boen, no ben de soso wan sani di ben abi foe doe nanga boen maniri, ma a ben de wan moreel sistema . . . Den bijbel gwenti foe bari wan weriskin sma di ben teki waka wan switikon, èn foe na ontfanga foe a freimdesma na den mindri, ben de a fondamenti pe a lobi foe ontfanga sma boen èn ala den tra sani di abi foe doe nanga dati, komoto kon tron wan boen eigifasi di sma ben lespeki troetroe na ini den gwenti foe den djoe”. A lobi foe ontfanga sma boen moesoe de wan eigifasi di ala troe anbegiman foe Jehovah abi, moro leki a de wan eigifasi foe wan nationaliteit noso ras.

Wan sma di ben ontfanga engel boen

11. Sortoe toemoesi aparti eksempre e sori taki a lobi foe ontfanga sma boen, ben tjari blesi kon di sma no ben froewakti? (Loekoe so srefi Genesis 19:1-3; Kroetoebakra 13:11-16.)

¹¹ Wan foe den moro bekènti tori foe bijbel di e sori a lobi di wan sma lobi ontfanga trawan boen, na a tori foe Abraham nanga Sara di den ben seti kampoe na mindri den bigi bon foe Mamre, krosibei foe Hebron (Genesis 18:1-10; 23:19). Tweifri no de taki na apostel Paulus ben prakseri a sani disi di a ben gi a froemane disi: „No frigiti foe lobi foe ontfanga sma boen, bika na foe dati ede son wan, sondro foe den sabi, ben sorgoe boen gi engel” (Hebrewsma 13:2). Te wi e ondrosoekoe a tori disi, dan dati sa jepi wi foe si taki a lobi di wan sma lobi foe ontfanga sma boen, a no soso wan sani foe gwenti noso a fasi fa wan sma kweki. Na presi foe dati, a de wan eigifasi foe Gado di e tjari toemoesi moi blesi kon.

12. Fa Abraham ben sori en lobi gi freimdesma?

¹² Genesis 18:1, 2 e sori taki Abraham no ben sabi èn no ben froewakti den fisitiman, ala di wi kan taki dati dri freimdesma nomo ben waka pasa. Soleki fa wan toe njoensoeman e taki, dan a gwenti na ondro sma foe Owstoesei ben de taki wan sma di ben teki waka go na wan tra kondre, ben abi a reti foe froewakti taki sma ben o ontfanga en boen, srefi te a no ben sabi no wan sma drape. Ma Abraham no ben wakti te den freimdesma ben o meki gebroiki foe a reti disi; en fosi ben bigin doe wan sani. A „ben bigin lon” go miti den freimdesma disi di no ben de so fara foe en — èn disi a ben doe na „a faja pisi ten foe a dei” èn Abraham ben abi 99 jari! Disi no e sori foe san ede Paulus ben sori go na Abraham leki wan eksempre di wi moesoe waka na baka? Dati na san a wani taki foe lobi foe ontfanga sma boen, a waran firi noso lobi di joe lobi freimdesma, a broko di joe e broko joe ede nanga san den abi fanowdoe. Disi na wan boen eigifasi.

13. Foe san ede Abraham ben „boigi” gi den fisitiman?

¹³ A tori e froeteri wi toe taki baka di Abraham miti den freimdesma, a „ben boigi go na gron”. Boigi gi krinkrin freimdesma? We, wan boigi leki a wan di Abraham ben meki, ben de wan fasi foe bari wan lespeki fisitiman noso wan sma di ben abi wan hei posisi, wan odi èn sma no moesoe broeja disi nanga sani di e doe foe anbegi, san Gado nomo moesoe kisi. (Teki gersi Tori foe den Apostel 10:25, 26; Openbaring 19:10.) Di Abraham ben boigi, èn no taki a ben saka en ede nomo, ma a ben meki wan boigi „go na gron”, dan a ben sori den freimdesma disi a grani di prenspari sma e kisi. A ben de a famiri-edeman foe wan bigi osofamiri pe sani ben waka boen, ma tokoe a ben si den freimdesma disi leki sma di ben warti foe kisi moro grani leki ensrefi. Fa disi e difrenti foe a gwenti di sma gwenti foe no froetrow freimdesma, a loekoe di den e loekoe boen, fosi den e doe wan sani gi den! Abraham ben sori troetroe san den wortoe disi wani taki: „Teki fesi te oenoe e gi makandra grani.” — Romesma 12:10.

14. Sortoe moeiti nanga ofrandi ben de na ini toe, di Abraham ben sori taki a ben lobi foe ontfanga den freimdesma boen?

¹⁴ A tra pisi foe a tori e sori taki den firi foe Abraham ben de opregti. A njanjan wawan ben de wan aparti sani kaba. Srefi na ini wan bigi osofamiri di abi foeroe meti, „wan safoe èn jongoe mankaw” a no wan sani di den e njan ibri dei. Daily Bible Illustrations foe John Kitto e taki foe den gwenti di foeroe sma abi na ini a kontren dati: „Den no e gi densrefi abra na prisiri sani nanga goedoe di no de fanowdoe troetroe, boiti te son fesa de, noso te wan freimdesma doro; èn a de soso na den sortoe okasi disi, taki oiti sma e njan meti, srefi den sma di abi wan heri ipi meti.” Foe a waran weer ede meki sma no ben man kibri njanjan di ben kan pori, èn dati meki te den ben wani sreka so wan njanjan, dan den ben abi foe doe ala sani na a momenti dati. A no de foe froewondroe taki na ini a sjatoe tori disi, a wortoe „esi” noso „foe doe esi” de foe feni dri leisi, èn Abraham „ben lon” troetroe foe meki den sreka a njanjan! — Genesis 18:6-8.

15. San na a joisti fasi foe gi materia sani te wan sma e sori taki a lobi foe ontfanga sma boen, soleki fa na eksempre foe Abraham e sori?

¹⁵ Ma a marki no de nomo foe hori wan bigi fesa foe kan naki na ati foe sma. Ala di Abraham nanga Sara ben doe ala a moeiti dati foe sreka èn pristeri a njanjan, loekoe fa Abraham ben taki na fesi foe disi kaba: „Grantangi, meki wi teki pikinso watra, èn oenoe moesoe meki wi wasi oen foetoe gi oenoe. Dan go sidon na ondro a bon. Èn meki mi teki wan pisi brede, gi oen kowroe-ati. Baka dati, oenoe kan waka go moro fara, bika na foe dati ede oenoe waka pasa djaso na oen foetoeboi” (Genesis 18:4, 5). A „pisi brede” dati ben sori foe de wan njanjan-fesa nanga wan fatoe pikin kaw makandra nanga lontoe koekoe foe fini blon, botro, nanga merki — wan boen bigi fesa. San wi e leri foe disi? Te sma e sori taki den lobi foe ontfanga sma boen, dan a prenspari sani, noso a sani pe krakti moesoe poti na tapoe, no de o foeroe njanjan nanga dringi sa de, noso sortoe kefalek boen ontspanning sa de, èn so moro fara. Efoe wan sma lobi foe ontfanga trawan boen, dan dati no e anga foe efoe a man gi sma diri sani. Na presi foe dati, disi abi en fondamenti na tapoe wan opregti dipi belangstelling gi a boen foe trawan èn na tapoe wan angri foe doe trawan boen, so fara wan sma kan doe dati. „Wan skotriki groentoe pe lobi de, betre moro wan mankaw di sma fatoe na a njanjan baki, èn pe bita-atifasi de toe”, wan odo foe bijbel e taki, èn dati na a sroto foe a troetroe lobi di wi lobi foe ontfanga sma boen. — Odo 15:17.

16. Fa Abraham ben sori nanga san a ben doe gi den fisitiman, taki a ben warderi jeje sani?

¹⁶ Ma wi moesoe taki, dati a heri tori ben abi foe doe nanga jeje afersi toe. Na wán noso tra fasi Abraham ben kon si taki den fisitiman disi ben de boskopoeman foe Jehovah. Disi wi kan si na a fasi fa a ben taki nanga den nanga den wortoe: „Now Jehovah, efoe joe feni mi boen, dan grantangi no waka pasa joe foetoeboi.”a (Genesis 18:3; teki gersi Exodus 33:20.) Abraham no ben sabi na fesi efoe den ben abi wan boskopoe gi en noso efoe den ben waka pasa nomo. Awansi fa a no fa, a ben froestan taki a prakseri foe Jehovah ben e pasa drape. Den sma disi ben abi foe doe wan wroko foe Jehovah. Efoe a ben kan doe wan sani foe jepi, dan dati ben o prisiri en. A ben froestan taki den foetoeboi foe Jehovah ben moesoe kisi a moro boen sani, èn a ben o gi den a moro boen sani, so fara leki a situwâsi ben gi pasi foe dati. Te a ben o doe disi, dan wan blesi na jejefasi ben o de gi en, efoe a ben de gi ensrefi noso gi wan tra sma. Soleki fa sani ben go, dan a bakapisi ben de taki Abraham nanga Sara ben kisi foeroe blesi foe a troetroe lobi di den ben sori foe ontfanga sma boen. — Genesis 18:9-15; 21:1, 2.

Wan pipel di lobi foe ontfanga sma boen

17. San Jehovah ben aksi foe den Israèlsma ini a tori foe freimdesma nanga den wan na den mindri di ben de na nowtoe?

¹⁷ A nâsi di ben kon foe Abraham, no ben moesoe frigiti a toemoesi boen eksempre di Abraham ben gi. A Wet di Jehovah ben gi den Israèlsma ben wani taki so srefi, sani di seti foe sori a lobi di den ben lobi foe ontfanga den freimdesma na den mindri boen. „A dorosei-sma di e libi na oen mindri moesoe tron gi oenoe leki wan sma di gebore na ini joe kondre; èn joe moesoe lobi en leki joesrefi, bika oenoe ben tron dorosei-sma di ben libi na a kondre Egipti. Mi na Jehovah, oen Gado” (Lefitikus 19:34). A pipel ben moesoe poti spesroetoe prakseri na den wan di ben abi jepi fanowdoe na materia sei èn den no ben moesoe si den leki sma di no ben de prenspari. Te Jehovah ben blesi den nanga kotiten pe den ben feni boen foeroe njanjan, te den ben prisiri nanga den fesa foe den, te den ben rostoe foe a wroko foe den na ini den Sabadei-jari, èn na tra okasi, dan a pipel ben moesoe memre den wan di sani no ben waka so boen nanga den — den weduwe, den boi sondro papa, nanga den dorosei-sma di ben libi na a kondre. — Deuteronomium 16:9-14; 24:19-21; 26:12, 13.

18. O prenspari a de foe lobi foe ontfanga sma boen te joe wani, taki Jehovah feni joe boen èn te joe wani kisi a blesi foe En?

¹⁸ A prenspari fasi foe sori switifasi, a lobi foe gi sani, nanga a lobi foe ontfanga sma boen, spesroetoe gi den wan di de na nowtoe, wi kan si na a fasi fa Jehovah ben handri nanga den Israèlsma di den no ben prakseri foe sori den eigifasi disi. Jehovah ben sori krin taki a sori foe switifasi nanga a lobi foe gi sani na freimdesma nanga den wan di de na nowtoe, na wan toe foe den sani di a ben aksi foe en pipel efoe den ben wani kisi en blesi doronomo (Psalm 82:2, 3; Jesaja 1:17; Jeremia 7:5-7; Esekièl 22:7; Sakaria 7:9-11). Di a nâsi ben de fajafaja foe doe den sani disi nanga tra sani di Gado ben aksi foe den, dan a ben go boen nanga den èn den ben abi foeroe sani na materia sei èn na jejefasi. Di den ben gebroiki den ten nomo foe feti na baka persoonlijk sani èn ben prakseri densrefi nomo, èn ben frigiti foe sori den switi eigifasi disi na den wan di ben de na nowtoe, dan Jehovah ben trowe den, èn te foe kaba den ben kisi wan takroe kroetoe. — Deuteronomium 27:19; 28:15, 45.

19. San wi moesoe loekoe ete?

¹⁹ Foe dati ede, o toemoesi prenspari a de gi wi foe ondrosoekoe wisrefi èn loekoe efoe wi e libi akroederi den froewakti foe Jehovah ini a tori disi! Disi de spesroetoe so na ini a ten disi pe wi e si a fasi fa sma foe grontapoe e prakseri densrefi nomo èn taki den abi pratifasi. Fa wi kan sori a kresten lobi foe ontfanga sma boen na ini wan grontapoe di prati. Dati na a tori di wi sa taki foe en na ini a tra artikel.

[Foetoewortoe]

Joe e memre disi ete?

◻ San den bijbel wortoe di vertaal nanga „foe lobi foe ontfanga sma boen”, wani taki?

◻ Na sortoe fasi Jehovah de a volmaakti eksempre foe wan Sma di lobi doe trawan boen?

◻ O fara Abraham ben go foe sori taki a ben lobi foe ontfanga sma boen?

◻ Foe san ede ala troe anbegiman moesoe „waka a pasi foe lobi foe ontfanga sma boen”?