„Disi na fa Gado ben lobi wi”
„Efoe disi na fa Gado ben lobi wi, dan wi abi a froeplekti foe lobi makandra.” — 1 JOHANES 4:11.
1. Foe san ede miljoenmiljoen sma sa kon makandra na ini Kownoekondre zaal nanga tra konmakandra presi na heri grontapoe, 23 maart baka te son dongo?
SONDE 23 maart 1997, baka te son dongo, dan tweifri no de taki moro leki 13.000.000 sma na heri grontapoe sa kon makandra na ini Kownoekondre zaal nanga tra konmakandra presi di Jehovah Kotoigi e gebroiki. Foe san ede? Foe di a moro bigi fasi fa Gado sori lobi gi a libisma famiri, naki na ati foe den. Jesus Krestes ben poti prakseri na tapoe a toemoesi moi fasi dati fa Gado ben sori a lobi foe en, di a ben taki: „Gado ben lobi grontapoe sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi”. — Johanes 3:16.
2. Foe sortoe aksi a ben sa boen efoe wi alamala ben sa poti dati gi wisrefi ini a tori foe a fasi fa wi e handri na tapoe a lobi foe Gado?
2 Te wi e loekoe a lobi di Gado sori, dan a boen foe aksi wisrefi: ’Mi e warderi troetroe san Gado doe? A fasi fa mi e gebroiki a libi foe mi de wan boeweisi foe a warderi dati?’
„Gado na lobi”
3. (a) Foe san ede a sori di Gado e sori lobi no de wan toemoesi aparti sani gi en? (b) Fa makti nanga koni de foe si na ini den sani di a meki?
3 A sori di Gado e sori lobi, dati srefi no de wan toemoesi aparti sani foe en sei, bika „Gado na lobi” (1 Johanes 4:8). Lobi na wan foe den moro prenspari eigifasi foe en. Di a ben sreka grontapoe foe libisma libi na en tapoe, dan na opo di a ben opo den bergi èn a tjari di a ben tjari watra kon na wán na ini den bigi watra nanga se, ben de wan toemoesi moi fasi foe sori makti (Genesis 1:9, 10). Di Gado ben meki a sistema fa watra e drai kon ibri tron baka èn a sistema fa zuurstof e drai kon ibri tron baka, di a ben meki den someni pikinpikin libisani nanga den difrenti sortoe bromki nanga bon foe den kenki den chemisch elementi foe grontapoe kon tron so taki libisma ben kan gebroiki dati foe tan na libi, di a ben seti a biologisch oloisi di de na ini wi foe meki disi kroederi nanga a langa foe den dei nanga moen foe a planeiti Grontapoe, dan disi ben tjari wan bigi koni kon na krin (Psalm 104:24; Jeremia 10:12). Ma tokoe, san de moro aparti srefi na ini den mekisani di wi kan si, na a boeweisi foe a lobi foe Gado.
4. Sortoe boeweisi foe a lobi foe Gado wi alamala moesoe si èn warderi, na ini den mekisani di wi kan si?
4 A tapoesei mofo foe wi e froeteri wi foe a lobi foe Gado te wi e beti na ini wan safoe lepi froktoe, di krinkrin no ben meki nomo foe hori wi na libi ma foe gi wi prisiri. Den ai foe wi e si krinkrin boeweisi foe disi na ini den toemoesi moi sondongo, hemel di foeroe nanga stari na wan krin neti, den difrenti sortoe bromki nanga den moi kloroe foe den, a preiprei fasi foe jongoe meti, nanga a switi lafoe foe mati. A noso foe wi e meki wi kon sabi disi te wi e smeri a switi smeri foe bromki. Den jesi foe wi e jere en te wi e arki a babari di wan bigi soela e meki, a singi foe fowroe, nanga den sten foe lobiwan. Wi e firi en te wan lobiwan e gi wi wan waran brasa. Son meti abi a koni foe man si, jere noso smeri sani di libisma no kan. Ma a libisma famiri, di ben meki na a prenki foe Gado, abi a koni foe firi a lobi foe Gado na wan fasi di no wan meti no kan. — Genesis 1:27.
5. Fa Jehovah ben sori boen foeroe lobi gi Adam nanga Eva?
5 Di Jehovah Gado ben meki den fosi libisma, Adam nanga Eva, dan a ben gi den foeroe sani di ben de lontoe den di ben de wan boeweisi foe a lobi foe en. A ben prani wan djari, wan paradijs, èn ben meki ala sortoe bon gro na ini en. A ben sorgoe gi wan liba foe gi en watra èn ben foeroe en nanga moi fowroe nanga meti. Ala den sani disi a ben gi Adam nanga Eva leki a tanpe foe den (Genesis 2:8-10, 19). Jehovah ben handri nanga den neleki pikin foe en, leki wan pisi foe en universeel osofamiri (Lukas 3:38). Foe di a hemel Tata foe a fosi libisma paar disi ben gi den Eden leki wan model, dan a gi den a prisiri wroko foe bradi a Paradijs meki a tapoe heri grontapoe. Heri grontapoe ben moesoe kon foeroe nanga den pikin foe den. — Genesis 1:28.
6. (a) San joe e denki foe na oproeroe fasi foe Adam nanga Eva? (b) San ben sa kan sori taki wi leri wan sani foe san ben pasa na ini Eden èn taki wi kisi wini foe a sabi dati?
6 Ma sjatoe baka dati, Adam nanga Eva ben kisi foe doe nanga wan tesi di ben o sori efoe den ben o gi jesi, wan tesi tapoe a loyaalfasi foe den. Fosi a wan èn baka dati a trawan ben sori taki den no ben warderi a lobi di Gado ben gi den. San den ben doe ben takroe srefisrefi. Den no ben kan kisi pardon! A bakapisi ben de, taki den ben lasi a matifasi di den ben abi nanga Gado, a ben jagi den komoto na a osofamiri foe en, èn a ben poeroe den foe Eden. Wi di de na ini a ten disi, e firi den bakapisi foe a sondoe foe den te now ete (Genesis 2:16, 17; 3:1-6, 16-19, 24; Romesma 5:12). Ma wi leri wan sani foe san ben pasa? Fa wi e handri na tapoe a lobi foe Gado? Den bosroiti di wi e teki ibri dei e sori taki wi e warderi a lobi foe en? — 1 Johanes 5:3.
7. Fa Jehovah ben sori lobi gi den bakapikin foe Adam nanga Eva, awansi san Adam nanga Eva ben doe?
7 Srefi a fasi fa wi fosi papa nanga mama ben sori krinkrin taki den no ben warderi ala den sani di Gado ben doe gi den, no ben tapoe Gado foe sori a lobi foe en. Foe di Gado ben abi sari-ati gi libisma di no ben gebore ete na a ten dati — so srefi den wan foe wi di e libi na ini a ten disi — meki a ben gi Adam nanga Eva pasi foe kweki wan osofamiri bifo den dede (Genesis 5:1-5; Mateus 5:44, 45). Efoe a no ben doe dati, dan no wan foe wi ben o kon gebore. Foe di Jehovah ben tjari a wani foe en kon na krin safrisafri, meki a ben sorgoe toe gi wan fondamenti foe howpoe gi ala den bakapikin foe Adam di ben o sori bribi (Genesis 3:15; 22:18; Jesaja 9:6, 7). A seti foe en ben wani taki so srefi sani di e meki taki ala nâsi ben kan kisi baka san Adam ben lasi, dati wani taki, volmaakti libi leki memre foe Gado en universeel osofamiri di a feni boen. A ben doe disi foe di a ben gi wan loesoe-paiman.
Foe san ede wan loesoe-paiman?
8. Foe san ede Gado no ben kan bosroiti nomo, taki ala di Adam nanga Eva ben moesoe dede, no wan foe den bakapikin foe den di ben gi jesi, ben moesoe dede?
8 A ben de troetroe fanowdoe foe pai nanga wan libisma libi leki wan loesoe-paiman? Gado no ben kan meki wan wet nomo taki ala di Adam nanga Eva ben moesoe dede foe na oproeroe foe den, tokoe den pikin foe den di ben o gi Gado jesi, ben kan libi foe têgo? Gi wan libisma di no man si sani na fesi, a ben sa kan gersi wan reidelek sani. Ma Jehovah na „wan sma di lobi regtfardikifasi nanga retidoe” (Psalm 33:5). Soso baka di Adam nanga Eva ben tron sondari den ben meki pikin; so boen, no wan foe den pikin dati ben gebore na ini volmaaktifasi (Psalm 51:5). Den alamala ben kisi sondoe, èn a strafoe gi sondoe na dede. Efoe Jehovah no ben wani poti prakseri na tapoe disi, dan sortoe eksempre dati ben o de gi den memre foe en universeel osofamiri? A no ben kan loekoe pasa en eigi regtfardiki markitiki. A ben lespeki den markitiki foe retidoe. No wan sma oiti ben kan kroetoe nanga reti, a fasi fa Gado ben handri nanga den aksi di de na ini a tori. — Romesma 3:21-23.
9. Sortoe loesoe-paiman ben de fanowdoe, soleki fa Gado en markitiki foe retidoe e sori?
9 Ma fa wan boen fondamenti ben kan gi dan foe froeloesoe den pikin foe Adam di ben sa sori taki den lobi foe gi jesi na Jehovah? Efoe wan volmaakti libisma ben sa dede leki wan ofrandi, dan retidoe ben kan meki taki a waarde foe a volmaakti libi dati de wan fasi foe tapoe den sondoe foe den sma di ben o teki a loesoe-paiman foe di den e bribi. Foe di a sondoe foe wán libisma, Adam, ben meki taki a heri libisma famiri de sondari, meki a broedoe di lon foe wan tra volmaakti libisma, di abi a srefi sortoe waarde, ben kan meki retidoe kon na ini balansi (1 Timoteus 2:5, 6). Ma pe den ben kan feni so wan sma?
O bigi den kostoe ben de?
10. Foe san ede den bakapikin foe Adam no ben kan gi a loesoe-paiman di ben de fanowdoe?
10 Na ondro den bakapikin foe Adam, no wan sma ben de di ben kan gi san ben de fanowdoe foe bai a howpoe tapoe libi baka di Adam ben lasi. „No wan foe den kan froeloesoe wan brada srefi foe en na wan noso tra fasi; (èn a froeloesoe prijs foe a sili foe den warti someni taki a kaba te ten di no skotoe,) so taki a ben sa tan libi foe têgo ete èn no si na olo” (Psalm 49:7-9). Na presi foe Jehovah libi a libisma famiri nanga no wan enkri howpoe, ensrefi ben seti wan sani foe di a abi sari-ati.
11. Nanga jepi foe san Jehovah ben gi a volmaakti libisma libi di ben de fanowdoe gi wan loesoe-paiman di e fiti?
11 Jehovah no ben seni wan engel kon na grontapoe di ben o doe neleki a dede te a ben o poeroe wan libisma skin, ala di a ben libi go doro leki wan jeje. Na presi foe dati, foe di Gado ben doe wan wondroe di soso En, a Mekiman, ben kan doe, meki a ben tjari a libikrakti nanga den eigifasi foe wan hemel manpikin go abra na ini a bere foe wan oema, Maria, na oemapikin foe Eli, foe a lo Juda. A wrokokrakti foe Gado, en santa jeje, ben sorgoe taki ala sani waka boen nanga a gro di a pikin ben gro na ini a bere foe en mama, èn a ben gebore leki wan volmaakti libisma (Lukas 1:35; 1 Petrus 2:22). A wan disi ben abi a prijs na ini en anoe di ben de fanowdoe foe sorgoe gi wan loesoe-paiman di ben sa de krinkrin akroederi Gado en markitiki foe retidoe. — Hebrewsma 10:5.
12. (a) Na sortoe fasi Jesus na Gado en „wan-enkri gebore Manpikin”? (b) Fa Gado ben poti krakti na tapoe en lobi gi wi, taki a ben seni a wan disi gi wi foe sorgoe gi a loesoe-paiman?
12 Soema foe den foeroe tindoesoen hemel manpikin foe en Jehovah ben gi a wroko disi? A sma di den taki foe en na ini den Boekoe foe bijbel leki a „wan-enkri gebore Manpikin” foe en (1 Johanes 4:9). Den e gebroiki den wortoe disi foe taki, no foe san a ben tron di a ben gebore leki wan libisma, ma foe san a ben de fosi dati na ini hemel. A de a wan-enkri sma di Jehovah ben meki langalanga sondro taki a wroko makandra nanga tra sma. En na a Fosigeborewan foe ala sani di Gado meki. A de a sma di Gado ben gebroiki foe tjari ala tra mekisani kon na libi. Den engel na manpikin foe Gado, neleki fa Adam ben de wan manpikin foe Gado. Ma den e taki foe Jesus leki a sma di abi „wan glori so leki di de foe wan wan-enkri gebore manpikin foe wan papa”. Den e taki dati a e tan „ini a borsoe posisi na a Tata” (Johanes 1:14, 18). A matifasi di a abi nanga a Tata na wan krosibei, froetrow èn waran matifasi. A abi a srefi lobi di en Tata abi gi a libisma famiri. Odo 8:30, 31 e taki fa a Tata foe en e denki foe a Manpikin disi èn fa a Manpikin e denki foe a libisma famiri: „Mi ben tron a sma di spesroetoe a [Jehovah] ben abi waran firi gi dei na dei, èn mi ben breiti na en fesi ala ten, . . . èn den sani di mi [Jesus, Jehovah en Basi Wrokoman, a sma di e prenki koni srefi] ben abi waran firi gi den troetroe, ben de den manpikin foe libisma.” A ben de a moro diri lobi Manpikin disi di Gado ben seni kon na grontapoe foe gi a loesoe-paiman. Foe dati ede, den wortoe foe Jesus wani taki foeroe: „Gado ben lobi grontapoe sote, taki a ben gi en wan-enkri gebore Manpikin”! — Johanes 3:16.
13, 14. Fa a bijbel tori di e taki foe a proeberi di Abraham ben proeberi foe òfer Isak, e jepi wi foe kisi warderi gi san Jehovah ben doe? (1 Johanes 4:10)
13 Foe jepi wi foe froestan pikinso san dati wani taki, dan langaten bifo Jesus ben kon na grontapoe, Gado ben taigi Abraham so wan 3890 jari pasa: „Grantangi, teki joe manpikin, joe wan-enkri manpikin di joe lobi sote, Isak, èn teki waka foe go na a kondre Moria èn tjari en leki bron-ofrandi drape na tapoe wan foe den bergi di mi sa sori joe” (Genesis 22:1, 2). Na ini bribi, Abraham ben gi jesi. Poti joesrefi na ini a posisi foe Abraham. San efoe a ben de joe manpikin, joe wan-enkri manpikin di joe lobi troetroe? Sortoe firi joe ben sa abi te joe ben priti na oedoe na toe gi a bron-ofrandi, te joe ben teki a waka foe someni dei go na a kondre Moria, èn poti joe manpikin na tapoe na altari?
14 Foe san ede wan sari-ati papa noso mama abi den sortoe firi dati? Genesis 1:27 e taki dati Gado ben meki libisma na a prenki foe En. A firi di wi abi foe lobi èn foe abi sari-ati e sori pikinso nomo, san na Jehovah en eigi lobi nanga sari-ati. Ini a kefal foe Abraham, Gado ben kon na mindri, so taki a no ben òfer Isak troetroe (Genesis 22:12, 13; Hebrewsma 11:17-19). Ma ini en eigi kefal, Jehovah no ben tapoe ensrefi foe gi a loesoe-paiman, ala di a ben kostoe en nanga en Manpikin foeroe. San ben doe, no ben de foe di Gado ben de froeplekti, ma na presi foe dati, a ben de wan fasi foe sori no-froedini boen-atifasi na wan toemoesi aparti fasi. Wi e warderi dati troetroe? — Hebrewsma 2:9.
San kan kon foe dati
15. Fa a loesoe-paiman ben abi krakti na tapoe a libi foe sma srefi na ini a disiten seti foe sani disi?
15 A lobi-ati sani dati di Gado ben seti abi foeroe krakti na tapoe a libi foe den wan di e teki disi foe di den e bribi. Fosi, den no ben sabi Gado leki wan bakapisi foe sondoe. Den ben de, soleki fa en Wortoe e taki, ’feanti foe di den ben poti prakseri na tapoe sani di ben de godelowsoe’ (Kolosesma 1:21-23). Ma den ben kon „verzoen nanga Gado nanga a dede foe en Manpikin” (Romesma 5:8-10). Foe di den kenki a waka nanga libi foe den, èn den teki a pardon di Gado e gi na den sma di e sori bribi na ini Krestes srakti-ofrandi, meki den e kisi wan boen konsensi. — Hebrewsma 9:14; 1 Petrus 3:21.
16. Sortoe blesi a pikin ipi e kisi foe a bribi ede di den abi na ini a loesoe-paiman?
16 Jehovah gi wan pikin groepoe foe den, wan pikin ipi, a no-froedini boen-atifasi foe de kompe foe en Manpikin na ini a hemel Kownoekondre, nanga na prakseri foe doe a sani di Gado biginbigin ben abi na prakseri gi grontapoe (Lukas 12:32). Den teki den poeroe „foe ibri lo nanga tongo nanga pipel nanga nâsi . . . kon tron wan kownoekondre nanga priester gi wi Gado, èn den sa tiri grontapoe leki kownoe” (Openbaring 5:9, 10). Na apostel Paulus ben skrifi gi den: „Oenoe ben kisi wan jeje foe a teki di den teki oenoe leki manpikin, di nanga a jeje dati wi e bari kari: ’Abba, Tata!’ A jeje srefi e gi kotoigi nanga a jeje foe wi taki wi na pikin foe Gado. Foe dati ede, efoe wi na pikin, dan wi na erfgenaam toe, troetroe erfgenaam foe Gado, ma kompe erfgenaam foe Krestes” (Romesma 8:15-17). Foe di Gado kweki den leki en manpikin, meki den e kisi a lobi matifasi di Adam ben lasi; ma na tapoe foe dati, den manpikin disi sa kisi a grani foe dini na hemel — wan sani di Adam noiti ben abi. A no de foe froewondroe taki na apostel Johanes ben taki: „Loekoe a lobi di a Tata gi wi, so taki den sa kari wi pikin foe Gado”! (1 Johanes 3:1) Gi den sortoe sma dati Gado no e sori lobi di abi en gron na tapoe gronprakseri (a·gaʹpe) wawan, ma a e sori firi foe lobi toe (fi·liʹa), di abi leki eigifasi a banti di de na mindri troetroe mati. — Johanes 16:27.
17. (a) Sortoe okasi ala sma di e sori bribi na ini a loesoe-paiman, e kisi? (b) San „a glori fri foe den pikin foe Gado” wani taki gi den?
17 So srefi gi trawan — ala sma di e sori bribi na ini den someni sani di Gado seti gi libi nanga jepi foe Jesus Krestes — Jehovah e opo na okasi foe kisi a diri matifasi di Adam ben lasi. Na apostel Paulus ben tjari kon na krin: „A tranga froewakti foe den mekisani [libisma mekisani di kon foe Adam] e wakti taki den manpikin foe Gado e tjari kon na krin [dati wani taki, den e wakti a ten te a kon na krin taki den manpikin foe Gado di de kompe erfgenaam foe Krestes foe a hemel Kownoekondre, e doe positief sani foe a boen foe a libisma famiri]. Bika den mekisani ben kon na ondro soso sani [den ben gebore na ini sondoe nanga a froewakti foe dede, èn na no wan fasi den ben kan fri densrefi], no foe di densrefi ben wani, ma foe Gado ede di ben poti dati na en ondro, tapoe a fondamenti foe howpoe [di Gado gi], so taki a mekisani srefi sa kon fri toe foe a katibo foe pori èn sa abi a glori fri foe den pikin foe Gado” (Romesma 8:19-21). San a fri dati sa wani taki? Taki den kon fri foe a katibo foe sondoe nanga dede. Den sa kon volmaakti na ini froestan nanga skin, den sa abi a Paradijs leki a tanpe foe den, èn têgo libi pe den kan njan boen foe a volmaaktifasi foe den èn sori a warderi foe den na Jehovah, a wan-enkri troe Gado. Èn fa ala den sani disi ben man? Nanga a loesoe-ofrandi foe Gado en wan-enkri gebore Manpikin.
18. San wi sa doe 23 maart baka te son dongo, èn foe san ede?
18 Tapoe 14 Nisan 33 G.T., na ini wan sodro kamra na Jerusalem, Jesus ben seti a Memrefesa foe en dede. A memre di sma e memre a dede foe en ala jari, tron wan prenspari sani na ini a libi foe ala troe kresten. Jesus srefi ben komanderi: „Tan doe disi foe memre mi” (Lukas 22:19). Na ini 1997 a Memrefesa sa hori baka te son dongo 23 maart (èn dati na te 14 Nisan e bigin). A dei dati, noti ben kan de moro prenspari leki foe de na a Memrefesa disi.
San joe ben sa piki?
◻ Na sortoe fasi Gado sori lobi pasa marki gi a libisma famiri?
◻ Foe san ede wan volmaakti libisma libi ben de fanowdoe foe gi den bakapikin foe Adam wan loesoe-paiman?
◻ Omeni a ben kostoe Jehovah foe gi a loesoe-paiman?
◻ San kan kon foe a loesoe-paiman ede?
[Prenki na tapoe bladzijde 10]
Gado ben gi en wan-enkri gebore Manpikin