• „Gado fosi lobi wi”
    Kon krosibei na Yehovah

    • „Gado na lobi”

      15. San Bijbel e taki fu a lobi fu Yehovah? Fu san ede den wortu dati de so aparti? (Luku a futuwortu sosrefi.)

      15 Bijbel e taki wan sani fu a lobi fu Yehovah di a no e taki fu no wan fu den tra prenspari fasi fu en. Bijbel no e taki dati Gado na makti, noso taki Gado na retidu; a no e taki srefi taki Gado na koni. A abi den fasi dati, èn en na a fosiwan di sori den fasi disi; nowan sma kan sori den dri fasi disi leki fa en e du dati. Ma fu a di fu fo fasi Bijbel e taki wan moro prenspari sani: „Gado na lobi”b (1 Yohanes 4:8). San dati wani taki?

      16-18. (a) Fu san ede Bijbel e taki dati „Gado na lobi”? (b) Fu san ede a fiti taki fu ala den libisani di de na grontapu, Yehovah teki libisma fu agersi a lobi fu en?

      16 Te sma e yere den wortu „Gado na lobi”, dan den no musu denki taki „Gado na a srefi leki lobi”. Sosrefi wi no kan drai den wortu disi; wi no kan taki dati „lobi na Gado”, fu di Yehovah a no wan fasi di wan sma abi. Gado na wan trutru sma, a abi firi, èn boiti lobi, a abi furu tra fasi ete. Toku, lobi de fu si na ini ala san Yehovah e du. Fu dati ede wan buku e taki fu a bijbeltekst disi: „A heri fasi fa Gado de, na lobi.” Te yu luku en bun, wi ben sa kan luku a tori na a fasi disi: A makti fu Yehovah e meki taki a man du sani, aladi a retidu nanga a koni fu en e tiri a fasi fa a e du sani. Ma fu di Yehovah abi lobi, meki a wani du sani gi sma. A lobi fu en de fu si ala ten na ini a fasi fa a e gebroiki a makti, a retidu, nanga a koni fu en.

      17 Furu tron Bijbel e sori taki Yehovah na a moro bun eksempre fu lobi. Sobun, efu wi wani kon sabi san na a·gaʹpe lobi, dan wi musu kon sabi suma na Yehovah. A no de fu taki dati libisma kan sori a tumusi moi fasi disi tu. Ma fa libisma du kisi a fasi disi? Soleki fa a sori, dan na a ten di Yehovah ben e meki sani, a ben e taki nanga en Manpikin, taki: „Meki wi meki libisma akruderi a prenki fu wi, soleki fa wi de” (Genesis 1:26). Fu ala den libisani di de na grontapu, man nanga uma wawan kan sori lobi fu di den wani du dati, èn na a fasi dati den e du leki a hemel Tata fu den. Memre taki Yehovah gebroiki difrenti libisani fu agersi den prenspari fasi fu en. Toku, Yehovah gebroiki libisma, a moro hei libisani di a meki, fu agersi a moro prenspari fasi fu En, namku lobi.​—Esekièl 1:10.

  • „Gado fosi lobi wi”
    Kon krosibei na Yehovah

    • b Tra bijbeltekst de tu di skrifi pikinmoro na a srefi fasi. Leki eksempre: „Gado na leti” èn „Gado . . . na wan faya di e bron sani” (1 Yohanes 1:5; Hebrewsma 12:29). Ma den sani disi e teki Yehovah gersi nanga sani di wi kan si. Yehovah de leki leti, fu di a de santa èn fu di en ati krin. Nowan „dungru”, noso doti, no de na ini en. Wi kan teki en gersi nanga faya bika son tron a e gebroiki en makti fu pori sani.