Sori alaten lobi nanga bribi

„Soema e tan na ini a lobi, e tan na ini wanfasi nanga Gado.” „Èn disi de a wini di wi ben wini a grontapoe, a bribi foe wi”. — 1 JOHANNES 4:16; 5:4.

1, 2. Sortoe égifasi e kisi krakti spesroetoe na ini 1 Johannes 4:7–5:21?

JEHOVAH de ini persoon lobi, èn a sma di wani plisi en, moesoe sori a égifasi disi foe Gado. Na apostel Johannes de meki disi kon krin na ini a laste pisi foe en fosi brifi di skrifi nanga santa jeje.

² Troe kristen moesoe sori ooktoe bribi. Soso tapoe a fasi disi den kan wini na grontapoe èn kan de séker foe a boenati foe Jehovah. Meki wi, aladi wi e bestuderi a laatste pisi foe Johannes brifi, loekoe nanga begi o prenspari a de foe sori lobi nanga bribi.

„Meki wi lobi makandra”

3, 4. Sortoe kroederi de a mindri a sori foe lobi èn a sabi foe wi foe Gado?

³ Johannes e poti krakti tapoe wán prenspari fasi foe lobi. (Lési 1 Johannes 4:7, 8.) Den kristen „lobiwan” e kisi na tranga foe „tan lobi makandra bika na lobi e kon foe Gado”, foedi Gado de na fonten foe dati. „Ibriwan sma di e lobi trawan gebore foe Gado [leki wan sma di Gado jeje wiki] èn e kisi na sabi foe Gado”, foedi a sabi den égifasi nanga den prakseri foe Jehovah èn foe na fasi fa a e sori lobi. Na ini a ten disi na „bigi ipi” foe Kristus „tra skapoe” ben kisi na „sabi disi foe Gado”.

⁴ Sabi Gado, wani taki, foe abi opregti warderi gi den égifasi foe en, foe lobi en dorodoro èn hori tranga na en leki wi soeverein. Ma „na sma di no lobi trawan, no ben leri sabi Gado”. Wan sma di no e sori kristen lobi, no „ben leri sabi Gado, bika Gado na lobi”. Ija, lobi de na égifasi foe Jehovah di e kon moro foeroe na fesi, èn di de krin foe si na ini den seti na jeje èn na skinfasi di a ben seti foe na boen foe libisma.

5. San de a moro bigi bewijsi dati „Gado na lobi”?

⁵ Dan wi prakseri e poti tapoe na moro krakti bewijsi dati ’Gado na lobi’. (Lési 1 Johannes 4:9, 10.) Johannes e taki: „Nanga disi na lobi foe Gado, ben kon na krin [ini a geval foe wi leki sondarl di e ferdini dede], dati Gado ben seni en wan enkri gebore Manpikin go na grontapoe, sodati wi nanga jepi foe en ben sa kisi libi.” Jezus de Jehovah „wan enkri gebore Manpikin” foedi a ben de na wan enkri mekisani di Gado ben meki nanga en égi anoe (Johannes 1:1-3; Kolosse 1:13-16). Èn den ben ’seni Jzus go na grontapoe’ foedi a ben tron wan libisma, ben doe en diniwroko na ini publiki èn moro fara ben dede wan ofrandi dede (Johannes 11:27; 12:46). ’Foe kisi tégo libi nanga jepi foe en’, efoe a de now ini hemel ofoe na grontapoe e aksi bribi ini na waarde foe en ferloesoe ofrandi.

6. San Gado ben doe di wi ben de sondari ete di no ben lobi en?

⁶ Wi ben de sondari ete di no ben lobi Gado, di „a ben lobi wi èn ben seni en Manpikin leki zoenofrandi foe wi sondoe”. Na srakti-ofrandi foe Kristus ben opo na pasi gi wi baka foe kon na ini wan boen matifasi nanga Gado (Romeini 3:24, 25; Hebrewsma 2:17). Joe abi warderi gi na moro bigi sori disi foe noverdini lobi foe na sé foe wi hemel Tata?

7. (a) Fa wi kan sori, foedi wi no kan taki dati wi lobi Gado foedi wi no ben si en, dati wi lobi en troetroe? (b) Na sori foe bradalobi foe wi de wan bewijsi foe san?

⁷ A lobi foe Gado gi wi moe abi krakti na tapoe wi fasi di wi abi nanga tra sma. (1 Johannes 4:11-13.) Foedi a ben lobi wi aladi wi ben de sondari ete, „meki wi de ooktoe ferplekti foe lobi makandra”. Nowan sma a mindri den libisma ben „si Gado oiti”. Wi no kan taki soboen dati wi lobi Jehovah foedi wi ben si en (Exodus 33:20; Johannes 1:18; 4:24). Te wi e sori lobi dan wi e sori dati wi e lobi na fonten foe na égifasi disi. Na brada lobi foe wi e bewijsi dati „Gado e tan na ini wi èn . . . en lobi e tjari kon de volmaakti na ini wi” ofoe e kon de foe si krinkrin na ini wi. Èn wi sabi „dati wi e tan na ini wanfasi” [nanga Jehovah] „foedi a ben prati foe en jeje gi wi”. Dati wi e sori brada lobi, de wan bewijsi dati Jehovah jeje e wroko na ini wi bika lobi de wan foe den froktoe foe a jeje dati (Galacia 5:22, 23). Foe disi e kon a krin dati wi sabi Gado èn abi en boenati.

8. Nanga sortoe sani moro a bewijsi e gi dati wi „de ini wanfasi nanga Gado”?

⁸ Moro bewijsi de ete „dati wi de ini wanfasi nanga Gado”. (Lési 1 Johannes 4:14-16.) Foedi Johannes „si” san Jezus ben doe na grontapoe èn fa a ben njan pina foe libisma ede, meki ’a ben kan gi kotoigi dati a Tata ben seni en Manpikin kon leki Ferloesoeman foe a grontapoe’ foe na sondoe libisma famiri (Johannes 4:42; 12:47). Boiti foe dati, ’Gado e tan na ini wanfasi nanga wi èn wi nanga en’ efoe wi e taki ini a dipi foe wi ati dati Jezus Kristus de en Manpikin. Disi wani taki dati wi moesoe sori bribi èn na fesi foe sma moe kotoigi dati Jezus de na Manpikin foe Gado (Johannes 3:36; Romeini 10:10). Na fertrow foe wi na ini „na lobi di Gado abi gi wi” de ete wan bewijsi dati wi, efoe wi de now foe na salfoe fikapisi ofoe foe den „tra skapoe”, de ini wanfasi nanga Jehovah.

9. (a) Na ini sortoe fasi na lobi foe Gado „kan tjari kon de volmaakti”, èn fa disi sa abi krakti na tapoe na fasi fa wi de nanga trawan? (b) Volmaakti lobi e meki sortoe sani kon na fesi?

⁹ Dan Johannes e sori dati lobi kan „tjari kon de volmaakti”. (Lési 1 Johannes 4:16b, 17.) Den e tjari kon na wi memre dati ’Gado na lobi’. Foedi wi ’e tan na ini a lobi’ foedi wi e sori na froktoe disi foe Jehovah jeje, ’meki wi e tan na ini wanfasi nanga Gado’. Efoe na lobi foe Jehovah „tjari kon de volmaakti ini wi”, sori krinkrin gi en, dan wi sa lobi kompe-bribiman. (Teki gersi nanga vers 12.) „Volmaakti” e meki ooktoe „fri foe taki sondro frede” go a fesi te wi drai go na Gado ini begi, now èn „tapoe na kroetoedé” na ini a ten foe Kristus denoja. A sma di e sori sowan sortoe lobi no sa abi wan réde foe frede dati na kroetoe foe Gado sa de wan takroe wan. Te wi loekoe en foe na sé foe na sori foe lobi, dan wi „de ooktoe ini na grontapoe soleki en [Jezus]”. Ija, wi de soleki en, na ini a fasi dati wi abi na boenati foe Gado leki pikin foe Gado na ini na grontapoe disi di de vreemd foe Gado.

10. Wan sma ini soema lobi kon de „volmaakti” no e kisi skotoe ini san?

¹⁰ Den sma na ini soema na lobi tjari kon „volmaakti”, no e kisi hendri ini den begi foe frede ede. (Lési 1 Johannes 4:18, 19.) „Frede e poti wan skotoe” di ben sa kan tapoe oenoe foe go na Jehovah sondro sjensjen. Efoe wi e firi soboen sowan frede dan „wi no ben tjari kon volmaakti na ini na lobi”. Ma efoe „wi tjari kon de volmaakti na ini na lobi”, dan na égifasi disi e foeroe wi ati, e poesoe wi foe doe a wani foe Gado èn e tjari wi go sofara foe tan krosbé ini begi na wi hemel Tata. Wi abi séker réde foe lobi Jehovah èn foe begi na en, bika, soleki Johannes e taki, ’wi ben lobi tra sma foedi Gado ben lobi wi fosi’.

11. Foe san-ede a de redelek foe gi jesi na a gebod „dati a sma di lobi Gado, moe lobi ooktoe en brada”?

¹¹ A no nofo foe taki nomo dati wi lobi Gado. (Lési 1 Johannes 4:20, 21.) Wan sma di e taki: „Mi lobi Gado” èn tokoe abi ogri-ati gi en jeje brada ’de wan léman’. Foedi wi kan si wi brada èn kan si den égifasi foe Gado na en, dan a ben sa de moro makriki foe sori lobi gi en leki foe lobi wan Gado di joe no kan si. Ija, „a sma di no lobi en brada, di a ben si no kan lobi Gado di a no ben si”. A de soboen redelek foe gi jesi na a „gebod” dati „a sma di lobi Gado, moe lobi ooktoe en brada”.

Soema e wini a grontapoe?

12. Sortoe tra lobi sma kan ferwakti foe wi, foedi wi lobi Gado?

¹² Dan Johannes e tjari kon na krin san a lobi foe Gado wani taki troetroe. (Lési 1 Johannes 5:1-5.) Fosi na apostel e sori na tapoe dati „ala sma di e bribi dati Jezus de na Kristus [na Messias ofoe Jehovah salfoewan]”, „gebore foe Gado”, ofoe Jehovah ben wiki en tron wan jeje Manpikin. Boiti foe dati ala sma di lobi a Sma di wiki en, Jehovah, e lobi ala tra sma di „gebore foe a sma dati”. Ija, ala den salfoe pikin foe Gado lobi en èn den e ferwakti foe den dati den lobi makandra. Na brada lobi dati de ooktoe wan marki gi na „bigi ipi” foe „tra skapoe” di abi wan grontapoe howpoe. — Johannes 10:16; Openbaring 7:9.

13. (a) Foe san-ede den gebod foe Gado no de wan „lai di e druk” wi? (b) Fa ’wi e wini a grontapoe’?

¹³ ’Wi sabi dati wi lobi den pikin foe Gado, te wi lobi Gado èn e hori en gebod.’ Ija, ’Na lobi gi Gado wani taki dati wi e hori en gebod’. Foedi wi lobi Gado èn retidoe, meki wi wani hori en gebod sote. Johannes e taki dati den no de „wan hebi lai” gi wi, „bika ala sani san gebore foe Gado, e wini a grontapoe”. „Ala sani” kan abi foe doe nanga na krakti di Gado gi foe „wini a grontapoe” ofoe f oe wini na onregtvaardiki libisma maatschappij nanga den jepi sani foe en foe kori wi foe pasa Jehovah gebod (Johannes 16:33). „Na wini di ben wini na grontapoe”, de „wi bribi” ini Gado, ini en Wortoe èn ini en Manpikin. Efoe wi abi „bribi dati Jezus de a Manpikin foe Gado”, dan ’wi e wini a grontapoe’ foedi wi e trowe en fowtoe denki nanga hoeroedoewroko a wansé èn e hori den gebod foe Gado.

14. (a) Fa Jezus ben kon „nanga jepi foe watra”? (b) Fa „nanga broedoe” a bewijsi ben gi dati Kristus de a Manpikin foe Gado? (c) Fa na santa jeje ben gi kotoigi foe Jezus Kristus?

¹⁴ Foedi bribi na ini Jezus de so prenspari gi na ’wini tapoe a grontapoe’, meki Johannes e kari wantoe bewijsi di gi foe Kristus nanga jepi foe „dri di e gi kotoigi”. (Lési 1 Johannes 5:6-8.) Fosi Johannes ben taki dati „Jezus ben kon nanga jepi foe watra”. Di Jezus ben kisi dopoe na ini watra foe sori dati a ben pristeri ensrefi na Gado, Jehovah ben ferklari: „Disi na mi Manpikin, na lobiwan di mi ben feni boen” (Mattéus 3:17). Dati Kristus ben de a Manpikin foe Gado, ben de foe si ooktoe „nanga na broedoe” di a ben meki lon leki ferloesoe-prijs na a ten foe en dede (1 Timotéus 2:5, 6). Boiti foe dati, na so Johannes e taki, a de na „[santa] . . . jeje di e kotoigi, bika a jeje de na waarheid”. Dati a jeje ben saka kon sidon na a ten foe Jezus dopoe, e bewijsi dati a ben de a Manpikin foe Gado (Mattéus 3:16; Johannes 1:29-34). Jehovah jeje ben gi Jezus na okasi foe doe a wroko di a ben kisi èn foe doe krakti wroko (Johannes 10:37, 38; Tori foe den Apostel 10:38). Nanga jepi foe na geest Gado ben meki wan ongewoon doengroe nanga wan aardbeving ben kon èn a ben meki na tempelgarden priti di Jezus ben dede, èn moro fara Gado ben wiki en nanga jepi foe na srefi jeje komoto foe dede. — Mattéus 27:45-54.

15. San de den ’dri di e gi kotoigi’?

¹⁵ Joe abi soboen „dri di e gi kotoigi” dati Jezus de na Manpikin foe Gado. Den disi de (1) na santa jeje (2) na watra foe Jezus dopoe èn san dati wani taki (dati a ben pristeri ensrefi na Jehovah) èn (3) na broedoe di a ben meki lon na a ten foe en dede leki wan loesoeprijs. Den dri disi „e akroederi nanga makandra” ini na kotoigi foe den dati Jezus de na Manpikin foe Gado, na ini soema wi moe bribi opregti foe kan kisi tégo libi. — Teki gersi Deuteronomium 19:15.

Na kotoigi di Gado gi

16. Fa Jehovah ben gi kotoigi foe Jezus?

¹⁶ Gado srefi ben gi kotoigi foe en Manpikin. (Lési 1 Johannes 5:9-12.) ’Efoe wi e teki na kotoigi di onvolmaakti sma e gi [leki na waarheid] [soleki wi e doe gewoonlek na ini wi takmakandra ofoe na fesi kroetoe], dan na kotoigi di Gado e gi moro bigi’ (Johannes 8:17, 18). Foedi ’Gado no kan lé’, meki sondro wan kondisi wi kan fertrow tapoe a kotoigi foe en Manpikin. Jehovah ben taki Jezus Kristus de en Manpikin (Titus 1:2; Mattéus 3:17; 17:5). Boiti foe dati, Gado ben de na sma baka den dri di e gi kotoigi, dati wani taki en santa jeje, na watra foe na dopoe foe Jezus nanga a broedoe foe Kristus di ben lon.

17. San de na wan enkri fasi fa ferloesoe de mogelek?

¹⁷ „Na sma di e poti en bribi na ini na Manpikin foe Gado, abi na kotoigi di ben gi ini en geval”, dati wani taki „na ini ensrefi”, foedi ala na bewijsi materiaal de overtoigi en dati Jesus de Gado Manpikin. Ma „a sma di no e poti bribi na ini Gado” leki wan betrowbaar kotoigi foe en Manpikin, e meki a gersi leki Jehovah de wan léman. A no de foe taki dati na heri kotoigi di e gi e kon tapoe disi „dati Gado ben gi wi tégo libi, èn a libi disi de ini en Manpikin”. Soso nanga jepi foe bribi na ini Jezus leki a Manpikin foe Gado e meki ferloesoe foe kisi tégo libi kan (Johannes 11:25, 26; 14:6; 17:1-3). Soboen „a sma di abi na Manpikin” foedi a e bribi na en, abi na no-verdini presenti foe tégo libi (Johannes 20:31). Ma a sma di no e poti bribi na ini Jesus leki na Manpikin foe Gado no sa tesi „na libi disi”.

Begi e jepi!

18. Foe san-ede Johannes ben skrifi den sani disi?

¹⁸ Dan Johannes e tjari na marki kon na krin di didon leki na fundamenti foe en bribi, èn a e taki foe na begi. (Lési 1 Johannes 5:13-15.) A ben skrifi „den sani disi” sodati a ben sa kon de bekènti ’dati wi abi tégo libi’. Na overtoigi disi wi abi foedi wi e poti bribi na ini na „nen” foe na Manpikin foe Gado. (Teki gersi 1 Johannes 3:23.) Ala sma di fadon komoto na bribi, di no de foe wi sortoe, no kan pori na bribi dati. — 1 Johannes 2:10, 19.

19. (a) Sortoe „fertrow” na Gado wi abi soleki 1 Johannes 5:14, 15 e taki? (b) San de wantoe sani di nanga leti wi kan begi foe den?

¹⁹ Na fesi foe Gado wi abi na „vertrow” ofoe na „fri foe taki sondro frede” dati, awinsi san wi e aksi toe na ini begi „akroederi en wani, a e jere wi”. Nanga leti wi e begi foe den sortoe sani leki na kon santa foe Jehovah nen, en santa jeje, foe koni foe Gado èn foe fri komoto foe na makti foe na godelowsoewan (Mattéus 6:9, 13; Lukas 11:13; Jakobus 1:5-8). Èn „wi sabi dati wi sa abi den sani di wi ben aksi, foedi wi ben aksi den foe en” di de a „Jereman foe a begi”. — Psalm 65:2.

20, 21. (a) San de „wan sondoe di no e tjari dede kon? (b) Foe san-ede a de wan fowtoe sani foe begi na ini a tori foe „wan sondoe di e tjari dede kon nanga en”?

²⁰ Dan Johannes e taki foe a begi èn toe sortoe foe sondoe. (1 Johannes 5:16, 17.) „Wan sondoe di no e tjari dede kon nanga en” de wan sondoe di no doe foe espresi, èn a no ben sa de wan fowtoe sani foe begi foe kisi pardon gi na sma di ben psa a wèt ma di ben abi berow. (Tori foe den Apostel 2:36-38; 3:19; Jakobus 5:13-18). Ma a ben sa de wan fowtoe sani foe begi ini a tori foe „wan sondoe di e tjari dede kon nanga en”, bikasi disi de wan espresi sondoe tége na santa jeje, èn kisi pardon foe dati de wan sani di no kan (Mattéus 12:22-32; Hebrewsma 6:4-6; 10:26-31). Den sortoe sondari disi e go na Gehenna èn e kisi na tégo pori na ini na „di foe toe dede” (Openbaring 21:8; Mattéus 22:15). Aladi Jehovah de na Kroetoeman te foe kaba, meki wi no e teki soboen na risico foe meki en ati kon bron foedi wi e begi gi wan sondari te a e kon krin na fesi dati a ben gi ensrefi abra na wan espresi „sondoe di e tjari dede kon nanga en”.

²¹ Efoe foe dat’ede „wan sma [spesroetoe wan owroeman di kisi salfoe nanga jeje] e kisi na ini ai dati en brada doe wan sondoe di no e tjari dede kon nanga en [na „di foe toe dede”], dan a sa aksi, èn [Gado] sa gi e en [na sondari] libi”, èn ferloesoe en nanga dati foe na tégo pori. A no de foe taki dati „ala onregtvaardikifasi na sondoe”, ofoe wan misi foe na marki ini sofara a ben de den regtvaar diki markitiki foe Gado. „Tokoe wan sondoe de di no tjari a dede kon nanga en”, foedi disi de wan bakapisi foe onvolmaaktifasi foedi wi abi berow èn foedi na srakti-ofrandi foe Kristus e figi na sondoe poeroe.

Edeprakseri foe na brifi foe Johannes

22. Soema no man foe kisi wan loyaal kristen na „ini en makti”, èn foe sortoe sani sowan sma kan begi foe en na ini fertrow?

²² Now Johannes e loekoe sjatoe baka den fundamenti punt foe en bribi. (Lési 1 Johannes 5:18-21.) Ibriwan sma leki wan kristen di kisi santa jeje ’no e doe sondoe’. Jezus Kristus „a sma di gebore foe Gado” nanga jepi foe santa jeje „e hori ai tapoe en, èn na godelowsoewan, [Satan] no e kisi en na ini en makti”. Sowan loyaal èn salfoe kristen kan begi nanga foeroe fertrow foe kisi ferloesoe foe na makti foe na godelowsoewan èn kan fri ensrefi nanga na „bigi skilt foe bribi” foe kisi jeje mankeri foe den „faja péri” foe Satan. — Mattéus 6:13; Efese 6:16.

23. Fa ’na heri grontapoe de na ini a makti foe na godelowsoewan?

²³ Foedi salfoe kristen abi den bewijsi dati den de jeje manpikin foe Jehovah, meki den kan taki: „Wi sabi dati wi komoto foe Gado.” Foedi den e poti bribi na ini Jezus Kristus èn no e doe sondoe, e bewijsi dati den de pikin foe Gado di Satan no ben kan kisi na ini en ’makti’. „Ma na a heri grontapoe [na onregtvaardiki libisma-maatschappij] didon na ini na makti foe na godelowsoewan”, Satan a Didibri (Efese 2:1, 2; Openbaring 12:9). Na grontapoe e broko kindi gi Satan godelowsoe krakti èn no e doe moeiti foe fri ensrefi foe dati foe doe a wani foe Gado.

24. Jezus ben gi wi „na ferstan” foe doe san?

²⁴ Bepaalde falsi leriman e taki dati Kristus no ben kon na ini skin (2 Johannes 7). Ma a bewijsi materiaal di gi na ini a brifi disi e meki Johannes taki: „Wi sabi dati a Manpikin foe Gado ben kon” (1 Johannes 1:1-4; 5:5-8). Boiti foe dati, Jezus ben gi oenoe „na ferstan” ofoe na „si di na ferstan kan si sani”, foe „kisi na sabi foe na troe wan”, wan progressief ferstan foe Gado (Mattéus 11:27). Foe dat’ede „wi de ini wanfasi nanga na troewan [Jehovah Gado], nanga jepi foe en Manpikin, Jezus Kristus”. — Teki gersi nanga 17:20, 21.

25. Fa wi kan poti leki kristen na rai foe 1 Johannes 5:21 ini wi libi?

²⁵ Den sma di de ini wanfasi nanga na troe Gado, Jehovah, efoe den de now foe na salfoe fikapisi ofoe „den tra skapoe”, wani plisi en ini ala fasi. Na net soleki tesi ben de ini na fosi jarhondro foe gi ensrefi abra na a dini foe kroektoe Gado, na so dati de ooktoe na ini a ten disi. Foe dat’ede Johannes e tapoe en brifi na wan fasi di fiti nanga na rai di de leki foe wan papa: „Oen pikin, oen wakti oensrefi gi den kroekoe gado.” Leki kristensma wi no e boigi wisrefi gi popki (Exodus 20:4-6). Wi sabi ooktoe dati a ben sa de fowtoe foe gi wisrefi, prisiri ofoe wan tra sani na resi di Gado moe kisi (2 Timotéus 3:1, 2, 4). Èn dati wi ben gi wi libi abra na en, e poti kaba na dorosé dati wi e anbegi na politiek „wèrdri meti” èn en „popki” (Openbaring 13:14-18; 14:9-12). Meki soboen, nanga na winsi na wi fesi foe plisi wi hemel Tata èn foe kisi foe en na presenti foe tégo libi, tanapoe faste sondro foe seki na ini wi bosroiti foe tan farawe foe ala anbegi foe kroektoe gado èn no meki noiti na diri matifasi di wi de nanga Jehovah nanga jepi foe Jezus Kristus kon pori.

Jepi gi wi di e tan

26. San de wantoe aparti punt na ini wán Johannes?

²⁶ Na fosi brifi foe Johannes di skrifi ondro krakti foe santa jeje ben jepi den fosten kristen foe hori densrefi farawe foe anbegi foe kroektoe gado. A brifi foe en ben jepi den foe poti den lé foe sma di fadon komoto foe na bribi a wan sé, èn na ini a ten disi wi kan gebroiki a brifi foe en foe asrefi marki dati. A brifi, foe eksempre e bewijsi dati Jezus Kristus ben libi leki wan libisma èn ben dede leki wan „zoenofrandi” gi sondoe. Na brifi e meki oen kon sabi „na antikrist” èn e meki wan difrenti a mindri den pikin foe Gado èn di foe Didibri. A e sori fa wi kan tesi „Wortoe di komoto foe wan jeje” foe si efoe den komoto foe Jehovah. Boiti foe dati, den wortoe foe Johannes e overtoigi wi dati ’Gado na lobi’, dati wan troe bribi e wini a grontapoe èn dati Jehovah e jere den begi foe en loyaal kotoigi.

27. Na ini sortoe fasi na fosi brifi foe Johannes di Gado ben meki skrifi nanga en santa jeje kan jepi wi?

²⁷ Fa a de foe dat’ede wan koni sani nanga ini prakseri den kori foe a grontapoe foe denki na warskow foe Johannes dati wi no moe lobi na grontapoe! Efoe persoonlek difrenti ini denki ben sa meki na matifasi a mindri wi nanga bepaalde kompe-bribiman kon span, dan den wortoe foe na apostel kan memre wi dati wi kan sori foe lobi Gado foedi wi e sori brada lobi. Nanga na jepi foe Gado èn foedi wi e poti na rai foe Johannes na ini wi libi, meki wi kan sorgoe foe no doe sondoe èn wi kan hori tranga na a bribi di wi e wini na grontapoe. Meki wi sori foe dat’ede na tangi foe wi gi na brifi disi di skrifi na ondro santa jeje foedi wi e tan waka na ini a leti di Gado e gi wi, e go doro foe libi leki pikin foe Gado èn e sori alaten lobi nanga bribi meki wi hemel Tata, Jehovah kisi bigi nen.

San joe ben sa piki?

◻ Efoe wi e lobi Jehovah, fa disi moe abi krakti tapoe a matifasi foe wi nanga kompe-bribiman?

◻ Fa wi kan wini na grontapoe?

◻ San na den „dri di e gi kotoigi” foe a Manpikin foe Gado?

◻ Sortoe „vertrow” wi kan abi ini na tori foe begi?

◻ Na sortoe fasi wán Johannes kan jepi wi?

[Prenspari pisi na tapoe bladzijde 11]

Foedi Jehovah ben lobi wi aladi wi ben de sondari ete, meki wi de ferplekti foe lobi makandra

[Prenki na tapoe bladzijde 13]

Na santa jeje, na watra foe Jezus dopoe, en broedoe di lon, èn Jehovah srefi ben gi kotoigi dati Jezus Kristus de Gado Manpikin