A moro bigi kado di Gado gi wi​—Fu san ede a abi so furu waarde?

SUMA GI A KADO?

Son kado warti gi wi fu di wi kisi en fu wan sma di abi wan hei posisi noso wan sma di wi e lespeki. Son leisi wan kado no diri, ma wi lobi en fu di wi kisi en fu wan famiri noso wan mati di wi lobi. Na so a ben de nanga a kado di Russell gi Jordan, soleki fa wi si na ini a fosi artikel. Wi kan taki a srefi sani fu a lusu-paiman. Fu san ede?

Na a fosi presi, Bijbel e taki dati „Gado ben seni en wan-enkri Manpikin kon na grontapu, so taki a kan yepi wi fu kisi libi” (1 Yohanes 4:9). Dati meki a kado disi warti trutru. Nowan sma hei moro Gado. Wan psalm skrifiman ben taki fu Gado: „Yu di nen Yehovah, yu wawan na a Moro Heiwan fu heri grontapu” (Psalm 83:18). Yehovah Gado na a moro hei sma di gi wi wan kado.

A di fu tu sani, na taki Gado na „wi Tata” (Yesaya 63:16). Fa so? Na en gi wi libi. Boiti dati, a e sorgu gi wi leki wan papa di lobi en pikin. Luku san Gado taki fu a pipel fu en di a kari Efrayim: „Efrayim na mi lobi manpikin èn a popki fu mi ai . . . Mi ati e krei fu en ede. Awinsi fa a no fa, mi musu fu sari en” (Yeremia 31:20). Na so Gado e firi tu gi den anbegiman fu en na ini a ten disi. Boiti taki en na wi almakti Mekiman, en na wi lobi Tata nanga wi Mati tu. Disi e meki taki ibri kado di a gi wi warti srefisrefi.

FU SAN EDE A SMA GI A KADO?

Son kado warti fu di wi kisi en fu wan sma di lobi wi trutru. A sma no gi a kado fu di a ben musu fu du dati. Wan sma di lobi fu gi sani no e fruwakti taki trawan o gi en sani baka.

Gado seni en Manpikin kon na grontapu fu di a lobi wi. Bijbel e taki: „Disi na a fasi fa Gado sori taki a lobi wi: Gado ben seni en wan-enkri Manpikin.” Fu san ede a du disi? „So taki a kan yepi wi fu kisi libi” (1 Yohanes 4:9). Gado ben de fruplekti fu du disi? Nôno! „A lusu-paiman di Krestes Yesus pai” e sori a „bun-ati fu Gado”.​—Romesma 3:24.

Fu san ede wi kan taki dati na a „bun-ati fu Gado” meki taki a gi wi a kado disi? Bijbel e taki: „Gado sori wi taki a lobi wi fu di a meki Krestes dede gi wi, aladi wi ben de sondari ete” (Romesma 5:8). Trutru lobi meki taki Gado du wan sani fu frulusu sondu libisma di swaki èn di no man yepi densrefi. Wi no e frudini a lobi disi èn wi no man pai Gado fu san a du gi wi. A kado di a gi wi na a moro moi fasi fa wan sma sori lobi.

SAN A SMA BEN MUSU DU FU KAN GI A KADO?

Son kado warti fu di wan sma ben musu du wan bigi sani fu kan gi wi en. Te wan sma de klariklari fu gi wi wan sani di warti trutru gi en, dan wi abi furu warderi gi a kado dati.

Gado „gi en wan-enkri Manpikin” (Yohanes 3:16). Aladi Gado lobi en Manpikin moro ala tra sma, toku a seni en kon fu dede gi wi. Na ini den milyunmilyun yari di Gado ben e meki hemel nanga grontapu, Yesus ben e wroko makandra nanga en èn a ’ben e gi Gado bigi prisiri’ (Odo 8:30). Yesus na Gado en „lobi Manpikin” èn a abi „den srefi fasi fu Gado di sma no man si” (Kolosesma 1:13-15). Noiti wi o kaba frustan o tranga a matifasi fu Yehovah nanga Yesus de.

Toku Gado ’no kibri en eigi Manpikin srefi’ (Romesma 8:32). Yehovah gi wi a moro bun sani di a abi. Disi na a moro warti kado di a gi wi.

A KADO E TAPU WAN BIGI NOWTU

Son kado warti fu di den e tapu wan bigi nowtu. Kon meki wi taki dati yu musu du wan bigi oparâsi, ma yu no man pai en. Fa yu ben o firi te wan sma taki dati a o pai na oparâsi gi yu? So wan kado ben o warti srefisrefi gi yu, a no so?

’Neleki fa ala sma e dede fu Adam ede, na so ala sma sa kon na libi baka tu fu Krestes ede’ (1 Korentesma 15:22). Fu di wi na bakapikin fu Adam, meki wi alamala e siki èn e „dede”. Wi no man lon gi den sani disi. Efu wi no ben kisi yepi, wi no ben o kon bun baka nanga Gado èn wi no ben o kisi pardon fu wi sondu. Boiti dati, wi no man gi wisrefi noso wan tra sma „libi baka”. Bijbel e sori: „Nowan fu den kan frulusu wan tra sma, awinsi san den e du èn den no man pai Gado fu bai a sma disi kon fri. (A paiman di musu pai fu bai wan sma baka, hei so te, taki noiti wan libisma o man pai en.)” (Psalm 49:7, 8). Wi ben de na ini wan bigi nowtu fu di wisrefi no ben o man pai a lusu-paiman.

Fu di Yehovah abi bigi lobi, meki a ben de klariklari fu tapu a nowtu fu wi, so taki nanga yepi fu Yesus „ala sma sa kon na libi baka”. Fa a lusu-paiman e meki disi pasa? „A brudu fu en Manpikin Yesus, e krin wi fu ala sondu.” Iya, te wi e sori bribi na ini a brudu fu Yesus, dan wi kan kisi pardon fu sondu èn wi kan kisi têgo libi (1 Yohanes 1:7; 5:13). Èn fa den lobiwan fu wi di dede kan kisi wini fu a lusu-paiman? „Fu di na wan libisma tyari dede kon, dan na wan libisma [Yesus] o meki taki dede sma opo baka tu.”​—1 Korentesma 15:21.a

Soleki fa wi si, dan na ofrandi fu Yesus na wan kado di kon fu Yehovah, a moro hei sma. Nowan sma sori so wan bigi lobi leki en. Nowan sma du so wan bigi sani gi wi leki Yehovah Gado. Èn nowan kado e tapu so wan bigi nowtu leki na ofrandi fu Yesus di e fri wi fu sondu nanga dede. Iya, a lusu-paiman na a moro warti kado di wi kisi.